IRHT

> Actes

<Acte 8>

Regeste

Aimé, abbé de Saint-Etienne de Dijon et maître Aubri, doyen de la chrétienté de Dijon, notifient que dame Isabelle, femme d'Etienne Boujon, chevalier, a reconnu avoir assis, délivré et baillé à Jean, seigneur de Nesle, damoiseau, pour le mariage de Gertrude, sa fille, avec ledit Jean, ce qu’elle pouvait avoir dans le village d’Échannay ; après la mort d’Isabelle et d’Etienne, tous les biens donnés à Gertrude reviendront dans le partage. A la prière d’Etienne et d’Isabelle, les deux ecclésiastiques ont mis leur scel.

Acte

Nos, Amees, humiles abbés de Saint Estiene de Dyjon, et nos, maistre Aubriz, doiens de la crestiantei de cel maismes leu, faison savoir a touz cels qui verront cels presentes letres que an nostre presence estaublie madame Ysabiaux, fenme mon signor Estiene Boujon, chevalier, at reconeu de sa propre voluntei, non mie contrainte, que ele, per lou lox et per l’outroi del devant dit mon signor Estiene Boujon son mari, at assis, delivrei et bailliée a Jehant, signor de Neelles, damoisial, por lou mariaige Gertruhet, femme del dit Jehant signor de Neelles, et fille de la dite madame Ysabial et del devant dit mon signor Estiene Boujon, quant que la dite Ysabiaux avoit, ne povoit avoir, ne devant ne après, an la vile de Aschemney et as apartenences, an [fol. 21] honmes, an terres, an preiz, an maisons, an bois, an aigues, an costumes, en tierces, an dismes, an four, an mainmorte, an escheoites, an justise et an signorie, grant et petite, et trenchiement an toutes autres choses nommées et a nonmer, venues et a avenir, les quex choses dessus dites muevent del chief a la dite madame Ysabial, fenme del dit mon signor Estiene Boujon ; et de toutes cels choses ele s’est desvistue per devant nos per lou lox del dit mon signor Estiene son mari et an at revistui lou dit Jehant, signor de Neelles, por lui et por la dite Gertruhet sa femme, fille de la dite ma dame Ysabiaul et de mon signor Estiene Boujon ; et ont volui et outroié li devant diz mes sire Estienes Boujons et ma dame Ysabiax sa fenme que [fol. 21v] Gertruhez fenme del dit Jehant et lour fille ou li hoir de son cors après lou decés des devant diz mon signor Esteine et ma dame Ysabial reveingnent an fraraige germain de toute lour terre et de touz lour autres biens, quel que il soient et ou que il soient, et ont promis per devant nos li devant diz mes sires Estienes et madame Ysabiaux per lour soirement corporelment donez, cestes devant dites covenances a tenir et a garder anterinement et que il non iront ancontre ne feront a aler ne consentiront a aler per aux ne per aucun. Et quant a ces choses tenir et garder il ont renoncié devant nos a toutes barres et a toutes exceptions et a touz droiz de clerc et de laiz et maismement la dite madame Ysabias [fol. 22] at renoncié a toutes menieres de avouherie, et a toutes autres choses que li porroient aidier et que porroient et devroient ampauchier cels covenences an aucune chose ; et por ce que ce soit ferme chose et estauble, nos as proieres des devant diz mon signor Estiene et madame Ysabial avons mis noz seels an cels presentes letres an tesmoignaige de veritei ; ce est fait en l’an de grace m. cc. et sexante et trois el mois de juignet.

Comment citer cette notice

Xavier   Hélary . " Le cartulaire de la seigneurie de Nesle ( 1269 , Chantilly , 14 F 22 )", dans Le cartulaire de la seigneurie de Nesle , Orléans : Institut de Recherche et d'Histoire des Textes , 2006 . [en ligne]. http://www.cn-telma.fr/nesle/acte 8 /.

Mentions légales | Colophon | Contacts | Haut de page