IRHT

> Actes

<Acte 41>

Regeste

Jacques, abbé de Notre-Dame de Châtillon-sur-Seine, et Thibaut, prieur, notifient qu’en leur présence Jean de Coulmier-le-Sec, fils de Milon dit Raboan, a reconnu avoir vendu, avec l’accord de sa mère Agnès, à Naudin de Coulmier, fils de feu Lambert, les biens détaillés dans l’acte précédent. A la requête du vendeur et de sa mère, l’abbé et le prieur de Notre-Dame de Châtillon ont apposé leur sceau.

Acte

[fol. 67]Nos, Jaques, humiles abbés de Nostre Dame de Cheisteillon sus Seynne, et nos Thiebaut, priors de cel maismes leu, faison savoir a toz ces qui verront et orront ces presentes letres que an nostre presence por ce specialement estaubliz, Jehanz de Colonmer lou Sec, filz Milon dit Raboan, at reconeu par devant nos que il at vendu et quittei a toz jors par lou lox et par l’outroi d’Agneal sa mere, an heritaige perpetuel, a Naudin de Colunmer lou Sec, fil feu Lambert et a ses hoirs, par la vendue faite antre vis, une maison que il avoient an la vile del devant dit Colommer, la quex siet souz l’orme, la quex maisons fut Tiecelin ; la grange autresi qui siet darriers la dite maison ; la moitié del champ des poirerez qui contorne sus la voie de Cheisteillon ; un jornal de terre qui siet darriers la maison Gilet dit Chauvin, li quex fut feu Humbelet lou maistre ; demi lou champ des crays qui contorne sus lou cortil Lambert lou Roi ; une piece de terre assise an la voie de Culemin, la quele est asise selonc la terre costant lou Nevol Colas et sa partie del mex qui est apeléz li mex del quarre des lou mex au prestre tant que au mex Colas et contorne sus lou cementere ; por sexante livres de la monoie de viennois, des quex deniers li diz Jehanz [fol. 67v] et la dite Agneas sa mere ont ahu et receu del dit Naudin lour plein paiement, bien et loialment, et s’en sunt tenu por bien paié si comme il ont coneu per devant nos ; et ont promis par lor soirement faiz sus sainte Evangile li diz Jehanz et Agneax sa mere a tenir et a garantir la dite vendue au dit Naudin et a ses hoirs bien et loialment contre toutes genz, et que contre la dite vendue que il ne venront ne feront venir, an fait ne an dit, ne an consentement, an celée ne an apert, an plait ne fors plait, ne jemés riens n’i reclameront desoranavant ; et ont renoncié li dit Jehanz et la dite Agneax a tout barat, a toute croiserie, prise et a prendre, a toz privileges donez et a doner, a toute ayide de droiz et de loiz et de costumes, venues et a venir, a toute aiide de cort de crestientei et de poestei. El tesmoing de la quel chose, nos avons seellées ces presentes letres de noz seaux a la requeste de Jehant et de Agneal sa mere desus nomméz. Ce fu fait an l’an de grace m. cc. et sexante et nuef, el mois de janvier.[fol. 68]

Comment citer cette notice

Xavier   Hélary . " Le cartulaire de la seigneurie de Nesle ( 1269 , Chantilly , 14 F 22 )", dans Le cartulaire de la seigneurie de Nesle , Orléans : Institut de Recherche et d'Histoire des Textes , 2006 . [en ligne]. http://www.cn-telma.fr/nesle/acte 41 /.

Mentions légales | Colophon | Contacts | Haut de page