[1]

A De Giles Morin de Villeville, qui dut 1 home ocirre, dont le viconte dona congié de pes fere, par deniers que il en ot, si com l'en dit1.

Repont le viconte et nie que riens il n'en ot ne autre pour li ne congé n'en dona, ainz en dona le congé mon segneur Julian de Perone, ballif en celi tans, du commandemant le roi et de ses mestres, si com il croit, par ce que le ballif enquist, et sot que il, cil Giles, avet fet le fet sus sei ; defendent, et ce sevent mestre Richart du Fai, monsegneur Herbert, personne de Villevile, et le verdier de Montfort, se il en vouleint voir dire et furent audit Giles ses biens commandez a rendre par ledit ballif, dont il eut une partie et l'autre est encore deüe et arestee par monsegneur Gui le Bas. Et de ces cas dit le viconte que il n'est pas tenuz en mestre s'en enqueste, car il i pourret avoir peril de cors.

I. Guillaume Jouceaume, tesmoin juré, requis, dit par son serement que Gile Morin tua 1 home, si com l'an li mist sus, en la parroisse de Illeville. Req. du tens, dit 5 anz ot entour Nouel novelement passé. Apres il dit que ledit Giles s'an foui et le viconte fist prendre touz ses biens meubles. Req. quieus biens, dit : blez et vaches. Req. de la value des biens, dit : jusques a la value de 30 l. et de plus, si com il croit. Req. du tans que il furent pris, dit : tantost apres l'ocision. Req. qui prist ces biens, dit : Matot le serjant par le commandemant au viconte. Req. savoir mon se le dit viconte rendi puis le biens meubles, dit que non. Req. commant il set que le viconte ne les rendist pas dit qu'il le set par ce que il les vendi a Herbert l'Eschacier et en vit ledit Herbert espletier com des siens. Et dit que ledit Giles est tout en pés ou païs et espousa la seur au mort par pes fesant des amis, et vivent encore ensemble par mariage. Req. se ledit viconte en ot rien pour ladite pés souffrir, dit que il n'an set rien. Req. se ledit viconte dona congé de la pés fere, dit que il n'an set rien.

II Guillaume de la Feriere... [id.]

III Robert Buquet ... [id.]

IV. Guillaume Hurtaut, ... cf 1

Le viconte 2 connut par devant nous que il avet eu 11 l. et 10 s. des biens Giles Morin, maufeteur desus nommé, tant seulement

B 3 De Guillaume de l'Abaiee qui fu mehangnez au tallieman, don le viconte dut doner congé de pes faire, si com l'an dit, pour deniers que il en dut avoir.

Respont le viconte que riens il n'en ot et ne autre pour li ne congié n'an donna, ainz furent apelez ceus en asisse, don le mehangné fu pleintif et souz de defalli l'un, tant que il dut estre bani en l'asisse de septembre, et l'autre se rendi, et du mehangné et de celi qui se rendi pourchaça le ballif qui ore est, congé de pés fere, a la requeste des parties, vers les mestres le roi en l'Eschequier de Pasques, parce que il fu enquis et trouvé que ce fu en chaude mellee et par paroles, et que cil qui se rendi n'avet pas fet le cop, mes il est en la compaignie du blecié et de celi qui le feri et veneint touz ensemble de boivre de une taverne. Par quoi le viconte dit que il semble que l'an ne l'an puisse ne ne doie rien demander, et dit le viconte que les congez de pés fere de cas de crime n'apartienent a li ne a autre viconte, que le rois est, par quoi il n'est pas tenuz de ces cas a mestre soi en enqueste, car il i pouret avoir peril de cors, et si est chose seüe communement par tout le païs que nus viconte ne peüt doner congé en cas de crime. Pour quoi il ne semble pas que nul li deüst rien doner, pour tel congé que il ne poet doner et se il le donast ne povet il rien valeir.

I. Jehan le Neveu, tesmoig juré. Req. dit par son serement que Guillaume de l'Abaiee fu mehangnez en la parroisse du Tallieman. Req. du tens, dit entour 7 anz, si com il croit et dit que le viconte ot de ceus qui les mehangnerent 20 l. Req. commant il le set, que il eüst ces 20 l., dit que il oï dire a pluseurs genz, de nons desquieus il ne se recorde pas. Req. de ceus qui en furent soupeçonneus du mehang dit : le munier mon segneur Thomas du Val et le fiuz Roger de la Raie. Req. se ce fu par le congé au viconte, que la pés fu feste, dist que oïl, si com il a oï dire a pluseurs genz. Req. se il en set plus, dit que non.

II Robert Babiz, ... .

III Guillaume Martin ... .

IV. Pierre le Mercier, Roger Lescuier, Thomas Maatelin, Guillaume Panier, dient ... que il n'en sevent rien. 4

C. 5 De 1 larron qui dut estre amené une bourse au col en la prison de Pont Audemer, que le viconte dut delivrer sanz enqueste et sanz jugement, par deniers que il en ot, si com l'an dit.

Respont le viconte et nie que onques riens ne en ot ne autre pour li, ainz l'amenerent ceus qui le rendirent en la prison tout dessesi et pour ce que il n'iert de riens sesi, ne nul ne le suivet, et avet esté tenuz longuement en prison et ert tesmoignez des genz de son pais a leal home, et fu trouvé par la gent de la parroisse ou il fu pris que garçons qui buveint aveques li li aveint mis le fet sus par ivrece, et fu delivré par jugement de chevaliers. Ce sevent Thomas de Brotonne, Richart de Contemoulin et autres qui furent au jugement fere, dont le viconte ne se recorde pas, et en furent tenuz en prison pour ce que il ne le rendirent sesi ceus qui l'amenerent, c'est a savoir Gilebert Vastel, Gautier Le Cerf, Robert Asire, Jehan Sehier, et l'amenderent et plevirent l'un l'autre, et par desus ce les plevirent Renout le Moine, Robin Bernart et Anthoine Herbert, et mist le viconte l'amende a tauxer en l'asisse par devant sire Gautier de Villiers, adonques ballif de Ruan, et dedanz cele asisse 2 de ceus qui l'amenerent en prison estoient peescheurs et furent noiez en la mer, si com l'an dit, et les autres 2 furent soufferz pour ce que il estoient povres homes. Ce ne set le viconte a qui requeste, et de cest cas, si com il est mis avent, le viconte ne s'an veut pas mestre en l'enqueste car il li pouret avoir peril de cors.

I. Robert Tison, tesmoin juré, req. dit par son serement que 1 larron fu amenez en la prison du Pont Audemer, lequel avet emblé deniers en une bourse a Guillaume Hanot, si com l'an disoit. Requis commant il set que larron feust amenez en la prison, dit que il i estoit present et qu'i le vit. Req. si vit que le larron fust sesi de la bourse desus dite ne de l'argent, dit que non. Req. du tans, dit : entour 4 anz et entour Noel novelement passé. Req. du jour, dit : a 1 lundi. Requis se il set commant ce larron fu delivré, dit que il n'an set riens. Req. se il set que le viconte en eust rien pour sa delivrance, dit que oïl, si com il croit, mes autrement il ne le set. Requis se il en set plus, dit que non.

II. Geffroi le Geolier, ..... .6

D.7 Des bestes du viconte qui ont esté au bois le roi et fet domage, si com l'an dit.

Respont le viconte que sa fame tenoit auscunes vaches pour avoir du let et des formages et se ces bestes furent onques mises ou bois le roi, ne en leu ou eles li peusent fere domage, il dit que ce ne fu par li ne par son commandemant, ne riens il n'an sot, ainz deffendoit a celi qui les gardet que il ne les i menast et a sa fame que ele ne les i envoiast, et veust bien que il set seuz, et que en a enquere par les serjanz et par les autres bones genz et le domage qui sera trouvé que eles aront fet, il est preez de rendre a la volenté le roi, et apres ceste response il reconnut par son serement par devant nous que ses vasches i aveint esté par espace de 2 anz.

I. Robert Tison, tesmoin juré, requis, dit par son serement que il vit les bestes au viconte aler au bois le roi qui est delez le Pont Audemer, par 3 annees ensuivanz, si com il croit. Req. de la dareniere anee, dit que en aoust novelement passé. Req. quieus bestes c'esteint, dit que ce esteint vaches. Req. se il set quel domage les bestes porent fere ou bois desus dit, dit que il ne le set pas. Req. quantes vaches il i veist onques plus aler ensemble, dit aucune foiz 9, aucune foiz 10, si com il croit, et ne det aler nule beste ou bois desus dit en nule saison, si com il dit. Req. se il en set plus, dit que non.

[5^e peau] II. Geffroi le Geolier, ...

E8 De Thomas Hurtaut de Villeville, qui dut batre 1 home tant que il en mourut, et que le viconte dut delivrer sanz enqueste et sanz jugement, par deniers que il en ot, si com l'en dit.

Respont le viconte et nie que riens ne l'an fu doné ne a autre pour li, ainz dit que ledit Thomas fu tenuz en prison 1 an ou plus et n'avet poient de suite du fet, fors qu'en la joustice ne an enqueste il ne s'en voulet mestre, et pour ce que il fu tesmoigné a monsegneur Julian de Perone, ballif en celi tans, que il ne estoit pas courpable du fet, einz l'avet fet 1 qui est apelé Richart le Clerc, qui se estoit tret arrere, et est ore bigame et revenuz au païs. Le ballif le commanda a delivrer par pleges, cors pour cors, a rendre le toutes les foiz que mestier seret, ce est a savoir Jehan Mahi, Richart Dudan, Guillaume Lampereur, Henri Guilart, Raoul Buquet et Robert Mahi, pour quoi le viconte dit que il n'est pas tenuz de mestre sey en enqueste car il i pourret avoir peril de cors.

I. Guillaume de la Feriere, tesmoin juré et requis, dit par son serement que Thomas Hurtaut bati 1 home, si com l'an li mist sus, qui avet non Richart le Fevre. Req. du tans qu'i fu batuz, il dit entour 4 anz a, si com il croit, et dit que ledit Richart le Fevre mourut de la bateüre, si com l'an dit, mes autrement il ne le set. Req. se il set combient il vesqui enpres la bateüre, dit entour 3 mois, si com li semble, et dit cil qui parle qu'i vit aler moult de foiz ledit Richart parmi le voiees puis que il ot esté batu. De rechief il dit que le dit Thomas fu pris et tenuz en prison entour demi an, pour la reson du batu desus nommé. Req. qui le delivra de la prison, dit monsegneur Julian de Perone, ballif ou tans de lors, si comme il se recorde. Req. commant il set que monsegneur Julian le delivrast, dit que il oï dire a pluseurs genz, autrement il ne le set. Req. se il set que le viconte eust ne don ne lor pour la delivrance audit Thomas, dit que oïl, si com il croit, mes autrement il ne le set. Req. quel don ne quel loer il en ot, dit que il ne set. Req. se il en set plus, dit que non.

II. Gilebert Jouceaume,... [6^e peau]

III. Guillaume Hurtaut, .

[en marge :] nihil est probatum contra vicecomitem et probatur quod dominus Julianus deliberavit dictum detentum in prisione.

F. De Perrato Oin qui interfecit Fabrum de Oinvilla.

De Perrot Oin qui ocist le Fevre de Bourneville, dont pés dut estre feste par congié du viconte, par deniers que il en ot si com l'an dit, et le dut ledit viconte delivrer de la prison par plege.

Respont le viconte et nie que riens il n'an ot ne autre pour li, ne point ne an delivra ne congié de pés faire n'an dona ainz le delivra le serjant du leu, cors pour cors et par pleges, quant il fu en la prison et ne estoit pas le viconte ou païs et pourchasa le ballif qui ore est vers les mestres de l'Eschequier congié de pés faire parce que il trouva par tesmoig de bone gent que ledit Perrot ocit le Fevre, a qui serjant il estoit, seur soi deffendent, et que le Fevre l'avet feru 2 cos de 1 coutel, la ou il fuiet devant li, avent que ce Perrot se retournast, par quoi il semble au viconte que l'an ne l'an puisse ne ne doie riens demander, et de ce peut bien le roi savoir la verité se il li plest. Et dit le viconte par ces resons et par les autres que il a dites par desus et ces que l'an li met sus de doner congié de pes fere de cas de crime, que il n'est pas tenuz de pes fere ne n'est tenuz a mestre sen en enqueste, car il i pouret avoir peril de cors.

I. Thomas le Caron, tesm. juré requis, dit par son serement que Perrot Oin tua Guillaume Le Fevre, si com l'an dit, a Borneville, et fu pris il, celi Perrot, et amenez en la prison du Pont Audemer. Req. du tens, dit que 2 anz a, si comme il croit. Requis du jour, dit que il ne s'en recorde mie. Req. commant ledit Perrot fu delivré de la prison, dit que il ne set. Req. se il set qui le delivra, dit que non. Req. se il set que le viconte en eust ne don ne loer pour la delivrance, dit que oïl, de celi Perrot si com il croit, mes il ne le set autrement.

II. Pierre le Tourneur .

III. Pierre le Galais .

.

IV Enjorent le Telier .

V Richart Buquet .

[En marge :] Nichil probatum est contra vicecomitem.

G. De Gaufrido, serviente de Bernaio, qui interfecisse dicitur in sua sergenteria.

De Geffroi, le serjant de Barnai, qui ocist une home, si com l'an dit, en sa serjanterie, dont ledit Gefroi fut pris au Pont Audemer, et que le viconte delivra par deniers, si com l'en dit, pour ce qu'il i edast a une enqueste qui en fu feste.

Respont le viconte que riens il n'an ot, ne autre pour li, ne de l'anqueste, il ne oï que 2 tesmoinz, present le ballif, qui ore est, et fu en la chapele de la Magdalene du Pont Audemer, auquel ballif le dit des tesmoinz fut recordet, les tesmoinz presenz, et fist le ballif le seurplus de l'anqueste, et quant ledit Geffroi fu delivré de la prison du Pont Audemer, ce fu du commandement du ballif, par pleges, cors pour cors, a venir as asisses, a fere et a repondre ce que il devroit du fet que l'an li metet sus, et de ce peut le roi fere savoir la verité quant li plera, ne le viconte ne semont pas les enquestes des genz en tel cas, ainz les semonnent li serjant. Par quoi le viconte dit que il n'est de rien tenuz en cest cas, ne n'est pas tenuz en mestre sen en enqueste, car il i pourret avoir peril de cors.

I. Hebert le Blont, tesm. juré, requis, dit par son serement que Geffroi le Serjant de Bernai fu pris par soupecon de murtre et dona au viconte 20 l. pour avoir sa delivrance. Req commant il le set, dit que ou tans que il fu pris, il estoit en prison et oï que ledit Geffroi dist et proia a Geffroi le geolier du Pont Audemer qu'il alast parler au viconte et qu'i li promeist 20 l. en don de par li, et que le viconte se vousist travellier a sa delivrance. Req se il set que le viconte eust les 20 l., dit que oïl, si com il croit, mes il ne le set autrement, ne il ne fu pas au paiement fere. Req combien il a que ce fu, dit entour 3 anz. Req se il set que nul oïst cele promese autre que li, dit que non. Req se il set commant ledit Gefroi fu delivré, dit que le ballif de Roen qui ore est le delivra par pleges en plene assisse, a revenir par devant toutes les foiz que metier en seroit, et fu ci qui parle present quant ledit Geffroi fu delivré. Req se il en set plus, dit que non.

II. Gefroi Le Geolier, tesm. juré, requis, dit par son serement que il ne oï onques parler de don ne de promesse, que le viconte eust pour delivrer ledit Geffroi. Req se il set que le viconte en eust onques nule chose quele que ele feust, dit que non, et dit cil qui parle que aucunes foiz li dist et proia ledit Gefroi, serjant de Bernai, que il parlast au viconte et li deist de par li que il travellast en sa delivrance, et il li donret volentiers du sien et ledit geolier li respondi que il ne s'en entremetret ja et qu'i n'en oseret parler. Req qui delivra ledit prisonnier, dit que du commandement au ballif, si com il croit, le viconte le delivra par pleges et fu cele delivrance feste entour 2 anz a, si com il se remenbre. Req se il en set plus, dit que non.

[En marge :] Casus non est probatus contra vicecomitem.

H. De homine quem Guillotas Cardinel debuit interficere a Hautvile.

De 1 home que Guillot Cardinel, clerc, dut tuer a Hautville si com l'an dit, dont le viconte dut prandre loer pour tenir le en pés.

Respont le viconte et nie que il n'an ot rien, ne autre pour li, mes quant ledit clerc dut avoir fet le fet, il s'en foui et s'a ala en Tunes ou il demoura 2 anz et plus, si com l'an dit, ne ne savoit riens le viconte que il feüst retournez quant les enquesteurs l'an enquserent ne le serjant ne li fist asavoir, ne le clerc n'avet riens, ne tere ne autre chose, si com le serjant et les bones genz du païs le tesmoignent, et a eu le viconte deffense en eschequier que il ne meist mein en clerc, se il ne estoit pris en present mefet, par quoi i li semble que l'an ne l'an peut ne ne doit riens demander et nie bien que onques riens ne en ot, ne autre pour li, ne ne estoit le clerc seü de nuli devant le viconte ne devant autre que il seüst, ne ne fu onques le clerc suivi de la mort de celi qui fu ocis, ne a asise ne allieurs, et se le clerc feüst en cas qu'i deus estre pris, puis que il retorna de Tunes, si n'est ce pas la defaute du viconte, mes du serjant du leu en qui serjanterie le clerc demeure qui bien devoit savoir ou il demeuret, par quoi le viconte dit que il n'est pas tenu a mestre seu en enqueste, car il i pouret avoir peril de cors.

I. Geffroi Fouterel, tesmoin juré et requis, dit par son serement que Gilebert aus Chantes fu tué en la parroisse de Hauville et le tua Guillot Cardinel, si com la renommee du païs dit, car il ne le vit pas. Req du tans, dit qu'il a bien 2 anz, si com il croit. Req du jour, dit le jour de une Mi Aoust. En apres il dit que le viconte prist les biens audit Guillot et a ses freres et les enporta. Req quieus biens, dit : blez. Requis de la value des blez, dit que il n'an set rien. Req commant il set que le viconte prist les blez, dit qu'il oï dire. Req a qui il oï dire, dit : a pluseurs, dont il ne se recorde des nons, et dit que toute la renommee du païs le disoit au tans de lors, et dit que le viconte ne rendi puis les biens, si com il croit. Derechief il dit que le viconte leva ou fist lever de 10 homes ou de 12 de la parroisse de Hautville de chascun 10 s. pour ce que il n'aveint pas pris le maufeteur desus dit. Req commant il le set, dit que il oï dire a Guillaume Harel, a Thomas Quarré et a pluseurs autres dont il ne set les nons. Req se il set que le viconte en eust onques ne don ne loer pour deporter le maufeteur, dit que non, si comme il croit. Derechief, il di que le maufeteur desus dit s'en foï du païs apres le fet et revint areres bien entour 4 anz a, et i est encore demourant sanz ce que le viconte le prist ne ne feist prendre, ne ne le meist a achoison du fet desus dit. Requis se il en set plus, dit que non

II Guillaume du Reest...

III Guillaume Harel...

IV Thomas Mal Conte et Raoul Marc .

[Note :] Non est probatum contra vicecomitem.

I. De Richart de la Court, clerc, qui dut ocirre Sehyer Davy a Breetot, et dont le viconte dut avoir deniers pour tenir le en pés, si com l'en dit.

Respont le viconte et nie que riens il n'en ot ne autre pour li, einz se trest le clerc arieres qui dut avoir fet le fet, que l'en li mist sus, et pourchaça amonitions de l'official de Roan a amonester le viconte de rendre li ses biens que il tenet pour l'occasion de lui, ou a dire reson devant l'official, pour quoi il n'i seroit tenuz. Le viconte garda son jour et dist a l'official que il teneit les biens au clerc pour 1 home que il avet ocis a Breetot, si com les genz du païs tesmoignent, laquele chose le clerc nie mout bien et disoit que le viconte li metoit sus et que nul ne l'en suivet fors que lui. Et pour ce que l'oficial vit et sot que il n'aveit suite que du viconte, il le contreint a rendre ce que il connoisset que il tenoit du clerc, pour l'occasion de luy, et de ce peut li rois fere aprendre la verité se il est einsi ou non. Et ofri l'oficial a fere dret du clerc, qui estoit de sa diocese, en tel cas se nul l'en vouloit suivre, ne nus ne l'en suivi devant l'oficial qui estoit son juge quant a ce ; par quoi le viconte dit que il n'est pas tenuz de ce cas a mestre sen en enqueste, car il i poureit avoir peril de cors.

I. Gautier Morin, tesmoin juré, requis, dit par son serement que Sehier Davi fu tuez en la parroisse de Breetot et le tua Richart de la Court. Req du tans que ce fu, dit entour 2 anz a, et dit que ledit Richart fu pris, et croit que le viconte le delivra par loer que il en ot. Req. quel loer et combien il en ot, dit que il ne set, mes il croit mieuz que il en eust loer que autrement. Req. qui esmeut a ce croire, dit que la commune renommee de païs est tele, et pour ce croit il que ce soit voier car il n'en set riens de certen. Req. se il en set plus, dit que non.

II. Raoul des Mares

III. Roger Hamon

IV. Herbert Baudouin

V. Nichole Julian .

[En marge :] Non probatur quod vicecomes habuit mercedem pro casu isto preter quam de fama.

J. De Robert Poiletat qui fu pris pour soupeçon de larrecin que le viconte delivra par deniers que il en ot, si com l'an dit.

Respont le viconte et nie que riens il n'en ot ne autre pour li einz fu delivré par enqueste feste par coutume de terre, et oïe avesques le viconte par 4 chevaliers et jugee, ne le viconte ne semont pas les enquestes, par quoi l'an ne le peut ne ne doit avoir soupeçonneus et de ce peut le roi fere aprendre la verité quant li plera.

I. Raoul Boutin, tesm. juré, requis, dit par son serement que le viconte prist par pluseurs foiees et tint en prison Robert Poiletat, comme soupeçonneus de larrecin, et dit que le viconte ot de celi Robert 40 l. et plus de rachat que il ne le pendist. Req. commant il le set, que il eust les 40 l., dit que par ce que il veest souvent ledit Robert en prison au Pont Audemer pour soupeçon de larrecin, et puis le delivret le viconte sanz enqueste, par quoi il croit que ce feust par grant loer. Req par quantes foies ledit Robert est esté pris, dit que il croit que il est esté pris chascun an une foiz puis que le viconte fu viconte et dit que iceli Robert Poiletat estoit larron si com la renommee du païs le disoit.

II. Symon le Rous

III. Godefroi Boucher

[En marge :] Non est probatum ad plenum quod vicarius habuit dictas 40 libras, tamen testes deponunt super hoc de credulitate, pro eo quod ille Robertus pluries fuit captus et pluries liberatus per vices.

K. De Henri Agace qui fu mis en prison a tort si com il dit.

Respont le viconte et connoist bien que il le mist en prison pour ce que il se prist devant li au prevost de Brionne et li estreint la goule mout durement, et les denia le viconte mauves ribout et menaça a ocierre pluseurs foiz par devant bones genz et l'amanda tout connaissenment en l'asise devant le ballif et en fu mis a 10 l. de amande, dont le ballif li quita puis 100 s. pour ce que il estoit povres et convenoit que si plege poiassent pour li.

I. Estienne Goist, tesm. juré, requis, dit par son serement que le viconte mist en prison Henri Agace pour le contanz qui estoit entre il, celi Henri, et Estienne Char de Blé, prevost de Brionne, et compere au viconte, et fist mestre le dit Henri en cep, les meins liees. Req commant il le set, dit que il fut present a ce. Req. se il le vit ou cep les meins liees, dit que oïl. Req. du tans, dit entour 2 anz, et dit que le viconte fist amener ledit Henri en prison au Pont Audemer et le fist mestre en la fosse aus larrons. Req. combien il i fu, dit par 6 semeinnes, si com il croit. Req. se il set la cause pour quoi le viconte mist en prison celi Henri, dit pour ce que il prist par le manton le prevost de Brionne et pour ce que il avet oï dire que il avet desmenti le viconte. Derechief, il dit que ledit Estienne a fet en sa meson une bone (?) du quarrel le roi qui estoit cheet de la tour de Brionne. Req. commant il le set, dit que il a veu ledit Estienne qui amenet le quarreaus et les fesoit ouvrer et dit que ce estoit par le congié au viconte. Req. commant il le set, dit que par ce que le viconte estoit present, et nul semblent ne fesoit.

II. Raoul Pinot

III. Nigaise Loquet, ... cf I fors de tant que il ne oï pas que ledit Henri desmenti le prevost.

Le viconte connoist bien que ledit Estienne, prevost de Brionne, ot du quarrel de la tour de Brionne, si com il oï dire, mes il ne en fi onques enqueste, ne n'an leva amande. Derechief i fu demandé au viconte combien ledit prevost aveit eu du quarrel dit que il ne set et toutes voies croit il, se il en ot, qu'il en ot mout pou, et fist le viconte ceste connoissance puis que li tesmoig furent receuz.

L. De Geffroi le Munier et de sa fame qui furent tuez en la parroisse de Seint Symeon, dont Robert et Richart Giraut freres furent soupeçonnez et mis en prison et les dut le viconte delivrer par grant loer que il en ot, si com l'en dit.

Respont le viconte et nie que riens il n'an ot et ne autre pour li et dit que Richart Giraut, qui estoit clerc, se delivra par l'eglise, et Robert Giraut fu delivrez par enqueste oïe par coustume de terre et jugee par 4 chevaliers, qui esteint presenz ovesques le viconte a l'anqueste oïr, ne le viconte ne semont pas les enquestes, par quoi le an le doie avoir soupeçonneus.

I. Raoul du Chemin, tesmoig juré, requis, dit par son serement que Geffroi le Munier et sa fame furent tuez en la paroisse de Seint Symeon. Req. combien il a, dit : entour 5 anz. Req. du jour, dit : a 1 samedi a seir. Req. de ceus qui firent ce fet, dit que il ne set, mes il dit que cil en furent soupeçonnez, a qui leur eritage dut eschaer. Req. de ceus qui en furent soupeconnez, dit : Richart Giraut et Jehan son frere. Req. savoir mon se le viconte en ot onques ne don ne loer, dit que il, croit mieuz que il en eust loer que non, mes il n'en set rien de certen, car il ne le vit ne n'u set.

II. Guillaume Roussee

III. Geffroi le Novel .

IV. Roger le Novel [id.]

[En marge :] Casus iste non probatur nisi de credulitate et fama.

M. De 2 larrons qui furent jugez au Pont Audemer et menez pendre, 1 en eschapa et le set le viconte et n'an fist plus, si com l'en dit, et semble que li serjant le consentissent par ledit viconte.

Le viconte respont et nie que par son asentement ne fu ne riens il ne en sot en la journee, car il tenoit encore ses plez qui durerent jusques a la nuit, ne li serjant ne retournerent pas a li, et puis que il le sot il les en blasma et le montra au ballif qui ore est, en leur presence, en la premiere asise ou il vint apres ce, et le ballif les blasma de ce que li serjanz devant diz les meneint pendre a pié, et leur commanda que il ne en menassent jamés nul pendre, se il n'esteint liez seur cheval ou en chareste, et se li larron eschapa par la defaute de serjanz et des bourjois de la ville, en qui garde et en qui conduit li larron esteint, par le ban et par le commandement le roi, ovesques les serjanz, liquieus bourjois ne s'en murent onques, ne ne firent leur pouer du prendre, einz en sont tenuz en pés, dit le viconte, que l'an ne l'an peut ne ne doit rien demander, ne mes a ceus qui esteint la ou il eschapa, et que il n'est pas tenu a respondre de autre defaute ne de autrui courpe, par quoi il dit que de cest cas il n'est pas tenu a mestre sen en enqueste, car il i pouret avoir peril de cors.

I. Monsegneur Guillaume Ferrant, chevalier, tesm. juré, requis, dit par son serement que il ot larrons jugez au Pont Audemer, et dit que 1 en eschapa, quant l'an le menet pendre. Req. commant il le set, dit que il oï dire a ceus qui les aveint menez pendre Requis qui i furent ceus qui les menerent pendre, dit Guillaume Poisson, Brouados et autres. Req. se il en sont corpables, dit que oïl, pour ce qu'i les meneint pendre et il leur eschapa, ne il ne le suivirent mie, ne ne firent ne cri ne haro. Req. se il eschapa par le consentement de nul des serjanz de la ville, dit que oïl et que ce fu par le consentement Guillaume Poisson, car le larron estoit parent a la fame Richart de Beuseville, qui est mestre audit Guillaume Poisson. Req. commant il le set que ce fu par le consentement audit serjant, dit que par ce que il oï dire a pluseurs, des nons des quieus il ne se recorde. Requis se le viconte en est courpable, de ce fet, dit oïl, si com li semble, car il sot bien le fet, et onques semblent n'en fist. Req. du tens que ce fu fet, dit : 1 an ot en quaresme novelement passé. Requis du jour, dit : a 1 vendredi, si com il se remenbre. Requis se il en set plus, dit que non.

II. Robert aus Vibez ... et Robert le Coup, qui estoit valet Richart de Beuseville ...

Req. se nul des serjanz en estoit courpable, dit que oïl, si com il li semble, en tant com il les deveint mener, et 1 leur en eschapa en une vanele, ou 1 home ne pouet pas bien aler se il ne se tournast de couté, et onques semblent n'en firent, ne haro, ne en crieurent ...

III. Estienne le Guerin, cf I

IV. Geffroi le Geolier...

N. Du prieur de Borc Achart qui demandeit a avoir la delivrance de son pasturage a ses pors en la forest de la Londe ou Champ Baudri, les quieus pors Pierre de Gaengni, verdier des Molineaus en celui tens, i avet pris et arrestez a tort, si com le prieur disoit, et le verdier des Molineaus disoit encontre, que ce ert 1 defens ou nul n'avoit riens, fors que le roi. Les mestres de l'Eschequier, a la plainte du prieur et en la presence du verdier, commanderent au ballif a enquerre se ce ert deffens ou non, quar le prieur disoit que il i avoit touz jourz usé, comme 1 des autres frans, a envoier ses pors ou pasturage en celui leu, et avoit franchise par point de charte en la forest, si com il disoit. Le ballif commanda au viconte de Pont Audemer que il en enqueist et commant le prieur en avoit usé, et le viconte ala sus le leu avesques Baudeit, adonc verdier des Molineaus, et ovec bien 60 homes, chevaliers et serjanz de la forest, et autres frans homes et coutumiers touz du rain de la forest et semons par le verdier et par les serjanz du leu. Et fu trové par l'acort de touz et par leur seremenz que les frans de la forest envoient leur bestes en celui qui est appelé Champ Baudri, don le contanz est toute l'esnee, excepté le mois de moy que les bestes faonnent et les coutumiers i envoient les leur bestes des la mi stembre jusques a la mi marz. I leur fu demandé se le prieur avoit acoustumé a envoier ses pors en celui leu comme les autres frans, il disdrent que oïl, mes l'en les i preneit touz journ, et touz jourz le prieur les delivret. I leur fu demandé conmant le prieur les delivret, il disdrent que il ne saveint. Encore leur fu demandé se il en virent onques au prieur ne a son commandemant faire amande, disdrent que nennin, mes il dient que il virent que Pierre de Gaengni mist le prieur en amande et en derres du prieur pour la darraiene prise de ses pors pour quoi li contanz mut, et fist le verdier jousticier le prieur pour l'amande et prendre les chevaus de sa chareste, don le prieur ballia audit verdier 1 henap d'argent, qui encore est tenuz, pour avoir de ses chevaus la recreance, et fu trouvé par 2 autres tesmoinz, c'est a savoir par le clerc qui a esté aus verdiers lonc tans et est encore, et par 1 autre home, que ledit prieur fu pleintif au roys Loys, qui estoit au Bec en celui tans, de Jehan de Brie, verdier adonques des Moulineaus, et du verdier de Brotonne qui li aveint arresté son pasturage de ses bestes es dites forez, et oïrent et virent que ledit Jehan, verdier des Moulineaus, rendi en pleins plez, du commandemant le roy, si com il disoit au prieur, son pasturage en la forest desus dite. Et toutes ces choses desus dites, regardees et oïes, le ballif rendu au prieur sa seisine tele quele, par moz de l'enqueste, si com il est dit desus, furent tesmoignez au ballif par une partie des chevaliers et des serjanz et de autres de l'anqueste qui furent a ce fere, et fist puis le ballif le prieur ajourner contre le roi sus la proprieté, et veust bien le viconte que le ballif set oïz, a savoir mon se il est ensi ou non.

I. Thomas du Bois Bernart, chevalier, de l'aage de 70 anz, si com il dit, tesmoig juré et requis, dit par son serement que le prieur de Boc Achart demandeit a avoir 1 usage en la forest de la Londe, ou tans au roi Loys. Comandé fu a mestre Richart du Fai que il enqueïst de l'usage audit prieur, il en enquist et fu cele enqueste feste au bois Gouet ou cemetiere, et dit cil qui parle qu'il i estoit present et en fu receuz a tesmoig. Ledit Richart trouva par l'anqueste que ledit prieur n'i avoit nul droit. Et furent bien 60 ou plus qui tuit tesmoigneint que le prieur n'avoit droit en l'usage desus dit. Req. commant il set que il portassent tesmoignage contre ledit prieur, dit que il oï que l'un le disoit a l'autre, ou cemetiere desus nommé, le jour que l'anqueste fu feste, et diseint l'un a l'autre que mout se mervellient don le prieur demandet usage en il celi leu, qui est apelé Champ Baudri.

Req. du tans, dit entour 15 anz ou 16, si com il croit. En apres, il dit que une enqueste fu feste dudit usage, bien a 3 anz ou plus, en la parroisse de Nostre Dame de Chaumont, devant la meson Chopillart, a la requeste dudit prieur, et demandeit a avoir l'usage en ladite forest, si com il est dit par desus. Et dit cil qui parle que il a 12 serjanz et regardeurs de ladite forest, 6 de fié et 6 qui ont la franchise de la forest pour estre regardeurs de la forest, et il cil 12 sont tenuz a savoir les usages de la forest et a savoir quel dret chascun usagier il det avoir et furent treit a tesmoig des 12 desus diz li 11 a ceste dareniere enqueste, laquele enqueste fu feste en la parroisse de Nostre Dame de Chaumont devant la meson Chopillart, et disdrent par leurs seremenz touz 11 que il celi prieur de Boc Achart n'avoit usage ne coutume ou leu desus dit, ne droit ou demander, et est cil qui parle 1 des regardeurs de la forest par la franchise que il en tient du roi. Et fu l'anqueste darrenement feste dudit prieur par Jehan de Nenni, viconte du Pont Audemer, ou tans de lors, et apres ces 11 tesmoinz desus nommez, receus et examinez par ledit viconte, fist venir ledit viconte genz estranges, jusques a 24 personnes, qui de riens ne esteint tenuz, a la forest, et par le tesmoignage de ces 24 homes, il delivra au prieur l'usage qu'il demandeit. Requis commant il set que il delivrast audit prieur ledit usage par le tesmoig de 24 homes, dit qu'il i fu present, et dit cil qui parle que le viconte ot 50 l. dudit prieur pour li mestre en l'usage qu'i demandeit. Req. commant il le set, dit que il oï dire a la commune renommee du païs, ne autrement il ne le set. Requis se il en set plus, dit que non.

II. Guillaume Doucher, serjant fiefié de la forest de la Londe, de l'aage de 36 anz, si com il dit, tesmoin juré et requis, dit par son serement que ou tans au roi Loys le prieur de Boc Achart demanda a avoir usage en la forest de la Londe. Commandé fu a mestre Richart du Fai que il en enqueist, il fist l'anqueste et trouva que le prieur n'i aveit nul droit. Req. commant il le set, dit que il le set par ce que il est serjant de fié de la forest et demourant sus le leu, et ne vit onques que se le prieur feust trouvez usant en ladite forest, ne li ne sa gent, que il ne feust pris et reinz ausi comme 1 autre home estrange qui point d'usage n'areit en la forest, et dit cil qui parle qu'i fu a l'anqueste desus dite et en fu receuz a tesmoig et fu l'anqueste contre ledit prieur. Et ce dit il par son serement. Req. du tans que l'anqueste fu feste, dit entour 16 anz, si com il croit Requis du leu ou l'anqueste fu feste, dit au Bois Goet, au cemetiere. Et dit cil qui parle qu'il ot bien 60 homes apelez a cele enqueste et tesmoignerent tuit contre le prieur devant dit. Et dit que il oï que il diseint l'un a l'autre que mout se mervelleint dont le prieur demandet usage en ladite forest, que il n'i avet nul droit en demander ledit usage. Req. du darenier enquest de l'usage desus dit, que le viconte fist, dit que il n'en set rien, car il estoit en la voie de Seint Jaque au tens de lors, mes il oï dire, quant il fu revenuz, a ses compaignons, serjanz de ladite forest, que cest enquest darrenier fu contre ledit prieur de ce que li veeurs et li serjanz de la forest disdrent par leur seremenz. Et apres ce, le viconte apela autres gens estranges qui de riens ne esteint tenuz en la forest, et par leur tesmoignage il mist ledit prieur en l'usage qu'il demandeit, et dit cil qui parle que le viconte ot 50 l. du prieur pour mestre le en l'usage qu'i demandeit, si com il a oï dire a la commune renommee du païs, et par ce il le croit. Requis se il en set plus, dit que non.

III Robert Chopillart, veeur de la forest de la Londe, de l'aage de 40 anz,... Boc Achart, a monsegneur cf I et dit... que se celi prieur ne autre pour li feust trouvé usant en la forest desus dite, il fust pris et reint ausi comme 1 autres hon estrange qui riens n'eust en la forest.

IV. Jehan Maubon, veeur de la forest de la Londe, de l'aage de 50 anz, ..., dit... que le prieur de Boc Achart n'a point de usage en la forest de la Londe. Req. commant il le set, dit que il i a veu prendre les bestes audit prieur et en esteint les amandes levees, et dit cil qui parle qu'i oï dire par mout de foiz a son pere, qui estoit veeur de ladite forest, que le prieur desus dit n'aveit ne usage ne coustume en la forest desus dite, ne pour li ne pour ses bestes, et aveit bien quant il mourut, le pere audit Jehan qui parle, 80 anz et plus. Req. se il set que le viconte eust du prieur devant dit ne don ne loer pour li mestre en l'usage qu'i demandeit dit oïl, 50 l., si com il a oï dire a la commune renommee du païs. Requis du tans que le viconte mist le prieur en l'usage desus dit, dit entour 3 anz. Requis se il en set plus, dit que non.

V. Colin le Blanc, serjant fiefié de la forest de la Lande, de l'aage de 40 anz, ... cf I.

VI. Robin le Bourguegnon, serjant de fié de la forest de la Londe, de l'aage de 24 anz, ... cf I, et dit que il ne fu pas au premier enquest.

VII. Monsegneur Arnoul des Haies, chevalier, veeur de ladite forest, cf I, et dit que du premier il ne set rien, cat il n'i fu pas.

VIII. 9 Mestre Richart du Fai dit que il fist une aprise par le commandemant aus mestres de la court, de l'usage devant dit, et dit que il ne trouva pas par l'anprise qu'il en fist que le prieur i eust droit, ne possession nule qui li deust valoir, si com li semble. Et fist ledit mestre Richart cele dite aprise au Bois Gouet, au cemetiere, et la fist par grant planté de bones gent bien creables et enciens, si com il tesmoigna par devant nous, et a grant tans que cele aprise fu feste, me il n'est pas recordenz de l'esnee.

O. De Raoul Beliart, d'Espaigne, qui fu pris pour soupeçon de larrecin, dont le viconte dut avoir 100 s. et la vicontesse 50 s. si com l'an dit, pour fere li avoir une anqueste a sa voulenté Respont le viconte et nie que li et sa fame n'en orent onques riens, ainz fu ledit Raoul delivrez par une enqueste feste par coustume de terre, par 24 homes, et oïe en la presence de 4 chevaliers et delivree par jugement, ne le viconte ne semont pas les enquestes, einz les semonnent les serjanz des leus et des parroisses, dont ceus qui sont tenuz en prison les requierent, par quoi il dit qu'il n'i est de riens tenuz, ne n'est pas tenuz a mestre sen en enqueste, car il i pourret avoir peril de cors.

I. Mahi Feré, tesmoig juré, requis, dit par son serement que le viconte prist Raoul Beliart d'Espaigne pour larrecin de pein, de ceintures et de Joiaus que il avet enblez. Requis combien il a que il fu pris, dit : entour 3 anz a, si comme il croit, et dit que la vicontesse ot pour la delivrance dudit Raoul 50 s. Requis commant il le set, dit que il le set par ce qu'il oï dire a la personne de Marteinville, qui aveit poiez les 50 s. a la vicontesse, si com i li dist. Req de ceus qui esteint quant il oï dire a la persone, dit : Perrenele, serorge de ladite persone, et pluseurs autres dont il ne li menbre des nons. Requis du tans que il oï dire, dit : entour 3 anz a. Req se il set que le viconte eust 100 s. du dit Raoul Beliart pour fere li enqueste a sa volonté, dit que il n'en set rien. Req se il en set plus, dit que non.

II. Guillaume Gloriant

III. Robert Tehi

IV. Raoul le Conte

[En marge :] Nichil est probatum contra vicecomitem de mercede sibi imposita.

P. De 2 larrons qui furent pris a Esquaquellion, dont l'un fu penduz et l'autre eschapa par deniers et par une fause enqueste que il i fist avoir, si com l'en dit, et le serjant dut avoir 50 s.

Respont le viconte et nie que il n'en ot riens ne autre pour lui, einz orent li dui larron leur enqueste a une journee en la presence de 4 chevaliers qui oïrent que ce que les enquestes disdrent avec le viconte, c'est a savoir Roger de la Haie, Jehan du Bost, Thomas de Brotonne et Richart d'Onnebaut, chevaliers, et fu l'un des larrons condampné par l'anqueste et l'autre delivré par l'anqueste et par jugement ; et se le serjant prist deniers pour mauvestié fere, don le viconte ne set riens, il n'est pas tenu de respondre, ne le viconte ne semont les enquestes, ne nul de ceus a qui il eust mefeit ne nul de leur lignage n'en a esté pleintif ne ne s'en plaint. Par quoi le viconte n'est pas tenu a mestre sen en l'anqueste, pour ce que il i pouret avoir peril de cors.

I. Thomas Ferrant, tesmoig juré, dit par son serement que le viconte fist prendre a Esquaquellon 2 larrons, don l'un fu penduz, et l'autre fu delivrez par une fausse enqueste, que le viconte li dut fere avoir, et dit que le viconte ot 9 l. pour la delivrance du larron. Req commant il le set, dit que il oï dire a Maçot, serjant du Pont Audemer, et le li dist celi Maçot a Montfort, chiés Viton, et que ledit Maçot en ot 50 s. pour semondre l'anqueste. Req commant il set que Maçot eüst ces 50 s., dit que Maçot meimes le li dist a Montfort en la meson dudit Viton, et parleint de ce larron qui aveit esté delivré et s'enz mervellent mout durement. Req du tans, dit entour 3 anz. Req du jour, dit l'andemein de Noel. Requis se il en set plus, dit que non.

II. Guillaume Ferrant, ... dit ... que 2 larrons furent pris en la parroisse d'Esquaquellon pour blez et pour autres choses qu'il aveint emblez entour 5 anz a, ou la entour, en apres il dit que l'un des larrons fu pendu et l'autre eschapa, par enqueste que le viconte fist semondre a la volenté du larron, par loer que il en ot. Req commant il set que le viconte li feist semondre l'anqueste a sa voulenté et pour loer, dit que il oï dire a 1 serjant de la ballie qui aveit non Maçot, a qui le viconte aveit comandé que il semonsist l'anqueste tele comme les amis au larron direint. Req du leu ou le serjant le li dist, dit en la meson audit chevalier. Req de ceus qui i esteint quant ledit serjant li dist, dit que eus deus tant seulement, car il i dist a grant conseul, et dit celi chevalier que ledit serjant li dist que pour ladite enqueste fere, le viconte aveit eu 9 l. et le serjant 50 s. Req se il en set plus, dit que non.

[En marge :] Nichil probatur contra vicecomitem de proposito, tamen isti duo testes dicunt quod audiverunt dici a Maçoto serviente vicecomitatus ea que sunt in petitione contenta.

Q. Du bois Robert de Breetot, qui dut estre venduz 40 l. et sanz congié, dont le viconte dut avoir la moitié et ledit Robert l'autre.

Respondi le viconte et nea que riens il n'en ot, ne autre pour li et dist quant les enquesteurs l'en enquserent que il ne savoit que ce estoit par ce que il le contreigneient a respondre despourveument, ne ne pouet avoir repit de soi consellier, ne de regarder ses escriz, tout le requeïst il, mes apres ceste response feste, le viconte trouva une lestre seelee du seel au ballif qui ore est, et connut bien le clerc au ballif que il aveit feste et iert contenu que le ballif avoit donné audit Robert congié de 30 livrees de bois vendre, et cil Robert n'en vendi que 20 livrees, que le viconte seüst, et fu vendu a monsegneur Guillaume Malest, segneur du Boc Achart, lequel chevalier dist au viconte, seur la foi et seur la leauté que il devoit au roi, que plus il n'an avoit acheté, ne autre pour li, et Robert dist par son serement que plus il n'en avoit vendu ne a li, ne a autre et envoia le viconte cele lestre a montrer a monsegneur Gui Le Bas et a monsegneur Guillaume de Couardon, qui esteinz venuz a Pont Audemer, qui la commanderent a ballier aus enquesteurs. Si requiert le viconte que la lestre veue et le ballif et son clerc oïz a tesmoigner la, que il soit seu par le serement du vendeur et de l'acheteur, se i fu ensi ou non, ne se le viconte se consenti que il en vendist plus au chevalier ne a autre.

I. Robert de Bretot, ..., dit ... que il vendi 20 livrees de son bois a monsegneur Guillaume Malet par le congié au ballif de Roan, et enporta ledit Robert les lestres au ballif a Jehan de Nenni, viconte du Pont Audemer au tans de lors. Requis se le viconte en ot riens par la reson de la vente dudit bois, dit que non. Et dit cil qui parle que ledit Guillaume Malet tient par deniers li tel droit comme li rois doit avoir au 20 livrees de bois desus dites. Requis commant il le set, dit que iceli chevalier qui le bois ascheta le li a dit, et li dist qu'i les baudret pour le roi au ballif de Roan. Req du tans que le bois fu vendu, dit que il ot un an le jour de Pasques Flouries novelement passees. Req se il en set plus, dit que non.

II. Robert Buignet, ..., dit ... que Robert de Bretot vendi 20 livrees de son bois a monsegneur Guillaume Malet, chevalier. Req se il set que il en vendist que ces 20 livrees, dit que non. Req. se il set que le viconte en eust ne don ne loer pour la vente du bois desus dite, dit que non. Requis du tans que le bois fu vendu, dit : entour Pasques novelement passees ot 1 an.

III. Raoul Martin .

IV. Mahi Bueselin, ... cf I.

V. Estienne Bueselin

VI. Richart Morice

[En marge :] Nichil probatum est contra vicecomitem

R. De l'estanc de Montfort dont le viconte ne rent riens, ainz i fest peschier a son eus, si com l'en dit, et que le verdier ou tans qu'il estoit en sa garde en rendoit au roi de 3 anz en 3 anz 100 s. ou 4 l., si comme il connut devant les enquesteurs.

Respont le viconte et dit que il le vendi une foiz et n'i aveit point de poisson blanc, fors que 1 poi de roces et anguiles, car l'estanc est tout plein de fant et de ordure, et en conta le viconte au ballif 6 l. pour le roi a l'Eschequier de Pasques M. CC. LXXII, et apres ce le viconte i fist mestre luz que il i envoia du Pont Audemer et poisson de Seinne jusques a 60 soudees la nee, apres ce que le poisson de Seinne i fu mis il n'i parut rien. Le viconte douta que il feust emblez, il fist mener

1 batel a peeschier et 1 peescheeur o tout 1 travial pour savoir que le poisson estoit devenuz, l'an ne pot point trouver du poison blanc, fors que des luz 1 poi. Le viconte ne se tint pas a poié a tout, ençois fist l'estanc rompez, ne onques ni pot l'en point trouver de poisson blanc fors que luz et 1 poi de tanches et de roces que le viconte i avet fet mestre. Il fist arrere la chauciee de l'estanc refermer et le poisson mestre arreres fors que aucunes des roces et 1 lucel qui furent bleciéz au prendre, et retint le viconte le lucel et dona les roces a ceus qui li esdeint l'estanc a garder cele nuit, et ne pot onques le viconte savoir que l'autre poisson fu devenuz se les luz ne le mengerent. Et encore dit il que l'estanc vaut mieuz que il ne fist onques mes, et veust bien que il soit seüz se il est enpirez ou non et de rendre l'enpirement se il est trouvez et d'amander a la volenté le roi, ne mestre Richart du Fai ne se recorde mie que le verdier en contast onques rien que que il die.

[Manque la fin du rouleau]