IRHT

> Actes

<Acte 43>

Regeste

Jacques, abbé de Notre-Dame de Châtillon-sur-Seine, et Thibaut, prieur, notifient qu’en leur présence Domengez de Coulmier, fils de feu Milon dit Raboan, a reconnu avoir vendu à Jean de Nesle, écuyer, la moitié du champ du Poirerer, assis au finage de Coulmier, plus sa partie du mex du quarre, le tout pour 10 l. et 8 s. de viennois. A la requête de Domengez, l’abbé et le prieur ont apposé leur sceau à l’acte.

Acte

Nos, Jaques, humiles abbés de Nostre Dame de Cheisteillon sus Seynne, et nos Thiebauz, priors de cel maismes leu, façons savoir a toz ces qui verront et orront ces presentes letres, que an nostre presence por cette chose specialment estaubliz Doimengez de Colommer le Sec, filz feu Milon dit Raboan, at reconeu par devant nos, de sa bone voluntei, senz contreindre, que il at vendu et quittei a toz jors a Jehant de Neelles, escuier, la moitié del champ del Poirerer tout franc assis el finaige de Colommer qui contorne sus la voie de Cheisteillon et autressi sa partie del mex del quarre tote franche, la quele est assise dedanz la cloison del dit mex, por dix livres et huyt solz de la monoie de viennois, des quex deniers li diz Doimengez at ahu et receu del dit Jehant son plein paiement an deniers companz, si comme il at coneu par devant nos ; et s’en est tenuz par devant nos por bien paiez, si comme il a coneu par devant nos et s’en est tenuz par devant nous, et a promis par sa foi corporelment donée an noz mains li diz Domengez a tenir et a garantir la dite vendue au dit Jehant, bien et loialment contre totes genz et que contre la dite vendue que il ne venrat ne ferat venir ne jemés riens n’i reclamerat desoranavant ; et at renoncié par devant nos li diz Domengez a tot barat, a tote croiserie prise et a prendre, et a toz privileges donéz et a doner, a tote ayide de droiz [fol. 69] et de loiz et de costumez venues et a venir, et a tote ayide de cort de crestientei et de poestei. El tesmoing de la quel chose, nos avons mis noz seaus an ces presentes letres a la requeste de Domenget dessus nommez. Et ce fu fait an l’an de grace m. cc. sexante et nuef, el mois de marz.

Comment citer cette notice

Xavier   Hélary . " Le cartulaire de la seigneurie de Nesle ( 1269 , Chantilly , 14 F 22 )", dans Le cartulaire de la seigneurie de Nesle , Orléans : Institut de Recherche et d'Histoire des Textes , 2006 . [en ligne]. http://www.cn-telma.fr/nesle/acte 43 /.

Mentions légales | Colophon | Contacts | Haut de page