IRHT

> Actes

<Acte 62>

Regeste

Jean, fils d’Etienne Boujon, chevalier, fait savoir qu’il a cédé à Jean de Nesle, damoiseau, au nom des enfants que ce dernier a eus avec feue Gertrude, sa femme, sœur du dit Jean Boujon, tout ce qu’Isabelle, la mère de ce dernier et de Gertrude, possédait à Talant et Échannay, à hauteur de 80 livrées de terre que ledit Jean Boujon assiéra en terres. Reconnaissant par avance le jugement de la cour du duc de Bourgogne en cas de litige, Jean Boujon a demandé à ce que l’acte soit scellé du sceau de ladite cour.

Acte

Gie, Jehanz, fiz mon seignor Estiene Boujon, chevalier, faz savoir a touz cels qui verront et orront ces presentes letres que je, por moi et por mes hoirs, outroi, delivroi et quit en herietaige permangnauble a Jehan de Neelles, damoiseal, ou non des anfanz que il a de feu Getruet, ça i en arriers sa fame, ma serour, quanque ma dame Ysabiaus ma mere hai et puet havoir et doit de son chief en Talant et a Eschannay, en terres, en prés, en hommes, en més, en maisons, en vignes, en rantes, en issues, en touz biens et en tous profiz quelque il soient et por quelque non que il soient apelé, por quatrevins livrées de terre dou partaige et dou mariaige a la dite Getruot ; en tel maniere que aprés la mort des desux diz mon seignor Estiene Boujon et de ma dame Ysabiaul, je panrai premieremant en l’erietaige de mon pere et de ma mere en un leu quatre vinz livrées de terre ; et se cilz leus ne valoit quatre vinz livrées de terre je au plus prés d’icel leu panroie et hauroie leu remenant selonc l’usaige de Bergoingne, et touz li remenanz des herietaiges de mon pere et de ma mere seroit et demorroit a partir igalmant entre moi et les anfanz a la dite Gertuot ; et promet per mon sairemant corporelmant doné sor sainz Evangiles que je contre ceste quittance ne vanrai por pora moi ou por autrui, taisiblement ou expressemant ; et voil que je soie controinz a tenir et a garder ceste quitance aussi [fol. 91v] comme de chouse adjugié par la court mon seignor leu duc de Bergoingne, en la jurisdition dou quel quant a ce je mez et moi et mes hoirs. En tesmoingnaige de la quel chouse je hai supploié a metre en cels letres le seaul de la dite court. Ceu est fait en l’an de grace mil dous cenz et sexante et quatorze, ou mois de may.

Apparat critique

a por, sic.

Comment citer cette notice

Xavier   Hélary . " Le cartulaire de la seigneurie de Nesle ( 1269 , Chantilly , 14 F 22 )", dans Le cartulaire de la seigneurie de Nesle , Orléans : Institut de Recherche et d'Histoire des Textes , 2006 . [en ligne]. http://www.cn-telma.fr/nesle/acte 62 /.

Mentions légales | Colophon | Contacts | Haut de page