Main [II seigneur de Fougères] en confirmant la donation faite par son grand-père de l'église de Lupiniacum y ajoute le bourg et les terres dépendant de l'église.

l.1 Quisquis fidelium ardore succensus adimplendȩ praeceptionis evangelicȩ, qua cuncti divitias habentes misericorditer admonentur facere sibi de mamo-
l.2-na iniquitatis amicos, a quibus cum defecerint in ȩterna tabernacula recipiantur, omnium necessitatibus communicare studuerit indigentium, prȩcipueque
l.3 pauperum spiritu, quorum juxta veritatis vocem regnum dinoscitur esse cȩlorum, ut deficiens ab hujusmodi videlicet amicis in mansiones excipiatur ȩternas, noverit se
l.4 indubitanter non solum a sui receptione non esse frustrandum, sed etiam ab ipso bonorum omnium largitore, qui ei contulit unde sibi tales faceret amicos, se esse inter gloriosiores
l.5 beatitudinis aeternȩ praemia percepturum. Hac igitur ego in Dei nomine Maino consideratione permotus, cum non satis magnam michi cernerem suppetere facultatem qua
l.6 redimi possent quorum ponderibus prȩgravabar admissa, aliquid michi credidi fore emolumentum si saltem elemosynam parentum meorum, quam eos pro animabus suis fecis-
l.7-se non ignorabam, cum in manum meam dirivatȩ sint eorum gratia Dei possessiones, annuendo firmarem. Elemosynam itaque Mainonis avi mei, quam post ejus ab hac luce
l.8 decessum, Alfridus genitor meus, ut hujus beneficii particeps efficeretur, auctoritate sua firmavit, ego in linea jam tertia positus, non tantum annuens firmo,
l.9 verum etiam ut incrementum capiat ex propria portione procuro. Ille siquidem avus meus pro suorum expiatione delictorum, quandam ecclesiam suam in loco qui vocatur
l.10 Lupiniacus existentem destinavit perpetualiter in elemosinam, cum universis rebus ad eandem ecclesiam pertinentibus necnon et terram totam in circuitu ad altare attinentem,
l.11 excepto tantum burgo extra cymiterium posito, tribusque campis suo dominio reservatis. Ego autem in cujus nunc manu positus esse videtur honor paternus, omnibus
l.12 notum percognitumque fieri volo sanctȩ Dei ecclesiȩ fidelibus quoniam et quicquid ille de praedicto loco in elemosynam contulit, annuo, et quidquid inde sibi retinuit, ut animȩ
l.13 quoque meȩ propitietur Dei benignitas, in opus simile concedo, annuente Adelaide conjuge mea, et Heudone filio nostro. Locum igitur hunc Lupiniacum nomine
l.14 cum omnibus ad eum pertinentibus, scilicet ecclesia cum accidentibus suis et burgo, tam qui infra cymiterium quam qui extra positus est, cum omnibus consuetudinibus
l.15 suis, et tota in circuitu terra quȩ ad altare sive burgum pertinere videtur tam culta quam inculta, cum universis nichilominus suis consuetudinibus, pratis
l.16 etiam atque decursibus aquarum siqui nunc habentur, aut deinceps fieri possint, et concedens annuo et annuens concedo pro salute animȩ meȩ Sancto
l.17 MARTINO Majoris monasterii, ad usum videlicet monachorum ibidem omnipotenti Deo famulantium, quatenus eorum orationibus ego et avus geni-
l.18-torque meus, conjunx quoque mea et filius adjuti, patrocinante tanto confessore, omnium illorum qui elemosynis divinȩ majestati placuerunt, mereamur
l.19 adjungi consortio. Terminari autem hȩc terra videtur a parte orientali terra Guillelmi cognomento Trosserii, a parte vero australi terra
l.20 Judhalis filii quondam Fulberti, ab occidente terra vicariorum, Ansgerii videlicet atque Guillelmi, ab aquilone autem terra cujusdam militis mei
l.21 nomine Raganeti, quam et ipse divino animatus instinctu, recepto per manum domni ALBERTI tunc abbatis benefacto Majoris monasterii,
l.22 totam ex intego concedens prȩfato sancto, me quoque per precarium ejus annuente, quia eadem die qua et ego donum inde fecit eadem etiam carta con-
l.23-scribi donationem suam optinuit. Nobis enim, me scilicet atque uxore mea cum quibusdam militibus nostris quorum inferius nomina continentur, terram hujus
l.24 nostrȩ donationis girando lustrantibus eamque prȩdicto abbati et his qui cum eo erant assignantibus, contigit ut etiam ipse Raganetus, cum prȩsens
l.25 adesset, terram istam suam in dominium Sancti MARTINI transferens, memorato consignaret abbati. Siquis autem, quod absit, hujus elemosynȩ
l.26 donum calumnians, Sancti Martini monachos inquietare temptaverit, et pravȩ voluntatis effectum injustitiȩ convictus optinere non valeat, et comiti
l.27 qui pro tempore fuerit auri libram coactus exolvat. [colonne1] S. comitis Conani. S. comitis Heudonis. S. Mainonis de Filgeriis. S. Adelaidis uxoris Mainonis. S. Heudonis filii eorum. S. Mainonis filii Radulfi episcopi. S. Guillelmi fratris ejus. S. Bernuini. S. Urvodii. [colonne2] S. Tudualdi. S. Rivallonii de Dolo. S. Rodaldi vicarii. S. Nortmanni. S. Rodulfi. S. Hervei. S. Ingelbaldi. S. Agnetis comitissȩ. S. Adilȩ abbatissȩ. [colonne3] S. Ansgerii vicarii. S. Guillelmi fratris ejus. S. Judhalis. S. Guarnerii. S. Raganeti. S. Gualandi presbyteri. S. Alberti presbyteri. S. Herberti. S. Alberti Salientis. [colonne4] S. ALBERTI ABBATIS. S. Alberti monachi. S. Benedicti monachi. S. Hademari monachi.

MORICE (Dom P.H.), Mémoires pour servir de preuves à l'histoire ecclésiastique et civile de Bretagne, 2 vol., Paris, 1742-1744, t. 1, col. 410.

LA BORDERIE (Arthur de) et LA BIGNE DE VILLENEUVE (Paul de), Chartes du prieuré de la Sainte-Trinité de Fougères, dans Bulletin archéologique de l'association bretonne, 3 (1851), p. 178-201 et 236-250, p. 183-184, n° 1.