[1]

... charron a Jenvile quant le charron les ont scié, et estoit Robert presenz au couper, trois anz a, et ne set se Robert a ...

Guillaume de Rebrachien, juré et requis, dit que Robert ne s'est mené ne bien ne loiaument ne envers le roi ne envers le païs. Requis par quoi, dit que il qui parole a pluseurs fois veu que Robert, quant il avoit adjorné les bones genz devant soi, et il se voloient escondire par leur seremenz de ce que il leur metoit sus ou il requeroient que Robert leur feïst droit, par les chevaliers qui i estoient et par les sergenz meesmes, ne Robert ne voleit prendre leur escondit ne fere leur droit, ainz comandeit qu'il l'amendassent et quant il ne le voloient amender, ainz se deffendoient par les resons devant dites, Robert les commandoit a metre en prison et pluseurs foiz a convenu com cestui qui parole en plenissent aucuns avant qu'il peüssent eïssir hors de la prison.

Requis des noms des personnes que Robert menoit einsi, dit : Martin de la Varenne, Johan Guichard, Tevenon Pateux, Guiart Paleteau et pluseurs autres de cui nons il ne li sovient.

Item il dit que Robert a esteint de aucunes grosses amendes don li rois n'a riens eü si comme il croit, c'est assavoir l'amende de Gilet des Planches qui avoit fet couper par ses sergenz 4 chesnes es bois du Mignon et les prist Gilet dou Pont, sergent souz Robert, si comme cil Gilet dist a cetui qui parole, et li dist onquore cil sergent que Giles des Planches avoit avoué ses sergenz du fet, et mist ce fet cil Gilet devant Robert, nonques li rois n'en oüt denier de l'amende, si comme cil Gilet, sergent, a puis dit a cetui qui parole.

Item il dit que Coignet, qui est oste Robert a Rebrachien, use plus en 1 an de la forest le roi que le sire de Rebrachien qui i a son usage ne fait en 5 anz, et vent es et escenle et late et autre merrien et le voit Robert as elz et va ausi conmunement en la forest conme s'il i eust son usage, ne ja pris n'i sera ne arresté et li a veu cetui qui parole amener tel chesne que quatre chevaux ne poient trainer, ainz vit que la charrette rompit et dit que il avoit dit a celui Coignet et a sa fame que els n'avoient pas ce bois por nient, ainz en fesoient de granz cortoisies a Robert et a sa fame de oes, gelines, de chapons et de autres choses.

Item il dit que il vit cian en la cort de Saint Ladre de Puisat chesnes coupez enpres pié a fere jumeles a pressoir et le dist a Gilet du Pont et a Phelipe de Marrigni, sergenz et leur demanda : Beax seigneurs, des quant ont usage en la forest cil de Seint Ladre de Puisat , et Gilet du Pont respondi : Por quoi le dites vous ? – Por ce, dist cil qui parole, que ge veu (sic) en leur court 8 beax chesnes ou 8 de la forest et lors dist Gilet : ne vous en esbahissez pas, quar il en eüt en ci an plus de 18, et ce set Robert nostre mestre, ne nous n'i poon metre conseil, deables enportent tout. Requis des autres sergenz, dit qu'il ne set que els mesfacent en rien se ce n'est en boivre et en mengier chies cez bone genz. Requis se il donent point de la forest ne s'il estaignent nul meffet ne se il se meffont en nule autre maniere, dit que il ne n'oït onques parler ne plus n'en set.

Item cil qui parole dit que il oï dire Girot des Broces, Guillaume des Broces, escuiers, que Gilet des Planches leur avoit enblé 3 chesnes pour faire 3 tres au moutier de Marrigni et les avoit vendu a la parroisse.

Item il dit que il oït dire a Guillaume Jahan que Robert ot de lui une vache pour un pressoer mener d'un lieu en autre et ot de ceux de Rebrachen 20 s.t. pour abandonner les tailles que le balli avoit conmandé abandonner, et a ce fut prise.

Phelipe de Monceau, prevost de Rebrachien, juré et requis, dit que Robert s'est mesfet et vers le roi et vers le païs.

Requis por quoi, dit pour ce que Robert grevoit la bone gent qui estoient ajourné devant lui et leur metoit sus que il avoient mesfet et ne vouloit oïr leur bonnes resons ne leur deffenses, ainçois les metoit en prison et leur fesoit amender par force de prison et ce set il pour ce que il qui parole l'a veü pluseurs foiz.

Requis des nons de cex que il fesoit metre en prison, dit Guillaume de la Sale que Robert ne voloit mener par droit ne de sergenz ne de chevaliers, mes les fist metre en prison senz reson et en ot Robert 12 s. ainçois qu'il l'en esist, et pluseurs autres servit il enxi en la presence de cestui qui parole de qui nons il ne li sovient.

Item il dit que Cognet le Boucher, qui est oste Robert a Rebrachien, amaine de la forest entreses, gros chesnes, ses a faire jumelles a pressoers, a veü et a seü des sergenz et de Robert, et en fait faire esceanne, merrien et late et le vent quemunement et ce a veü et seü cestui qui parole et dit que cil Cognet a du bois de la forest checun an qui vaut plus de 10 l. de tournois, et a bien 4 anz ou plus que cil Cognet comença enxint a user et dist cest qui parole que c'est par la souffrance Robert pour ce qu'il boit et megne et descent ches Cognet et pour ce que il aporte le bois a veüe de Robert et des sergenz, et voient checun jour le grant astelier en sa meson, et tout auxi dit cestui qui parole de jouvenciau, fors tant que il ne sot unques que jovenciau vendist point de merrien que il aportait.

Item il dit que Robert ot des bonne genz de Rebrachien, qui vaches avoient, 12 s. et un mengier de 12 s. ou de plus pour delivrer les tailles que le ballif avoit conmandé abandoner et en ot Gilet de Pont 4 s. et Phelipe de Marrigni 4 s.1 et fut present cest qui parole a ceste finance pour ce qu'il avoit vaches.

Item il dit que en aoust ot un an cestui qui parole vit que 3 charretes de Rebrachien qui avoient porté veiex a Robert revenoient devers la meson Robert chargees de granz chenes par pié verz et li distrent li charretier que Robert leur avoit donné pour paiement.

Item il dit que il a veü pluseurs foiz Quatre Sous, bourgois de Novile, qui emenoit chenes coupez par pié verz en sa charrete quant il avoit mené a Robert buche du bois pour son usage, et aucune foiz li delivroit Senz Terre qui est fil batart Robert, et disoient que c'estoit pour sa journee et disoit : Qui bois maine, bois mengne .

Item il dit que Colet Gautier de Rebrachien ort a 2 anz ot tout l'iver 2 chevaus et 2 charretes corantes ou bois et aportoit gros chesnes ses et entreses en sa meson et en fesoit merrien et late pour sa meson, mes il ne sot unques qu'il en vendist point, et dit que il aloit au bois checun jour 3 foiz ou 4 tant conme le jour pooit durer et ala bien enxi 15 jours et dit que il portoit si quemunement le bois que Robert et touz les sergenz le pooient voir.

Requis sus touz les autres articles, dit qu'il n'en set riens fors tant que Robert maine communement levriers par la forest.

Requis de touz les sergenz et de checun par soi, dit que il ne set que nul s'en soit mesfet, fors tant que cil qui parole oï dire a Giles du Pont que la gent du ramage de Marrignie li avoient donné entour 22 gelines et plus n'en set.

Guillaume de Con en Roi, bourgois d'Orliens, juré et requis de touz les articles devant diz de Robert de Hubeicourt, dit que il ne set coment il s'est meffé ou bien ou malement, mes il dit que l'en tient a trop cruel. Requis de touz les sergenz, de checun par soi, dit que il n'en set riens.

Giles de Blois, bourgois d'Orliens, juré et requis sus touz les articles devant diz, que il ne set que nul des sergenz se soit meffet, fors Taupin qui corut sus a un escuier en la meson aus nonains en karesme, ara 2 anz, a un escuier qui a non Perier, et l'eust tué qu'i ni li eüst rescous.

Jahan Alagoule, Robert Passeloire, Jahan d'Ivoy, Michel de la Porte, Hue Poi Dras, tous bourgois d'Orliens, jurez et requis sus touz les articles desus diz et demandez checun par soi contre touz les sergenz et contre checun, dient qu'il ne sevent que nul des sergenz se soit mesfait, fors tant que il boivent et mengnent sovent en ces religions d'Orliens qui ont usage u bois, mes il ne sevent pour quoi c'est, et dit Phelipe de la Porte que il oït dire que quant l'en demandoit Robert que il abandonast tailles, il disoit que l'en abandonoit tailles a bons chapons rotiz, a bons poissons, a bonnes viandes et a bons vins.

Regnaut le Bufetier, bourgois d'Orliens, juré et requis sus toz les articles desus diz, dit par son serement que il ne set que nul des sergenz de la forest se soit de riens mesfet, fors tant que il dit que Thaupin est trop crueux et met en prison les bonne genz et senz raison mout de foiz et les grieve mout.

Phelipe le Prevost, bourgois d'Orliens, juré et requis sus touz les articles devant diz, dit par son serement que il ne seit riens que nul des sergenz de la forest se soit mesfet en riens, fors tant que il oï dire a Jahan du Change que Robert de Hubecourt li avoit donné bois de la forest pour mesoner et vit bien cestui qui parole 60 pieces de bois ront et gros pour mesonner en la court dudit Jahan et li dist cil Jahan que Robert les li avoit donnees.

Andri le Breton, bourgois d'Orliens, juré et requis sus touz les articles de touz les sergenz et de checun par soi, dit que il n'en seit riens fors tant que Taupin leva 10 l. du segneur de la Goupille pour ses chevaus et sa charrete qui fut prise ou bois et ce set il par ce que il qui parole et li prieur de Seint Ladre d'Orliens firent la peiz et furent au deniers paier.

Jahan le Pimolain, bourgois d'Orliens, juré et requis, dit par son serement que il ne set que nul des sergenz se soit mesfet.

Aket le Lunbart, juré et requis, dit que les sergent mengnent et boivent a Seint Ladre, a la meson Dé et aillors ches les usagiers a Orliens et dit qu'il a oï dire a ces garçons qui portent du bois les fessiaus de bois pluseurs foiz que les sergens prenoient 3 d. ou 4 et quant il ne leur pouent donner il les batoient et leur toloient leus fessiaus.

Gilet Alagoule, bourgois d'Orliens, juré et requis sus touz les articles desus diz de touz les sergenz et de checun par soi, dit par don serement dit que il grevent trop les povres genz qui aportent le bois et les batent. Et plus n'en set.

Guillaume Trois Souz, bourgois d'Orliens, juré et requis, dit que il ne set coment les sergenz se sont mené en leur servises, quar il ne hante giere ou leu leur conpagnie, mes il dit que Guillaume Rupon le mena ant an en sa meson et li mostra bois que Taupin et Robert de Hubecourt li avoit donné, si comme il disoit, et cestui qui parole le voüst achater 10 s. et dit que c'estoient gros chesnes.

Item cestui qui parole dit que il a pluseurs foiz oï dire a Gefroi Haois : Robert de Hubecourt a esté en mon ostel et m'a lessié 2 charretees de bois et plus il n'en set.

Guillaume Grime, juré et requis, dit par son serement que il a veu que Pierres de Lonc Champ, Trinon et Alout prenoient les fessiaus que la bonne gent aportoient du bois et les toloient et les vendoient et le set par ce qu'il meimes en a achaté dans, et dit qu'il n'en set plus.

Guillaume Le Normant, mareschal, bourgois d'Orliens, juré et requis, dit qu'il a mout eu de charbon de Tenot, sergent aus bois l'evesque, puis 10 ans a, quar celui Tenot fesoit famer le charbon l'evesque et le fesoit mener en ses mesons et dit que il en a tant en que il ne set le nonbre et le li vendoit celui Tenot et le faisoit venir en sa meson par les charretes Salemin et par les charretes aus nonains et par autres que il loait, et dit que en tel maniere en ont eu : Gilebert Le Fevre, feu Johan Yvon et Guiot Ponce.

Requis comment il le set, dit par ce que il sons ses voisins et que il voiest checun jour que cil Tenot vendoit le charbon ou a cestui qui parole ou a un des persones devant dites.

Item il dit que Guillaume Le Barbier a bien eü par 3 anz une charrete et un cheval et aloit u bois checun jour et aportoit une foiz bois sec, une foiz bois mort et a pluseurs foiz veü que Robert et les sergenz descendoient en l'ostel de celui Guillaume et mengoient et bevoient et se chaufoient de cele buche et aportoit cele buche a veüe et a seüe d'aus :

Item il dit que il a veü pluseurs foiz que les sergenz prenoient les fessiaus au povres genz et les bevoient et les mengoient.

Requis des sergenz, dit de Robert et aucun de sergenz, de qui non il ne li sovient et plus il n'en seit.

Regnauz Turpin, bourgois d'Orliens, juré et requis, dit que il a veu plus a d'un an que la charrete Guillaume le Barbier aloit au bois et s'en venoit chargee, mes il ne set pour quoi c'estoit et dit que les sergenz de la forest repairent en sa meson et ne seit riens des sergenz plus.

Robin le Fornier, d'Orliens, juré et requis, dit auxi conme Regnaut Turpin, tesmoing prochain devant cest qui parole.

Aubert du Crucefiz, bourgois d'Orliens, juré et requis, dit que il ne set riens des sergenz fors tant que il a veü que cil qui aportoient le bois se plaignoient d'eux.

Estienne Bon Sergent, juré et requis, dit auxi comme Regnaut Turpin, tiers tesmoing devant cestui qui parole.

Guiot Poncet, bourgois d'Orliens, fevre, juré et requis sus touz les articles devant diz contre touz les sergenz et checun par soi, dit par son serement que il ne set comment nul des sergenz se soit mené ne se il se sunt mesfet ou non, dit que il n'en seit riens, fors tant que il a veu mout de povre genz touz nul qui se plaignoient des sergenz et disoient que il les avoient depolliez et tolu leur fessiaus.

Thenot Mançon, sergent a l'evesque d'Orliens es bois de Chanteau, juré et requis, dit que Robert s'est malement mené en son servise.

Requis en quoi, dit en ce que il estoit une foiz, un jour de quoi il ne li sovient, en l'aumone d'Orliens et oït que Robert promist a Jehan du Change, bourgois d'Orliens, 8 charretees de bois, mes il qui parle ne set se cil Jahan les ot ou non.

Item il oï, entour un an a, que cil Robert promist a Billebaut le Peletier une charretee de chabon en sa meson meimes, mes il ne set pour quoi il li promist ne si celui Billebaut la ot.

Item il dit que cil Robert, quant il a beu es tavernes, fait paier son escot aus povre gent, et dit que il meimes en a paié 3 fois ou 4, une fois 3 s., une fois 4 s.

Requis sus touz les autres articles, dit que il ne set que Robert ne nul des sergenz se soit mesfet en autres choses, fors tant que Alou la semaine penouse prist un lievre a un panel et fors tant que il oït que Perrot, Phelipe et Gilet, sergenz, donnerent chacun une charretee de rennasons a Guillaume le Borgne, cousturier, et fors tant que il dit que il a veü 40 foiz et plus que les sergenz fesoient leur escoz que il avoient despendu es tavernes paier a povres genz, et plus il n'en set.

Item il dit que Robert ot l'amende de Callart, bourgois d'Orliens, pour 2 charretees de charbon que l'en devoit mener ches l'evesque que Trinon aresta ; et ne set se il l'a acontee le roi, et plus n'en set2.

Frere Garnier, prieur de Seint Ladre d'Orliens, juré et requis dit que il ne vit unques des mesfez Robert, mes il a oï dire quemunement et est renomee tele que cil Robert grieve mout la povre gent et vet en leur hostieus, prent le leur et leur dit : Delivrez moi 2 s. en cele taverne de mon escot, et vous 3, et vous 4 si comme l'en dit, et dit celui qui parole que il ne donna unques riens a Robert fors, entour 4 anz a, un tonel de vin que il li empli, et Robert envoia le fust, et dit que celui Robert et sa mesnee mengnent et boievent sovent partout es leur mesons et gisent quant il leur plest.

Requis des sergenz, dit que il ne set nul de leur mesfez, fors tant que il dit que en la garde Robert ne soloit avoir fors 2 sergenz a cheval, ore en i a 6 a cheval qui soloient estre a pié et en sunt plus grevees les mesons de cex qui ont usages ou bois et dit celui qui parole que pluseur foiz en a il veü en sa meson 3 ou 4 a cheval en une nuit et dit que Alot qui demore a Sercote tient cheval et n'a que 8 d. de gages, et a 5 enfanz ou 6 et sa feme et n'a ne rente autre ne eritage.

Item il dit que le mestre de la meson Dé li a aucune foiz dit que Robert a trop grevee sa meson Dé , quar Robert i aloit et venoit, lui et sa feme et sa mesnee et dit celui qui parole que les sergenz ne font pas leur prises es forez, mes es tavernes et es mesons es (sic) bonnes genz, et dit cestui qui parole que Gile des Planches fist domage es bois l'evesque de vallant 100 mars d'argient quant il ot sa vente de Plangnene lez Chanteau et ce set cil qui parole par ce que il voest checun jour les charretes aler a Orliens par devant sa porte et cognoissoit bien que ce n'estoit pas le bois de la vente.

Requis de Taupin, dit que il a oï dire que Taupin de tens de tournesir de suz a levé granz deniers, mes il ne set combien, mes il oït dire que il ot de Thomas le Charpentier de suz 100 s. pour ce qu'il avoient tué un petit porcelet entour la Touz Seinz, ot un an si comme il disoit ; et en envoia cil Taupin a cestui qui parole un quartier, mes il n'en manga onques quar il estoit puant et estoit ci petit cil porcel que il ne valoit pas 10 d.

Item il dit que cil Taupin le fist aler a Paris et leva de lui 60 s. senz reson et le ballif les li fist rendre.

Item il dit que touz les petiz serganz a pié prennent la povre genz et leur ostent leur fessiaus dedenz la banleue d'Orliens et pregnent de l'un 4 d., de l'autre 6 d., de l'autre 3 d., et leur ostent ce que il poent avoir et plus en la ballie Taupin que en l'autre.

Item cil qui parole dit que cil Taupin li dist, entour trois anz a : Prieur, j'ai trop bon sourcot, si je eüsse penne Le prieur dist que il n'estoit pas peletier, et toutevois il li dist : Envoiez vostre sourcot chez mon peletier, et je le vous ferai forrer et cil li envoia et il le fist forrer, et autre foiz li donna il un autre forreüre et costerent les 2 forreüres entour 38 s..

Item il dit que cil Taupin a pluseurs foiz donné du bois a Margarites de Lengres et a autres tex femes avant que il fust mariez comme il a oï dire, et dit que le sorourge Taupin a faite une meson a Buci et n'a que 6 d. de gages.

Item il dit que Robert de Hubecourt tient grant mesnee et faucons et levriers et se vait par cele Biausse et sa mesnee de meson en meson et sa mesnee senz lui, et dit que la peour coustume que Robert a si est, que il vet lui disiesme, lui 8, lui 7, lui 6 et aucune foiz dit il que il a veü Robert et touz les sergenz et estoient bien 11 en un jour en sa meson et cestui qui parole leur disoit : Comment gardez vous vostre forest, ore i estes ci touz et la forest set toute sole. Sachez que vous vous mesfeses malement et ne cuidez pas que je le die pour voz despens, ainçois le di pour le domage que l'en poet maintenant en la forest fere. Et plus il n'en seit :

[3^e peau] Adan des Espesses, juré et requis si Robert s'est bien et loiaument mené en son servise o non, dit que il ne s'i est pas bien mené conme il deüst en ce que cil Robert donna a celui qui parole 6 chesnes ou 8 antan en aoust quant il fesoit sa meson et valoit bien checun chesne 4 d.

Item en ce que Robert a donné a Robin Biau Pere de ce bois meimes et le set par ce que la charrete a cestui qui parole en a porté bien 8 foiz ou plus ches ledit Robin et li en a donné la value a plus de 40 s.

Requis si il donna unques riens a Robert, dit que non, si ne fut chapons ou geline et a boivre et a mengier quant il venoit a sa meson et dit qu'il li a donné a mengier en sa meson plus de 40 foiz.

Requis pour quoi il fesoit ce, dit pour ce que, si ses boes fussent trovez en talles ou a aucun mesfet, Robert et les autres sergenz li en fussent plus courtois.

Requis de touz les sergenz et de checun par soi, dit qu'il ne seit que il se soient mesfez en riens.

Renbaut de la Chaussee, juré et requis, dit que il qui parole a usé par 3 anz a conches seches du conmandement Robert, et dit que il en a eü plus de 40 charretees de conches, et dit que il ne deroit pas 40 s. d'autant de bois conme il en a eü et d'autel, hors les despens du couper et du charroier.

Requis sus touz les autres articles, dit que il n'en set riens

Requis de touz les sergenz, de checun par soi, dit que il ne seit que nul d'eux se soit mesfet, mes il dit que quant il trove Robert ou un autre sergent devant sa meson, il leur donne a boivre et a mengier ou les retient au soir en sa meson quant il leur plaist.

Thomas le Charron de Lengennerie, juré et requis savoir mon comment Robert de Hubecourt s'est mené en son servise, dit que il s'est mesfet en ce que il comanda Martin le Charron que il li delivrast une sele de 16 s. a Orliens ou que il le couperoit, si comme il a oï dire a celui Martin.

Item cestui qui parole dit que Robert l'a 2 foiz ou 3 mené es tavernes a Lenganerie et li fesoit delivrer son escot quant il avoient beü et dit que il en a bien païé juques a 2 s. ou plus et dit que il donna une foiz a Robert 2 gelines.

Requis pourquoi il paioit enxi ses escoz, dit pour peur que cil Robert le semoseist a Bourc Nuef a ses jourz ou cil qui parole perdist une jornee de 2 s. ou de 18 d. se il alast a ses jourz, et quant il avoit mengié ovec lui il ne le semonoit pas.

Requis de touz les autres articles, dit que il n'en seit plus.

Requis de touz les sergens et de checun par soi, dit par son serement que il ne set conment il se sont menez quar il ne hantent (sic) pas leur compagnie.

Guillaume Roillie de Lengennerie, juré et requis, dit que il ne vit unques que Robert de Hubecourt ne se menast bien en son servise, mes il qui parole dit que cil Robert ot une foit (sic) de lui 2 s. pour ce que il le trova que il avoit coupé ou bois 2 verges d'alier et furent les 2 s. envoiez a Robert en une longe de porc et un chandun a Lenganerie ches la dame Taupin ou il disnoit pour ce que cil Robert n'ajournast cestui qui parole a ses jourz et s'est enxi souffert Robert.

Requis de touz les autres articles dit que il n'en set riens.

Requis de touz les sergenz, de chacun par soi, dit par son serement que il n'en set riens.

Pierres le Suerre de Lengennerie, juré et requis, dit par son serement que Robert ne fist unques bien au païs, ainçois les a touz raienz.

Requis le quex il a raienz, dit que mout de gent si conme il qui parole a oï dire et que lui meimes a il raient pour son droit usage de pris de 20 s. en domages et despense que cil Robert a fait faire a cestui qui parole par force de prison ou le tint plus de 8 jours ainçois que il le vousist lessier aler senz amende.

Item cestui qui parole dit que autre foiz ot Robert de lui 5 s. en un escot ches Martin le Charron pour son droit usage pour paour que il ne le semonist a ses jourz et pour paour de prison ; et envoia cestui qui parole un bon agnel a Robert ches ledit Martin qui fut mengié a cel escot, et unques n'en menga ne ne but cestui qui parole, si comme il dit.

Gefroi le Barbier de Lengenerie, juré et requis, dit que Robert a assez fet de domages au païs si comme il a oï dire, et dit que a lui meimes tolut celui Robert un espervier, entour 6 anz a, et une reiz et coupa les giez a ses coulons o quoi il tendoit et les menga a Evri, entre lui et ses sergenz, et cestui qui parole s'en clama au seigneur de Lengennerie, et pour ce que il s'en clama, Robert puis ce trova porteaus en l'eur de la forest que le fil a cestui qui parole gardoit, il la mist sus que il les avoit trové ou bois et en leva 2 s. et li en rendit sa raiz.

Item il dit que Taupin et Robert sunt dous des plus foux dou roiaume a mestre en ballie et que il se mervoille mout coment il i ont tant esté.

Requis en quoi il sont si foux, dit que il sont testuz et que il font trop de testeries et de domages au bonnes genz, si comme cestui qui parole a oï dire, et si conme l'en dit quemunement u païs.

Requis de touz les autres articles, dit que il n'en set riens.

Requis de touz les sergenz, de checun par soi, dit que il n'en seit plus.

Jahan le Breton de Lengennerie, juré et requis, dit que tout le monde se plaint de Robert.

Requis pourquoi tout le monde se plaint de lui, dit pour ce que ledit Robert raent le païs et met en prison la bonne gent, soit tort ou droit.

Requis comment il le seit, dit por ce que cil qui parole a esté a ses jourz mout de foiz et vit que Robert prenoit la gent qui estoient venuz aus jours et les metoit u cep et leur disoit : Vous l'amenderez ou vous serez mis en prison , et en vit 2 homes et 2 femes de Vilereau un jour, entour 6 anz, a Bourcnuef en un cep, la ou Robert tenoit ses jours, pour ce que il ne voloient amender.

Item cestui qui parole dit que Robert le tint en prison 15 jourz pour ce que il li metoit sus que une meson que il fesoit, entour 8 anz a, estoit du bois le roi3, et cestui qui parole le fist semondre a Orliens devant l'oficial et quant cil Robert vit que il fut semons il apoia l'espee o tout le forre a la poitrine de cestui qui parole et li disoit que il le tueroit et toute vois fut il delivrez par l'oficial.

Requis de touz les autres articles, dit que il n'en seit riens, fors tant que cestui qui parole dit que Renaut le Munier envoia a Robert, entour 9 anz a, 2 muis d'avoine et 12 mines de farine de la Chapale, ou celui munier demoroit lors.

Requis conment il le seit, dit par ce que cestui qui parole estoit voisin celui munier et vit la charrete chargier de la farine et l'avoine en sas et demanda cestui qui parole au charretier : Qu'est ce, ou veus-tu aler ? Nous portons, ce dist le charretier, a Robert, 2 muis d'avoine et 12 mines de farine que monsegneur li envoie pour mengier, que male paission li entre. Et dit cestui qui parole que cil Regnaut li envoioit cele avoine et cele farine pour avoir aucune courtoisie de la forest.

Requis de touz les sergenz et de checun par soi, dit que il ne set que nul s'en mesface, fors tant que il qui parole dit que Alot a fait sa meson du bois du demoine le roi.

Requis conment il le seit, dit par ce que il qui parole vit ledit Alot par 3 jours qui fesoit couper ou demoine le roi trois chesnes ses enprés pié et fesoit venir a sa meson ; et vit cestui qui parole les coupeurs et les charretes qui aportoient le bois et en i vit 2 jourz 4 charretes et le tiers une ; et dit que il en amena bien en cez 3 jourz 12 charretees et disoit cil Alot que Robert li avoit conmandé prendre ce bois pour sa meson si conme cestui qui parole dit, et dit que il n'en set plus.

Robin Le Fevre de Lengenerie, juré et requis, dit que Robert a fait assez de maus a pluseurs genz, si conme il a oï dire, et dit que quant Robert vient a Lengennerie il s'en vet par les charrons et leur fait delivrer son escot en la taverne, si conme il a oï dire, et dit que Robert est mout escriez u païs que il est mout foul et mout enturlés.

Requis de touz les articles desus diz, dit que il n'en set riens.

Requis de touz les sergenz, de checun par soi, dit que il ne set coment il se sont menez ou bien ou malement, fors tant que l'en dit que Alot a faite une meson a Sercotes des bois le roi, et dit cestui qui parole que il oit dire a charretier qui menoient blez a Orliens que Alot avoit eu d'aux 9 s. ou 10, pour ce que il estoient issuz de la voie es charrestes qui estoit mauvese ou demoine le roi d'enpres Sercotes et estoient par le bois pour querre leur bonne voie.

Requis des autres choses, dit que il n'en set plus.

Thomas Peliçon de Lengennerie, juré et requis, dit par son serement que il ne set riens de Robert ne de ses mesfez, fors par oïr dire.

Requis que il en a oï dire, dit que il a oï dire que il raient la gent a tort et les met en prison et leur fait mout de miauz et l'a oï dire a Martin le Charron et a Pierre le Suerre et a pluseurs autres de quoi il ne li sovient.

Requis de touz les articles desusdiz, dit que il n'en seit riens.

Requis des sergenz, de checun par soi id., fors que il dit que tout le monde s'en plaint.

Au v^o des deux derniers :

Ce sunt ceux de Lengennerie :

[4^e peau] [Témoins de Buci]

Estienne Malecraime, juré et requis des fez Robert de Hubecort, dit par son serement que il ne seiet riens des fez Robert de Hubecort, fors tant que la gent de la parroisse de Buci le Roi touz ensemble li donnerent 20 s. de par. pour soufrir a user en bois mort en la forest loï roi.

Requis conment il le set, dit que li qui parole fut a la taille des 20 s. faire et en païa sa part et fut par le gré deu prieur seignor de la ville.

Requis de Perrot de Lonc Champ, il dit que il n'en set riens et dit oncors cil qui parole que, entor 3 anz ou 4 a que ce don fu donné audit Robert, ne plus il n'en set.

Oger, juré et requis des fez Robert de Hubecort, dit par son serement que il ne set riens des fez Robert de Hubecort, fors tant que la ville de Buci li donna, au devant dit Robert, 2 muis d'avene qui furent pris sus les biens de l'iglise de Buci, si com il dit pour soufrir a user en la forest, pour avoir lor droit de la forest bien et en pez et fut par le consentement mon sour Johan d'Entonnerre, prieur d'iceu lieu au tens, et a bien entor 5 anz ou 6.

Requis coment il le set, dit que il fut a l'acort que aus s'acorderent touz ensemble de muis d'avaienne donner au devant dit Robert. De Robert ne de ses sergenz il dit qu'il n'en set riens.

Estienne Guine, juré et requis des fez Robert de Hubecort, dit par son serement que il ne set riens des fez Robert de Hubecort fors tant que il a oï dire que la gent de la paroisse de Buci lor Roi donnoient tuiz ensemble un mieu d'aveinne, or a 3 ou 4, par le consentement mon sour Jehan deu Tonnerre, prieur au tens de Buci si com il a oï dire ne autrement il n'en set riens. Des autres sergenz il ne set riens.

Gilebert Lenglois, juré et requis des fez Robert de Hupecort, dit qu'il n'en set riens.

Gautier Gason, juré et requis des fez Robert de Hupecort, dit qu'il ne set riens des fez Robert, ne des fez a nule des autres sergenz souz Robert.

Estienne le Borelier, juré et requis des fez Robert, dit que il n'en set riens ne de ses sergenz.

Jaquet de Chenans juré, requis des fez Robert de Hupecort, dit par son serement que tout le monde s'en plaient.

Requis por coi, dit que il bat la bone gent sanz reson quant il vont querre lour usages et dit que cetui qui parole lesse assez de son droit ou bois que il i a si com il dit pour ce que il craient que Robert ne le bate.

Requis comment il le soiet, dit que il l'a oï dire.

Requis des fez Robert, il dit qu'il n'en set plus.

Requis de Alot et Perrot de Lonc Champ, il dit qu'il n'en set riens, fors tant que ledit Perrot batit, or a 2 anz, Jorget le filastre Gautier de Buci qui venoit de son usage de la forest et li osta sa robe.

Requis conment il le set, dit que celui Jorget le dist a cestui qui parole.

Requis de touz les autres sergenz, de checun par soi, dit que il n'en set plus.

Raul Gautier, juré et requis des fez Robert de Hupecort, dit par son serement que Robert devant dit out de la genz de la paroisse de Buci par quemun acort de touz ensenble, en esté, ara 2 anz ou 3, 2 muis d'avaienne pour soufrir a user en la forest deu bois mort et dit que Robert Male Craienme livra l'avaienne et Colin Male Craienme la porta au devant dit Robert, et fut par le consentement de frere Jehan de Tonnerre, jadis priour de la vile de Buci le Roi.

Requis comment il le set, dit cetui qui parole que il qui parole fut a l'acort quant il fut acordé que le devant dit Robert eüst les 2 muis d'avaienne, mes au livrer il ne fut pas, ne de Robert il ne set plus, fors tant que il a oï dire que Robert est maus et crueus.

Requis de toz les serganz, de checun par soi, dit que il n'en set riens.

Droin de Gocie, juré et requis des fez Robert de Hupecort, dit par son serement que il ne set riens de ses fez, fors tant que il dit aussi de 2 muis d'avaienne con li autres tesmoiein devant diz qui en parlent.

Requis des fez Robert, il dit qu'il n'en set plus ne des sergent qui sunt souz lui, il dit qu'il n'en set riens.

Phelipoau le Breton, juré et requis des fez Robert de Hupecort dit par son serement que il ne set riens des fez Robert, fors tant que il out 2 muis d'avaienne por soufrir a user en la forest deu bois mort, or a 3 anz, si com il dit.

Requis conment il le set, dit que il l'oïst dire a Raul Gautier et au Gobe qui le menerent et la livrerent si con il le croit, ne plus il n'en set ne de ses sergenz.

Johaneaus Rose, juré et requis des fez Robert, dit qu'il ne set riens de ses fez, fors tant que il dit aussi des 2 muis d'avaienne qui li furent donnez de la gent de Buci le Roi pour soufrir a user en la forest con li autres tesmoin qui en parlent par devant.

Requis de touz les sergenz et de checun par soi, dit que il n'en set riens.

Robin Male Craime, juré et requis des fez Robert Hupecort, dit par son serement que il bat et fiert et met en prison la bonne gent a tort et sanz reson que il i aiet.

Requis conment il le set, il dit que il a oï dire a la bonne gent.

Item il dit que Robert de Hupecort out 4 anz ara4 en esté, 12 muis d'avaionne et 6 oisons de la gent de Buci lor Roi, de touz ensenble por ce que ledit Robert les souffrist a prendre lor usage que aus ont en la forest, et fut par le consentement de fere Johain deu Tonnerre, priour au tens de celi lieu, et le set cetui qui parole quer li meimes la livra et Colin Male Crainme, son frere, la porta a Robert de Hupecort de par la ville por ce qui est devant dit

Requis des fez a ses sergenz, il dit qu'i n'en set riens.

Ameline de Saint Lié, juree et requise des fez Robert de Hupecort, dit par son serement que ele ne set riens de Robert, fors tant que la gent dient qu'il est si maus et si divers que tout le monde s'en plaient et qu'i lor fes assez de villanies a tort et a dereson, mes a lui n'en fist il onques paient fois que tant que il li cercha une foiz sa meson et en porta une paiele et 2 poz sanz reson, si com ele dit.

Requise se l'on a riens donné a Robert devant dit, ele dit que oïl, que le metre de Saint Ladre de Pyset li donna par 2 foiz 2 charretees d'avaine por voilles a Noël, out un an une charretee, avant antan un autre, por ce que ledit Robert li faiset cortosie de bois de la forest si conme mout de gent l'ont dit a cete qui parole.

Requise conment ele set que les metre de Saint Ladre donnast les 2 charretees de l'avainne devant dite a Robert, dit que ele les vit quant les charretiers de Saint Ladre li menoit et que le charetiers li disoient : Or avon mené a Robert 2 charretees d'aveine.

Requise dë Perrot de Lonc Champ, dit que ele ne set riens, fors que tant que ceaus de la paroisse de Saint Lié li ont donné aucune foiz l'un chapons, l'autre gelines, l'autre poucins, l'autre un aignel, l'autre 2, et autres choses et croit miez que ce fust por fere lor cortesie de bois de la forest que por autre chose. Ne plus ele ne set des fez Robert, ne de Perrot, ne de Aalot, sergenz souz Robert.

Requise se ele set que les malades de Saint Ladre deu Pisau usent poient d'usage en bois des achaz, dit que ele ne vit onques que il i eust poient d'usage a nul jor.

Colin Male craime, de Buci le Roi5, juré et requis des fez Robert de Hupecourt, dit par son serement que il ne se condit ne biau ne bien, si conme cetui qui parole l'a o dire a mout de gent, et autrement il ne le set.

Item il dit que la gent de la paroisse de Buci le Roi li donnerent au devant dit Robert, 12 mines d'avainne et 6 oisons pour ce qu'il les deportast et por ce que il avoit prins les chevaus a cetui qui parole et les Herbelin Male Crainme a tort et a dereson, qui venoient de lor verger si conme ceti qui parole dit.

Requis conment il set que Robert oust les 12 mines d'avaine, il dit que li meeime les mena et les presenta a la fenme au devant dit Robert de par la vile de Buci et les livra Robin Male Craime et ce fut fait par le consentement de fere Johan de Tonnerre, prior de cele vile au tens que ce fut fait.

Requis de Perrot et d'Aaalot (sic) il dit qu'il n'en set plus.

Robin Male Craime et juré et requis des fez Robert de Hubecort et de ses sergenz, il dit ausi en toutes choses conme Colin Male Creinme, tesmoin devant cetui.

Hamardin de Seint Lié, juré et requis des fez Robert de Hubecourt, dit par son serement que il ne seit riens de Robert, fors que tant que il cercha la meson sa mere et en porta une chaudire et 2 poz, un de cuivre et autre d'aren, sanz reson que il eüst a prendre les si con il dit et les raient de 5 s.

Item il dit que les charretiers de Seint Ladre de Pisau ditrent a celui qui parole que le metre de Seint Ladre avoiet donné a Robert de Hupecort 2 charretées d'avaine por ses veilles, l'une a Noel out un an et l'autre avant antan.

Requis de Perrot, de Aalot et des autres sergenz, il dit que ne set plus.

Tecelin le Surre, juré et requis des fez Robert de Hupecort et de ses sergenz, il dit que il n'en seit nient.

Guiart Doece, juré et requis des fez Robert de Hupecort, dit par son serement que il ne set riens de Robert ne de ses sergenz, fors que tant que Robert prent deu melor bois a son ardoir.

Requis conment il le set, il dit que il l'a veu, ne plus il ne set des fez Robert ne de ses sergenz.

Hervet de Seint Lié, juré et requis des fez Robert de Hupecourt, dit par son serement que il s'est mesfet en son servise.

Premierement il dit que s'est mesfez en ceu que le prieur de Seint Ladre de Pisau li envoia en don, 2 anz a, 4 muis d'avaine charton, en 4 charretes, en un an 2 muis et en 3 anz 2, et dit que les charretes s'en revenoient toutes charchies de bois que cil Robert leur avoit donné de la forest lor roi.

Requis conment il le set, dit que il qui parole vit le charretes charchiés d'avaine et les charretiers qui les menoient disoient a cetui qui parole que li priour l'envoiet a Robert de Hupecort et vit cil qui parole les charretes venir toutes charchiés deu bois le roi, que cil Robert li envoiet de chenes enpres pié, bel et gros.

Requis conment il le set, il dit que les charretiers li disoient.

Item il dit que es bois qui sunt nonmez les bois des Achaz ou nus n'a ne vert ne sec, ledit Robert souffre et a souffert par 4 anz que les malades de Seint Ladre i ont usé par 4 anz et usent uncore au bois mort.

Requis conment il le set, il dit que il l'a veu, que s'en usoient et en usent uncore.

Item il dit cetui qui parole que Robert cercha la meson Ameline de Seint Lié devant nonmee et en porta un chauderon et 2 poz, un d'aren, autre de cuivre et la raent de 5 s. de par. sanz reson que il i eust.

Requis conment il le set, il dit que il vit quar il demeure empres ladite Ameline.

Requis de Perrot, dit que il s'et (sic) mesfez en cen que il prent deu bois as chevalier et a damoiseles et des bois le roi a fere ses paliz et auges et es et prent chenes par empres pié.

Requis conment il le set, il dit que il l'a veü et seü et aidié a chargier d'une part.6

Requis en quel estat il estoit quant il vint en servige, il dit que il n'avoit pas 5 s. vaillant quant il vint en servige si conme ledit Perrot le dit a cetui qui parole, qui ores est riches de bien de la value de 150 l. de par. de muble si conme le quemun du païs dit.

Requis dou ce grant mubles li est venu, il dit que il li est venu des granz usures que il a fetes conme fort usurier que il est, si conme l'en dit.

Requis de touz les autres sergenz, il dit qu'il n'en set plus, fors tant que il et tuit li autre dou païs avoient si grant poour des sergenz que il n'oseent rien dire et dit cil qui parole que il li vendit un oieut et la moitié d'un porc 14 s. de par. dont il n'oout onques que 6 de par. et por cele dete li bailla sa terre a moitié, don cil Perrot leva le tout.

Sevin Borre, juré et requis des fez Robert de Hupecort, dit par son serement que il n'en set riens se il s'est bien condiz ou malement, fors que il a oï dire a mout de gent que il fet assez d'utrage a la bone gent sanz reson que il i ait. Requis se l'en li a riens donné, il dit que les mesons de relegion d'anviron sa baillie, si conme la meson Seint Yvultre d'Orliens et autres mesons, li ont aucune fiee fait cortesie, et dit que quant il vait a lour mesons, que il se herberge lienz. De Robert de Hubecort il n'en set plus.

Requis de Perrot7 de Lonc Champ, dit que il se chaufe deu bois le roi.

Requis de quel bois, il dit que des achaz.

Requis conment il le set, dit que il vit le coupeors et cetui qui parole lor demandoit : A cui coupez vous ? Et lors il lor disoient : Nos coupon a Perrot de Lonc Champ, don ledit Perrot en a une charretee et le metre de Seint Ladre deu Piset l'autre Et dit uncore que il, celui Perrot, se chaufe dou bois as chevaliers, a denmes et en chaufe son four et en vent le païen en sa taverne, ce qui ne puet faire ne doit.

Item il dit que il envoie son sergent as lievres et as connins et li mees il vet quant il puet.

Requis conment il le set, il dit que il l'a veü li et son sergent venir et aler et a veü que li sergent en aportoit levres et connins.

Item il dit cetui qui parole que Perrot a donné dou bois dou chemin de la chaucie a Richer le Malle et au prestre de Seint Lié et a Mauroi de Buci et au Breton de Seint Lié.

Requis conment il le set, il dit que il le set quar li mesmes en a chacé ce Perrot de celui bois meimes et des gentz honmes qui i avoient part.

Requis conment il le set que il aiet donné de celui bois a ceaus devant diz, il dit que il a veu plusors fiees que s'en aloient toutes chargiés deudit bois qui lor estoit donné.

Item il dit que il a veu plusors fiees que l'en li portoit en don souvient poucins, chapons et gelines, mes il ne set por coi c'estoit.

Requis de touz les autres fez, il dit qu'il n'en set plus, fors tant que il et tuit li autre ont si grant poour, que il n'en osent riens dire de sergent pour poour que il de demuirgent en servige.

Hervet le Breton, juré et requis des fez Robert, dit que il s'est mesfet en cen que il a donné plusors fiés deu bois des achaz et deu bois de Bion d'enpres le Borc Nof.

Requis conment il le set, dit que il le set par ce que les charretiers qui le menoient et les coupierres qui le coupeient le ditrent a cetui qui parole.

Item il dit que le metre de Seint Ladre dou Piset a envoié en don a celui Robert avaine par une foiz ou par 2.

Requis conment il le set, dit que li charretiers qui la menoient le disoient a cetui qui parole, juré et debatu de Perrot de Lonc Champ, par haine.

Requis des fez Perrot8, dit que Perrot a fet fere palix de la forest lor roi qui sunt nonmé les Tailles lor Roi, vers Mortemer.

Requis conment, il dit que il vit les charretes qui aportoient le bois a fere les paliz bien juques a 13 charretees ou plus et par les charpentiers que il i voiet ouvrer.

Item il dit cetui qui parole que Perrot a fait venir tronces a es qu'i prenoit es bois des achaz.

Requis conment il le set, dit qu'il le set par le charpentier qui les coignea, et dit que il a, entour un an ou poi plus ou poi maiens que il fist venir les charretees de bois a fere les paliz et les tronces a fere les es.

Requis de coi il se chaufe, dit que deu bois le roi et des bois as gentis honmes d'ileuques environ et en prent cele part que il veut et dit que la meson ou il demure n'a poient d'usage eu bois si conme la gent dou païs l'ont dit a cetui qui parole.

Item il dit que il vait aus paniaus et prent levres et connins ne plus il n'en set.

Regnaut Moreau de Seint Lié, juré et requis de Robert de Hupecort, dit par son serement que il n'en set riens.

Requis de Perrot et des autres sergenz, dit qu'il n'en set riens.

Hervet Godeau, juré et debatu de Robert par la reson de la forest, dit qu'il ne set riens de Robert ne de Perrot de Lonc Champ, (et des autres sergenz)9, fors tant que il croit meux que Perrot ait10 fet ses paliz qui sunt environ sa meson des bois de la forest lor roi que d'aillors.

Requis si set que l'en li et riens donné, il dit que oïl, il qui parole et son frere li donnerent or a un an un aignel et croit meux que ce fust por deporter les de bois (sic) que por autre chose

Requis de touz les autres sergenz, il n'en set plus.

Andri Godeau, juré et (requis rayé) de debatu de Robert de Hupecort, requis des fez Robert, dit par son serement que il ne set riens de Robert ne de Perrot, fors tant que Hervet Goudeau, son fere, donna audit Perrot un aignel et croit meux que ce fut pour doute que pour autre chose, ne plus il n'en set.

Girart Coupee, juré et debatu de Robert de Hupecort, requis de ses fez, dit par son serement que il ne set riens, fors tant que caus11 de la perroisse de A nonvile le li ont donné blé par plusors foiz, si con il a oï dire.

Requis de tuitt les sergent, il dit qu'il n'en set riens, fors que tant que Belon la Godele donna audit Perrot un aignel, bien a un an, et le vit porter audit Perrot cil qui parole.

Requis se Perrot a riens dit oïl si com il croit par oïr dire par gent qui en ont eu, mes a lui non, prit eil onques riens.

Huau le Page, juré et debatu de Robert pour la reson de la forest, requis de ses fez dit par son serement que il n'en set riens

Tuibaut le Page, juré et debatu de Robert de Hupecourt et requis des fez Robert, dit qu'il n'en set riens.

Requis de touz les sergenz, il dit qu'il n'en set rien, fors tant que il croit meux que Perrot prensist le bois don il fist ses paliz en la forest lor roi que aillors.

Requis de touz les autres sergenz, il dit qu'il n'en set plus.

Thomas Godeau, juré et requis et debatu de Robert, dit par son serement que il ne set riens des sergenz, ne de Robert de d'autre.

Adam Cherpoutin, juré et requis de Robert, que il ne set riens, fors tant que l'en le tient a maus et a cruaus et que il bat la gent a tort, si con il a oï dire, ne plus il ne set sus Robert.

Requis de Perrot, dit qu'il ne set riens, fors tant qu'il a oï dire que Perrot pretix blé et le baille pour plus qu'i ne vaut, ne plus il n'en set.

Johanin le Page, juré, dit qu'il ne set riens de Robert, fors tant que il croit meux que Perrot prensist le bois don il fist ses paliz et don il se chaufe hors de vente que en vente, et dit que il ai oï dire que l'en a donné aucune foiz a Perrot poucins, chapons, gelines, que ce estoit par doute plus que pour autre chose, ne plus ne en set.

Guilot Godeau, juré et requis de Robert, dit que il n'en set riens, fors tant que il a oï dire que il est maus et crueus et divers, ne plus il n'en set.

Requis de Perrot si il set que il set mesfet, il dit qu'il ne set.

Requis si tient taverne, il dit que oïl.

Requis ou Perrot prist le bois dont il fist ses paliz, dit que il croit meux qu'il le prensist hors de vente que en vente.

Tievenau, juré et requis de Robert, dit que il est coutumiers de batre la gent, si com l'en dit, et dit qu'il a bien un an qu'il batit Henri Ridau de une maçue en la teste et li eüst la teste encarcelee s'il ne se fust trestonez et li fist une boce.

Requis conment il le set, dit que le batu le dist a cetui qui parole que ce li avoit fet Robert de Hupecort, ne plus il n'en set.

Requis de Perrot, dit que il n'est pas si crueus con est Robert.

Requis si tient taverne, dit que oïl.

Requis ou il prist le bois don ses paliz sont fez, dit que l'en dit que il l'a prins en la forest, mes il n'en vit onques.

Requis se l'en a riens donné a Perrot, il dit le metoier as moines de Guires li donnerent une charretee d'avaine en esté out un an.12

Requis conment il le set, dit qu'il le vit et croit meux13 que ce fust pour doute et pour crente de lui que pour autre chose.

Requis se il set que il soit usuriers, il dit que oïl.

Requis conment il le set, dit que il preta entour Pasques qui passa a son pere 12 mines d'avaine pour 14, qui valet 10 s., pour le terme avoir jusques a la oust.

Requis se l'en li a riens donné, il dit que oïl, aigneaus tendrons gras.

Requis ques persones, dit que Amiot Godeau li donna a Pasques, out un an, un aigneau, et la Coupee un autre, et le vit cetui qui parole que l'en les pourtoit audit Perrot et plusors autres gelines et chapons, de qui nons il ne souvient, ne plus il n'en set.

Perrin Gastelu, juré et requis de Robert, dit que il est herous et maus et crueus et qu'i bat la gent a tort si conme caus que il a batuz l'ont dit a cetui qui parole, ne plus il n'en set.

Odin Carnu, juré et requis, dit que il ne set conment Robert de Hubecourt s'est mené ou bien ou malement, ne des sergenz il ne seit riens.

Johan Borre, juré et requis, debatu de Robert pour amendes que il a levees de lui, dit par son serement que il croit que Robert et Perrot et li autre sergent se maiennent bien et leaument.

Requis de Perrot, dit que il se mainne bien et leaument et que il a bon renon en son païs et que n'en sest de riens mesfet, fors de 2 chenes que il donna, entour un an, a Hervet le Breton, et ce vit cetui qui parole.

Item il dit que il achata une meson qui li conta bien 40 livres et a puis touz jorz tenu taverne, et il herberge bonne gent si conme marcheanz et autre bonne gent et dit que li meeme i a jeu 2 foiz ou 3 et dit que il se chaufe bien et largement de la forest14 et ce a il veu plusors foiz, et dit que Perrot preste blé, avaine et char salee a la bonne gent et lor preste pour plus que venant.

Requis conment il le set, dit que il en a presté a Guilot Bolie antan entour onze livres si com il a oï dire et dit que il gaenna en ce prest des onze livres bien juques a 60 s.

Requis conment il le set, dit que il l'oïst dire audit Guilot a ses vesins et a plusors autres que il preste blé, avaienne et char salee si conme l'en dit et si dit que il a fet un paliz de reire de sa meson et dit que il n'en feroit pas autant cetui qui parole pour maiens de 50 s. de par., ne plus il ne set de Perrot, fors tant que il voit les porceaus Perrot et les sa donme qui vont tres touz les jorz es tailles et jesent anz et demorent en une loge qui est pres des tailles et dit que la dame en i a bien 40 et 8 et Perrot 20, si conme Perrot le li dist, ne plus il ne set de Robert ne de Perrot ne des autres sergenz.

Regnaut Chiefdomme, juré et requis des fez Robert de Hupecort dit par son serement que il n'en set riens, ne de Perrot, de da Alot (sic) ne des autres.

Henri Baudri, juré et requis des fez Robert de Hupecort, dit par son serement que il n'en set riens, fors que tant que Robert n'ust soitre a Amiot de la perroisse Seint Lié, demorant aus Bordeaus, que il avoit prins des bestes de la forest et pour ce il le raient de 2 muis d'avaine ou d'une, il ne set pas bien lequel, et le mist en prison pour ce, et le dist celui Amiot a cetui qui parle.

Requis de touz les sergenz, il dit que il n'en set plus.

autre main

Estienne le Prevost, des Chieres, juré et requis de touz les sergenz souz Robert de Hubecour et de celui Robert, coment il sont mené en leur servises, dit par son serement que il ne sout onques que Robert ne sergent quel qu'il soit souz lui se mesfeïssent en riens.

Estienne du Solier de Eschieres, juré et requis, dit que Robert s'est le plus honteusement et le plus malement mené en son servise du monde.

Requis en quoi, dit en ce que Robert a batu et feru mout de gent senz reson, si conme il a oï dire, et si conme il a oï plaindre pluseurs persones.

Item Robert et ses sergenz ont eu de cestui qui parole plus de 20 s. en escoz que il leur a delivrez pluseurs foiz, une fois 3 s., une foiz 4 s., autre foiz 5 s. ou plus ou moins, secont que il avoient despendu.

Requis pour quoi il leur delivroit, dit pour ce que cestui qui parole est charron et doutoit mout Robert et les sergenz que il ne l'ajournassent davant lui, fust tort ou droit, et pour ce que il ne le travaillassent a tort, leur delivroit cestui qui parole leur escoz, et dit que Robert li a fait domage par foies de plus de 60 s. en bois que cil Robert li arestoit, que il qui parole avoit achaté en vente pour cortoisies et servises avoir.

Requis de touz les autres articles, dit que il n'en seit riens

Requis de touz les sergenz, de checun par soi, dit par son serement que il ne seit nul de leur mesfez, mes il dit que il prenent volentiers qui leur donne.

Herbert Esluart d'Eschieres, Estienne Boet d'Eschieres, Amis Braz de Fer, d'Eschieres, Michel Mestivier, d'Eschieres, Aubert Usilart, jurez et requis, checun par soi, de Robert de Hubecourt et de touz les sergenz de souz lui, dient par leu serement que il ne sevent nul des mesfez Robert ne de ses sergenz, fors tant que il est trop hereus et bat la gent a tort et leur feit mout d'enuiz, si conme il ont oï dire quar autrement il n'en sevent riens.

Colin Lorenz de Vilereau, escuier, juré et requis, dit que Robert s'est mesfeit.

Requis en quoi il s'est mesfeit, dit que il s'est mesfeit en ce que il a sousfert pluseurs foiz que ceus de Mamonvile aient aporté du bois le conte du plus gros quant il avoient porté ou pois en foire ou fain ou autres choses ches Robert.

Requis conment il le seit, dit que il qui parole a veu plus de 13 foiz, puis 10 ans a, les charrettes de Mamonvile qui portoient bois ou blé ou avoine ou autres choses, cestui qui parole demandoit e charretiers qui menoient les charretes : Qu'est ce ? ou alez vous ? que portez vous ? . Et li charretier disoient : Nous alons cheis Robert de Hubecourt et li portons avoine, ou pois ou ce que il portoient, et quant les charrettes revenoient, il s'en venoient chargees de gros chesnes du bois le Conte, cestui qui parole disoit aus charretiers : Vous n'aportez pas du plus petit bois ou le priste vous ? les charretiers s'en rioient et disoient que il l'avoient pris u bois l'Evesque et que il prenoient tel bois que il leur estoit mestier, et dit que Mamonvile n'a point d'usage en la forest, et dit cestui qui parole que ce memes a il veü et seü de Famartvile par les charetier qui portoient ches Robert et pois et avoine et blé et autres choses et s'en revenoient chargees du bois le conte, et dit cestui qui parole que mout de foiz a veu cestui qui parole aler et venir les charretes, si conme il a dit devant, et dit que Famartvile a usage en la forest, mes ou bois le Conte n'a ale ne usage ne autre chose et dit cestui qui parole que Robert a fait norrir touz jourz a Mamonvile et a Femartvile levriers, chiens couranz et paoons et pourceaus, et ce seit cestui qui parole par ce que quant il aloit a Mamonvile et a Famartvile, il demandoit : Qui sont ses chiens ? qui sont cez porceaus ? Ceux des mesons disoient : Il sont Robert .

Item cestui qui parole dit que Robert dona en aoust, ot un an, chenes vert gros a faire filieres a Gielet de Saumer, et ce seit cestui qui parole par ce que il vit les charretiers audit Gilet qui amenoient une charrettee de gros chenes verz, et distrent cil charretier a cestui qui parole que Robert avoit donné le bois que il portoient en leur charrette a Gilet et uncore autre qui est u bois.

Item cestui qui parole dit que Robert moine trop malement les genz a ses jours, quar il les prent et les lourdoie et les mait en prison et leur fait amender, soit tort ou droit, et ce seit il par ce que il qui parole a esté pluseurs foiz a ses jours, et a veu que Robert formenoit enxi la bonne gent.

Requis de touz les autres articles, dit que il n'en seit plus fors tant que il qui parole a plus de 7 foiz esté en conpagnie ovec Robert, que Robert fesoit paier leur escot et dit que anxi l'a fait sovent Perrot de Lonc Champ et i esté pluseurs foiz ovec Perrot.

Requis de touz les sergenz, de checun par soi, dit que il n'en seit riens, fors tant que il a veu en la meson P. de Lonc Champ gros chesnes coupez par pié pour faire feu, et i a veu pluseurs foiz biau fou, mes cestui qui parole ne seit de quel lieu cil chenes venoient et dit que touz les sergent prennent volentiers quant l'en leur donne.

Requis de toutes les autres choses, dit que il n'en seit plus.

Jehan Gras Pour Neent, de Vilereau, juré et requis des mesfez Robert de Hubecourt, dit par son serement que il n'en seit riens.

Requis de touz les sergenz, de checun par soi, dit par son serement que il ne seit que nul se mesface, mes il dit que Perrot de Lonc Champ preste a usure.

Requis coment il le seit, dit par ce que il a oï dire a Guillaume Belie et a pluseurs autres, de qui nons il ne li sovient, que Perrot leur a pluseurs foiz presté blé a terme plus chier que il ne valoit le jour que il le recevoient, et plus il n'en set.

Pierres Chevalier, de Vilereau, juré et requis savoir mon conment Robert s'est mené en son servise, dit par son serement que il ne seit conment il s'est mené ou bien ou malement, fors par oïr dire.

Requis que il en a oï dire, dit que il a oï dire a pluseurs gent, de qui nons il ne li sovient, que Robert est trop mal home et maine trop malement la gent a ses jours et les bat et meit en prison et oït dire que les charretes de Mamonvile et de Famartvile vont sovent et ont alé pieça cheis Robert, a blé o avoine ou o autres choses et s'en reviennent par le bois chargees, du quel que les charretiers volent, mes cestui qui parole dit que il ne vit unques les charretes aler ches Robert ne venir.

Requis de touz les sergenz, de checun par soi, dit que il ne seit se il ont bien fait ou mal.

Requis de touz les articles desuz diz, dit par son serement que il n'en seit riens.

Houdoin Alinant, Guillaume Belie, Benoist Le Roi, de Vilereau, jurez et requis checun par soi de touz les articles desus diz, de Robert et de touz les sergenz de soz lui, de checun par soi, dient par leur serement que il ne sevent de Robert ne des sergent nul forfait, mes il dient que Robert est tenu a mal home, et dit l'en que il bat la gent, et dit Guillaume Belie de Perrot de Lonc Champ que il li a presté blé pluseurs foiz a terme, plus chier que il ne valoit le jour que il le li prestoit, 6 d. ou 8 chacune mine, et auxi a il dit a pluseurs autres, si conme cestui qui parole a oï dire, et dit Benoist Le Roi que il porta une foiz un chael a Mamonvile pour norrir, que Robert i envoioit par cestui Benoist, et plus il n'en sevent.

Giles du Pont miz en amende pour 6 chenes coupés enprés sa vente et trouvé dedens et dient li sergent que cil Giles n'estoit pas en ses tailles quant les 5 chesnes furent coupés.

Et furent present quant l'amende fut faite Phelipe de Marregné, Robert de Hubecourt, Giles du Pont, Perrot de Lonc Champ, Phelipes du Pont.

Item cil Giles du Pont en amende pour... .

Milart le Bonier de Semoy se plaint de Giles du Pont que il ot de lui 7 s. Gyle dit que il le trova coupant chesnes et Milart dist que il n'estoient pas plus gros que son braz.

Ce sunt les nons des bourgois d'Orliens :

Ce sont ceus de Bolain. Isti fuerunt circa et 4 mots ill.

Nous, enquesteurs, demandons a Bertaut de Vilers, sergent le roi en la garde de Courci en Loge, que il avoit recelé si conme nous disions, une amende de Adan de Vilers qui, puis la deffense que Berthaut li avoit faite de par le roi que il ne chaçast en la forest i avoit chacié et li trova chaçant cil Berthaut et en mena 2 levriers cil Berthaut qui couroient apres un lievre et les mist en garde de par le roi, en cele garde cil Adan vint et dist : en despit de Dieu et du roi et de vous, Berthaut, je ocirai ces levriers, il treïst s'espee et feri un des chiens et le tua mort et feri l'autre qui s'en foï et oute sa celee. Berthaut dit que le fait fut voirs, mes l'endemain que cel fait fut fet il ala au ballif d'Orliens et li mostra le fait. Le bailli apela son clerc et fist le fait arester.

Memoire de l'arest des usagiers de la forest de Loge, des quex nous avons aresté leur usages pour ce que il avoient usé senz servise que il facent le roi et senz autre cause soufisant que il puissent metre avant pour quoi nous disons que par defaut de sergenz.

Item memoire de demander au prieur de Mareau de quel lieu son usage e li vint, qu'il dit que il a u Gaut, ou de don le roi ou d'evesque ou d'autre lieu.

Estienne le Pife, d'Orliens, se plaint de Perrot de Lonc Champ que il li a tué son frere et lui plaie et mehangnie en la teste. Perrot dit que ore a 4 anz la veille de Noel il aloit par la forest il trova ledit Estienne et 3 autres en la forest a mesfet, il les voust arester, il se conbatirent a lui, il se desfendi au meaus qu'il pot, apres il fut a court et dit son fait au roi, le roi en fist enquerre et en fut assouz par enqueste et fist cele enqueste monseigneur Gui Le Bas.

Ce sont cex par qui l'en sara des fez au prevost moine de Clugni qui est de l'abeie Saint Maismin et Johan le Chat qui fu escuier l'evesque, son conpagnon, et de Besson, garçon celui prevost, qui fet les cordes a penre les bestes, c'est assavoir Le Faucheur de Clugni, Jehan le Teissier, Clariet, Boutet, Guillemart, Estieme de Trapes, et est assavoir que Taupin ne mengue ne ne boit que leenz et quant il est endormi lors va li prieur chacier et a 6 levriers, et laz et roiz et destruit toute la forest.

Cez sevent des fez Taupin : Robin de Gresilli, escuier, de Buci le Saint Liefart, mon seur P. de Terri, Parceval de Pont, escuier, et monseur Phelipe de Corneron, Phelipe de la Corbeliere, Richart le Poitevin et Genvier son frere, mon seur Raoul de Bieres et Estiene de Bieres son frere.

Memoire de la fame Huet de Brissi que Taupin força et le monstra a Felipe do Pont et de 3 autres ou quatre qu'il a forciees.

Perreau Lorian se plaint de Perreau de Long Champ, Perreau de Long Champ dit que il le trova cogneant chesnes, dolant et cogneant en son hostel coupez enprés pié et en fut ajournez et en fu levé 10 s. que Robert de Hubecourt ot, et il eussoit 60 s. mes il estoit et est trop povres.

v^o 2^e peau. C'est le transcrit d'une lettre des moinnes de La Court.

Ph. Dei gratia Francorum rex, forestariis suis de Logio, salutem, mandantes vobis precepimus quatenus monachos Curie Dei et servientes eorum qui de parte illorum transmittunt permittatis capere usuaria sua sicut carte nostre et Aurelianensium episcoporum testantur et sicut hactenus habuerunt et si forte per ignorantiam nemora nostra scindere vel eorum animalia pascere inveneritis ubi non sic eis concessimus, vadimonia eorum propter hoc capta usque ad primam assisiam recredatis et ibi diem assignetis, quia volumus quod emendatio et justicia que inde debent fieri sint per assisores nostros, non per forestarios et eis emenda reddatur quibus debet reddi, et quod si in venatione aliquis de fratribus sive de servientibus eorum captus ad presens forisfactum fuerit, eundem fratrem sive servientem tantum custodiatis quod inde nostram emendam et non ad abbaciam inde vos capiatis. Et si aliquis de suis propriis nemoribus eisdem monachis dederit ad ardendum sive ad edificandum, volumus quod monachi ea capiant de licentia nostra si videratis quod nemora nostra, ubi ipsi usuarium suum capiunt, minus inde gravantur, nec ipsi qui eis dederint nemora propter hoc accusentur. Et volumus quod ballivi nostri et assisores hoc faciant teneri. Hoc idem precipimus de fratribus de Quatuor Vallibus qui ibidem usuarium suum habent ex donatione regis Ludovici, karissimi genitoris nostri. Actum Medunte anno Domini M^oCC^o decimo, mense martio.

Nous devons enquerre savoir si Thenot a point vendu ne donné du bois de la forest ne merriem ne esceanne, ne merrien (sic), ne late ne charbon. Et nie ledit Thenot que il n'en vendi unques point et a otrié que nous enquerons

L'abé de Seint Yvultre d'Orliens a otrié que nous, enquereurs, facions voir savoir si une chaucee que l'abé a fait faire en la forest est faite au domage le roi il le voust amender, nous la ferons voir par bonne genz.

L'abé de Seint Yvultre d'Orliens se plaint de Taupin : vint de nuiz a une soe meson et voloeit entrer en cele meson et disoit que bone gent de cele meson avoient tué une truie sauvage et por ce qu'il n'i pot entrer il enmena chevaux et mit en prison gent et en il morut un home en prison. Si demandoit qu'il li fut amendé quar sa gent n'avoient pas tué bestes sauvage, mes une truie privee.

Taupin dit que il vint a leur meson et pour la beste sauvage, les gens de leenz li distrent que il n'i entreroit pas, mes alast en Espaigne apres le roi, quar roi ne reigne n'i entreroit. Apres ce il s'en ala et prist dedenz le tiers chevaus qui estoient leur et mist de leurs hostes emprison.

L'abé nie que sa gent ne firent unques tel vilanie. Une partie et autre doit prover, mes pour ce que le baillif a ... foiz ... de la chose, les parties se sont acordees que le baillif en quenoisse.

Tenot Mançon voust que nous enquerons savoir mon se il vendi onques point de bois ne de charbon que nous li metions sus que il devoit porter ches l'evesque et il le portoit et le vendoit ailleurs de quoi il a le bois honi et fait damage le roi de C marz d'argent que nous li demandions pour le roi, il le nia et en voust atendre enqueste.

Frater Gilebertus de Cirisi, de Curia Dei, dixit nobis quod Guillelmus de Ponte rogaverit ipsum ut nuntiaret sibi quadrigas suas pro deferendis charneriis quas fieri fecerat in foresta, et hoc crastina die qua recessimus de Lorriaco.

[3^e peau]

Memoria quod Jahennot et Estienne de Trapes et Alot et Perrot de Long Champ traient avant leur garant, du bois de quoi il ont fait leur meson, ou que il l'amendent le roi.

Ce sunt ceus de Lengennerie :

[4^e peau]

Ce sunt les nons de ceaus de la paroisse de Buci Lor Roi :

Rigaut de Loupile se plent de Taupin que il, celui Rigaut, avoit achaté une taille qui li avoit esté livree par le bocheron d'icele taille. Taupin, si con il dit, le semeut a sez jorz d'Orliens, par force de prison, le raieut de 8 l. de par. pour ce que son bois estoit lié d'autre lien que deu bois que il avoit achaté. 15 si com Taupin li seule

Taupin respont que il avoit coupez ponmiers et periers qui n'etoient pas en la motree, li Grier16 de Bur le Roi li deffendi de par le roi que il n'enportast le bois. Apres la deffense faite ledit Rigaut ala la et brisa la sessine le roi et por ce il le raent de 7 I. de par. que noisaument

Rigaut li neia et jura par son serement que onques ne li amenda quenoisaument, le grier en sera creu de la sessine, et est le jour assiné a dyemoienche, le prieur de Seint Ladre d'Orliens en seront creuz, et André Le Breton d'Orliens seront creuz de l'amende faite quenoisement par l'asentement de parties. Le prior de Seint Ladre dit que il ne set rien de l'amende, mes de la finance il set bien. Hervet d'Artamiler, maire de Gimiaus, dit par son serement que Rigaut brisa la sessigne.

Alaon de Sarain se plaient de Taupin que il le batit et ferit et li fist sanc et plaie sanz reson que il eust de ce faire.

Taupin respont que il le trova, lui et son sergent Perrot le Prevost, coupant chenes enprés pié ou il n'out poient d'usage si conme Taupin dit. Perrot le sergent Taupin le semont a jorz s'an metre et li dist que il li baillast sa sarpe. Ledit Alon dit que as jorz ne corret il poient ne sa sarpe ne li baudroit il poent. Taupin vint la et li dist que il li baillast sa sarpe. Il ne vout baillir ou hauter la sarpe et feri lo si conme Taupin dit, et li brisa l'arc et lors Taupin hauta son arc quant il vit son arc brisé et le feris de son arc si que il fist sanc et plaie en la coste, si con il a queneu par devant nous Alen li vies que onques ne le fist ce qu'i dit. Taupin li a amendé et au roi. Soront la coutume deu pais nous aprendon de la coutume et por cen que nous avons aprins de la coutume que le seignorage en doit avoir 60 s. de par. et celui a qui le mesfet est fet 20 s. de par., nous avisames audit Alaon 20 s. de par. pour le sanc qu'il li fist et 40 d.p. por ses damages, et au roi de 60 s.

Martin le Charron se plaent de Robert de Hubecort que il eut de lui 20 s. de par. sanz reson.

Robert respont que Alot fist la prinse et por ce il requeroit que Alot vousist avant qui fist la prinse.

Alot respont que il et Perrot de Lonc Champ aloent par le forest et troverent bois qui estoit coupé. Alot foui la roine de la charrete et trova les bois et en porta 2 pices et deffendit de par le roi que le bois ne fust bugé ne osté.

Martin si conme il dit en porta le bois et mennovra apres la deffense le roi faite. Martin respont que le bois avoit esté en sa meson par 3 jorz ou par plus. Et pour ce qu'on dit que la coutume de la forest est tele que puis que le bois a esté 3 ou plus en sa meson il ne doit pas fere amende, nous enquereors, refusames ceste coutume por ce que ele est contraire a la general coutume de la forest.

Ce sunt ceaus de Seint Liz :

Ce sunt cis de bordes de la paroisse de Seint Li

Mi sires Hues de Bainaus se plaient de Taupin que il le raient de 60 s. de par. sanz reson que il eust en ce fere si con il dit.

Taupin respont que il envoia ses sergenz et furent, troverent coupanz en bois Guillaume de Mauchene et dit que le coupour d'icelui chevalier ne se vout justicer par ledit Guillaume de Mauchesne. Lors vint Guillaume et s'en clama a Taupin, sergent le roi. Lors Taupin le semont a ses jors, le dit Hues. Il li vint et l'amenda de 60 s. de par. quenoisaument. Li dit Hues li nia tout par son serement. Taupin provera par Guillaume de Mauchesne, mon sour Th. le Bolier, Perrin de Vilers, Saiencert19 Baudoin.

Hervet le Grier se plaient de Taupin que il batit un sen sergent qui avoit non Beri de Costes, or a 2 anz, que li monta le cheval par desus le cors, si que l'os deu genoil l'en fut trestornez et en jut malade par quinz jorz por la bateure. Taupin le nie. Hervet le provera.

Hervet de Seient Lié se plaient de Perrot de Lonc Champ que il prent sa coite pour 5 s. de tor. que Hervet devoit d'amende. Requenoient bien les 5 s.t. por l'amende et dit que il ne pout reenbre la coite dedenz les nuiz, qui fust vendue 5 s. de par. et si com il ne devoit que 5 s.t. et elle fut vendue 5 de par., il demande 12 par. Perrot dit que il le mist devant Robert.

Ce sont ceaus de Sarcote : Hubert Aalart, Jehan Bordin, Bernart Cocier, Regnaut de Sarcotes, Robin Pote, Robert Chinart, Joanin Foise, Joanin Le Picart lit Hubert

Cis furent presenz quant misires Hues de Bainaus dist a Taupin sergent lor roi qu'il estoit desrobeors et l'amenda Taupin a nous pour le roi :

Guillaume de Mauchene se plaient de Robert de Hubecort que il aresta sa charrete qui venoit de ses usages si com il dit et en mena un des chevaus de la charrete, et le tint en prison une semainne et i out damage bien de 10 s. de par. Robert respont.

Guillaume de Mauchene se plaient que Robert li cua 2 cherez senz reson.

Robert li nea. Perrot de Lonc Champ, juré, de par les parties dit que li et Robert les trovoient en la forest lor roi.

Colin Trinon, par le quemandement Robert, le ferit d'une soete par mie le col.

Guillaume de Mal Chene se pleent que il prist son filé a Acis sant reson. Robert ne dist onques reson por coi il les tensist et los nous quemandons a Robert que il les rendist audit Guill.20 ou la value, dedenz les nuiz.

Item nous demandames a Robert et Perrot de Lonc Champ et a Gilet de Pont si savoient que le filé fust defendu a prendre les bestes environ la forest, il dient que onques n'oÿrent que fut defendu.

Une ligne dans l'autre sens :

Moreau le Jart remembrance deu bois qu'il a donné a malades de Saint Ladre, qu'il a coupé.

Remenbrance de ce que l'abé de Seint Evultre a ballié a messire Gautier de Nemours leur mainer de Saint Nicholas du Bois en la ballie Bertaut de Vilers, et en ont eu 100 p. Mes li procureor dient que ce n'est pas por l'usaiger et enquor entent li procureur que il leur doint plus de 10 livrees de terre, et il doivent venir lundi a Cheteaunuef et aporter leur resons.

Adan des Espoisses se plaint de Robert qu'il a arresté son usage a tort. Robert respont que il usoit la ou il n'a point d'usage, c'est assavoir u bois que il a acheté de sa seror qui point d'usage n'i avoit.

Et cil Adan respont que il en puet user par la coustume.

Robert li nie et offre a monstrer le contraire.

Nous sarons de la coustume.

Item Adam li demande 20 s.p. por ses porceax qui furent pris es tailles qui avoient plus de 3 anz.

Robert connoist que c'est voir, et issi la il a coustumes, puis son tens, etc.

Nous avons trové par les sergenz que li rois en est ensesiné.

Item Adam demande a Robert 26 s. de la vente d'un tonneau de vin. Robert li en connoist vint s. de par. et Adan s'en tient a paié et les doiet paier as nuiz.

Guillaume le Boier demande a Robert 10 s.por ses porceax. Robert les connoist, et est autel cas conme Adan.

Remenbrance des chaceeux qui jurent chiés Loïs le mecredi des feriez de Noel et qui s'en alerent par la forest et retornerent leenz atout chiens, mastins et levreirs et i troverent les estretes Bertaut et Chapelet.

Remenbrance des trois demandes que mon seur Jehan du Pont fist, contre Robert de Hubecort, la premiere d'un cheval de 100 s., la segonde de 3 chevax de 15 l., la tierce de 3 chevax que il raint 6 l.

Robert connut tout et respondi Phelipe de Marrigni por li et, la response oïe, li chevalier de son bon gré dist qu'il s'en sous-ferroit s'il plesoit a nous et a Robert et il nous plait et nous sousfrimes de prendre l'amende por ce que l'en s'en plainsist quar la response touche grant amende et est la response tele.

Seçon le Monier se plaint de Robert de Hupecort que il out de lui 50 s. de par. et de 10 est en sa sousfrance san reson. Robert respont que il trova son coupeor qui avoit coupé en la forest et avoit aporté en sa coupe autre bois, et pour ce il prist la charrete et les chevaus et le raient de 50 s. de par., et amenda le dit Semçon quenoissaument si con il dit Semçon nee que il ne li amenda ou que mes al quenoient que il en fina a lui a 40 s. quar autrement il ne poiet avoir ses chevax.

Robert Bonins se plaint de Perres Sanz Char que il vint en a sa meson ean et brisa son ostel et en porta 2 aunes et demi de drap et un sac san reson.

Si con li dit Perres le nia nous demandons a Robert se il le vouloit provier, il dit que non.

[6^e peau]

Guerin Le Fevre, d'Ienvile, se plaint que Robert le prist et aresta senz reson, il demanda retrauct, il l'a ot et en fut ajourné il fut au jour et mist avant ses bonnes raisons. Robert dit que il paieroit l'amende. Cestui qui se plaint fut au baillif, il ne pout riens faire, il fut au roi et a la parfin le roi leur donna auditeur : mestre Henri de Verzelai. Mestre Henri, oïes les resons d'une partie et d'autre conmanda que ses plaiges fussent delivré et leur choses, si demande ses domages qui montent 10 l. ou plus. Robert respont que cil Guerin ot tout que (?) il avoit eu et levé de lui, de ses ploiges, si dit que le roi est en sesine, que il ne sa gent ne doivent rendre nul demoges de prise que il facent la ou quident avoir a reson, et dit que cil Guerin fut au roi et ot juge mestre Henri de Verzelai qui conmanda a Robert, oïes les resons de ça et de la, que Robert rendist ce que il avoit pris de celui Guerin et de leur pl. , cil Robert le fist et dit que Guerin ne fist unques mention devant mestre Henri de nul domages, celui Guerin le quenoist bien. Et dit Robert celui Guerin mena bois a mesoner a Artenay et il ne le poieit l'amener fors a Yenvile.

Et nous por ce que la cause fu devant mestre Henri, deimes a celui Guerin que il li demandast ses domages.

Ce sont ceux d'Eschieres21

Estienne le Prevost : nichil

Dit que Robert fait norrir chiens et poons a Mamonvile et vidit

Estienne du Solier, bocheron.

Herbert Esluart : nichil, fors que Robert est herous et a oï dire que il bat la gent.

Estienne Boet, fevre : nichil omnino.

Amis Bras de Fer : id.

Michel Mestivier : nichil

Aubert Uslart : nichil

Ce sont ceux de Vilereau

Johan Gras pour Neent : nichil scit de Roberto nec de servientibus, nec de Petro sicut nec de fratre suo, tamen dicit quod mutuat ad usuram.

Houdouin Alinant : nichil

P. Chevalier, dicit quod Robertus gravat gentem ad dies suos etc., et dicit quod Mamonvile et Femartvile cherroient les pois, le forre et les dons et puis s'en viennent les charretes chargees des plus biaus chenes du bois le conte, si que cestui qui parole a oï dire.

Colin Lorenz, escuier, dicit de

Guillot Belie et Benoist Le Roi : aliquotiens P. mutuavit isti minam bladi cariorem 8 d. quam valeret, dicit quod detulit Camelinus ex parte R. apud Mamonvile ad sincendum et dicit de Petro quod ardet de ligno sicut Colinus dicit.