IRHT

> Actes

<Acte 14>

Regeste

Hugues, duc de Bourgogne, notifie qu’en sa présence Guillaume, fils de Renier de Retei, chevalier, a reconnu avoir échangé avec Jean, écuyer, seigneur de Nesle plusieurs personnes et leurs biens ainsi que plusieurs fiefs.

Acte

Nos Hugues, dux de Borgoigne, faisons savoir a touz cels qui verront et orront ces presentes letres que an nostre presence estaubliz por ce specialment Guillaumes, filz mon signour Rennier de Retei, chevalier, at reconehu lui fors de toute avuoheriea et an leiaul aaige lui avoir eschengié perpetuelment a Jehant, escuier, signour de Neelles, Drouhet lou fil dan Durant dit Voisons et Germain son frere, aux et lour choses, lou fil feu Litier lou Voisons, Acelin son frere, Martin lou fil Viart lou Gouz, Agnès la femme Estevenin lou fil Viart lou Gouz, Constant et Bernart filz Mengeart, Remei lou Bruson, Arembor Borget fenme Thiebaut Grate, Renaut Calon, Vibour la fenme Renaut Calon et lou mex Renaut Calon et sa fenme, et lou mex Renaut Calon et Letier son frere qui siet devant la maison Colas lou fil dan Renaut, lou mex Viart Calon amprés lou mex Milot Culpalei ; lou mex Thiebaut Grate et Pariset son frere qui siet devant la maison Renaut Bodot ; un motteon de avoine de rente que Perrins Millerei doit sus son mex ; un moiteon de avoine de rente sus lou mex Vincent lou fil Crestien Tyrel un moiteon de avoine de rente sus lou mex Marguerithe la Bisaude et Adeline la fenme Girart lou Bisaut ; lou mex Hobert que li genres Martin lou Crosié tient ; lou mex Lietier et Germain lou Basclois que il tienent ; lou mex que danz Meinars li convers tient ; lou mex Huguenin lou convers ; lou mex Thiebaut la Grate ; lou mex Briceon lou Pelletier ; lou mex Huot lou Fol devant la maison Naudin lou fil Lambert ; lou mex Huot lou Loup ; trois deniers de censive sus lou mex Martin Coscan ; trois deniers de censive sus lou mex dan Meinart ; lou fié que mes sires Miles de Sancy, chevaliers, tient de lui an la vile de Colonmiers lou Soc et as apertenences ; lou fié Jaquete, damoisele, fille mon signour Huede de Retei, chevalier, tient de lui an la vile dite de Colonmiers et as apertenences, c’est a savoir lou huitiesme de la justise grant et petite de la dite vile et des apertenences et trenchiement toutes les autres choses et les autres proffiz que li diz Guillaumes avoit et devoit avoir an la dite vile de Colonmiers et as apertenences a dix livrées de terre a viennois que li diz Jehanz avoit chescun an en la mise de Talant lou duc les quels dix livrées il tient del chief Gertrui [fol. 32v] fenme au dit Jehant que l’at volu senz nule force ; et li diz Guillaumes s’est desvistuz corporelment per devant nos por lui et por ses hoirs de toutes les devant dites choses que il tenoit an la devant dite vile de Colonmiers et as apertenences ne devoit avoir ; et an at mis an corporel saisine lou dit Jehant, signour de Neelles, et Gertrui sa femme, por aux et por lour hoirs, per lou lox et per lou outroi mon signour Jehant de Retey chevalier, frere au dit Guillaume, del cui fié les dites choses de Colonmiers sunt, et per lou lox et per lou outroi mon signour Rennier de Recey, chevalier, pere as diz mon signour Jehant et Guillaume. Semblaublement, li diz Jehanz de Neelles et Gertruz sa fenme se sunt desvistu per devant nos por aux et por lour hoirs des dites dix livrées de terre a viennois que il avoient an la dite vile de Talant et an ont mis an corporel saisine lou dit [fol. 33] Guillaume por lui et por ses hoirs per lou titre de perpetuel et de loial eschenge ; et ont promis les dites parties per lour soiremenz donéz corporelment que contre les dites choses ou aucune ne venront ne consentiront a venir, per aux ne per autrui, an fait ne an dit, desoranavant ainçois les garderont et garentiront li une partie a l’autre contre touz chalongenz leialment tant que a droit per lou soiremenz devant nonméz et tant cum a ceste garantie porter, li une partie oblige a l’autre touz ses biens moubles et non moubles, acquis et acquerre, et tant que a ce garder fermement et perduraublement senz corrumpre, les dites parties an renuncent per devant nos au droit qui dit que covenences ou l’on est decehuz outre la moitié del droiturier pris ne valt et au droit qui dit que les choses que sunt nonmées as covenences se eles ne sunt delivrées ne valent maismement la dite [fol. 33v] Gertruz an renonce de sa bone voluntei a avouherie de mariaige et a toute ayde donée an favour de fenme et les dites parties ansemble an renoncent a tout droit et a toute ayde et de crestientei et de poestei que porroient ampaauchier les dites covenences an aucune chose. Et por ce que ce soit ferme chose et estauble, nos devant diz Hugues, dux de Borgoigne, avons louhei lou dit aschenge sauf nostre fié faisant et sauf nostre droit et lou autrui ; et avons seellées ces presentes letres de nostre seel an tesmoignaige de veritei, a la requeste des parties. Ce fu fait an l’an de l’incarnation nostre Signour mil dous cenz sexante et sept, el mois de joignet.[fol. 34]

Apparat critique

a Sic, pour auvoherie.

Comment citer cette notice

Xavier   Hélary . " Le cartulaire de la seigneurie de Nesle ( 1269 , Chantilly , 14 F 22 )", dans Le cartulaire de la seigneurie de Nesle , Orléans : Institut de Recherche et d'Histoire des Textes , 2006 . [en ligne]. http://www.cn-telma.fr/nesle/acte 14 /.

Mentions légales | Colophon | Contacts | Haut de page