IRHT

> Actes

<Acte 54>

Regeste

Emengart de Drées autrefois fille de Gautier dit de Castres, chevalier, et femme de Robert dit de Saudon, écuyer, fait savoir qu’elle a échangé avec Jean, seigneur de Nesle, écuyer, le tiers de la succession de Guillaume dit de Drées, son frère, clerc et chanoine d’Autun, et le tiers de tout ce qu’elle peut avoir dans la succession de ses père et mère ; en échange de 20 livrées de terre que ledit Jean doit lui asseoir en droits de justice et de seigneurie, et qu’elle tiendra de lui en fief ; Emengart s’engage à faire approuver cet échange par les seigneurs dont les biens concernés meuvent ; ladite Emengart a engagé ces 20 livrées de terre de telle sorte que Jean lui donnera chaque année une robe. Guillaume de Saudon et André de Corpoier, chevaliers, sont plèges de l’accord au nom d’Emengart. Guillaume de Vieteaul, notaire, Itier de Corceles, chevalier, Jean de Vile, écuyer, et Androin de Leignes, clerc, dit Sarregot, ont été témoins de l’acte.

Acte

A touz cels qui sont et seront, gie Emoingarz de Drées cai en arriés fille mon soignor Gautier dist de Castres, chevalier, et cai en arriés fame Robert dit de Saudon, escuier, faiz savoir que je hai baillié et delivré et quité a touz jourz perpetuelmant a Jehan, seignor de Neeles, escuier, por lui et por ses hoirs, por raison d’eschange, lou tierz de l’eschoite Guillaume dit de Drées mon frere, clerc et chanoine d’Ostui, tel droit, tel action et tel raison comme j’ai et puis havoir et doi en quelcunque maniere en la dite escheoite en moubles et en heritaiges, quel leu que il soient et en quelcumque leu ; ceu est a savoir a Blance, a Barnay, ou Vaul de Voudenai et Sevigné leu Viel et en toz autres leus ; et leu tierz de toutes chouses moubles et non moubles movenz de part leu dist Gautier, mon pere, et de part madame Marie, ma mere, que puent et doivent estre moies en quelcuqme manire, en quelcumque leu eles soient, ceu est a savoir a Drées, a Chenannay, a Missere, a Mont Saint Juhan et en toz autres leus, en tel maniere que li diz Jehans me baille et delivre a touz jourz perpetuelment por moi et por mes hoirs vint livrées de terre a viennoisa en eschange et en recompensation des chouses desux dites, les quex vint livrées de terre li diz Jehans me doit esseeir a Neeles, en justise et en seignerie ; et je et mi hoir les devonz tenir de dit Jehan et de ses hoirs an fié et en chasemant ; cest chouses et cest eschange je doi faire louer aus seignors de cui fié eles movent ; ceu est a savoir a seignor de Mont Saint Juhan, au seignor de Coiches, au seignor de Soubornon, Jehan de Voudenay, mon seignor Guillaume de Gisse vers Blance et a touz autres seignors a cui il apartient sanz leu mien metant ; et est a savoir que ja amoisenées au dit Jehan les dites vint livrées de terre, [fol. 82] en tel meniere que il m’an baillera chascun an dedanz la feste de Touz Sainz une robe soffisant a mon cors jusques a tant que il et sui hoir puissient havoir et tenir paisiblement les chouses desux dites ; et s’il avenoit, que ja ne soit, que je n’eusse, ne peusse, ne deusse riens havoir en la dite escheoite ne es chouses de mon pere et de ma mere desux nomméz, par dreit ou par coustume ou par autre chouse, les dites vint livrées de terre et la robe serient quités et delivrés au dist Jehan et a ses hoirs ; ces covenances, ensi comme eles sont desux dites et devisées, je doi louer et outroier et sealer de seals es seignors de cui fié la dite escheoite et les chouses de mon pere et de ma mere movent et cil qui n’auront seals i feront metre seals soffisanz en leu de lour et pour eaus ; ces chouses et ces covenances ensi come eles sont desux dites et devisées nos desux dist Emoingarz et Jehanz havons covent et promis por nos sairemanz donéz corporelmant sux sainte Evangile de Deu tenir et garder et l’avons ploigié a tenir chascuns jusque a cent mars d’argent [fol. 82v] des quex mes sires Guillaumes de Saudon et mes sires Andriers de Corpoier, chevalier, sont ploige et doite, chascuns deu tout par les doues parties ; les quex cent mars la partie que ensorsauroit paieroit a la partie que seroit obedianz. Et nos desux nommé mes sires Guillaumes et mes sire Andriers sumes pleige et dote por les doues parties des diz cent mars d’argent chascuns dou tout ; en tel maniere que nos bailleriens et delivreriens par nos sairemanz por la partie qui en sorsauroit des covenances desux dites gaiges moubles a Flavigney dedanz la quinzene que l’autre partie nos hauroit requis, as quex l’en porroit havoir les cent mars d’argent. Et nos desux nommé Emoingarz, Jehanz, mes sires Guillaumes et messire Andriers quitons toutes barres, toutes exceptions et toutes chouses por quoi l’en porroit aler encontre les chouses desux dites ; et volons et outroions que toutes ces chouses desux dites tenir et garder seiens contreint par la cort mon seignor leu duc de Bergoigne ensi comme de chouse jugié et queneue en la dite cort, a cui jurisdistion nos obligons quant a ceu nos et nos hoirs. Ceu fu [fol. 83] fait en presance de Guillaume de Vieteaul, notaire, mon seignor Hitier de Corceles, chevalier, Jehan de Vile, escuier, et Androin de Leignes, clerc dist Sarregot, apeléz por ces chouses tesmoignier, en l’an de grace mil .CC. sexante et quinze, ou mois de decembre.

Apparat critique

a a viennois ajouté au-dessus de la ligne.

Comment citer cette notice

Xavier   Hélary . " Le cartulaire de la seigneurie de Nesle ( 1269 , Chantilly , 14 F 22 )", dans Le cartulaire de la seigneurie de Nesle , Orléans : Institut de Recherche et d'Histoire des Textes , 2006 . [en ligne]. http://www.cn-telma.fr/nesle/acte 54 /.

Mentions légales | Colophon | Contacts | Haut de page