Bar-le-Duc, AD de la Meuse, 14 H 71, n° 3

<< < / > >>

NuméroChLor39

GenreCharte

Date1176

Lieu non identifié

DiocèseChalon-sur-Saône

Supportparchemin

Fiabilité de l'actenon suspecté

Sceau

Etat de la traditionoriginal

Hauteur à gauche381   mm

Hauteur à droite375   mm

Largeur en haut302   mm

Largeur en bas256   mm

AuteurPierre de Brixey, évêque  de  Toul

BénéficiaireAbbaye  de  Cîteaux

Regeste

l'évêque de Toul confirme la donation de la grange de Clairlieu (lieu-dit Villers-lès-Nancy; Meurthe-et-Moselle, Nancy, Laxou) faite aux religieux de Cîteaux par le duc de Lorraine Mathieu I pour leur établissement à Clairlieu, et celle de terres à Benevise (sur le territoire actuel de Germiny; Meurthe-et-Moselle, Toul, Colombey-les-Belles) faite par Gérard, comte de Vaudémont (pseudo-original)

Texte

l. 1 IN NOMINE PATRIS ET FILII ET SPIRITUS SANCTI. Petrus, Dei gratia Leucorum episcopus, universis fidelibus in Domino IN PERPETUUM. Semper quidem rationis ordo poscebat ut super muros

l. 2 Jherusalem constituti custodes pro [monogramme] ecclesiarum defensione, seipsos murum malignantibus opponerent, nunc autem major necessitas instat et urget ut speculatores domus Isra l patrimonium

l. 3 crucifixi, prebendam videlicet pauperum Christi, tota auctoritate defendere studeant atque tueri quoniam dies mali sunt. Nunc igitur omnis generatio rectorum memoriter teneat quod de collegio sanctorum horum qui monastice

l. 4 discipline rigorem, in antiquum florem revocarunt, venerunt viri virtutis, qui pro Christo sua omnia seque dedentes, sacrum Cisterciensem ordinem in suo sanguine plantaverunt suoque sudore plantatum rigare

l. 5 non cessarunt, quem nos cernimus tantis benedictionibus multiplicatum, ut ipsum Patri spirituum, spirituales fructus indesinenter offerre credamus. Hujus ordinis sacri religiosi fratres, auctoritate sanctorum Patrum missi, velut examen sanctarum

l. 6 apum, mellificandi gratia venerunt, mansionem conversationi sue congruam nostris in partibus avidius perquirentes, qui fortassis, ut fidei sue constantia probaretur, terram sterilem et arentem sortientes, in valle subtus

l. 7 Chaleini domunculam edificare ceperunt, quam Ferrariam nuncupantes, duram nimis et infructuosam, in circummanentium cordibus ferreis invenerunt, proinde loci quidem sterilitatem, sed magis turbe tumultuantis

l. 8 inquietationes devitantes, recedere paraverunt ad vastioris heremi solitudines, secundum suum desiderium ac propositum suspirantes, quos princeps nobilis Lothoringie dux et marchio Matheus, cum summa devotione

l. 9 suscipiens, in allodio suo, in valle scilicet satis horrida et spinosa, in Heys eos benignissime collocavit, misericordia motus super eos, eo quod essent pauperes spiritu qui in locis sylvestribus exulare delegissent, ut per hoc

l. 10 efficerentur in fine, sine fine cives sanctorum et domestici Dei. Igitur servi Dei locum tunc horroris et vaste solitudinis, cum gratiarum actione suscipientes, humanis usibus idoneum et habitabilem in brevi reddiderunt, quoniam

l. 11 spinis et vepribus extirpatis, secundum sui ordinis instituta, religiosas officinas erexerunt, totis viribus tendentes ad hoc, quatenus ubi prius fremitus et ululatus ferarum frequenter sonabat in auribus hominum, ibi dein-

l. 12-ceps in psalmis, hymnis et canticis spiritualibus crebrius resonaret melodia celestis in auribus angelorum. Taliter in honorem et gloriam gloriose virginis Marie constructa est ibi Cisterciensis ordinis abbatia,

l. 13 que prefato duce dictante, congruum sortita nomen, Claruslocus vocatur usque in hodiernum diem, in quo Claroloco claruit virtus voluntarie paupertatis, quia quamvis pauperibus his, dux devotus, et pro agricultura terras et pasturas

l. 14 animalium et cetera usuaria, prout sibi tunc placuit, contulisset, duro tamen ac diuturno martyrio fuerunt vehementer afflicti, tam victus quam vestimentorum penuria laborantes. Pius vero princeps jamdictus, cum huic monasterio multa

l. 15 bona contulisset vivus, contulit tandem seipsum, ut ibidem sepeliretur defunctus, sed et vicini circummanentes, suas similiter eleemosynas paulatim offerre ceperunt, predicto duce nobili taliter inchoante. Est autem

l. 16 grangia Clariloci que vocatur Forest, in cujus confinio dedit comes Gerardus Wademontis et uxor illius ac filii, quidquid pertinebat ad eos et quidquid homines sui dare vel vendere voluerint eisdem fratribus, amodo et in reliquum. Testes:

l. 17 Walterus de Spinal, Ebalus et Warnerus fratres ejus, Ludovicus de Synterey, Fridericus de Sancto Firmino et Albertus et Cono frater ejus, Garsirius de Betteneis et Bartholomeus frater ejus. Boimundus de Seroucort et Ebalus frater ejus dederunt eisdem fratribus

l. 18 terras illas que de beneficio ducis descendant et Benevise vocantur. Testes: comes Girardus, Wirricus de Purs, Theodoricus de Forcellis. Dederunt sub eisdem testibus et pasturas quorumlibet animalium. Drogo presbyter de Forcellis et Hugo

l. 19 filius ejus et Theodoricus archidiaconus eorum et Albertus et Cono frater ejus, contulerunt ecclesie Clariloci omnem decimationem predicte grangie, que pertinet ad illos, in acquisitis et acquirendis infra terminos hos, sicut chiminus vadit de Tontunvilla

l. 20 et vergit deorsum usque ad stagnum, sub censu duorum solidorum Tullensium qui in festo sancti Gorgonii seu infra octavas ejusdem persolvendi sunt super altare ecclesie de Forcellis. Testes: Girardus presbiter de Synterey, Remigius presbiter de Hodervilla,

l. 21 Hugo presbyter de Vulterei. Hugo presbyter de Seroucort et Albricus frater ejus et Nicolaus nepos eorum, et Theodoricus archidiaconus eorum, contulerunt eidem ecclesie omnem decimationem, sicut chiminus vadit de Seroucort versus Tuntunvillam et inde

l. 22 sicut cadit in Breyenvallem et tenditur usque ad parochiatum Sancti Firmini, sub censu duodecim denariorum Tullensium qui in nativitate sancte Marie seu infra octavas persolvendi sunt super altare de Seroucort. Testes: Willelmus clericus de

l. 23 Sancto Firmino, Cono villicus, et Willelmus de Seroucort. Constantius et Ulricus de Ferreriis cum heredibus suis dederunt eidem ecclesie quicquid habebant infra divisam grangie de Haignorvilla. Testes: Johannes prepositus, Girardus, Cono, Hugo,

l. 24 villici de Roseriis. Theodericus de Roseriis et uxor ejus ac filii Albertus et Walterus dederunt eidem ecclesie omnem decimationem de Ancengiis infra divisam predictam, consensu Gileberti a quo decimatio feodali jure descendit,

l. 25 sub censu quatuor denariorum Tullensium in festo Petri et Pauli persolvendorum. Testes: Otto de Domalivera, Ulricus et Sirardus et Matheus nepos ejusdem Theoderici. Theodericus de Roseriis cum Alberto filio suo dedit super altare Clariloci

l. 26 pasturas quorumlibet animalium in Blahaires. Testes: Devid prior de Romont, Rufinus et Bertrannus milites. Abbas Sancti Salvatoris in capitulo suo et Ludovicus presbiter de Loucort et Theodericus archidiaconus contulerunt eidem

l. 27 ecclesie omnem decimationem grangie sue de Bellodono sub censu sex denariorum Tullensium qui in festo sancti Gorgonii vel infra octavas persolvendi sunt super altare de Loucort. Testes: Overardus, Richardus, Hugo, Wiardus.

l. 28 Dux vero Matheus abbatiam suam Clariloci quo in vita sua dilexerat, in morte quoque diligere non omisit, nam legittimum statuens testamentum dedit fratribus predictus domus vineam suam de Nancei, non solum sicut erat

l. 29 tunc, sed in quantum eam dilatare voluerint ipsi fratres. Dedit et brolium suum sub Chantehui molendinumque super Maldonum, et concessit illis ut extyrpent in Heys et agriculturam suam undique quantam voluerint

l. 30 extendant. Dedit et ligna ad marrimandum et ad ignes, pastiones porcorum, pasturas animalium et cetera usuaria in omnibus alodiis suis et feodis. Quo facto valefecit seculo et sollicitudinibus ejus et obiit et abiit

l. 31 viam universe carnis, quem nos cum luctu et lamentatione totius terre II idus maii sepelivimus ibi in nomine Domini. Accesserunt autem filii ejus Theodericus Metensis electus et primogenitus ejus, dux Symon, Fridericus et Matheus, et ducissa Berta,

l. 32 mater eorum, et Adelidis soror eorum, et Robertus patruus eorum, hi omnes omnem ducis donationem in manus nostras lacrimabili devotione contulerunt confirmandam. Testes: Petrus Gorziensis abbas, Petrus abbas Belliprati, Willelmus

l. 33 abbas de Mirewalde, Fridericus decanus Tullensis, Odo archidiaconus, Albricus archidiaconus, Folmarus archidiaconus, Theodericus de Romont, Ulricus de Novovillari, Drogo de Nancei, Symon de Perreya, Constantinus de Fonteneto. Nos igitur

l. 34 pii principis elemosinam in Claroloco confirmantes, irrefragabiliter constituimus ut nulli homines liceat ibi infra ambitum dedicati cimiterii nec infra clausuram abbatie vel grangiarum ejus hominem capere, spoliare,

l. 35 verberare vel occidere nec quicquam de substantia domus furtim vel violenter auferre, sed omnia perpetua libertate sicut anima ecclesiastica conserventur illesa. Si quis autem hoc nostre confirmationis decretum temerare presumpserir, ipsum a

l. 36 sacratissimo corpore et sanguine Domini nostri Jhesu Christi et a sancte matris ecclesie membris segregamus et excommunicamus, et sicut extinguitur lucerna de manibus nostris, projecta sic in die judicii lucerna ejus cadat extincta

l. 37 ne possit videre gloriam Dei, sed cum reprobis iciatur in tenebras exteriores, si digne non emendaverit quod deliquit. Fiat. Fiat. Amen. Actum legitime, publice recitatum, canonice confirmatum.

l. 38 Datum per manus Theodorici, Tullensis archidiaconi et cancellarii, indictione VIII, incarnationis dominice anno millesimo C LXX VI . Actum feliciter in nomine Domini. Amen.

Bibliographie

CALMET Augustin (Dom, Histoire ecclésiastique et civile de Lorraine, 1ère édition, tome 2 de 3, Nancy, 1728. - Edition complète du document aux pages Pr. 371-373.

Responsable

Non relu

Comment citer cette notice

Acte n°39 dans Chartes originales conservées en France (1121-1220) , Christelle BALOUZAT-LOUBET, Jean-Baptiste RENAULT, éds., Nancy : Centre de Médiévistique Jean Schneider; éds électronique : Orléans : Institut de Recherche et d'Histoire des Textes, 2013. (Telma). En abrégé, citer : « ChLor n°39»[En ligne] http://www.cn-telma.fr/originaux2/charte267594/. Date de mise à jour : 08/11/13.