IRHT

> Actes

<Acte 76>

Regeste

Hugues d’Arcy, bailli d’Auxois, fait savoir qu’en sa présence Jean Gruau, fils de feu Odon Gruau d’Échannay, chevalier, a remis en gage à Jean, écuyer, seigneur de Nesle, le champ « au verrat » et une pièce de terre de six journaux (et diverses autres terres ?), toutes choses qu’il reconnaît tenir en fief du seigneur de Nesle, le tout pour 12 livres de viennois qu’il reconnaît avoir reçues. Jean Gruau pourra récupérer ces terres au mois de septembre moyennant le remboursement des 12 l. En cas de litige, Jean Gruau reconnaît par avance la compétence du bailli d’Auxois.

Acte

Nos, Hugues d’Arcey, bailliz de Auxois por noble baron Hugon, duc de Bergoigne, façons a savoir a touz ces qui verront ces presantes letres que Jehanz Gruaux, qui fu fiz mon seignor Odon Grual de Eschannay, chevalier, estaubliz en nostre presance, baille en gaiges a Jehan, escuier, seignor de Neelles, et a ses hoirs, lou champ au verreat essis en rueres qui se tient au champ Gautier, prevost de Montoillot, et au champ au fil bon fil ; et une piece de terre en quoi i ha sex jornaus qui toiche (sic) au bois de la martroe desux lou champ Mathier de Montoillot et leu champ de Come Hebot qui se tient au champ Arnou Gros os, et emprés leu pré aus convois de Praalon et leu pré de Lavrille qui siet sux leu rut amprés leu pré [fol. 102v] Monin lou Loriat et troinchiemant a toutes autres chouses qui sient ne qui furent dou fié au seignor de Montoillot, les quex chouses il quenuit tenir an fié deu dit Jehan de Neelles, por douze livres de viennois purs, des quex il se tient por paiez anterinemant par devant nos en deniers nombrez. Et est asavoir que li diz Jehanz Gruaus ou sui heir puent raandre et avoir ou mois de septambre les dites chouses toute les foiz que il voudront paier les dites douze livres au dit Jehan de Neelles ou a ses hoirs ; et s’il havoit sombres es dites terres quant eles serient raanses li diz Jehanz de Neelles i hauroit dous bléz fromant et avoine. Et toutes ces chouses desux dites promet a tenir et a garder li diz Jehanz Gruaus par son sairemant doné corporalmant sux sainte evangile par devant nos et a garantir lealmant ; et ha renuncié quant a ceu par son dit sairemant a toute ayde de droit escrit et non mie escrit, et a touz privileges et a toutes exceptions de deniers non mie nombrez ou reçeuz, et a toutes les chouses que porrient estre dites contre ces letres et au droit qui dist que generaus renunciations ne vaut, et oblige quant a ceu a nostre jurisdition soi et ses hoirs et toz lor biens, vollenz et outreianz que nos ou cil qui seroit bailliz d’Auxois en celui tans les peussiens contreindre a ces chouses tenir ansi de chouse adjugié an notre cort. En tesmoignaige [fol. 103] de la quel chouse nos havens mis nostre seaul en ces letres a la requeste deu dit Jehan Gruaul. Ceu fu fait a l’an de grace mil et dous cenz et sexante et douze, ou mois de septembre.

Comment citer cette notice

Xavier   Hélary . " Le cartulaire de la seigneurie de Nesle ( 1269 , Chantilly , 14 F 22 )", dans Le cartulaire de la seigneurie de Nesle , Orléans : Institut de Recherche et d'Histoire des Textes , 2006 . [en ligne]. http://www.cn-telma.fr/nesle/acte 76 /.

Mentions légales | Colophon | Contacts | Haut de page