IRHT

> Actes

<Acte 55>

Regeste

Emengart de Drées autrefois fille de Gautier dit de Castres, chevalier, et femme de Robert dit de Saudon, écuyer, fait savoir qu’elle a échangé avec Jean, seigneur de Nesle, écuyer, le tiers de la succession de Guillaume dit de Drées, son frère, clerc et chanoine d’Autun, et le tiers de tout ce qu’elle peut avoir dans la succession de ses père et mère ; en échange de vingt livrées de terre que ledit Jean doit lui asseoir en droits de justice et de seigneurie, et qu’elle tiendra de lui en fief. Hugues, sire de Coiches, l’approuve pour ce qui concerne son fief. Emengart et Hugues ont scellé l’acte de leur sceau. Guillaume de Vieteaul, notaire, Itier de Corceles, chevalier, Jean de Vile, écuyer, et Androin de Leignes, clerc, dit Sarregot, ont été témoins de l’acte.

Acte

A touz cels qui sont et qui seront, je Emoingarz de Drees çai en aeriés fille mon seignor Gautier de Saffres, chevalier, et cai en arriés famme Robert dit de Saudon, escuier, faz savoir que je hai baillié et delivré et quité a touz jourz perpetuelmant a Jehan, seignor de Neeles, escuier, por lui et por ses hoirs, por raison d’eschange, lou tierz de l’escheoite Guillaume dist de Drées, mon frere, clerc et chanone d’Ostui, tel droit et tel raison et tel action que j’ai et puis havoir et doi en quelcumque maniere en la dite escheoite, en totes choses moubles et heritaiges, quelcumque soient et en quelcumque leu ; ceu est a savoir a Blance, a Barnay, ou Vaul de Voudenay, [fol. 83v] a Sevigney lou Viel et en touz autres leus ; et lou tierz de toutes choses moubles et heritaiges quelcumque il soient et en quelcumque leu, movenz de part leu dist Gautier mon pere, et de part ma dame Marie ma mere, ceu est a savoir a Drées, a Chevannay, a Misserey, a Mont Saint Juhan et en touz autres leus, tel droit, tel action et tel raison que je hai et puis havoir et doi en quelcumque maniere es chouses desux dites, en tel maniere que li diz Jehanz me baille et delivre et quite a touz jourz perpetuelmant por moi et por mes hoirs vint livrées de terre a digenois, en eschange et en recompensacion des chouses desux dites ; les quex vint livrées de terre li diz Jehanz me doit esseoir a Neeles a touz jorz por moi et por mes hoirs en justise et en seignerie ; et je et mi joir les devens tenir deu dist Jehan en fié et en chasemant ; ces chouses et cest eschange ensi commil est desux dist et devisez j’ai covant et promis por mon sairemant doné corporelmant sux sainte Evangile de Deu tenir et garder sanz corrumpre et sanz aler encontre, ne por moi ne por autrui en quelcumque maniere, et renuncenz en cest fait de certeine science a toute [fol. 84] exception de barat, a toute deception outre la moitié de droturier pris, a tout droit de crestianté et de paesté, au droit entrodut en favour des fammes, au droit disant generaul renunciation neant valoir et troinchiemant a toutes chouses por quoi l’en porroit aler encontre les chouses desux dites. Et je Emoingarz voil et outroi que a toutes ces chouses desus dites tenir et garder soie controinte par la court mon seignour lou duc de Bergoigne ausi comme de chouse cogneue et jugée en la dite court, a cui jurisdiction je obligois quant a ceu moi et mes hoirs ces chouses et cest eschange ensi commil est desux devisez. Je, Hugues, sire de Coiches, chevaliers, wil et outroi ceu qui an muet de mon fié. En tesmoing des quex chouses desux dites, nos desux nommé Emoingarz et mes sires Hugues avons prié et fait metre en ces presentes letres leu seal de la dite court. Ceu est fait en presence de Guillaume de Vieteaul, notaire, mon seignour Guillaume de Saudon, monseignour Hytier de Corceles, chevaliers, Jehan dit de Biller, escuier, et Guillaume de Bere, apeléz por ces chouses tesmoignier en l’an nostre seignor [fol. 84v] mil .CC. soixante et quinze, ou mois de janvier.

Comment citer cette notice

Xavier   Hélary . " Le cartulaire de la seigneurie de Nesle ( 1269 , Chantilly , 14 F 22 )", dans Le cartulaire de la seigneurie de Nesle , Orléans : Institut de Recherche et d'Histoire des Textes , 2006 . [en ligne]. http://www.cn-telma.fr/nesle/acte 55 /.

Mentions légales | Colophon | Contacts | Haut de page