IRHT

> Actes

<Acte 83

Regeste

Règlement de la discorde entre Jean de Nesle et les demoiselles d’Eporve, Isabelle et Reinette, et le mari de Reinette, Odot d’Alise, à propos du moulin de Chamesson.

Acte

In nomine Domini, amen. An l’an de l’encarnacion nostre seignor m. dous cenz quatrevinz et dous, ou mois de jun lou grant. Nos Jehanz, sires de Naelles, chevaliers, d’une part, Ysebiaus et Roignote d’Esperves, demoiseles, et Odoz d’Alise, mariz a la dite Roignete, d’autre part, façons savoir a touz ces qui verront et orront ces presentes letres que, comme descorz fuist antre moy Jehan, seignor de Naelles, de une part, et les dites demoiselles d’autre, sur ceu que les dites damoiselles et Odoz disoient et affermoient ancontre moy que ge lor havoe fait tors et griés an mon molin de Chamesson, disanz que je havoie levée plus l’escluse que je ne devoe et fait une partie dou dit molin et la maison devant ou pastiz commun de la ville de Chamesson, et sor çou que ge havoie noié ou lor molin qui est an la rivere d’Esperve et i. lor autre molin amputié an la dite rivere [fol. 116] et sur ceu que par raison de la dite chaucie que je havoe trop levée je lor havoe fait grant domaige an lor prés et an lor terres gaaignaubles et que je aloe an lor forest d’Esperve et an portoie lor bois contre lor voluntez et an lor grevemant et que je paichoie an lor rivere d’Esperve aussimant contre lor voluntéz ; et an totes ces choses les dites damoiselles et Odoz que je les havoe grevéz, la quel chose je ne quenoissois pas, et je antandoie et demandoie usaige an la dite forest a la reparacion et l’usaige dou dit mon molin ; et an la dite rivere je disoie que je havoie la paicherie a touz angins ; aprés an lor molin lou desgrain por morre mon blef sanz moture, les quex dites choses les dites damoiselles et Odoz ne quenoisset pas et sur çou estoit li descorz. Cest diz descorz et touz ces griés, je et les dites damoiselles havons mis amiaublement sus noble home et saige mon seignor Guillaume de Chaacey, chevalier, seignor de Muxey, aut et bas a sa bone volunté et havons jurié sus saintes Evangiles corporelment a tenir et a garder a touz jors mais son dit, sanz aler ancontre par nos ne par autrui ; aprés je Jehan desus diz quenois an droit que li diz mes sires Guillaumes sus les choses desus dites dou consoil de prodomes hay dit et pronuncié son dit de ma volunté et de la volunté des dites damoiselles et de Odot et aussimant de sa bone volunté, que je ne puis riens demander ne reclamer [fol. 116v] ou dit bois ne an la paicherie de la dite rivere mas ques ansint comme mes sires Guillaumes ha mises les bones jusques a mon molin a ceu me demore quitement an ceu que les dit damoiselles, Odoz ne lor heoir, ne lor home, n'i poiet ne doiet poichier aprés desus les dites bones, je ne mi hoir ne povons ne devons poichier par nos ne par autrui se n'estoit par lou gré es dites damoiselles, ou de lor hors. Aprés je ne puis demander an lor molin lou desgrain ne mon blef moudre sanz moture. Aprés je ne mi hor deus or an avant ne povons lever la dite escluse ou greement des dites damoiselles ne de lor hors et por touz ces griés et ces domaiges que je lor havoie faiz, et por recouvrer et restoir et lor domaiges et lor pertes, il est escordé par la bone volunté mon seignour Guillaume que devoie es dites damoiselles et a lour hors an heritaige a touz jor mais de rante agnuel et perpetuel .IX. setere de bléf bon et leal et marcheant a la mesure de Chastoillon, c’est a savoir doues seteres de froment .III. seteres d’orge, doux setiers d’avoinne et doux setiers daugrin, lou quel blef je lor assetoy et assignoy sus tout mon gaagnaige de Colemex, lou quel je tain a presant et a paier lou dit blef, chascun an, a Colemex, an la graange ceu li blés dou dit gaaignaige sera mis landemain de l'octave de feste de Touz Sainz ; et se je ou mi hoir ne paiens lou dit blef si comme il est dit es dites damoiselles ou lor horz [fol. 117] je vuaul retrei que elles ou lor hor me puissient gaagier ou faire gaagier par queque justese qu’il vaudront sanz may arangnier ne sanz apeler an jugemant et je ne les ampuis acensever de riens par çou que elles tiennet lou dit blé de fié de moy ; aprés je cognois que li diz Guillaumes ha prononcié an son dit que li bley desus diz soit an escroissemant de mon fié d’Esporve par raison de ceu que auqunes parties des choses desus dites estoiet de mon fié ; et est a savoir que les dites damoiselles, Odoz ne lor hoir ne lor home ne poiet paichier antre la dite bone et lou dit molin ; et nos les dites damoiseles et Odoz cest dit aordenant et ceste composicion faite par lou devant dit monseignor Guillaume loons, volons et otroions et confermons et l’avons agré, et par ceu nos nos tenons por paié de nos dommaiges desus diz et totes ces choses desus dites ; et ordenons nos Jehanz, Ysebiaus, Raigniete et Odoz prometons par nos sairemanz donéz corporemant sus saintes evangilles aprés lou dit ordenemant garder et tenir a touz jorz mais sans corruption, et i obligons nos et nos hoirs presanz et a venir et renoncons an cest fait present a toute exception et a toutes barres, raisons et allegacions de fait et de droit, de canon et de loi, et a toutes deceptions, a totes costumes de toz pais et especiaument de Bergoigne, a toutes croiseries, a touz privileges donéz por femmes et a toutes les raisons que l'on porroit [fol. 117v] dire contre cestes letres ; e quant ces choses desus dites tenir garder nos tuit ansanble volons estre contraint par la cort mon seignor leu duc de Bergoigne comme de chose ajugié, a la juridicion dou quel nos submetons nos et nos hoirs. Ou tesmoignaige de la quel chose, nos havon prié et fait et metre an ces presentes letres leu seal de la dite cort ansanble lou seal de saige home mon seignor Jehan d’Argelle, arceprioure de Flavigné, et lou seal dou devant dit mon seigneur Guillaume de Chaace ; et nos Jehanz, arceprestres desus diz, par devant cui ces choses sunt ordenées, recogneues et otroiés des parties ; et nos Guillaumes de Chaace, chevaliers, qui ces letres havons ordenées et pronunciés a la priere et la requeste des dites parties qui hunt fait doubler ces letres, havons saalées ces letres de nos seax. Cest fait en la presance de Jehan de Salin, notaire de la dit cort a Flavigné, Huguet, curié d'Aise, Pierre, curié d'Estalante, Huon de Seigne, d’Adrier de Corpoier, chevaliers, Jehan Bonemer, clerc, Thiebaut lou Borne, Morel Haubert lou marechaut, et Hugues des Granges, tesmoings a ceu apelez an l’an et ou mois desus diz.

Comment citer cette notice

Xavier   Hélary . " Le cartulaire de la seigneurie de Nesle ( 1269 , Chantilly , 14 F 22 )", dans Le cartulaire de la seigneurie de Nesle , Orléans : Institut de Recherche et d'Histoire des Textes , 2006 . [en ligne]. http://www.cn-telma.fr/nesle/acte 83 /.

Mentions légales | Colophon | Contacts | Haut de page