IRHT

> Actes

<Acte 21>

Regeste

Guillaume de Chassey, chevalier, bailli d’Auxois, notifie qu’en sa présence Isabelle, fille de feu Guillaume Bridaine, a reconnu avoir échangé, avec l’accord de son mari Poincet Rostie, avec Jean, seigneur de Nesle, tout ce qu’elle possédait au moulin de la place, au finage de Chamesson, ainsi que deux journaux de terre sis au plus près du moulin, et qu’elle en a investi Jean. En échange, celui-ci leur a donné un demi muid de blé à la mesure de Châtillon, moitié avoine moitié froment, à prendre chaque année sur son four de Coulmier, à tenir en fief lige de lui. A la requête des parties, Guillaume de Chassey a scellé l’acte.

Acte

Nos, Guillaumes de Cheacey, chevaliers, bailliz de Aussois por lou noble homme Hugon, duc de Borgoigne, faisons savoir a touz cels qui verront cels presentes letres que an nostre presence estaublie Ysabiaus, damoisele, que fu fille Guillaume Bridaine, at reconehu, non mie contrainte mais de sa propre voluntei que ele, por lou lox et per lou outroi de Poincet Rostie, son mari, at quittei et outroié parduraublement et an heritaige, an non de eschenge, a Jehant, signour de Naelles, et a ses hoirs, quant que ele at el siege ne as apertenences del molin de la place seant el finaige de Chamesson et dous jornaus de terre seanz au plus prés del molin ; des quels choses la dite Ysabiaus, de cui chief les dites choses muevent, per lou lox et per lou outroi del dit Poincet son mari se est desvistue corporelment per de[fol. 46v]vant nos por li et por ses hoirs et an at revesti lou dit Jehant por lui et por ses hoirs. Et ont promis la dite Ysabiaus et lidiz Poincez, ses mariz, que jemais contre ceste quittance, outroiance et eschenge ne iront ne ne consentiront a aler per lour soiremenz donez corporelment per devant nos sus sainte Evangile, per aux ne per autrui ; ainz sunt tenu au garantir contre touz chalongeanz fors del signour del fié et del cens sus touz lour biens et de lour hoirs ; et quant a ce il se sunt obligié aux et lour hoirs et les biens de lour hoirs, an quelque onques leu que il fussent, ne fussent trovei. Et an at renuncié la dite Ysabiaus an cest fait a exception de avouherie de mariaige et a touz privileiges que est et sunt outroié an favour de fenme et an la decevance de la moitié del droiturier pris et a toutes autres ayhides de fait et de droit de crestiantei et de pohestei. [fol. 47] Et por ce faisant li diz Jehanz de Neelles at assis a la dite Ysabiaul an heritaige et au dit Poincet son mari et a lour hoirs, demi mue de blef a la mesure de Chesteillon, moitié froment et moitié avoine, a prendre chescun an a la saint Martin an yver sus son four de Colonmiers ; et se li diz fours nel pooit perfaire, li diz Jehanz ou sui hoir lou doivent perfaire sus touz lour biens au plus prés de ladite vile de Colonmiers ; les quels choses la dite Ysabiaus et Poincez ses mariz et lour hoira tienent et doivent tenir an fié lige et an chasement del dit Jehant et de ses hoirs. Et de ces diz eschenges les dites parties se sunt tenues por paiés per devant nos et louquel dit eschenge li diz Jehanz est tenuz et at promis a garantir por lui et por ses hoirs contre touz per son soirement donei corporelment per devant nos [fol. 47v] sus sainte evangile a la dite Ysabiaul et au dit Poincet son mari et a lour hoirs senz aler ancontre, ne faire a aler per lui ne per autrui et an at renuncié a toutes exceptions, a toutes raisons et a toutes barres et a toutes aihides de droit de crestientei et de pohestei que li porroient aidier a cels dites choses ampahanchier. Et que ce soit plus ferme chose et plus estauble, per la requeste des dites parties, nos avons mis nostre seaul an cels presentes letres. Ce fu fait an l’an de l’incarnacion nostre Signour mil dous cenz et sexante et cinc, el mois de mai. [fol. 48]

Apparat critique

a et lour hoir ajouté au-dessus de la ligne.

Comment citer cette notice

Xavier   Hélary . " Le cartulaire de la seigneurie de Nesle ( 1269 , Chantilly , 14 F 22 )", dans Le cartulaire de la seigneurie de Nesle , Orléans : Institut de Recherche et d'Histoire des Textes , 2006 . [en ligne]. http://www.cn-telma.fr/nesle/acte 21 /.

Mentions légales | Colophon | Contacts | Haut de page