[1]

Ph.. Dei gratia Francorum rex .. ballivo Caleti salutem. Mandamus tibi quatenus inquiras diligenter utrum fructus et exitus terre liberorum quondam Gaufridi Martelli, scutiferi, minus valeant in presenti quam valerent tempore quo Johanna, uxor Ysembardi de Lindebeuf, ratione ballii dictorum liberorum ad nos spectantis, ad firmam acciperet dictam terram, et valorem dicte terre, et causam dicte declarationis, videlicet utrum per culpam dicte Johanne aut vitio rei aut alias deteriorata fuerit, nobis celeriter studeas per tuas litteras intimare. Datum apud Mediamvillam, die mercurii post festum Exaltationis Sancte Crucis, anno Domini M^o ducentesimo nonagesimo nono.

Tesmoinz attrez sus ce ou lieu ouquel ladite terre siet Jehan Henri, tesmoing juré et requis sus lesdites choses dit par son serement que de quatorze acres de terre assis en la paroisse du Bec aus Cauchois, desqueles il i a huit acres de preiz, qui furent prisiez pour chascune acre cinc solz de value ou temps devant ce que elles furent baillies a ferme, que ou temps present chascune acre ne vaut que trois solz. Requis comment il le set et pour quoi il le dit, il dit par ce que, ou temps que ledit Giefroi Martel mourut, par la mort duquel ladite terre vint par garde a la main nostre seigneur le roy, pour le labourage et pour le fruit elles valoient bien adonques les cinc solz de rente et pooit bien durer le compest et le labourage desdites terres duques a l'espace de cinc anz. Et dit ledit Jehan qui parle que deus acres et une vergie et demie qui furent prisiees l'acre a quatorze solz apres le temps dudit mort valoient bien tant ; et ou point d'ore l'acre ne vaut que dis solz. Requis comment il le set ne por quele cause, il dit que ou temps que ladite terre vint a la main le roy par garde, de la mort dudit Gifroi que l'acre valoit bien le pris de quatorze solz, et le dist par ce que elle estoit en bon compost, et de novel ostee de essart et pooit bien durer le bon compost duques a l'espace de sis anz, par quoi il dit que au jour d'ore la terre ne vaut que dis solz.

Item, trois acres et demie et demie vergie qui sont au Petit Val, qui fu prisiee l'acre a seze solz pour ce que elle estoit de novel mallee, il dit que quant a ore, elle ne vaut que treze solz l'acre, et dit que la malleure ne dut valoir que environ sis anz, et que le compost qui adonc i estoit la fist metre au pris dessus dit.

Item un moulin qui est en ladite paroisse fu prisié a quinze livres l'an, qui ne vaut quant a ore que douze lb. Requis pour quoi, il dit pour ce que il i a pou de baniers, et pour ce que dedenz la banleue d'ilec l'en a fet depuis deus moulins a vent, et n'est pas par defaut dudit moulin retenir.

Item une masure assise en ladite parroisse, qui fu baillié en la ferme a sept quartiers d'aveine par an, et par vint solz et une geline, lesqueles choses celui qui la tenoit en rendoit, qui l'a laissié la ferme durant, n'est prisié au jour d'ui valoir que seze solz par an, et est un an passé que ladite masure fu laissié.

Guillaume Vassal, tesmoign juré et requis sus les choses dessus dites, dit par son serement en toutes choses aussi comme ledit Jehan Henri, premier tesmoign dessus escript.

Pierre Henri s'acorde audit Jehan en toutes choses.

Jehan1 le Maschon, Jehan de la Mare, Roger le Merchier, Jehan Tybout, Roger de Periers, Ricart Tiebout, Ricart le Monnier, Robert le Merchier, et Renaut Lengleis, s'acordent en toutes choses aus diz Jehan, Guillaume et Pierre, sanz riens oster et sanz riens ajouster.

Item un moulin de ladite ferme qui est nommé le moulin assit fu prisié a douze livres par an quant il vint en la garde le roi, retenu de mises aus coustumes de la riviere, si comme Ricart de Sortenbosc, juré et requis sus les choses dessus dites, dit par son serement, et dit que au temps que icelui moulin fut prisié, quant la ferme fu baillié, valoit douze livres par an, et dit que quant a ore il ne vaut que dis livres et demie par an. Requis comment il le set et pour quoi, il dit ce : il dit que il le set par ce que trois moulins a vent sont fez de novel en la banleue d'ilec, ausquels toutes genz vont moudre qui adonc souloient aler par priert audit moulin.

Jehan Gouhier, Guillaume Olivier et Jehan Du Val, dient par leur seremenz en toutes choses aussi comme ledit Ricart de Sortenbosc, tesmoign sanz moien dessus escript, et sus ces choses et sus chascune soit fete et acomplie la volonté de nostre seigneur le roy et de son noble consel, sauves les resons lesqueles ledit vicomte i met par coustume pour nostre seigneur le roi qui teles sont :

Ledit Denis le Tavernier, viconte de Monsterviller, qui ceste enqueste fist au lieu et en la paroisse ou lesdites choses sont, dit que se les terres dessusdites, les moulins et les autres choses de ladite ferme fussent labourees, coutivees et maintenues en l'estat tel com eus estoient ou temps que la ferme fu baillié a ladite Jehanne, fame dudit Ysembart, il ne convenist mie que rabat en fust fet, car tout fermier qui ferme prent doit savoir que il prent, et par coustume en quel point il prent.

Et dit ledit vicomte que le bailli de Cauz qui adonc estoit pour temps bailla ladite ferme pour nostre seigneur le roi par coustume de pais et par certain convenant et par certein nombre d'argent que ladite Jehanne ou ses pleges rendoient a nostre seigneur le roi et fu le convenant tel que eus rendroient en la fin de la ferme toutes les choses et chascune de ladite ferme en autel point et estat et aussi bon comme eus furemt bailliees et ce que chiet en coustume, c'est a dire douaire et vante paiez, et fu le nombre d'argent tel mis au marchié de ladite ferme que ladite Jehanne ou ses pleges rendroient par an, pour ladite ferme, cinquante livres quites par dessus lesdites choses, a nostre seigneur le roy.