[1]

Estienes Fusee de Seint Julien, jurez et diligenment examinez requis sus ces choses, dist par son serement qu'il a bien 20 anz et plus que cil qui parle conut premiers ledit Felippe, et a veu ades des lors an ança que cil Felippes a heu droit entendement et saige jusque a bien antour VII an ça an arriers, mais des VII an ança, cil Felippes aodissoit et assotoit ausint conme se il retournast en anfance, quar il estoit moult vielz et avoit pres de 100 anz, si conme croit cil qui parle. Et s'aperçut cil qui parle doudit assotement Felippe par ce que cil Felippes, qui en son meien aaige soloit estre saiges et bien morigenez, estoit a ce atiriez par sa viellece, que quant il meingoit et buvoit an compeignie auvec les autres marcheanz, ne voloit aucunes foiz paier son esquot, mes disoit vilenies a ses conpaiggnons. Et dist cil qui parle que li assotissemenz doudit Felippe estoit ja a ce montez, dens 7 jourz an ança, que il sembloit estre hors dou sens. Et croit cil qui parle qu'il fust hors dou sens certenement, par ce que cil Felippes meigoit trop glotement et croichoit aucunes foiz vers les visaiges a ses conpaignons, la quel chose il ne soloit pas fere, et par ce meesmement, que si, conme il samble a celui qui parle, ledit Felippe est morz par sa forsenerie, quar cil Felipes s'estoit couchiez lundi a soir, qui passa chies Gautier Chevalier, en Champiaus, an un lit ou solier, et gisoit cil qui parle et Bereingier Roichefort et Estiene son fil chascun an un lit, et vers le jour cil qui parle se leva pour pissier a une fenestre et demanda audit Felippe se il se leveroit pour pissier et Felippes li respondi : De quoi vous meslez vous ? Et quant cil qui parole se fu andormiz, il oï ledit Felippe criant Ge m'an vois, ge m'an vois . Et lors se leva cil qui parle et ala au lit doudit Felippe et non trova pas, et lors cil qui parle vit une fenestre ouverte et i corut et vit ledit Felippe qui estoit cheuz a terre, et lors furent levé les 2 conpaignons desus diz et alerent tuit aval et troverent que les guetes qui gardent les hales l'aportoient contremont et le remistrent arriers an son lit, et ne demora gueres que uns prestres vint la atout Corpus Domini et li demanda li prestres s'il voloit estre confés et conmeniez, et il respondi : Fetes ce que vous vourroiz. Et li demanda li prestres s'il creoit que ce soit cil par cui vous seroiz sauf. Et cil Felippes dist : Ge croira ce que vous voudroiz . Une fois disoit Ge le croi , autre foiz non. Et a la parfin dist il Je le croi . Et lors li prestes li bailla. Et apres ce cil qui parle et Berangier et son fil desus diz et plusor autres alerent d'iqui au chans et des chans au montier, et dou montier retournerent a l'ostel et monterent oudit solier ou celui Felippes gisoit et regarderent, et vit cil qui parle que cil Felippes tenoit un coutel ausinc c'on trouve et s'an piquoit en la pance. Et li demanderent qu'il faisoit et il respondi qu'il se juoit a son coutel, et lors cil qui parle li osta le coustel, et lors i vint un mire pour lui afetier. Et dist qu'il ne le vit pas afetier, mais li mires dist a celui qui parle que cil Felippes n'avoit plaies don il deust morir, queque fust de la cheoite. Et lors cil qui parle s'an parti, et oï dire anviron tierce que cil Felippes estoit morz. Et dist cil qui parle qu'il croit mielz que cil Felippes fust morz par la cheoite que par les plaies dou coutel, et croit mielz qu'il se laissast cheoir par sa forsenerie que autrement. Et plus n'an set, fors tant que cil Felippes avoit ledit lundi matin pris congié a son oste de soi aler en son pais et retourna puis, et dist qu'il ne savoit qu'il queroit.

Beraingé Roichefort, de Seint Julien, jurez et requis conment morut ledit Felippe, dist par son serement qu'il morut si conme il croit par ce qu'i cheu dou solier de chies Gautier Chevalier, segon ce que a dit desus Estiene Fusee, et par ce qu'il se piqua de son coutel an la pance, mais mielz croit qu'il morut par la cheoite que par le piquement du coutel. Et croit cil qui parle que lediz Felippe se laissa cheoir doudit solier plus par sa forsenerie conme ivres et hors dou sens, que par autre chose, laquele forsenerie estoit tele, si conme croit cil qui parle, que lediz Felippes ne savoit pas an soi laissant cheoir se il faisoit ou bien ou mal. Et croit mielz cil qui parle que cele forsenerie par laquele Felippes se laissa jus cheoir li estoit venue plus par glotonie de trop avoir beu et meingié celui soir que par autre accident, auvec la sotie qui estoit oudit Felippe par veillece, conme an celui qui estoit bien de IIII^xx et X ans ou environ, tant conme croit cil qui parle, et qu'i avoit trop beu celui soir1. Et dist cil qui parle que quant cil Felippes chei il crioit Alez, alez . Et dist cil qui parle que lidiz Felippes estoit ausint que touz aodiz et assotiz des anviron 4 anz a ou 5, et estoit trop enuriez, des 1 mois en ança, de meniere conme de maingier glotement, de refuser a paier son esquot et de dire et fere vilenies a ses conpaignons. Et dist cil qui parle que cil Felippes aucunes foiz quant il aloit par les voies contoit au haut et touz sens ce qu'il devoit et ce qu'an li devoit, et avint de lui bien a autour 5 anz et plus que cil Felippes fu au montier, a Seint Pere, a Saint Julien du Sauz, quant l'an chantoit la messe et en cel point qui li prestre fist l'elevation, que cil Felippes leva ses mains an haut toutes jointes et en levant dist si haut que plusor l'oïrent : Vinte sept livres, maugrez Deu. Et maingoit et buvoit trop glotement et faisoit plusors autres signes de forsenerie et de sotie et plus li avenoit en defaut de lune que en autre tens, et des autres choses s'accorde cil qui parle audit Estienne Fusee, et plus n'an set.

Gautiers Chevalier, requis sus ces choses, s'accorde au dit Beraingé, fors ce que la ou cil Beraingé dit que cil Felippes estoit assotiz des 4 anz ou 5 ança, cil qui parle dit des 2 anz an ança ; et fors ce que la ou cil Berangé dit qu'il croit mielz que cil Felippe se laissast cheoir par forsenerie de2 glotonie etc., cil qui parle dit qu'il croit mielz que cil Felippe se laissast cheoir par forsenerie de sotie de feste, de lunoisson et de veillece que par autre chose, conme cil qui estoit vielz et soz et lunatiques, si conme croit cil qui parle, par plusors folies et forseneries qu'il li avoit veues fere et oï dire, et teles que nuls hons vaillanz qui an son bon sens feust ne deust faire, quar il ne savoit qu'il se faisoit par maintes foiz.

Estiene Roichefort, filz dou dit Beraingé, jura et dist qu'il a bien 8 jourz que cil Felippes estoit hors dou sens, si conme il sembloit a celui qui parle, et li sambloit par ce que, quant cil Felippes vint a Paris, hui a 8 jourz, il aporta deniers en une bouges et ne les sot onques estuier ne baillier estuier, mais les i osta la dame de l'ostel, quar cil les avoit getiez anmi la maison et les estuia la dame, et se despoilloit touz nuz et montroit ses menbres vergoigneus neis devant les fammes, conme hors dou sens et fox. Et a bien veu cil qui parle par son serement que ledit Felippe, bien a autour 5 anz se esgratinoit ou visaige par lunoisons et dessiroit sa coiffe et tiroit ses chevox en tele meniere que tex foiz estoit qu'il se faisoit touz sanglanz.

Requis conment et par quele achoison morut le dit Felippe dist autel que Beraingé, peres a celui qui parle, an toutes choses, fors tant que la ou cil Beraingés dit que par l'ivrece doudit Felippe, il croit qu'il fust plus forsenez celui soit que par accident autre, dist cil qui parle qu'il croit mielz que par forsenerie de sotie de teste et de villece se laissa cheoir aval cil Felippes plus que par glotonie. Si avoit il bien beu, mais plus estoit frenisieus et soz que ivres. Et n'a pas plus de 10 anz que cil qui parle conut premiers ledit Felippe. Et a touz jourz oï dire des lors que il estoit tenres de teste par lunoisons, et plus n'an set.

Colins Li Normanz ... [cf 3].

Renauz Petit Roiz de Seint Julien dou Sauz, de l'aaige d'autour 40 anz ... dist que de son aaige, des lors qu'il pot avoir entendement, il conuist celui Felippe et le vit cil qui parle bon marcheant et saige ou moien aaige doudit Felippe, mais quant il chei en grant viellece il assoti molt et aodi et faisoit et disoit molt de vilenies a genz et plus sovant en defaut de lune que autre foiz. Et dist cil qui parle que cil Felippes ne sot bien marcheander ne ne fust en bon estat de son sens des 3 anz an ança. Et molt estoit enpiriez des huit jourz a qu'il vint a Paris, et an tele meniere qu'il estoit le plus des foiz que cil Felippes ne savoit qu'il faisoit. Mais dit cil qui parle que d'androit, de la meniere et de l'achoison de la mort celui Felippe ne sot il riens, fors par oïr dire, conme cil qui estoit aus nex en Greve et gardoit le vin, mais il croit miez par les choses desus dites, que cil Felippes fust morz par sa forsenerie et par sa sotie, tele qu'il ne savoit qu'il faisoit, que par autre acoison. Et plus n'an set.

Jaquez Cretoiche, de Saint Julien dou Sauz, de l'aaige de 40 anz, ... dist par son serement que bien a 30 anz qu'il conut premiers celui Felippe qui morz est, et ne vit onques, tant fust cil Felippes vielz ne juenes, qu'il ne samblast a celui qui parle que cil Felippes fust soz par lunoisons. Et estoit bien empiriez de sa sotie des 3 anz an ança, mais des 8 jourz an ança estoit il si par ampiriez qu'il sambloit mont bien qu'il ne seust qu'il faisoit et qu'il fust hors dou sens, par plusors folies qu'il faisoit3 et le redotoient molt li conpaignon marcheant pour sa sotie et pour sa forsenerie. Et d'androit, de la meniere de sa mort et de l'achoison, s'acorde cil qui parle audit Regnaut Petit Roi, et plus n'an set.

Garniers Begine, de Seint Julien dou Sauz, de l'aaige de 45 anz, ... [cf. 6].

Colins Pastez, de la Vilenueve le Roi, de l'aage de entour 35 anz, ... [cf 6].

Richer de Mal Regart, famme Gautier Chevalier, bourgeoise de Paris, ... [cf 3], ce ajousté que cele qui parle dist des 10 anz an ança que ele le vit premiers ele n'oï onques dire qu'il fust se soz non, et fox de teste par lunoisons.

Bertheloz Bolez, de Seint Julien dou Sauz, de l'aaige d'autour 50 anz, ... dist que quant cil qui parle venoit a Paris, il et Girarz Boileaul de Seint Julien, et il furent a Ponz. Cil Felippes qui venoit ausinc a Paris, juesdi ot huit jourz, les ataint a Ponz et traist a l'ostel ou cil qui parle et ses conpainz estoient et vint auvec els cil Felippes jusques a Paris. Et dist cil qui parle que cil Felippes fist par le chemin tant de folies et de soties que cil qui parle et ses conpainz an estoient trop amalaisé et ne savoient qu'il peussent faire de lui, tant de soties faisoit et croichoit nois cil Felippes an sa viende et an ses conpaignons et an leur verres quant il voloient boivre. Et nois ou bois de Senart gita il hors ses deniers qu'il aportoit en unes besaces et les prist cil qui parle et les aporta jusques a Paris, et li paioit cil qui parle ses esgoz dou suen argent propre, non mie des deniers celui Felippes, et plusors autres soties faisoit et fist cel Felippes par le chemin, teles qu'il sembloit molt bien qu'il fust hors dou sens. Et croit cil qui parle par son serement qu'il estoit hors dou sens. Et dist cil qui parle qu'il conut premiers ledit Felippe des lors que cil qui parle n'avoit pas 10 anz, et vil que cil Felippes estoit en son moien aaige uns des plus saiges marcheanz de son païs, mais que des 3 anz an ança que cil Felippes assoti et aodi si durement que li baillis l'arcevesque de Senz vost deffendre que l'an ne li creust riens, par ce que cil Felippes ne savoit qu'il faisoit, et ades anpiroit et plus an defaut de lune que an autre tens. Et croit cil qui parle par son serement que la cheoiste que cil Felippes ot et le piquemant qu'il se fist an la pance, qu'il fist ce par forsenerie tele qu'il ne savoit qu'il faisoit, comme cil qui an soi piquant disoit qu'il se jooit. Et plus n'an set.

Girarz Boileau, de Seint Julien dou Sau, de l'aaige d'autour 40 anz, ... dist qu'il connust ledit Felippe des lors qu'il se sot apercevoir et qu'il ne vit onques que cil Felippes ne fust foibles de la teste et meesmement par lunoisons, et ne fu onques que il ne fust redoutez. Et oï dire cil qui parle que feu Ysabiaus la Chicheuse, tente doudit Felippe, fu hors dou sens, et fu liee conme fole par l'espace de 3 anz avant que ele moreust, et vit cil qui parle que Marie, niece doudit Felippe, fille de son frere, fu hors dou sens, n'a pas 4 anz, et fu liee conme fole et hors dou sens, et menee a Saint Varain conme forsence pour recovrer senté, et vit ancor et ne sera ja croisanz que ele ne s'en sente. Et dit cil qui parle que cil Felippes estoit empirez molt des autour 2 anz an ança et au tel meniere qu'i ne savoit par plusors foiz qu'il faisoit. Et plus an croissant que an autre tens. Et des autres choses dist cil qui parle autel conme Berthelot Bolez desus diz.

Jofroiz le Breton ... [cf 7], hors ce que cil qui parle ne conoissoit celui Felippe que des 11 anz an ança.

Pierres de la Cele, prevoz l'arcevesque de Seint Julien dou Sauz, de l'aage de 40 anz, ... dist que cil Felippes fu ses conpainz de ladite prevosté de Seint Julien par l'espace de pres d'un an, et il la devoient tenir ansamble par 2 anz, mais cil Felippes asoti et devint ausinc conme hors dou sens, et li avenoit segon les lunoisons plus une foiz que autre, et d'androit, de la meniere et de l'achoison de sa mort, cil qui parle ne set riens, fors par oï dire, mais croit par son serement que cil Felippes soit moïz par sa forsenerie tele qu'il ne savoit qu'il le faisoit quant il, si com l'an dit, se tuoit, et plus n'an set.

[v^o] Inventum est probatum esse sufficienter quod mortuus fuit idem Philippus per insaniam et quod per septem annis citra, cum erat quolibet mense in defectu lune furiosus et plura signa furie faciebat. Et propter hoc liberatus fuit cum bonis suis de mandato prepositi Parisiensis predicti qui prius fecisset quod dictus Philippus corpus suum et bona sua forefecisset.