IRHT

Enquêtes menées sous les derniers capétiens

> Enquête sur un conflit à Saint-Malo. 1308. Titre au vo Articuli super commiss. contra regem vel ejus prejudicium in Britannia. MIIIc VIII.

Archives nationales, J 240, n°41

Enquête

[1]

Ce sont les articles esquels les bourg. de Saint Mallou de l'Ille se sont mespris ou prejudice nostre signeur le roy, car les evesques de Bretaigne ne leur ville n'obeïrent onques au duc de Bretaigne, ainchois doivent obeïr a nostre s. le roy, et a ladite ville de Saint Malo obeï tous jours a nostre signeur le roy.

Premerement il firent conspiration, colligation et conjuration contre leur signourie et firent communauté, maire et jurés et seau de communauté et de mairie, lequel ledit maire gardoit, et y avoit maison propre de commun, qui estoit Hamon le mareschal, ou il assambloient a faire leur traitiés, et quant il voloient faire leur traitiés et leur assemblees, ledit maire ou autres de son commandement faisoient sonner trompes peupliaument pour eus assambler a la dite maison et aloient a armes en descouvert lesdis jurés par ladite ville et si par grant fierté que lesdiz evesque et prieur n'osoient pas lors demourer en ladite ville.

Empres ledit maire et aucuns des jurés empetrerent du duc de Bretaingne sergens certains qui vindrent a la ville de Saint Mallou et requisent par voie de commandement l'evesque et le prieur que il closissent a leur despens la ville de Saint Mallou, et avoient lesdis maire et jurés grae audit duc li rendre la ville quant elle seroit close, quant il en aroit mestier, a sa volenté.

Apres ce lesdiz maire et jurés alerent en un lieu qui est appellé le baer pres de la dite ville o les serjans audit duc et se obligerent a eus el non dudit duc de li faire hommage et de li rendre chascun an en nom de rente deuz cens poys de cire, uns esperons d'or et un raim de lorier. Et empres ce alerent lesdiz maires et jurez audit duc et affermerent ces choses tant par leur seremens que par autres liens, dont aucuns des aloues audit duc ont puis requis lesdiz maire et jurés ladite rente rendre, mais il n'en ont riens encore rendu.

Lesquels maire et jurés ont encore le seau de leur communauté et de leur mairrie, ja soit ce que il ont esté requis pluseurs fois de l'evesque et du prieur de le rendre. Et ont fait pluseurs exces et outrages par la raison de ces choses. Et seront ces choses trouvees veritables par l'evesque, par le prieur et par le chapitre de ladite villd et sont toutes notoires ou païs.

Sus lesqueles choses dessus dites nostres sires li roys manda au ballif de Coustentin que il fesist adjorner par Michiel Fourré, serjant le roy ou ressort de Bretaigne, ledit evesque et les hommes de Saint Mallou ainsi comme il appert par les lettres nostre s. le roy qui s'ensievent, item que il feïst adjorner l'evesque de Saint Briouc d'une part et Chenin Le Prevost, chevalier, d'autre.

Ph. Dei gratia Francorum rex, ballivo Constant. sal. Cum sicut intelleimus episcopus Briocensis ex parte una et Chennins Le Prevost ex altera, super discordia cujus causa in nostra curia Parisius ventilabatur preter nostram super hoc licenciam pacificaverunt, item et quod episcopus Macloviensis de Insula et ejus homines ville predicte, ipso mandante et ratum habente, de novo in nostrum prejudicium fecerunt majorem et scabinos et obedientiam duci Britannie de novo fecerunt quod nunquam al. fuit factum, mandamus tibi quatenus predictos episcopos, dictum militem et homines Sancti Maclovii predictos per Michaelem Forré, servientem nostrum resorti Britannie facias adjornari proximi Parlamenti Parisius, ut si premissa veritate nitantur recipiant quod super hoc nostra curia viderit ordinandum, injungens dicto servienti quod certificet nostram curiam de adjornamento predicto. Actum Parisius XXIIa die septembris anno Domini MoCCo octavo.

Par la vertu duquel mandement je Michiel Fourre, sergent dessus dit, ai adjorné les persones dessus dites selon la teneur dou mandement nostre signeur le roy.

Item Guillaume du Pin alla comme commissaire du ballif de Constantin a Saint Briouc por radrecier aucuns atemptaz fez a Henri de Pledran pes son apel, lequel Guillaume du Pin fut batu et feru pluseurs collees grosses et villaines des genz dudit evesque de Saint Briouc, et crierent : a la mort , et convint audit serjant s'en foÿr par villains leus que il ne vout pas nommer et fut en grant peril de mort [2o peau] Item il a esté trouvé par Michiel Fourré, serjant nostre sire le roy ou ressort de Bretaigne et par Guillaume du Pin, sergent oudit ressort, liquel serjant avoient commandement du ballif de Constantin, liquel en avoit commandement de n. s. le roy, que l'evesque de Saint Paul de Lyon ou ses gens, puis et contre l'appiel que fist An. de Carnoter (?) escuier, dessaisirent le dit escuier d'un manoir qu'il avoit en la cité de Saint Pol de Lyon et puis, et contre ledit appel fait par ledit escuier de la court audit evesque a la court nostre seigneur le roy, et ce trouverent lidit serjant par le senechal dudit evesque et par Jaque Le Mignon, son seeleur par son office et par pluseurs autrez genz dignes de foy. Et sur ce lidit serjant de par n. s. le roy resaisirent ledit Nu dudit manoir duquel ledit evesque ou ses gens pour lui l'avoient dessaisi et adjournerent ledit evesque au prochain Parlement as jour des Normans pour venir amender a n. s. le roy l'attemptat fait ou prejudice de n. s. le roy et ou damage de partie selonc la forme dessus dite et pour veoir taxer l'amende selonc ce que le court regarderoit, et pour rendre a la partie ses cous teuls comme le court regarderoit que rendre les devoit ledit evesque.

Item adjornerent lidit serjant le roy ledit evesque audit Parlement as jours des Normans pour venir amender a n. s. le roy pour pluseurs attemptas qu'il a fais a pluseurs personnes dont les nons s'ensievent puis et contre les appiaus que lesdites personnes avoient fais de la court audit evesque a la court n. s. le roy, et ledit evesque par la force et par la prise des biens qu'il faisoit asdites personnes et par ce qu'il faisoit tenir leur cors en prison ; il les faisoit renoncier a leur appiaus et accorder et paisier a lui du tout a sa volenté, c'est assavoir Thomas Darien, Daniel Le Breton, bourg. de la cité de Saint Paul, Raoul le filz Guimar, le filz Morvan, Jacques Le Bourgne, Raoul le gendre Bertoul, Hervieu le filz au Fournier, le filz Alain Gonelon, Hervieu le filz Guillaume de Kardenot, Yvon Le Bourgne, le filz Hervieu.

Item li serjant nostre s. le roy dessus dit baillierent a Hervieu de Penfontoyon, ballis dudit evesque, Guigon le filz Hervieu de Champ Blant comme prisonnier pour les meffais qu'il avoit fais, ci apres nommés, et commanderent de par le roy lidit serjant audit ballif que il le feïst tenir et garder en prison fermee, si que il le puissent ravoir toutes les fois que il vauroient pour rendre le a leurs maistres, liquels Guygon avoit abatu les penonchaus qui estoient mis de par nostre s. le roy par Thomas Le Fevre, serjant le roy, a l'eglise de Pleaire esquet et au manoir appartenant a ladit eglise, liquels ballis sans le commandement des gens nostre s. le roy et desdis serjans laissa aler ledit prisonnier. Et pour ce que lidit serjant voloient estre plus certain se lidiz prisonniers estoit encore en la prison ou non, il requisent audit ballif et a pluseurs des gens audit evesque en presence de grant foison de bonnes genz que il ouvrissent le chastel, car il voloient savoir se ledit prisonnier estoit encore en la prison ou non, liquel n'en vaudrent rienz faire, et en desobeïrent du tout en tout, et deucerent lesdis serjans du roy entrer oudit chastel. Et pour les desobeissances dessus dites, lidit serjant adjornerent ledit evesque au prochain Parlement as jour des Normans a venir amender a nostre sire le roy desdites desobeissance selonc ce que la court regarderoit.

Item Michiel Fourré, serjant nostre signeur le roy dessus dit, adjorna au prochain Parlement au jour des Normans li visconte du Fou et li conmanda que il fust en propre personne, et eust Guillaume son frere aveuc lui pour ce que ledit visconte avoit fait dessaisir par pluseurs genz monsigneur Jehan, filz Yvenon de l'eglize de Pleure Esquent, qui en estoit saisis de par n. s. le roy, ainsi que il apert par les lettres de n. s. le roy, lesqueles il monstrera toutes les fois que mestiers sera. Et ledit Guillaume, frere audit visconte, fust en sa personne a faire la dessaisine dessus dite.

Item ledit Michiel Fourré, sergent n. s. le roy dessus dit a adjorné l'evesque de Saint Brioc d'une part et Chenin Le Prevost d'autre. Item il a adjorné l'evesque de Saint Maclot de l'Ille et les hommes de Saint Maclot de l'Ille au prochain Parlement au jours des Normans sus pluseurs desobeïssances faites, ainsi que il est contenu es lettres.

Item requierent ledit Michiel et Guillaume que il soit mandé aus auditors qui vont en Bretaigne que il s'enforment des choses desus dites et de totes celles qui aront esté faites en prejudice de nostre segneur le roy, c'est assavoir le archidiacre de Borbon et mons. Guillaume de La Rajace.

Comment citer cette notice

Elisabeth Lalou, Xavier Hélary. "Enquête sur un conflit à Saint-Malo. 1308. Titre au vo Articuli super commiss. contra regem vel ejus prejudicium in Britannia. MIIIc VIII. (Archives nationales, J 240, n°41)", dans Enquêtes menées sous les derniers capétiens, Elisabeth Lalou, Christophe Jacobs, éds, Paris : Centre de ressources numériques TELMA, 2007. (Ædilis, Publications scientifiques, 4). [En ligne] http://www.cn-telma.fr/enquetes/enquete6/ .

Mentions légales | Colophon | Contacts | Haut de page