<Acte 73>

Regeste

Thibaud le Borgne, bourgeois de Flavigny, fait savoir que Hugues d’Arcy, bailli d’Auxois, lui a donné plein pouvoir au nom du duc pour rendre jugement sur la cause mue entre Jean, seigneur de Nesle, écuyer, d’une part, et Guillaume dit Gruau d’Échannay, écuyer, d’autre part, dont le procès lui a été communiqué par écrit par le bailli. Guillaume dit Gruau d’Échannay fut ajourné devant le bailli à quatre reprises, pour y répondre de la plainte formulée par Jean de Nesle, écuyer ; Guillaume refusa à chaque fois de se présenter. Jean de Nesle l’accusait d’avoir mis le feu, le jour de la septembrèche, à la maison d’un homme d’Échannay ; cinq maisons brûlèrent aussi, le tout pour des dommages montant à 100 l. de viennois, que Jean demande à Guillaume de lui rembourser. Thibaud le Borgne condamne ledit Guillaume a être banni de la terre du duc de Bourgogne et ses biens saisis et affectés au remboursement de J! ean de Ne sle.

Acte

Ge, Thiebauz li Bornes, borgois de Flavigney, faz savoir a touz ces qui verront ces presantes letres que cum li discréz hons Hugues de Arcy, bailliz de Auxois, per noble baron Hugon, duc de Bergoingne, heust doné a moi plenier povoir et special commandemant de part leu di duc de randre jugemant de la cause que estoit entre Jehan, seignor de Neelles, escuier, d’une part, et Guillaume dit Grual d’Eschanney, escuier, d’autre part, sux leu procés de la dite cause que li diz bailliz me bailla en escrit, je, leu dit commandemant recehu en moi, et leu procés vehu diligemmant, qui estoit tex que comme Guillaumes diz Gruax d’Eschenney, escuiers, fust ajornéz par devant leu dit baillif a Vieteaul leu samadi [fol. 99] devant la Saint Vincent qui fu an l’an de grace m. cc. lx. et viiii, a la plainte Jehan de Neeles, escuier, au quel jour li diz Guillaumes ne vint et li diz Jehanz fu presanz et raisna par devant leu dit bailli que il feist tel demande au dit Guillaume se il fust presanz ;

dit et propose par devant nos, baillif d’Auxois, Jehanz de Neeles, escuiers, contre Guillaume Grual, escuier, que il, leu jour de la septembroiche, que passée est, de jour mist leu feu en la maison a un homme d’Eschanney ; par lou quel feu, la maisons au dit homme fu arse et cinc des maisons aus hommes au dit Jehan et li blez et li fein et les autres chouses que erent dedanz ; donc li diz Jehanz par chief de ceu ha perdues ses tailles et ses autres rantes que li homme li devoient, et sui dit homme desherité ; si requiert li diz Jehanz au dit Guillaume que les dommaiges que il et sui homme hont receuz por chief de ceu que il preise bien cent livres de viennois li rande, et par nos soit contrainz a ceu faire ; et se il leu met au ney il s’offre a prover a l’esgart de la cort ceu que soffire l’en porra ; et ceu dit il et propose contre leu dit Guillaume, sauf leu benefice de droit. Ceu fu doné leu samedi devant la Saint Vincent, an l’an de grace mil dous cenz sexante et nuef.

De rechief li diz bailliz fist rajorner lou dit Guillaume par devant lui a Vieteaul a trois essises ansiganz aus eglises et aus marchiez ; aus quex trois essises [fol. 99v] li diz Guillaumes ne vint ne ni anvoia, leu dit Jehan atandant tant cum il duit, en raisnant la dite demande et requerant droit. De rechief li diz bailliz fist rajorner leu dit Guillaume a ses essises ansuganz a Vieteaul por descorper les defauz que il havoit faiz ; es quex essises li diz Guillaumin ne vint ne ne descorpa, leu dit Jehan atandent tant comme il duit en raisnant la dite demande et requerant droit. De rechief li diz balliz fist rajorner leu dit Guillaume devant lui a Vieteaul le samedi devant la nativité nostre Seignor que fu an l’an de grace mil. cc. lx et x, por hoir droit sux les defauz et sus la dite demande ; au que jour, li diz Guillaumes ne vint ne n’anvoia, leu dit Jehan presant par devant leu dit bailli en raisnant sa demande et requerant droit, je devant diz Thiebaus li Bornes, borjois de Flavigney, qui plenier pooir havois et speciaul commandemant de part leu dit bailliz de randre leu jugement de la dite cause, vehue la dite demande et tout leu procés de la dite cause et diligemant resgardé l’absence deu dit Guillaume, haihanz por presance por ceu que tante foiz avoit esté apeléz cum il devoit selonc droit, haihanz deu soulement devant les hoilz per lou consoil des genz leu duc, en non deu pere et deu fil et deu Saint Esperist, leu dit Guillaume bannis et a droit de la terre leu duc, au comandement que quiconques [fol. 100] lou trovera en la terre leu duc que il leu praigne et l’amoint an la prison le duc ; et avec ceu di je et a droit que li devant diz bailliz de Auxois doit saisir en nom deu duc toz les biens de dit Guillaume que il havoit en la terre de dit duc et au doit faire johir leu dit Jehan porront, cum raisons aportera selonc sa demande ; et a ce condempnoi je et a droit leu dit Guillaume. En tesmoignaige de la quel chouses je hai sealées ces presantes letres de mon seaul. Ceu fu fait en l’an de grace mil dous cens seuxatea et dix, leu samadi aprés la nativité nostre Seignor.

Comment citer cette notice

Xavier   Hélary . " Le cartulaire de la seigneurie de Nesle ( 1269 , Chantilly , 14 F 22 )", dans Le cartulaire de la seigneurie de Nesle , Orléans : Institut de Recherche et d'Histoire des Textes , 2006 . [en ligne]. http://www.cn-telma.fr/nesle/acte 73 /.