IRHT

> Actes

<Acte 47>

Regeste

Hugues, duc de Bourgogne, notifie qu’en sa présence dame Marguerite, femme de Robert de Furuy dit Buillet, chevalier, avec l’accord de ce dernier, a reconnu avoir vendu à Jésuet, juif du duc à Montbard, la vigne appelée « le clos de Corbeton », dans la paroisse de Montbard, le pressoir qui s’y trouve, ainsi que leurs appartenances, toutes choses que tenaient la dite dame Marguerite et dame Agnès, femme de Jean de Saint-Sépulcre ; pour 400 l. t. A la demande de Marguerite et de son mari Robert, le duc Hugues a scellé l’acte.

Acte

Nos, Hugues, dux de Burgoigne, façons savoir a touz ces qui verront ces presentes letres que an nostre presence por ce estaublie specialment ma [fol. 71] dame Marguerithe, fenme mon signor Robert de Furuy dit Buillet, chevalier, at reconehu de sa bone voluntei et senz force, que ele, par lo lox et par l’outroi del dit mon signor Robert Buyllet son mari, at vendu, quittei et outroié en heritaige perpetuel, en justise et an signorie tranchiement, senz riens retenir, a Jesuet, nostre juif de Montbart, et a ses hoirs, la vigne qui est apelée li clox de Corbeton, de la parroche de Montbart, et lou pressour qui i est, et la dite vile de Corbeton, et lou porpris et les apertenences del dit pressour qui touche d’une partie a la vigne .. l’abbei de Chesteillon et d’autre part a la vigne qui fut Bernart Colquin, et toutes les apertenences au dit pressour et au dit clox an tresfonz de terre et an marrien, c’est a savoir quant que la dite Marguerite y tenoit, ne autres par chief de li, et quant que madame Agneax la fenme Jehant de Saint Sepulchre i tient por raison del douayre de son premier mari, et toutes autres choses que il ont ou poent avoir ou doivent de heritaige ou a vie par raison de doaire ou an autre meniere, an hommes, an justises, an signories granz et petites, an préz, an terres, an bois, et an toutes autres choses par quelque non que eles soient apellées, por lou pris de quatre cenz livres de tornois bons et loiax, des quex deniers la dite Marguerite et li diz Robers ses mariz se tienent a paié par devant nos an pecune nombrée, et an quittent lou dit Jesuet et ses hoirs por aux et por ses hoirsb lour hoirs [fol. 71v] de la quel vigne et dou quel pressour et des dites apertenences et des autres choses toutes dessus dites devisées la dite Margarite por li et por ses hoirs s’est desvestue an nostre presence per lou lox et per l’outroi del dit monsignor Robert son mari ; et an at mis an corporel saisine lou dit Jasuhet por lui et por ses hoirs, prometanz la dite Margarite et li diz Roberz ses maris par lour soiremenz donéz corporelment sus saint Euvangile par devant nos que il n’iront contre la dite vendue, quittance et outroiance et vesteure desoranavant, per aux ne per autre, a privei ne an apert, au fait ne an consentement, ainz la prometent a garantir por aux et por lour hoirs au dit Jasuhet et a ses hoirs a toz jors mais sus touz lour biens et les biens a lour hoirs acquis et a aquerre an quelque leu que il soient et puissent estre trovei, contre touz chalongenz ; et renonce la dite Margarithe de certeine science et senz force a exception de avoherie, de mariaige, de cremour et de dotance et au droit qui dit que fenme puet rapeler ce que ele loe lou mariaige durant dedanz lou tens de plour lou mariaige feni, et a touz droiz et a toutes indulgences outroiiés et a outroiier an favor de fenme soit veve soit mariée ; et li diz Roberz et la dite Margarithe en renoncent ansemble de certeine science a toute decevance, soit de la vendue del moins de droiturier pris, soit autre, et a l’exception de pecune non nombrée et non baillié, et au droit qui dit que generaus renonciations ne vaut et a touz autres [fol. 72] droiz de crestientei et de poestei, a indulgences de croisiez outroiiés et a outroier et a toutes autres choses qui porroient ampahaschier an aucunes choses ces dites convenences, ne aller ne obicier contre cest present instrument. Ou tesmoing des quels choses nos, Hugues, dux de Burgoigne, de cui fié muet la dite vendue, volons, loons et outroions et a la proiere de la devant dite madame Margarite et de monsignor Robert son mari avons fait metre nostre seal an ces presentes letres. Ce fut fait an l’an de grace m. cc. sexante et dix, el mois de avril.

Apparat critique

b Ajouté à la suite puis barré : ses hoirs.

Comment citer cette notice

Xavier   Hélary . " Le cartulaire de la seigneurie de Nesle ( 1269 , Chantilly , 14 F 22 )", dans Le cartulaire de la seigneurie de Nesle , Orléans : Institut de Recherche et d'Histoire des Textes , 2006 . [en ligne]. http://www.cn-telma.fr/nesle/acte 47 /.

Mentions légales | Colophon | Contacts | Haut de page