IRHT

Ordonnances de l'hôtel du roi

> Ordonnance de l'Hôtel [ févr.1291 -Toussaint 1292 ]

< Ordonnance 3>

Paris, Centre historique des Archives nationales, 12814 f. 67 V. 69.Paris, Bibliothèque nationale, latin, Foliotation ancienne 55 V. -57.

C'est l'ordenance de l'ostel le roi

Ordonnance

    • 1.Dux, contes, barons ne prendront nuls gaiges en l'ostel le roy ne manteaus, et est le boutellier de France de ceste condicion, sauf ce que doivent prendre et avoir pour la raison de leur office.
    • 2.Item clers ne prendront ne gaiges ne manteaux ne ceus du Conseil ne autres, exceptez ceus qui sont es offices de l'ostel le roy, c'est : le clerc de la paneterie et prendra 6 d. par jour et 50 s. pour robe ; le clerc de l'eschençonnerie, 6 d. par jour et sa robe ; et les autres, clers de la cuisine et de l'avoine, prendront leur gaiges et leur robes aussi comme il aont acoustumé.
    • 3.Item les sergens desz mestres demourront en l'estat des gaiges et d'autres choses qui estoient devant.
    • 4.Item la Chambre aus deniers en l'estat devant, et est a savoir que mestre Jehan de Saint Just fera le paiement, mestre Jehan Clersens comptera aus mestiésa , et Martin Marcel recevra et compera et ne seront plus, fors mons. Oudart de Chembely quant il voudra aler et venir, il aura aussi comme il a accoustumé un list pour li et pour ses escuiers.
    • 5.Item les clers des même correctionb feront leur office en propre personne senz mestre autres pour euls par tout la ou le roy yra, et se il avenoit que aucun d'iceuls clers fust empeesché ou de maladie ou d'autre cause, le mestre de l'ostel y mectroit un des clers des autres mestres a deporter l'office tant qu'il revenist a faire l'office.
    • 6.Item les chapelains de la chapele, c'est assavoir le chevecier, mons. Gile de Condé, mons. Estienne de Chaalons, les clers de la chapele, c'est a savoir Thoumas de Bris, mons. Jehan de la Fontaine et Raoul de Maente et prendront leur gaiges aussi comme devant.
    • 7.Item nuls garçons ne mangeront a court, mes chascun sergent des mestres, c'est assavoir pennetier, eschançon, queu et autres qui aient garçons mengens a court, des mestres tant seulement, auront chascun 8 d. pour un seul garçon et se il est trouvé que nulz mestre doigne riens a son garçon, ne son garçon preigne riens en l'ombre de son mestre, que le mestre le saiche ne apperçoive, le mestre et le vallet perdront l'ostel le roy.
    • 8.Item les sommeliers ne prendront nuls gaiges mes il mangeront a court.
    • 9.Item les sergens d'armes prendront leur gaiges et feront aussi comme il aont acoustumé.
    • 10.Item nuls ne prendra cheval devers le roy pour son monter fors son restour tel comme il a accoustumé.
    • 11.Item les vallez le roy se monteront souffisaument et ceus qui ce ne feront il ne prendront riens chez le roy.
    • 12.Item l'aumosnier fera l'aumosne et l'ofice et aura deuz sergenz souz lui et li aidera Symon aussi comme devant.
    • 13.Item toutes chambres sont ostees devers le roy, fors les freres le les fils le royc jusques a tant qu'il aient terres, le mestre de l'ostel, la chambre aus deniers, les chapelains, les confesseurs, l'aumosnier et le seel : iceus y auront chambre.
    • 14.Item l'en ne fera livroison de vin ne de chandele ne devers le roy ne devers madame, fors aus chambres ci dessus nommeez, mons. Hue de Villers, mons. Raoul de Gocourt et Thibaut de Corbeul en la maniere qu'il ont accoustumé.
    • 15.Item l'en ne fera nule livroison devers le roy a saigné ne a malade fors tant seulement a ceus qui sont des mestiers ou proprement de l'ostel, c'est a savoir comme pannetiers, keuz, eschençon, clerc, chapelains.
    • 16.Item il aura tousjourz en l'ostel le roy 3 eschençons et 3 pannetiers.
    • 17.Item, nuls ne prendra riens en l'escuierie, se ce n'est pour le corps le roy, pour mons. Loys, son frere, mons. Ferrent et pour Loys de Clermont tant qu'il soient assenné, c'est assavoir selles, sengles, seursengles, houces, esperons, sommes, bahus, chapeaus de feutre, ne nule autre chose quel qu'elle soit.
    • 18.Item toutes les menues choses qui seront prisees pour le corps le roy, c'est a savoir guanz, coeffes, couteaus, laz et autres choses qui seront prises et admenistrees par une seule personne que le roy y establira.
    • 19.Item la chareste de la huche sera ostee et portera l'en en bariz et en sommaige le vin le roy.
    • 20.Item la chareste de la huche sera ostee et portera l'en en bariz et en sommaige le vin le roy.
    • 21.Item il est ordené que l'en gardera ceste ordenance et l'autre avecques et jureront touz les sergens des mestiers et les autres a qui il appartient a garder et a faire garder l'ordenance devant ceste ci faite et ceste aussi.
    • 22.Item les garçons aus vaillez de chambre et les garçons au gueites n'enterront ne ne passeront la premiere porte ne n'entreront en sale ne en chambre ne en garde robe tant comme premiers ne derreans mangeront ches le roy.
    • 23.Item Colin Fromaige mengera touz seulz a court et se il ae nule seurté, l'en mectra hors ou il aura gaiges si plait au roy.
    • 24.Item mestre Pierres de la Fourriere mangera tout seul a court.
    • 25.Item chascun chambellenc aura un escuier mangent a court et le vallet qui aidera a faire son lit.
    • 26.Item le clerc mons. de Chambly mangera a la court ou en la chambre ou ailleurs pour ce que l'en a aucune foiz a faire de lui ou lectres ou escriz ou autres choses.
    • 27.Item nuls ne desserve ne n'est riens de la table aus chambellens fors tant seulement l'aumosnier ou ceuz qui sont establiz a ce faire.
    • 28.Item quant l'en aura crié "au queux !", l'en baudra toutes chambres et garde robes en la maniere qu'il a esté commendé autre foiz, ne ne demourra nuls, fors ceus qui doivent demourer de leur droit.

Apparat critique

a Sic, pour mestres.

b Sic, pour mestres.

c Sic, pour roy.

d de ajouté.

e a ajouté.

Comment citer cette notice

Elisabeth   Lalou . " Ordonnance de l'Hôtel ( Paris, Centre historique des Archives nationales, 12814 f. 67 V. 69.Paris, Bibliothèque nationale, latin, Foliotation ancienne 55 V. -57. )", dans Ordonnances de l'hôtel du roi , Elisabeth   Lalou , Benjamin   Suc , éds, Orléans : Institut de Recherche et d'Histoire des Textes , 2006 . (Ædilis, Publications scientifiques, 5). [En ligne] http://www.cn-telma.fr/ordonnances/ordonnance 3 / .

Mentions légales | Colophon | Contacts | Haut de page