[1]

Au recto : Enquestes faites dou commandement nostre sire le roi par le ballif de Caen selonc la tenour des lettres deudit nostre sire le roi dont la copie est ci dessouz enclose.

Enquestes faites du commandement nostre sire le roy par le baillif de Caen, selon la tenour des letres nostre sire le roy ci dessouz transcriptes, appelez et presenz as dites enquestes faire henorable homme mestre Robert de Caudebec, procureour le roy, pour nostre sire le roy, d'une part, et Pierre Cordon, escuier, seneschal et attorné reverent pere mons. G., par la grace Dieu evesque de Baieux, pour ledit evesque, d'autre. Et amena ledit seneschal et attorné de la partie dudit evesque les tesmoins dont les depositions sunt ci dessous escriptes.

Copie. Ph. Dei gratma Francorum rex, ballivo Cadomensi salutem. Significavit nobis dilectus et fidelis noster episcopus Bajocensis, quod dilectus et fidelis Petrus, dominus Chambliaci, miles et cambellanus noster, villam de Thorigniaco, cum feodis et pertinenciis suis, a rege et regina Sicilie acquisivit, et quod ipsi partem ville et feodorum predictorum ad fidem et homagium ab episcopo Bajocensi tenebant ; quam villam cum feudis predictis a dicto Petro causa permutationis habuimus et habemus. Item et quod, tempore quo nos et progenitor noster temporalitatem episcopatus Bajocensis ad manum nostram posuimus, et antea a tempore de cujus contrario non erat memoria, episcopus Bajocensis qui erat tunc, erat et fuerat et sui predecessores fuerant in possessione boujonnii pertinentis ad pannos, in villa Sancti Vigoris prope Bajocas, habendi, tradendi et emolumentum sibi applicandi, de quo eidem episcopatui non fuit facta restitutio, licet a predecessore dicti episcopi fuerit pluries requisita.

Item et quod dicto tempore et ante, etiam a tempore fundationis ecclesie Bajocensis, episcopi Bajocensis habuerunt et adhuc habet idem episcopus quemdam vicum qui dicitur Pons Sancte Marie, quem tenuerunt et possederunt libere absque ingressu potestatis justiciarie alicujus, nisi episcopi Bajocensis, in casibus magne et parve justicie, et quod gentes nostre impediant dictum episcopum uti magna justicia in dicto vico et ejus predecessores impediverunt, qui ut impedimentum hujusmodi amoveretur cum instancia pluries requisivit, supplicante igitur dicto episcopo ut de parte ville et feodorum predictorum que ab eodem episcopo teneri debet, recompensationem et bojoni predicti restitutionem fieri eidem episcopo et impedimentum amoveri predictum faceremus, mandamus tibi quatenus super predictis omnibus et singulis de jure dicti episcopi, qualiter episcopi bajocenses usi sunt predictis temporibus antedictis et ante, de valore et quantitate partis ville et feodorum, et quanta exinde juxta patrie consuetudinem debeat in annuo redditu fieri eidem episcopo recompensatio et de aliis circumstanciis predictorum, vocatis procuratore nostro et aliis evocandis, inquiras cum diligencia veritatem, et inquestam quam inde feceris sub tuo clausam sigillo nobis quamcicius remittas. Actum Parisius die ultima decembris anno Domino M^oCCC^o septimo.

I. Lorens Nicolas, de l'aage de 38 ans, tesmoing amené par ledit seneschal et attorné, sur ce que ledit attorné disoit que el temps que le roy nostre sire et son pere avoient pris la temporalité a l'evesque de Baiex en la main du roy et devant, de tel temps que il n'estoit memoire du contraire, l'evesque de Baiex qui estoit pour le temps estoit et avoit esté et ses predecessours en possession du boujon appartenant as draps en la ville de Saint Vigor jouste Baiex, d'avoir, de baillier et les emolumens a eus appliquier, de quoi a celi evesque ne fut faite restitution, ja soit ce que du predecessour a icestui evesque ait esté restitution requise, dit que il a hanté les comptes et les receptes de la visconté de Baiex depuis 20 ans, et grant partie du temps a fait la recepte de ladite visconté, et que il a veu et seu depuis 20 ans le roy saisi d'avoir l'esploit du boujon et du sayn de Baieux et de Saint Vigor, des hommes dudit evesque, paisiblement, et dit que il a bien oï dire que l'evesque Pierres, derrain evesque devant cestui, requist plusours fois cel emolument, et combien que il le requersist, il n'oï onques que iceli evesque delivrast ledit emolument a avoir par devers soi. Requis du temps par devant, se il seit que les evesques qui estoient pour le temps eussent la saisine et joisissent de tel emolument, dit que il ne seit ne ne croit que onques en eussent espleit ne emolument, anchois croit de cel temps eu contraire que le roy en ait eu l'emolument, toute foiz que cas s'est offert, ne onques ne sout le contraire.

Item, sur ce que ledit evesque disoit que du temps dessus dit, et de devant du temps du fondement de l'iglise de Baiex, les evesques de Baiex avoient eu et encor icest evesque a, une rue appelee le Pont Sainte Marie, laquele il tindrent et poursistrent franchement sanz entree de poesté d'autre justicier, fors de l'evesque de Baiex, es cas de haute et basse justice, et que les gens nostre sire le roy empeechent ledit evesque d'user de haute justice en ladite rue et ses predecessours empeechierent, dit ledit Lorens, que du temps de 20 ans en encha, il a veu que le roy usoit oudit lieu de toute haute justice toute fois que cas s'offroit, qui souvent s'est offert, comme de cas de cri, de haro, de douaire, de partie, de frarrage et d'autres, et du temps de devant, dit il que il croit que le roy ait touz jours usé en semblable maniere de touz cas de haute justice el dit lieu toute fois que cas s'offroit, et le croit pour la renommee qui le dit issi. Plus dit ledit tesmoing qui parole que, environ 25 ans a, Pierres Chouquet, demourant et resseant en ladite rue, fit pris en ladite rue en son hostel pour la mort d'un homme que l'en li metoit sus, et jugié par la justice le roy, ne ne sout onques ne n'oï parler veritablement que ledit evesque ne ses predecessours usassent en contraire, combien que il aient maintenu ou requis en contraire.

II. Mahieu de Juez, de l'aage de 60 anz, tesmoing amené de par ledit attorné, juré et requis sur les choses dessus dites, dit que il ne seit que l'evesque de Baiex qui est a present, ne l'evesque Pierres, son predecessour, ne autres evesques par devant, usassent onques de la justice du boujon, des emoluments ne de l'espleit en la ville de Saint Vigor, et dit en contraire que il croit que le roy en a usé et les fermiers qui ont eu cause de lui toute foiz que cas s'est offert, et ces choses dit pour ce que la renommee ledit issi, ne plus n'en seit.

... dit que il fut serjant le roy en la visconté de Baiex des le temps sire Jehan Le Saunier, lors baillif de Caen, 35 ans a ou plus, si comme il li semble, et vit en cel temps que les justices le roy qui estoient pour le temps usoient pour le roy en la rue du Pont Sainte Marie a Baiex de toute haute justice comme de cri de haro, d'ajornemens, de veues et d'autres choses, ne l'evesque n'en usoit point, mes tant vit il que cil qui estoient pour l'evesque en requeroient a avoir la connoissance, et la court, comme en cas de haute justice, mes comment que il la requersissent, le roy en demouroit saisi. Et dit le tesmoing qui parole que, el temps que il estoit serjant, il redoutoit aucune fois a mener en prison ceus que il menoit pour cas de crime par ledit lieu pour ce que aucuns disoient que c'estoit aumosne. Et parmi tout ce il dit que, environ 30 ans a, il fut a mener par ledit lieu, par 2 foiz, 2 hommes en cas de crime, l'un a Caen et l'autre a Baiex, l'un avoit non Teisevent et l'autre le Capelier, et passerent par ledit lieu sanz debat, paisiblement, et plus n'en set.

III. Ernoul le Tainturier, de l'aage de 70 anz, ... [1] dit ... que el temps que l'evesque Pierres, predecessour de cestui, vint premierement evesques de Baiex, les gens dudit evesque s'efforchoient d'user de la justice du boujon a Saint Vigor, et cil qui portoient le boujon le roy autressi eudit lieu, et estoit debat entrels, mes parmi tout le debat ceus qui estoient pour le roy emportoient tout l'emolument au devant des gens dudit evesque. Requis se au devant de cel temps les evesques qui estoient en cel tens ou ceus qui avoient cause d'els usoient d'avoir lesdiz emolumens, dit que il n'en set rien, quar en cel temps il ne demouroit pas el païs.

... dit que, depuis le temps de 30 ans en encha que il vint demourer el pais, il a veu et seu que les justiciers le roy, les serjans, et les autres qui estoient pour le roy, usoient el dit lieu des cas de la haute justice. Et dit que il vit que les gens dudit evesque le debatoient et disoient que il n'estoient pas tenuz a respondre devant les gens le roy et ne set comme le cas se determina. Requis se il set que l'evesque ou ses gens usassent onques eldit lieu apres ce ne devant du cas de la haute justice, dit que il n'en set rien.

IV. Raaul du Clos, homme de l'evesque, de l'aage de 55 ans, tesmoing ... [1] ne set se l'evesque Pierres, predecessour de cestui, ne autre par devant, userent onques du boujon a Saint Vigor, mes il a bien oï parler que il en requeroient la justice a avoir.

Requis el contraire se les gens le roy ont usé du boujon eldit lieu, dit que il croit que il en aient usé toute foiz que cas s'est offert, et le croit pour ce que il l'a issi oï dire, plus n'en set.

... dit cil qui parole que le roy a usé de la haute justice eldit lieu, du temps de 28 ans en encha que il a repairié la ville et le lieu, et aloit as veues eldit lieu comme homme de conseil, et estoient les quereles determinees en la court le roy. Et dit que il croit que, eu temps de devant, le roy en avoit touz jours usé endit lieu, ne onques n'oï parler du contraire, a quoi il ajoutast foi, tant dit il que il a bien oï parler que ceus qui menoient persones souppechonnouses de cas de membres doutoient a passer par ledit lieu, pour ce que aucuns vouloient maintenir que c'estoit aumosne. Et dit ledit tesmoing qui parole que il vit que son pere menoit un homme soupechonné, et quant il vint vers cel lieu, il dist : Alons par decha, quar se je passoie par la rue du Pont Sainte Marie, j'en porroie avoir riote dont je n'ai cure. Et plus n'en set.

V. Guillaume Sourebarbe, de l'aage de 70 ans, ... [1] croit que l'evesques Pierres, quant il vint premierement evesque, usa de la justice du boujon a Saint Vigor, et les evesques qui souloient estre par devant en userent aussi, ce croit il, et le croit pour ce que il l'oï dire en cel temps a plusours, et autrement n'en vit onques rien. Et dit le tesmoing qui parole que il vit tel houre que il ne couroit ne a Baiex ne a Saint Vigor point de boujon, mes il croit bien que le roy a usé du boujon a Saint Vigor puiz que le temporel l'evesque fut pris, environ 20 ans a, en la main le roy, ne plus n'en set.

... dit que le roy en a touz jours usé de toute sa souvenne, toute fois que cas s'offroit, depuiz 50 ans, et a veu que la gent le roy i ont cueilli le fouage, et puis le rendoient as gens des evesques qui estoient pour le temps, et i a eu pris gens par larrecins et par murdres qui estoient justiciez par les gens le roy. Et dit plus que, environ 56 ans a, il vit une bataille en cause de mort d'omme el chastel de Baiex, et estoient les persones qui se combatirent de la rue du Pont Sainte Marie et dit que l'un avoit nom Guillaume Bourgueise et l'autre Dyonis Candel.

VI. Pierres Varnier, de l'aage de 50 ans, ..., dit [1] que il n'oï onques mes parler devant au jour d'ui que les evesques qui ont esté eussent rien el boujon a Saint Vigor ne en usassent ne emprés ne devant que le temporel l'evesque Pierres fust pris en main de roy et dit que le roy en a es temps passez usé toute fois que cas s'est offert, ce a il oï dire, et ce croit il, et plus n'en set.

..., dit que 25 ans a que, il vint premierement a Baieux pour demourer el service de l'official qui estoit pour le temps, et faisoit les despens de l'ostel, et vit que l'evesque Pierres tenoit son temporel et son espirituel tout en pais. Apres vit que le roy nostre sire, pour descort qui fut entre lui et l'evesque Pierre, prist ou fist prendre son temporel en sa main. Et dit le tesmoing qui parole que au devant de cele prise ne depuiz ne vit onques que ledit evesque Pierre, ne autre pour lui usassent onques de haute justice el dit lieu, ainz en ont usé la gent le roy en la maniere que eus en usent a present, et issi l'a il oï tesmoigner a la renommee a qui il ajouste foi, et plus n'en set.

VII. Guillaume Marie, de l'aage de 60 anz, ... [1], de la justice du boujon a Saint Vigor, que el temps d'un evesque qui estoit pour le temps anchois que l'evesque Pierres fut evesque, il oï dire que icel evesque fist alever le boujon a Saint Vigor, et usa de justice en la cause du boujon poi de temps, environ demi an. Quant la gent le roy apperçurent que l'evesque faisoit user contre le droit le roy, il li abatirent toute sa justice, et depuiz la gent le roy en ont depuiz touz jours usé, et a bien veu la gent le roy en cest usage depuis 30 ans. Et avant que le temporel l'evesque Pierres fut pris en main de roy, en vit il user la gent le roy, mes bien dit que l'evesque Pierres, en temps que il vivoit, requist plusieurs foiz que l'en li rendist cele franchise, mes il n'i fut onques oï.

... dit que de 30 ans et depuiz il a veu user la gent le roy eudit lieu de haute justice toute foiz que cas s'offroit. Et vit le tesmoing qui parole que eudit lieu ot 1 homme ociz, et pour la mort d'iceli l'en prist Jehan Lalemant, et fut mis en la prison le roy, environ 25 ans a, et ne set se adonc le temporel de l'evesque estoit en la main le roy ou non. Et 1 autre homme ont il tué eldit lieu, de quoi Pierres Chouquet fut pris eldit lieu et pendu et justicié par la gent le roy et a bien environ 20 ans que ce fut.

Requis se au devant que le temporel l'evesque fust pris en main de roy pour cause, ledit eves que Pierres ou autres devant lui userent onques eldit lieu de la haute justice, dit que il ne set que autre en usast onques que le roy, en quel tens ce fust. Et plus n'en seit.

VIII. Jehan Lengleis, de l'aage de 60 ans, ... [1] du boujon, dit que il n'en set nient, ne qui en a usé, ne comme la chose s'est portee.

... dit que, du temps de 40 ans et depuiz, touz jours il a veu toute fois que cas s'offroit la gent le roy saisis de toute haute justice el dit lieu, mes tant dit il que quant le serjant le roy aloit justicier eldit lieu, il menoit o lui le serjant l'evesque et a eu eldit lieu gens plusours fois pris par la gent le roy et amenez el chastel de Baieux.

IX. Martin Le Fevre, de l'aage de 70 ans, ... [1] dit ... du boujon de Saint Vigor, que lui qui parole fut souz serjant en la ville de Baiex, souz Giefroi de Maysi, par l'espace de 20 ans et de plus, et a bien 23 ans que il est hors du service, et dit que bien 20 ans et plus, avant ce que il fust el service, que pour le profit commun, que pour la mauvestié que l'en faisoit es dras, le boujon fut establi, et dit que depuiz el temps a l'evesque Oede, et el temps que le tesmoing qui parole estoit serjant, la gent dudit evesque Oede establirent le boujon a Saint Vigor et tantost comme la gent le roy le sorent et porent savoir, il deffendirent a la gent l'evesque que il n'en usassent, et lor abatirent cele justice. Et quant l'evesque Oede oï parler que ses gens avoient establi boujon, il dist : Par cent mile diables ai je boujon ? Ostez, je n'en ai cure, il ne m'appartient pas, je n'ai point de monnoie , et dit que il a touz jours veu user du boujon a Saint Vigor as gens le roy.

..., dit que des le temps qu'il fut serjant, toutes foiz que cas s'offroit, comme de haro, de marchié de bourse, de briés, de toutes autres choses qui appartienent a haute justice, il a veu les gens le roy saisis de haute justice eldit lieu, et user pesiblement, et el temps de devant, par la relation de ceus qui estoient pour le temps, dit que il a oï dire que la gent le roy en ont touz jours usé. Et dit que el dis lieu a eu plusours murdres et plusours meffaiz dont la justice a touz jours esté faite par la gent le roy, ne ne sont que les evesques qui ont esté pour le temps en usassent onques. Plus n'en set.

X. Bertin de Tour, homme a l'evesque, de l'aage de 65 ans, ..., dit [1] que il ne set ne onques ne sout que nul evesque de Baieux eust onques justice el boujon a Saint Vigor.

... dit que il a repairié la ville de Baiex des son enfance, et a esté prevost le roy a Trevieres, et serjant le roy en la baillie desus Port, et ne vit onques ne ne sout que evesque de Baiex nul, quel que il fust, dont il a veu 5, eust point de haute justice, en quel cas que ce fust, en la rue du Pont Sainte Marie, ne aillours, et dit que le roy i a eu toute haute justice toute foiz que cas s'est offert, et dit le tesmoing qui parole que il a veu plusours fois en la rue du Pont Sainte Marie murtriers et autres malfetours, de quoi les gens le roy connoissoient sanz nul debat.

XI. Gires de la Barre, homme a l'evesque, de l'aage de 70 ans, ..., dit [1], du boujon de la ville de Saint Vigor, que il n'en set nient, et que au devant du jour d'ui il n'en oï onques parler que l'evesque i eust ne deust avoir ne onques eust boujon.

..., dit que il oï dire a son pere qui manoit au Pont Sainte Marie que il ot 1 homme ocis, environ 60 ans a, que on appeloit le fiz Bourgueise, et l'ocist Dyonis Candel, et en fut une bataille gagié entre ledit D. et 1 des amis du mort en la court le roy, et en fut la pais faite, le dit tesmoing dit qu'il ne sout ne ne vit que onques evesque eudit lieu usast de haute justice.

De l'evesque Guy dit que il deffendoit moult viguereusement ses hommes, non pas pour tant la gent le roy usoient eudit lieu de toute haute justice. Et plus n'en set.

XII. Jehan Bertin, de l'aage de 50 ans, ... [1], dit que il vit l'evesque Pierres user a Saint Vigor du boujon. Des autres evesques il n'en vit onques rien, mes il croit miex que il en usassent que non, et usoit l'evesque Pierres du boujon eudit lieu quant son temporel fut pris en main de roy, mes depuiz il ne croit mie que il en ait usé, ja soit ce que il a plusours foiz requis que il li fust mis au delivre.

..., dit que il ne set que l'evesque P. ne autre de ses predecessours nul temps eussent justice haute en ladite rue, et eudit lieu, dit que la haute justice est le roy, et que es temps passez les gens le roy ont eu saisine de toute haute justice eudit lieu.

XIII. Philippes de Gornay, de l'aage de 60 ans, ... dit [1] que il a 30 ans et plus que il a esté oveques autres el service du boujon porter pour le roy eudit lieu, et i ont les amendes tauxees et levees pour le roy, et dit que el temps a l'evesque Oede, ses gens voudrent alever ledit boujon eudit lieu, quant ledit evesque en oï parler, si comme le tesmoing qui parole oï dire, ledit evesque s'en courcha et dist a ses gens : Ostez cel boujon, il appartient au roy. Et dit que onques autrement evesque qui fust a Baiex n'en usa, mes la gent le roy en ont usé touz jours si comme dessus est dit.

..., dit que du temps dont il ot connoissance, depuiz 50 ans ou plus en encha, la gent le roy ont usé eldit lieu toute fois quant cas s'offroit, de toute haute justice, de cri, de haro, de murdres de toutes manieres d'ajornemenz en cas de haute justice, ne ne vit onques ne ne sout que les evesques de Baiex en usassent en nulle chose.

XIV. Beneet Le Chanterel, de l'aage de 78 ans, ..., [1] du boujon de Saint Vigor, dit que les gens l'evesque Eude aleverent le boujon el dit lieu. Et quant il le sout, il s'en couroucha et dist que il n'en avoit cure et que il appartenoit au roy, et dit le tesmoing qui parole que issi l'oï il dire a ceus qui i furent present. Et depuiz cel temps, nul des evesques qui ont esté pour le temps n'en usa, mes les gens le roy en ont touz jours usé.

... dit que l'evesque de Baiex, ne predecessour que il eust onques el Pont de Sainte Marie ne aillours n'ourent nulle haute justice et dit le tesmoing qui parole que, puiz le temps que il a eu connoissance, puiz 60 ans, il a touz jours veu que la gent le roy ont usé de la haute justice el Pont Sainte Marie, toute foiz que cas s'est offert, comme en cas de cri de harou, de murdre, de sanc et plaies et plusours autres dont il a moult veu, ne ne vit onques ne ne sout le contraire. Ne plus n'en set.

XV. Jehan de Vaux de l'aage de 76 ans, ... [1] n'en set nient.

... dit que il a veu 5 evesques a Baiex, et ne sout onques ne ne vit que onques evesque usast eu Pont Sainte Marie de haute justice, ne ne le croit, anchois croit el contraire, que le roy a usé en touz temps eldit lieu de toute haute justice, tant dit le dit tesmoing qui parole que il vit que les serjanz le roy aloient a ennis justicier eudit lieu sanz les serjans l'evesque pour ce que les evesques en gronchoient. Ne plus n'en set.

XVI. Jehan de Gavray, de l'aage de 60 ans, ... [1], dit que il ne vit onques ne ne sout que evesques de Baiex usast a Saint Vigor de justice de boujon, mes le roy en a usé et use encore.

... dit que il est né et norri de la ville, mes il ne vit onques nul temps ne n'oï que autres que les gens le roy usassent eldit lieu de haute justice, mes la gent le roy en a il veu user 40 ans et plus. Ne plus n'en set.

XVII. Renouf Campion, qui fut barbier a l'evesque Gregoire, de l'aage de 76 anz, ... [1] dit que de la justice du boujon de Saint Vigor du tout en tout il n'en set rien, ne pour le roy ne pour l'evesque.

..., dit ... que il a veu 5 evesques a Baiex et dit que eu temps que il estoit enfant, il aprist son sautier en une meson sus le pont de Sainte Marie, et li souvient que en cel lieu ot 1 enfant murdri, et li coupa une femme englesche la gorge et fut prise en cel lieu par la gent le roy, et jugié et destruite par la gent le roy, et avint cest fait el temps que le tesmoing qui parole estoit de l'aage de 7 ans, et que il aprenoit son sautier, ne ne soit que n'oï onques parler que le vesque se meust onques por cel fait ne por autre. Item le tesmoing qui parole dit que environ 2 anz apres cel fet, out eu pont Sainte Marie, entre les 2 pons, 1 autre fait tel que 1 homme qui avoit non Dyonis Candel ocist 1 autre homme dont il ne soit le propre non, et l'appelout le filz Borgueise, et commencha le fait d'entre eus par nerf que il getoient l'un a l'autre, et feri ledit Dyonis l'autre d'un coutel et l'ocist, et fut pris eudit lieu et amené por la gent le roy eu castel de Baieux. Et dit que il vit le dit D. armé en camp pour son cors deffendre vers Guillaume Borgueise, frere du mort, et fut la pes faite, et s'en ala ledit D. outre mer por pes faisant, sans revenir. Item il dit que il ont fait en ladite rue l'autre multre de nuit et i fut ocis Michelot l'Escrivain, et fut pris par cel fait Gyrart Lalemant en une meson eu pont Sainte Marie, la ou il manoit, et amené en la prison le roy, et ilech fut tenu longuement et apres s'en purja et fut delivré par la justice le roy, et mist ou seure cel multre a 1 clerc, et dit le tesmoing qui parole que il a touz jours veu le roy user oudit lieu de haute justice toute fois que cas s'offroit, ne ne vit onques ne n'oÿ parleir que evesque de Baiex eust endit lieu haute justice. Item le tesmoing qui parole dit de P. Chouquet en la maniere que dit Raoul de Tour.

XVIII. Henri le Grivelé, de l'aage de 35 anz, ... dit [1] de la justice deu boujon de Saint Vigor que il ne soit qui en a usé ne convient.

... dit que il a veu la gent le roy ont usé de la haute justice eudit lieu toutes foiz que cas estoit offert, ne onques ne vit ne n'oï que evesque qui fust a Baiex en usast, ne ne croit que il en usassent onques, ne que il i aeint droit et se pour quant il a veu que aucunes foiz les serjans le roy redoutoient a mener par ledit lieu aucuns soupechonnez de crisme de sanc, que il amenoient en prison.

XIX. Michel Poulart, de l'aage de 60 anz, ... [1] dit de la justice dou boujon de Saint Vigor que il ne vit onques que les gens des evesques de Baiex usassent deu boujon, mes il a oï dire que en aucuns tens en userent il, mes il ne croit pas que onques, en tens de l'evesque Pierre, ne de son predecessour en usassent.

... dit que le roy en a touz jours usé depuis le tens que il se sout cognoistre a sa veue et a sa seue, ne n'oÿ onques parler que l'evesque en nul temps i eust point de haute justice, et dit le tesmoing qui parole que il i a veu plusours foiz cri de haro et autres plusours causes de haute justice qui estoient toutes determinees en la court le roy, sanz cen que onques evesques de Baiex i eust que voier.

XX. Ricart le Malleour, de l'aage de 55 ans, ... dit de la justice du boujon de Saint Vigor, que il vit eu temps de l'evesque Eude que ses gens en userent, mes depuis le temps de celui evesque la gent le roy en ont usé toutes fois que cas c'est offert.

..., dit que tout le commun est a un, que le roy en a usé toutes foiz que cas s'est offert, ne n'oï onques parler ne ne vit que evesques qui fust a Baiex en usast.

XXI. Adam Cauchon, de l'aage de 50 anz, ... [1] dit de la justice deu boujon de Saint Vigor que il ne sout onques ne ne vit en temps de l'evesque Pierre que sa gent en usassent, mes en temps de l'evesque Eude et de l'evesque Gregoire, dit le tesmoing qui parole que il oï dire a son pere que il en avoient longuement usé ; comment depuis la justice du boujon leur fut empeechiee, il ne soit.

... dit que de son temps il a veü, toutes foiz que cas s'est offert, que la gent le roy en ont touz jours usé, et dit le tesmoing qui parole que il i a veü que il i avoit murdres fes qui touz se venoient droitoieer devant la gent le roy ne n'oï onques parler ne ne croit que onques evesque i eust haute justice, mes tant dit le dit tesmoing que il a oï dire que les gens le roy se redoutoient a mener par le Pont Sainte Marie prisonniers pour ce que aucuns disoient que ce estoit aumosne.

XXII. Guillaume Glachon, de l'aage de 55 anz, [1] de la justice du boujon de Saint Vigor, dit que il vit eu temps de l'evesque Eude que Jehan Laignel et Robert de Saint Lo i portouent le boujon en non de l'evesque et en usoient pesiblement ; eu temps de l'evesque Gregoire et du temps de l'evesque Pierres lour gens n'en userent onques, ainz en ont, toutes foiz quant cas s'est offert, en icel temps usé les gens le roy. Et dit ledit tesmoing qui parole que en cel temps il a esté en la compaignie d'autres boujonneours et cuilloient lui et ses compaignons le boujon a Saint Vigor et aillours par toute la ville de Baiex et tornout tout par devers le roy, et metoient a partie les amendes du boujon de Saint Vigor et les autres amendes a autre.

..., dit que le roy en a usé de touz tens dont cas s'est offert. Et ce a veu le tesmoing qui parole deu temps de 40 ans et de plus ne ne soit ne ne croit que onques evesque qui fust a Baiex en usast.

XXIII. Jaques de Villers, de l'aage de 40 anz, ... [1] de la justice du boujon de Saint Vigor, dit que l'evesque Eude de Lorris s'efforcha d'user deu boujon endit lieu, mes la gent le roy l'enpeechierent et touz jours depuis les gens le roy en ont usé.

..., dit que il a veu de touz temps de sa souvennee que la gent le roy en ont usé toutes foiz que cas s'est offert. Les evesques qui ont esté por le temps n'en usurent onques.

XXIV. Guillaume Pouchin, de l'aage de 40 anz, [1] sur la justice deu boujon de Saint Vigor de Baiex, dit que il n'en soit rien quer il n'a point hanté ileuques.

..., dit que il a demouré a Baiex puiz 20 anz ou environ et a veu de tout son temps que la gent le roy ont usé en Pont Sainte Marie de la haute justice sans cen que onques evesque en usast en son temps et au devant de cen que il venist demourer a Baiex, dit le tesmoing qui parole que si comme il a oy dire les gens le roy i ont husé de haute justice toutes foiz que s'offroit et croit por la renommee qui est tele, que ce soit voir.

XXV. Robert Taillefer, de l'aage de 55 anz, ... [1] de la justice deu boujon de Saint Vigor que il n'est mie certain qui en a usé, mes il a oÿ dire a plusours que les gens a l'evesque Eude s'efforchierent d'user en et en userent, si comme l'en dit, mes quant l'evesque le sout il dist que ce ne lui appartenoit point, ne ne vout que sa gent en usassent.

..., dit ... que il a environ 33 anz que il vint demourer a Baiex, et depuis cel temps il a veu eudit lieu les gens le roy, toutes foiz que cas s'offroit user eudit lieu de toute haute justice, sanz cen que onques evesque qui fust a Baiex ne autres por lui en usast de rien que il veist ne ne seüst. Et dist le tesmoing qui parole que, en touz temps passez puis que il vint a Baiex, il a veu touz cas de haute justice comme de cri de haro, de sanc et de plaie, de marché de bourse, de partie frairach, de briés, estre determinés en la court le roy et cen soit il bien.

XXVI. Colin Levesque, de l'aage de 50 anz ou environ, ..., dit [1] que il vit en temps de l'evesque Pierre, qui derrainement mourut, que les gens dudit evesque, desquiex il ne sout les nons, usoient de la justice deu boujon a Saint Vigor de Baiex, et les vit aler as ostieux la ou l'en fesoit le mestier, et as paliz la ou les dras estoient tenduz eu fieu l'evesque. Et quant il trouvoient que le drap n'estoit pas souffisant, il l'arestoient et le bailloient en garde a celui a qui le palis estoit jusques a tant que il fussent assignés de l'amende quant le drap estoit a persone estrange qui n'estoit justisable l'evesque et cele justice ou semblable vit il plus de cent foiz, et dit que l'evesque en usa bien en commencement que il vint, 3 ans ou environ et jusques a tant que le roy prist son temporal en sa main, du temps as evesques qui y furent par devant, dit que il oï dire que il en usoient bien et empes, et le croit. Et plus n'en soit.

... dit que de cen n'a il riens veü, mes que les gens dient que l'evesque en uset avant que le roy prinst son temporel en sa main, et les autres evesques qui furent par devant toutes fois que le cas s'offroit. Et dit cil qui parole, que il a veu, depuis que le temporel fut pris en la main le roy, que l'official tenoit ses ples en la rue du Pont Sainte Marie comme en pure osmosne, et vit plusours foiz que quant aucuns malfetours avoient meffet en la terre le roy en la ville, il se traioient au Pont Sainte Marie et ilec estoient garantiz comme en aumosne et de ce meismes il a veu aucune fois depuis que le temporel fut pris en la main le roy ne ne sout ne n'oÿ parler que le roy usast onques de la haute justice au devant que le temporel fut pris en la main le roy.

XXVII. G. de Graine, de l'aage de 70 anz, ..., dit [1] que il vit que l'evesque Guy en usa. Quant vint au temps de l'evesque Eude, la gent le roy debatirent a l'evesque la justice du boujon, et ne vout ledit evesque maintenir le boujon anciex, en lessa la justice au roy, et dist pour cen que il n'avoit ne coing ne monnoie que ce ne lui appartenoit mie, et ce oï et vit le tesmoing qui parole, si comme il dit, depuis cel temps le roy en a usé et dit le tesmoing qui parole que il a esté lonc temps boujonneour pro le roy.

..., dit que il ne vit onques evesque qui point de haute justice i eust, mes le roy lui a touz jors eue. Et ce dit le tesmoing qui parole que il l'a veü et seü depuis le temps de 40 anz et plus.

XXVIII. Martin d'Enserviller, de l'aage de 70 anz, dit [1] ... ne soit rien.

dit que du temps de 40 anz et de plus que il a hanté le lieu, la gent le roy ont usé eudit lieu de haute justice, les evesques non.

XXIX. Nicole Plesenche, de l'aage de 50 ans, ..., dit [1] sur l'article du boujon de Saint Vigor que il oï dire quant l'evesque Eude fut evesque, la gent dudit evesque en voudrent user, mes la gent le roy ne le voudrent souffrir, et en fut du tout hostee la saisine audit evesque.

... dit que en touz temps passez les gens le roy en ont usé eudit lieu de toute haute justice si comme il a oï dire as autres, a qui il a ajouté foy planere, et il meismes en a veü lonc temps user la gent le roy ne onques n'oÿ parler que nul evesque de Baiex en usast.

XXX. Jehan Cousinet, de l'aage de 60 anz, ..., dit [1] ... que il ne soit riens en toutes choses.

..., dit que il ne soit qui es temps passez a usé de la haute justice eudit lieu, et que il a eu mout d'autres choses a fere et a penser ne n'a point hanté le lieu.

XXXI. Adam de Cachie, de l'aage de 50 anz, ..., dit [1] ... que onques, eu temps de l'evesque Pierre ne de l'evesque son predecessour, il n'en vit user nul d'els, anciex en usoient les genz le roy, et fut le tesmoing qui parole garde du boujon par le roy par plusours foiz, et dit que il a bien oÿ dire que, lonc temps a, 1 evesque qui fut a Baiex s'efforcha d'avoir le boujon, mes il n'en joï onques, ainz il a oï dire que les genz le roy en ont touz temps1 passés estei en saisine.

..., dit que du temps dont il lui peut souvenir, il a veu sergenter la gent le roy toutes foiz que cas s'offroit, et especialement il vit sergenter de par le roy quant 1 clerc qui avoit non Michel l'Escrivain fut tué, bien a 18 anz, et en fut 1 homme mis en la prison le roy et tenu longuement, ne n'oÿ onques dire ne ne croit que onques evesque de Baiex i eust haute justice, mes il a bien oÿ dire que aucune foiz ceus qui amenoient prisonniers a Baiex doutoient bien a amener les par le Pont Sainte Marie pour ce que c'estoit trop pres de l'iglise.

XXXII. Renouf de Curcy, escuier, de l'aage d'environ 60 anz, ..., [1] dit que, eu temps de l'evesque Eude, il vit, si comme il lui semble, que icelui evesque estoit en possession de metre et oster garde de par lui au boujon as draps de Saint Vigor, et dit que son pere fut seneschal dudit evesque, et pour cen repperoit entour l'evesque, et fit en icel temps que ledit evesque avoit les amendes et les emoluments appartenans au boujon.

Requis se les successours dudit evesque ont eu la possession du boujon, dit que il n'en soit rien.

... dit par son serement que, eu temps dudit evesque Eude, nul n'i sergentout que ses sergens, et usout ilecques de la haute justice.

Requis se les successors de celui evesque ont usé d'icele possession, dit que il n'en soit riens.

XXXIII. Guillaume Taillebois, escuier, de l'aage d'environ 45 anz, ... [1] dit que ... il ne soit riens, fors que il a oï dire a aucun que le bouion des dras en icel lieu apartenoit a l'evesque.

... dit que il a oï dire que l'evesque i a haute justice et que touz temps avant ce que l'evesque Pierres fust evesque de Baiex, ses predecessours estoient en possession d'avoir haute justice eudit lieu. Et dit cil qui parle que il a lonc temps que 1 malfetour fut pris a Viaus et amené em prison a Baiex, et oÿ dire a ceus qui le menoient en prison que eus ne l'oseroient mener par le Pont Sainte Marie, et que les gens l'evesque leur rescorroient aussi bien comme se il estoit en l'iglyse. Et dit plus cil qui parole que il a bien 30 anz que il commencha a hanter Baiex et a descendre en icele rue et a oÿ dire que l'evesque a haute justice en icele rue.

XXXIV. Gyeffroy de Beuf Viller, de l'aage d'environ 40 anz et plus, [1] dit que du boujon as draps, il ne soit riens, ne onques jusques a ore il n'en oÿ parler.

... dit que il a oï dire que l'evesques y a haute justice, et doit avoir, mes il ne dit onques l'evesque ne ses predecesseurs user ne plus n'en soit.

XXXV. Henri de Taon, escuier, de l'aage de 60 ans ou environ, ... [1], dit que il n'oÿ onques parler que evesque de Baiex eust possession d'user du boujon a draps a Saint Vigor.

... dit que il a oÿ dire que les evesques de Baiex sont en possession de haute justice en icel lieu et que les gens le roy n'i povient sergenter, ne plus n'en soit.

XXXVI. Jordain de Taon, de l'aage d'environ 60 ans, ... [1] dit que il ne vit onques user l'evesque de Baiex pour le temps present ne pour le temps passé du boujon as draps a Saint Vigor, mes il dit que il a bien oÿ dire que le boujon as dras en celui liu li appartenoit.

... dit que il a oï dire que avant que le roy y eust mis sa main en temps de l'evesque P., que l'evesque Eude et l'evesque Gregore avoient la possession de la haute justice eudit lieu.

XXXVII. Thomas Piquot, du conseil audit evesque, de l'aage de 40 anz ou environ, ... [1] dit que il a oÿ dire que l'evesque Eude et l'evesque Gregore en leur temps usoient et avoient possession du boujon de Saint Vigor et des emoluments jusques a tant que la justice le roy y mist la main, eu temps a l'evesque P.

..., dit que il a oÿ dire que avant ce que le roy y meïst sa main eu temps de l'evesque Pierre, l'evesque Eude et l'evesque Gregore usoient et estoient en possession de la haute justice eu dit lieu, mes depuis l'arrest les genz le roy y ont justicié.

XXXVIII. Pierre Rigot, tenant dudit evesque, de l'aage de 40 anz ou environ, ... [1] dit que il vit [que] l'evesque Eude et l'evesque Gregore furent en possession d'avoir le boujon as draps a Saint Vigor et les explez a cen appartenanz jusques a tant que en temps de l'evesque Pierre, il fut arresté en la main le roy.

..., dit que il ne vit onques que le roy ne fust en possession de user en cel lieu de haute justice, mes il dit bien que il a oï dire que c'est de l'antreime omosne de Nostre Dame de Baiex.

XXXIX. Henri de Graine, de l'aage de 80 ans ou environ, [1] dit que de tant, de temps comme il se peut recorder, il vit que l'evesque Gregore et l'evesque Eude usoient a Saint Vigor deu boujon et avoient usé jusques a tant que il fut arresté eu temps a l'evesque Pierre de par le roy.

..., dit que il a oï dire que se les genz le roy y menassent un larron ou un murtrier, que les gens l'evesque le pouoient arrester, mes il ne vit onques que le cas s'offrit. Et dit bien cil qui parole que il a oï dire que les genz le roy y justisoient et ont justicié en touz cas de haute justice toutes foiz que cas s'est offert.

XL. Nicole Pasté, de l'aage de 60 anz et plus, dit que il vit que l'evesque qui por le temps estoit, environ 20 anz a, usoit du bouion a Saint Vigor et puis fut arresté de par le roy, il ne soit pour quel cause.

... dit que il lui semble que il ne vit onques les genz le roy justicier, fors tant soulement les gens l'evesque.

XLI. Morice Richer, de 60 anz, Johen Richer, de 60 anz, Martin Mateut, de 45 anz, Nicole de la Tailloule de 60 anz, ou environ, examinez chescun par soi, [1] dient que eus ont oÿ dire au commun des gens du païs que, avant que le roy meïst sa main eu boujon as draps de Saint Vigor, que les evesques de Baiex avoient en possession de metre garde de par eus au boujon des draps.

... dient que eus ont oÿ dire que elle appartient a l'evesque de Baiex et que les gens le roy y ont justicié, que ce a esté contre le droit de l'evesque.