Alphonse VI le Vaillant, roi de Léon et de Castille, concède à l'abbaye de Cluny, un cens annuel de deux milles aureos.

l.1 [chrisme] IN NOMINE DEI OMNIPOTENTIS, PATRIS ET FILII ET SPIRITUS SANCTI, ADEFONSUS, DIVINA FAVENTE CLEMENTIA, HISPANIARUM REX. Convenit majestati regiȩ predecessorum regum
l.2 virtutes et bene acta imitari, per quod et apud Deum et apud homines inveniat gratiam, et in posteros amabilem nominis sui transmittat memoriam. Subiit itaque mihi regi
l.3 Adefonso in mentem quid egregium inter cȩtera egerat pater meus rex Fredelandus, pia recordatione semper commemorandus. Comperta namque coenobii Cluniacensis tam celebri,
l.4 tam probata, tam sancta religione, divino mox timore compunctus et amore, societatem fratrum Deo et sancto Petro ibidem militantium humiliter expetiit, devotius accepit,
l.5 fidelissime quoad vixit retinuit, non inaniter credens se participem fore in eorum spiritalibus, si de sua temporali habundantia indigentiȩ servorum Dei fuisset munificus.
l.6 Unde censum annualem mille videlicet aureos, quos vulgo mancales appellant, conventui Cluniacensi ad vestiarium proprie dedit, quem censum eodem modo per successores
l.7 suos prefato loco annuatim reddendum instituit et firmavit. Quia vero placuit omnipotentiȩ creatoris in regno Hesperidum roborare solium meum, ego Dei gratia
l.8 rex ADEFONSUS, sicut heres paternȩ dignitatis, ita quoque bonȩ successor voluntatis, pactum fraternȩ societatis cum meis Cluniacensibus inii, statui, firmavi;
l.9 censum quoque largitatis paternȩ duplicavi, duo milia mancales in censu annuali Cluniaco persolvens. Communinicato etiam cum uxore mea regina consilio, et primum
l.10 Toletano archiepiscopo et ceteris episcopi meis et primoribus regni mei, fidelibus meis volentibus, consentientibus, laudantibus, astipulantibus, constituo de prefato censu
l.11 duplicato Cluniacensibus meis fratribus karissimis regiȩ auctoritatis precȩptum, a me ipso quoad vixero firmissime tenendum, omnibusque succȩdentibus per secula ventura
l.12 in regno Hispaniȩ regibus perpetua lege servandum. Hanc autem constitutionem facio pro animȩ meȩ remedio, pro animabus patris mei et matris ac fratrum meorum,
l.13 pro uxore ac liberis meis, ut et vivis prosit ad promerendam eternalem vitam, et defunctis proficiat ad possidendam requiem sempiternam. Si quis vero suc-
l.14-cessorum meorum regum precȩpti hujus, quod absit, temerator existens aut violator, censum Cluniacensibus constitutum sive ex toto abnegare, sive minuere tempta-
l.15-verit, sicut ego fido in domino Deo, a sorte regni se noverit alienum, et judicio divino exheredandum, nisi velociter resipiscat, et abnegatas vel diminutas census
l.16 condigna satisfactione restituat pensiones. Ut autem inviolabile teneatur hoc meum precȩptum, hanc kartam fieri conscriptionis jussi, quam regia manu et auctoritate
l.17 subtus firmavi et corroboravi, atque firmandam ȩque principibus ac fidelibus meis consequenter mandavi. Impetravi etiam a Cluniacensi abbate, patre meo domno Hugone,
l.18 tunc temporis mecum in civitate Burgis commanente, ut omnibus superventuris abbatibus suis successoribus constituat precȩptum de commemoratione vel obsequio quod pro nobis, videlicet pro patre meo,
l.19 pro matre, pro fratribus meis, pro me, pro uxore mea regina et liberis, ipse domnus Hugo abbas apposuit et ordinavit, tam pro vivis quam pro defunctis semper agendum. Acta sunt Burgis in civitate.
l.20 Data apud Burgis civitatem, anno ab incarnatione Domini millesimo XCmo, indictione XIIIma, Pascȩ diebus.