Manassès, archevêque de Reims, concède à l'abbaye Saint-Remi de Reims l'autel d'Isles-sur-Suippes, sine persona.

l.1 Si sacerdotalis pondus officii quanti sit ȩstimemus, et quid in se gerat exequi sollicita mente satagamus, tales nos subditis nobis contemperari
l.2 necesse est, ut non tantum pastores nominari quantum velimus operis exhibitione comprobari. Justis itaque petitionibus
l.3 aurem nos oportet prebere benivolam, quatinus et poscentibus debitum non subtrahatur solacium, et ȩcclesiis nobis commissis competens
l.4 videatur non deesse suffragium. Hoc igitur ego MANASSES, Remorum dictus archiepiscopus, pro modulo nostrȩ
l.5 parvitatis satagens adimplere, et ad capiendam perpetuȩ salutis hereditatem in monasterio beati REMIGII memoriam nostri
l.6 jugiter celebrari cupiens altare de Insula quod prefati monasterii fratres sub personali tuitione jamdiu tenuerant, ad nos autem post
l.7 decessum personȩ revocatum, eidem monasterio ad usus infirmorum contuli, et absque persona perpetualiter tenendum concessi. Et quia
l.8 hȩc nostra largitio aliqua potest temporis prolixitate ab hominum memoria deleri, testamentali eam pagina confirmavimus, et ne quorum-
l.9-libet improborum objurgatione imminui valeat, signis et probabilium personarum testimoniis cum nostrȩ auctoritatis imagine corroborari jussimus.
l.10 Signum Azenarii abbatis Sancti REMIGII. Signum Hugonis abbatis Altvilarensis cȩnobii. Signum Rodulfi abbatis Sancti Teoderici. Signum Richeri abbatis Sancti Basoli.
l.11 Signum Gervasii archidiaconi. Signum Manasse archidiaconi. Signum Rodulfi prepositi. Signum Gozfridi decani. Signum Richeri cantoris. Signum Elberti. Signum Odalrici.
l.12 Signum Odonis presbiterorum. Signum Fulconis Signum Richardi. Signum Odelrici diaconorum. Signum Isembardi. Signum Adȩ. Signum Bartholomei subdiaconorum.
l.13 Actum Remis, anno incarnati Verbi MCII, indictione X, regnante Philippo rege Francorum anno XXXVIIII,
l.14 archiepiscopatus autem DONNI MANASSE ANNO SEPTIMO.
l.15 Fulchradus cancellarius scripsit et subscripsit [sceau].

ROBERT (G.), Isles-sur-Suippes au Moyen-Age, in Revue de Champagne, n° 11, mai-juin 1910, p. 369-391, p. 377.

DEMOUY (Patrick), Actes des archevêques de Reims d'Arnoul à Renaud II, 997-1139, 3 vol., th. dact, Nancy, 1982, t. 2/1, p. 350-351, n° 129.