IRHT

> Actes

<Acte 20>

Regeste

Hugues, duc de Bourgogne, notifie qu’en sa présence Seguin de Chasteillonet, écuyer, et sa femme Adeline, ont donné à Jean, écuyer, seigneur de Nesle, le fief dit du « moulin de la place », au finage de Chamesson, et deux journaux de terre sis à côté du moulin ; le moulin lui-même avait été échangé par Jean avec Isabelle, fille de Guillaume Bridaine ; Seguin et sa femme ont investi Jean de Nesle du fief. A la requête de Seguin et d’Adeline, le duc a scellé l’acte.

Acte

Nos, Hugues, dux de Borgoigne, faisons a savoir a touz cels qui verront et orront cels presentes letres que per devant nos, et an nostre presence estaubliz por ce specialment, Seguins de Cheisteillenet, escuyers, et Adeline, sa femme, ont reconehu que il ont quittei et quittent, donei et outroié, et donent et outroient [fol. 45] por aux et por lour hoirs a tous jors mais an heritaige perpetuel a Jehant, escuyer, signour de Neelles, et a ses hoirs, lou fié des cinc parz del molin que l’on clainme lou molin de la place, assis el finaige de Chamesson, antre la vile que l’on apele Esporve et Chamesson, et dous jornaus de terre au plus prés del dit molin ; les quels dites cinc parz del molin dit et de la dite terre, Ysabiaus, la fille Guillaume Bridaine, at eschengié au dit Jehant de Neelles et a ses hoirs per lou loux et per lou outroi de Poincet Rostie, son mari ; del quel fié des dites cinc parz del dit molin et de la dite terre, li diz Seguins et Adeline sa fenme, por aus et por lour hoirs, se sunt desvistu corporelment per devant nos et an ont anvistu et mis an corporel saisine lou dit Jehant de Neelles, por lui et por ses hoirs, et ont promis per lour foiz et per lour soiremenz donez an nostre main corporelment li devant diz Seguins et Adeline sa fenme [fol. 45v] que contre la dite quittance, lou dit don et lou dit outroi, por aux et por lour hoirs, ne iront jemais desoranavant, ne ne consentiront a aler per autrui, an fait ne an dit, et an ont renoncié et renoncent per devant nos a toutes barres et a toutes exceptions, de fait et de droit, de crestiantei et de pohestei, et a toutes costumes de terres et de payis et a toutes les choses que lour porroient aidier ne a lour hoirs, et nuyre au dit Jehant ou a ses hoirs ; et maismement la dite Adeline fenme au dit Seguin an renonce a touz les droiz que sunt outroié an favour de fenme. Et nos devant diz Hugues, dux de Borgoigne, l’avons louhei au dit Jehant et li diz Jehanz l’at repris de nos. An tesmoignaige de la quel chose, a la requeste des devant diz Seguin et Adeline sa fenme, nos devant diz Hugues, dux de Borgoigne, avons seellé cels presentes letres de nostre seaul. Ce fu fait an l’an de l’Incarnacion nostre signor m.cc. et lx vii., el moi de mai. [fol. 46]

Comment citer cette notice

Xavier   Hélary . " Le cartulaire de la seigneurie de Nesle ( 1269 , Chantilly , 14 F 22 )", dans Le cartulaire de la seigneurie de Nesle , Orléans : Institut de Recherche et d'Histoire des Textes , 2006 . [en ligne]. http://www.cn-telma.fr/nesle/acte 20 /.

Mentions légales | Colophon | Contacts | Haut de page