IRHT

> Actes

<Acte 56>

Regeste

Frère Renaud, abbé de Fontenay, notifie qu’en sa présence Gilot de Ravières, frère de feu maître André, clerc dudit Gilot, a reconnu que, comme Jean, écuyer, sire de Nesle, leur devait 457 l. de viennois et 95 l. t., dettes pour lesquelles ils avaient des lettres scellées de frère Raoul, autrefois abbé de Fontenay, de maître Etienne, doyen de la chrétienté de Molesme, et de maître Hugues d’Aixe, alors bailli ducal, et datant de mai 1272, ils ont reçu dudit Jean 120 l. t. et 14 l. de viennois.

Acte

Nos, freire Reynauz, humbles abbés de Fontenoy, de l’ordre de Cyteaus, façons savoir a touz cels qui verront et horront ces presentes letres que en nostre presance por ceu speciaumant estaubliz Giloz de Ravieres, freres cai en arriés maitre Andrié, clerc deu dit Ravieres qui morz est, ha recogneu par devant nos de sa propre velonté que cum Jehanz, escuiers, sires de Neeles, deust au devant dist maistre Andrié et au dist Gilot une somme d’argent, ceu est a savoir quatre cenz et cinquante et sept lb de viennois et cent livres cent soz moins de tornoiz don il havient letres ; et encor li diz Giloz les ha si com il dit sealés de seals a prodommes, ceu est a savoir de frere Raou nostre predecessour, de maistre Estiene, doie de la crestianté de Moloismes, et de maistre Hugue Daixe bailli dou tens dadonques por noble baron Hugue, duc de Bergoigne ; les queles letres furent faites en l’an de grace mil douz cenz et sexante [fol. 85] et douze ou mois de mai ; don le diz Gilonz ha recogneu par devant nos de sa propre velonté et de sa propre consciente que de la devant dite somme de pecuine don il ha letres si commil dist et tesmoigne ci desux en ceste letre que entre lui et leu devant dit maistre Andrié avant qu’il alast de vie a mort haurent et receurent dou dist Jehan por raison de la pecuine desux dite .XIIxx. livres de tornois et quatorze livres de viennois que li diz Giloz ha receues autresi de dist Jehan en pecuine nombrée ; des quex deniers, tant des dites .XIIXX. livres de tornois quant as dites quatorze livres de viennois, li diz Giloz sen est tenuz par devant nos por bien paiez sanz nul rapel a toz jorz, mais en cort de crestianté et en cort laie, ne devant nule autre justise. Ou tesmoignaige de la quel chouse, a la requeste et a la priere deu dist Gilet et por la recognoissance de ceste chouse de lui faite par devant nos, havons mis nostre seal en ces presantes letres, faites en l’an de grace mil .CC. et sexante et quinze, ou mois de juing.[fol. 85v]

Comment citer cette notice

Xavier   Hélary . " Le cartulaire de la seigneurie de Nesle ( 1269 , Chantilly , 14 F 22 )", dans Le cartulaire de la seigneurie de Nesle , Orléans : Institut de Recherche et d'Histoire des Textes , 2006 . [en ligne]. http://www.cn-telma.fr/nesle/acte 56 /.

Mentions légales | Colophon | Contacts | Haut de page