IRHT

> Actes

<Acte 58>

Regeste

Hugues, duc de Bourgogne, fait savoir qu’en sa présence, Jean de Nesle, fils d’André de Nesle [chevalier], a reconnu avoir donné à Gauteron de Senoille qui est appelé de Nesle, et à Reine sa femme, sœur de Hugues de Remille [chevalier], la maison qui appartint à Poinçon de Nesle, à Nesle, et une série de biens et de champs dont la liste est donnée et que les dits Gauteron et Reine tiendront dudit Jean leur vie durant ; de plus, Jean leur accorde les mêmes usages qu’à ses hommes. Après leur mort, tous ces biens reviendront à Jean ou à ses héritiers, sans que leurs héritiers ne puissent rien réclamer. Le duc s’engage lui-même à ne rien réclamer. A la requête des parties, il a scellé l’acte.

Acte

Je, Hugues, dux de Bergoigne, faz a savoir a touz cels qui verront ces presentes letres que en ma presence estaubliz Jehans de Noeles, fiz mon seignor Andrié de Noeles, ha requeneu per devant moi que il ha doné Gauteron de Senoille qui est apeléz de Noelles, et Roigne sa famme, suer mon seignor Hugon de Remille, la maison qui fu mon seignor Poincon de Noeles, qui est en la ville de Noelles, et leu meix et leu corail qui est delez la maison qui fu au bossiaus, et lou champ de autures, et lou champ au preste qui est delez, et lou champ qui fu a la Bordeliere, et un champ Guillaume qui siet a la voie de Verdonnay, et la come[fol. 87v] de la voie de Colomiers, et dous jornex qui furent Guillaume selonc leu champ au Boitous, et un jornel qui fu Hebert leu Gifart qui sit a la voie de Sauvise, et leu champ des Broieres ; en fié et en chasemant que ce diz Gautiers et cele dite Roigne tanront deu dit Jehan et de ses hoirs tant commil viveront ; et ha doné en fié au dist Gautiers et a la dite Roigne et a lor bestes a huser de touz les husaiges que li homme au dit Jehan husent et huseront en la dite vile et ou finaige en bois, en plain et en pastures, en tel maniere que ce diz Gautiers et la dite Roigne ne puent huser des bois ne des husaiges de la ville ne dou finaige sen la ville non et ou finaige tant commil viveront ; en tel maniere que toutes ces chouses desux dites aprés la vie dou dit Gautier et de la dite Roigne remanront au dit Jehan et a ses hoirs a tenir perdurablement. Ne li hoir de ce devant dit Gautier ne de la dite Roigne ne porront rien demander ne reclamer en ces devant dites chouses, aprés li devant diz Gautiers et la dite Roigne ne tanront riens ne averont en la dite ville de Noeles et ou finaige [fol. 88] ; et il huseront des chouses et des husaiges de la dite ville et dou finaige, il se justiseront en la ville de Noelles et ou finaige por leu dit Jehan et por ses hoirs de toutes les chouses que a la jostise et a la signorie de la dite ville et dou finaige apartanront et apartienent. Et je par ce dit Gautier et par cele dite Roigne por chouse que il soient en la dite ville ne ou finaige ne por chose que il i aient esté ne esteront ne por chose qu’il i aient tenu ne qu’il i tienent ne qu’il i tanront, je ne puis riens demander, ne avoir, ne reclamer en la dite ville ne ou finaige. Et por ceu que cen soit ferme chouse et estauble, a la requeste deu dit Jehan et dou dit Gautier et de la dite Roigne, j’ai mis mon seaul en ces presantes letres. Ceu fu fait en l’an Jhesucrist nostre seignor que li milliaires corroit par mil et douz cenz et cinquante et sex anz.[fol. 88v]

Comment citer cette notice

Xavier   Hélary . " Le cartulaire de la seigneurie de Nesle ( 1269 , Chantilly , 14 F 22 )", dans Le cartulaire de la seigneurie de Nesle , Orléans : Institut de Recherche et d'Histoire des Textes , 2006 . [en ligne]. http://www.cn-telma.fr/nesle/acte 58 /.

Mentions légales | Colophon | Contacts | Haut de page