[1]

A vous sire prevost de Bourges denoncet et proposet en denonçant Perrenet de Rans sur le fet de la mort et dou murtre Perrin de Rans, son frere, contre religieux hommes l'abbé et le convent de Saint Satur, justiciers de celi leu, et contre Guillaume de Remors, parent au prevost moinne, et Guillaume d'Argeri neveu l'abbé, Jehan Panceron, prevost doudit leu, Robin de l'Aumonne, dit Maritorne, dit Baudri, vallet du celerier de l'abbaye, Colinet, vallet l'abbé, dit Touset, vallet dou four, Johan le batar Friolet, ses deus sergens, Bertier le pourtier de ladite abbaye, Tevenin des Mez, le chapellein et le segrestein de ladite abbaye, frere Souci, convers de ladite abbaye, les articles qui ensiguent a cele fin que lesdiz abbés et convent ayent fourfaite et commis au roy la justice de ladite ville par les deffauz, consentemenz, aides et favorabletez qu'il hont fez et donnez ausdiz maufaiteurs tant il comme leur prevost, leur sergenz et leur mesnie et que cil maufaiteur soyent justisé et puny par vous et li mesfez adreciez et amandez et que y ssoit descleré la justise estre aquise au roy par les resons dessus dites et par celes qui s'en siguent. Et protestet ledit Perrinet que par ceste denonciacion il n'entent fere partie et protestet desdiz maufeteurs acuser et poursigre en leu et en temps et devant juge competent, segon ce que a li de droit ou de coustume pourra apartenir.

Le premier art. est que Perrin de Rans qui a esté occis, estoit frere dudit Perrenet et estoit jurez le roy et notaires dou sael le roy.

Le segon art. est que li us ou la coustume dou païs ou li meffez fut feiz sont tel que li freres d'aucun qui a esté ocis peut denoncier le mesfait.

Le tierz art. est que Jehan Pancerons estoit on temps dou murtre fait avant prevost doudit leu et come prevost exerçoit l'office de prevosté ou non de l'abbé et dou convant et justisoit comunement en non d'abbé et de convent comme prevost et justiciers doudit leu.

Le quart art. est que Guillaume de Remors et Guillaume d'Argeri, niés l'abbé, Robin, clerc de l'aumonne, dit Maritorne, dit Baudriz, valet au celerier de l'abbaye, Colinet, valet l'abbé, dit Touset, vallet dou four, et fr. P. Soutis, convers de l'abbaye, estoyent on temps dou mesfeit au pain et au vin de l'abbaye, de leur gent, de leur ostel et de leur mesnie.

Le quint art. est que le vendredi apres la saint Michel derrenement passee, Guillaumes de Remors, escuyer l'abbé, dist a Michel La Vache, en la presence dudit Johan Panceron, pluseurs paroles laides et villainnes et le menaça en la presence doudit prevost a laidir, et disoit cil Guillaume audit Michel, celi prevost present, que cil Guillaume estoit annemis doudit Michel et que il s'en appercevroit briement.

Le VI. art. est que ledit Michel, qui se doutoit doudit Guillaume par la cause dessus dite, requis audit prevost que il li fait doner assegurement doudit Guillaume, le quel prevost presenz et oanz les menaces dessus dites respondit que il ne li feroit doner point d'assegurement doudit G.

Le VII. art. est que le vendredi dessus dit, apres ces paroles, de nuyz apres l'eure de queuvre feu, ledit Guillaume de Remors et ledit Johan Pancerons, prevost, assemblerent avec eaus Guillaume d'Argeri, neveu l'abbé, Robin, clerc de l'aumonne, dit Maritorne, dit Baudri, vallet au celerier, Colinet, vallet l'abbé, et dit Touset, vallet dou four de l'abbaye, les queles personnes estoyent dou pain et dou vin de l'ostel et des genz de l'abbaye, si come dessus est dit, freres Soutis, convers de l'abbaye, freres Estenes, chapellains et segrestains de l'abbaye, issirent de ladite abbaye atout leur espees et vindrent a l'ostel doudit prevost, et ileuc se armerent et d'icelui issirent tuit armé a glayves et a armes deffensables et offensables a l'ostel Tevenin Giraut, mauvesement en traïson et en aguest appausé, on quel ostel por etre plus segurement estoit ledit Michel.

Le VIII. art. est que ledit mesfaiteur, tantost come il vindrent a l'ostel devant dit, il briserent et rompirent les huys et les fenestres de celi ostel mauvesement, a tort et senz cause.

Le IX. art. est que les huys brisez et les fenestres routes, Perrin de Rans, frere doudit Perrenet, qui leanz estoit, ledit Michel La Vache, Tevenin Giraut de Johannet Clement, qui estoyent on dit ostel issirent hors tuit nu et tuit desarmé por savoir que ce estoit et tantost que ledit Perrin fut hors, il fut feruz desdiz mesfeteurs d'un paul parmi la teste, si que il cheit tout envers, et quant il se cuida relever, lidit mesfeteur li boterent une espee parmi le cors et tantost il cheit morz.

Le X. art. est que tantost com cil Perrin fut choez morz, celi des mesfeteurs qui l'ot ocis ferit tantost Robin de l'Aumosne de l'espee par le cors, creanz que ce fust uns des borgeis de la ville qui a nom Joham Bordon et dist ces paroles : Or te tien je Johan Bordon. Et adonc ledit Robin qui fut feruz dist a Guillaume d'Argeri, neveu l'abbé : Ha, Guillaume, tu m'as occis. Et lors ledit Guillaume li dist : Ha, pour Dieu, pardonne le moi, je cuydoye que ce fust Bordon. Et tantost il cheït morz.

Le XI. art. est que lidit mesfeteur batirent en celi leu villenement ledit Michel La Vache tant qu'il convint qu'il en fust pour ce de la place et git encor au lit en peril de mort, et coperent cil mesfeteur a Tevenin Giraut le braz.

Le XIII. art. est que, quant les bones genz de la ville vindrent au cri par savoir que ce estoit, il furent blecié et navré villenement par lesdiz mesfeteurs, especiaument Johan Bordon fut feruz d'une espee par la teste si que il cheït a terre, et quant il fut choez, il fut feruz villenement desdiz mesfeteurs sur les braz, li quex Johan Bordon corut au cri en ses chauces purement senz sourlers. Item avec Johan Bourdon furent blecié Johan fil Perre Climent, li Roys recoverres, Johan li fis a la Pinegnote en venant au cri en la maniere dessus dite.

Le XII. art. est que tantost que ce fut fet li voisin qui estoyent pres d'icele meson qui oyrent le cri des bleciez saillirent hors de leurs hostelx et pluseur des voisins giterent paille en la rue toute ardent a cele fin que l'en veïst qui estoyent cil mesfeteur. Et adonc li autre qui vindrent qui virent la paille ardant en la rue crierent au feu et a la mort juques a tant que il virent et cognurent les mesfeteurs.

Le XIIII art. est que les bones genz qui vindrent au cri quant il virent les morz et les navrez il distrent audit prevost : Vous veez ces bonnes genz ocis et navres, pour Dieu prenez ces mesfeteurs qui sont ci present, qui hont ce fet. Et ledit prevost respondit : S'il sont mort, si fete charbonee.

Le XV. art. est que ledit mesfet fet, ledit prevost et li autre mesfeteur assembleement s'en alerent en l'abbaye et fu li feiz si motaire et si manifet que il vint et put venir a la cognussance de l'abbé et dou convent, ne autres par eaus ne userent on de prise des mesfeteurs ne ne firent on ce que justice requiert et que bons juiges doit fere en tel cas qui est si notaire et manifeste, ainz furent negligent de tout en tout.

Le XVI. art. est que la justice de Saint Satur estoit tenue on temps dou mesfet dou roy come de souverain senz nunl mean.

Le XVII. art. est que, quant aucune justice est tenue dou roy senz mean, de droit de us et de coutume est que se cis qui la tient est negligens de fere justise et mesmement quant la mesme justise qui doit guarder que la injure ne soit fete fet le mesfet et le consant, ou le voit, ou le set, et ne le punist, le roy, de qui est tenue la justise l'a guaignee et li est aquise come forfaite par la cause dessus dite.

Le XVIII. art. est que de droit d'us ou de coustume li fez, la negligence et li mesfeiz dou prevost mis par l'abbé doit fere prejudice a l'abbé et au convent quar cis qui mest prevost dit metre tel personne qui soit suffisanz a guarder et a fere justise et qui ne face ne ne soffre fere injure aus soubgiez.

Le XIX. art. est que commune renommee et voiz et disfame notaire et manisfeste est tele que nuns ne la peüst nier envers bonnes genz dignes de foy au leu ou li mesfet fut fez et aus leux voisins que ledit prevost et li autre mesfeteur dessus dit hont fet et consenti et souffert a fere le mesfet dessus dit qui est si notaire et si manifest come il est dessus dit. Donques, comme ensi est que le prevost a esté au fet fere conduit mene et ramene les mesfeteurs, negligenz de prendre les et de retenir et de fere son office tel come justise requiert en si grant cas appert clerement la justise estre forfete et aquise au roy par les causes et par les resons dessus dites et que par vous, sire prevost de Bourges, doyvent estre li prevoz et li autre mesfeteur par le roy puni et justisé, et que vous ne souffroiz lesdiz abbé et convent entremetre de cest fet.

Et de ces choses vous offret, sire prevost de Bourges, enfourmer et amener tesmoins se le fet le deserret en la maniere qu'il pourra et devra soffire sur les protestacions dessus dites.

Aprise fete par Pierre de Chantelle, prevost de Bourges, sur le fet et sur le murtre Perrin de Rans, jadis notaire le roy et juré dou sael le roy, laquele fut fete a Seint Satur le mercredi apres la saint Denis, le jeudi, le vendredi et le samedi ensiguant, l'an de grace mil CCC et quatre, presenz Giles d'Orliens, clerc, Gautier de Oysemont, Guillaume Bonnin, sergenz le roy, et Michel, clerc doudit prevost, et sur les fez qui sont contenu es autres articles dessus diz et a la denonciation Perrinet de Rans, jadis frere doudit Perrin de Rans.

I. André le bourrelier, demorant a Saint Satur, premier tesmoin juré et diligenment examiné, requis par son serement surs les fays desus diz, dit que le vendredi apres la saint Michel darrenement passee, environ l'eure de nonne, il vit et oÿst, presenz pluseurs bones gens, c'est a savoyr Perrin Mirepie, Hodenin Giraut, Johan Mautaint et Gros Valet, son frere, et Perreau filz Michel La Vache et pluseurs autres, en la court de l'abbaye ou Johan Panceron, autrement dit Friolet, prevost de Saint Satur, tenoyt ses jours, que une fame que l'en apeloit Belon vint devant ledit prevost et dist en soy plaingnant que la mesnye et li enffent feu mestre Jehan d'Ursy l'avoient batue et ferue et requeyroit au prevost qu'i li en feÿst droit, et le prevost respondit que il ne poet que lidit enffant esteaint clers, mes il en feroyt volentiers son poer, et lors ladite fame se commença forment a demener, et dit que qui ne li en feroit autrement droyt, qu'elle metroyt le feu en la meson. A donques li prevost, dou consoyl Michel La Vache, et d'autres bones gens et por doute dou perilz, comenda qu'elle feüst menee em prison et ainsit c'on l'en la menoit, Guillaume de Remors, parent au prevost moyne et escuyer l'abbé, surs vint la ou li dit prevost et li autre desus dit estiaint, et commença a dire audit Michel La Vache : Michel, Michel, tu charres de ton tour. Et lidit Michel respondit : Non feré, syre, se Dex plest, et ce que ge dit ge dit por bien et por garder la ville de peril et ge ne say que vous me voulez, ge ne vous fayz ne mal ne tort, ge ne suy vostre amy ne vostre anemys. Et lors lidit Guillaume li respondit telx paroles : Ge suy vostre ennemi. Et tout ce fut fayt et dit en la presence doudit prevost et lors lidit Michel, par le consoyl celuy qui parle, requist au prevost et par pluseurs foyz que il le feÿt asegurer d'yceluy Guillaume en disant audit prevost telx paroles ou semblables : Vous hoez que cilz hons me menace, feytes moy asegurer de luy et devant ces bonnes gens ge vous en requier asegurement Et li prevost respondit que ce n'estyaint pas menaces et que il n'i chayt point d'assegurement et que il ne li en feroyt point fayre, et s'en partit lidit Guillaume de Remors sanz fere point d'asegurement audit Michel, luy et Guillaume d'Argeri, neveu l'abbé, asembleement avec ledit Michel Raygnaut ensemble jusques vers le moutier. Et nulles autres choses des articles desus diz, en tant que il touchent les menaces doudit Michel La Vache et l'assegurement demandé il ne set mes que d'oÿr dire.1

Et des autres articles en tant comme il touchent les murtres et les bateures, il ne set riens fors que d'oÿr dire2, excepté ce que, puys que li duy murtre furent foyz apres covrefeu et puys les bateüres faytes, cil qui parle qui venoyt au cri que l'en faysoyt par la ville vit ledit Guillaume de Remors, escuyer, et Guillaume d'Argeri, neveu l'abbé, alanz ensemble contre sus avec ledit prevost. Et dit cil qui parle que puys que il les hot vehuz il ala tout a viez au leu ou li duy mors estaint et les vit touz deux mors et vit les autres navrez contenuz es articles de suz diz et disoyt l'en communement que lidit Guillaume d'Argeri l'avoit fet. Et plus n'en set par son serrement dilig. requis quar il ne fut pas quant li murtre et les bateures furent faytes.

II. Hodenin Giraut, segont tesmoing, juré et dilig. examiné, requis par son serement surs les fayz desus diz, dit que le vendredi apres la saint Michel darrenement passee cil qui parle fut presens et vit en la court de l'abaye, present ledit Jehan Panceron, qui tant comme prevost doudit leu hoet les causes, present André le bourrelier, Perrin Mirepie, Michel La Vache, Johan Mautaint et Gros Valet, son frere, et pluseurs autres, que une fame que l'en apelle Belon s'en vint audit Jehan Panceron, qui lors hoet les causes, sy comme desus est dit, et prevost estoit por l'abbé et por le convent, et dist que les emffans mestre Johan d'Ursy l'avoient ferue et batue, par quoy requeroit qu'il li em faÿst droyt. Et il li respondit que il estoyent clers et que il n'en poet autre chouse fayre. Et lors elle dist que, qui ne li en feroit autrement droyt, elle metroyt le feu en la meson et lors lidit prevost, par le consoyl de Michel La Vache et d'autres bones gens qui yleuc estiaynt, comanda que l'en la menast emprison. Et un petit apres Guillaume de Remors, parent le prevost moyne et escuyer l'abbé, surs vint yleuc et dist audit Michel pluseurs paroles villaines et que il estoit ses annemis et que il s'en apercevroyt, et s'en feüst apercehuz se ne fust par amour de sa bruz qui tenoit a une fame de la ville. Et adonc lidit Michel dist au prevost : Vous hoez que il me menace, je vous requier que vous me façoyz asseguer de luy. Et le prevost respondit que il n'y avoyt point de assegurement et lidit Michel dist que se il ne le feyseyt assegurer ill iroyt au gens le roy por luy assegurer.

Requys se li prevost dist que il ne le feroyt point assegurer, dit que il ne l'entendit pas, si comme il li semble, mes bien set cil qui parle que cil Guillaume de Remors se departit d'yquy et s'en ala sanz ce que il feÿst nul assegurement, et oÿst bien cil qu'i dist tele paroles : Se vous li voulez riens demander, ge mire soayr, mes ne set cil qui parle ce lidit Michel l'entendit ou non ne ne li membre, se li diz Michel s'en estoit partiz ou non, mes lidit Guillaume s'en estoyt ja demartiz d'iquy quar lidit prevost li disoyt : Fuy de ci, a deable va t'en, nous chevyron bien sanz toy.

Item, dit cil qui parle que apres l'ore de covrefeu, le ser doudit vendredi desus dit, par ce que l'en crioit3 par la ville a la mort, aus murtriers s'en ala a l'ostel Tevenin Giraut, filz de celuy qui parle et trova ledit Tevenin forment blecié et ilquy avoyt grant foyson de gens de la ville qui estoyent venuz au cri, et yleuc estoit morz Perrin de Rans, et en la meson de cousté estoit Robin de l'Aumosne mors, et disiaynt les gens qui ileuc estiaint communement que Guillaume d'Argeri, neveu l'abbé, et qui aynsit se faysoit apeler, les avoyt occis, et que en sa compaygnie avoyent esté audiz murtres fayre lidiz Guillaume de Remors et tuyt li autre qui sont nommé ou septieme article et que c'est notoyre chouse et commune renommee a Saint Satur et que lidit Guillaume de Remors et Guillaume d'Argeri et li autres nommez ou septieme article estiaynt, ou temps que li murtres furent fayz, de l'oustel couchanz levanz et au pain et au vin de l'abbaye, et que lidiz mauffetors les huys, les fenestres doudit Tevenin briserent et despecerent et lidit Tevenin, Michel La Vache, Jehan Bordon, Johan le Filz Perre, Climent Le Roy, recouvreur, et Johan, le filz a la Pignegonce, qui estoyent venuz au cri desus dit batirent et navrerent, sy comme il est contenu ou treszeme article, et est li fayz sit notoyres que li abbés et convent le porent bient savoyr et ha oÿ dire cil qui parle a pluseurs des quelx nons ne li souvyent, c'est a savoyr aus uns que lidiz mauffetors estoyent yssuz de ladite abbaye por fayre les meffayz desus diz et aus autres que il estoyent yssuz de la meson doudit prevost et nules autres chouses ne set des articles desus diz par son seirement, dilig. requis.

III Perrin gendre Mirepie, tiers tesmoing etc., requis que il set des articles desus diz, dit par son seirement quar Johan Panceron, autrement dit Friolet, ou temps que le murtres fut fayz et avant par pluseurs annees, estoyt prevost ou non doudit abbé et convent oudit leu de Saint Satur, et communement ou non d'eaux, comme prevost et justiciers, justisoyt et ce vit cil qui parle en pluseurs cas, mesmement le jor dou vendredi apres la saint Michel darrenement passee, et vit cil qui parle ledit jor de vendredi, environ l'eure de nonne, que une fame que l'en apeloyt Belon, en la court de l'abaye vint audit Johan Panceron, qui estoyt yleuc comme prevost, et en soy plaignant li dist que li emffanz mestre d'Ursy l'avyaynt batue, et li requeroyt que li en feïst droyt, et li respondit que il estiaynt clers et que autre chouses ne li em poet feyre, et lors elle dist que se autre chouse ne li en feysoit elle metroit le feu en la meson, adonc lidit prevost, mehu par ces paroles, dou consoil Michel La Vache et de pluseurs autres bones genz qui yleucques estiaint, c'est a savoir André le Bourgoing, Perreau le filz Michel La Vache, Hodenin Giraut, le dit Gros Valet et pluseurs autres yleuc presenz, comanda qu'elle fut menee emprison et petit apres cest commandement, si comme l'en la menoyt, Guillaume de Remors et Guillaume d'Argeri vindrent ycquy et cil Guillaume de Remors dist audit Michel : Michel, Michel, vous venez moult a chevau par devant la justise de ceans. Et lidit Michel respondit : Syre, je ne di que bien et reyson, je ne suy por quoi vous me conrez, quar je cuydoye estre vostre amis. Et lidit Guillaume respondit : Je ne suy pas vostre amis. Et cil Michiel dist : Je ne suy vostre amys ne vostre ennemis. Et lors lidit Guillaume respondit : Et je suy vostre ennemis et vous en aparcevroiz et vous en feüsiez aparcehuz se ne fust une fille qui est chés vous qui est parente a une preude fame de ceste ville. Et lors lidit Michel dist audit prevost : Si, vous hoez bien comment il me menace. Je vous requier comme a prevost et leu tenant de prevost que vous me façoyz assegurer. Et li prevost respondit : Je ne voy chose por quoy vous doyez avoir assegurement, je ne vous feré pas assegurer. Et lidit Michel dist : Je me dout de mon cors, je vous requier une foyz, deux foyz, tierce foyz que vous me façoyz assegurer de luy, et se vous ne le feytes, ne vous courociez pas se je me fays asegurer par les genz le roy. Et toutes voys a la fin ledit Guillaume de Remors se departit d'yquy sanz ce que il assegurast ledit Michel.4

Item dit cil qui parle, que apres ce, le ser apres covrrefeu bien l'erre de deux lyues, cil qui parle, qui venoit de ches son frere, encontra ledit Guillaume de Remors, Guillaume d'Argeri et Colinet, valet l'abbé, Baudri, le valet au celerier, et Robin le clerc de l'Aumonsne, qui venoit de vers l'abbaïe et portoit chacuns 1 paul a son col, et chacuns avoit l'espee ceante en escharpe, fors que lidit Colinet qui n'avoit point de espee, qui aparissit a celi qui parle, et a chacuns de ceaux parla cilz qui parle, et lor dissi que il se gardessent de mal feire, et il li respondirent : Alez vous en, n'avez que feire. Et poi apres, quant cilz qui palle se fut botiez ches soi et se volet cocher, il qui parlet, qui bien pres demoreit et demoreit (sic) dou leu ou fut fait li murtres, eÿt crier : A la mort, aus murtriers. Et lors il qui parle se trait cele part et entra en la meson Tevenin Giraut ou estoit l'asemblee des gens et trova le dit Tevenin mout nafré ou bras et ledit Perrin de Rans gisent en un lit, qui disoit qu'il estoit nafrez a mort, et que ce li avoit feit lidit Guillaume d'Argeri, si comme il disoit. Et ençois que cil qui parle se departist d'iqui, qui poy il demora, lidit Perrins trepassa et toz jors disoit a sa fin que ce li avoit lidit Guillaume d'Argeri. Et lidit Tevenins disoit que lidit Guillaume de Remors l'avoit feru d'une espee parmi le braz, si que il l'avoit moult naffré et mesmement cil qui parle vit la plee de que morut ledit Perrins, qui estoit droitement feruz parmi la poitrine vers le cuer, et puis apres cis qui palle ala vieir en une meson il qui de costé, et vit Robin, le clerc de l'Aumosne mors, et disoit l'en quemunemant mesmemant tuit qui il qui estient, que lidit Guillaume d'Argeri l'avoit ocis, mes autre chose n'en set cilz qui palle quar il n'i fust pas.

Requis qui estoit presenz quant lidit Perrins de Rans dit que ce li avoit fait Guillaume d'Argeri dit que Perrinet, freres doudit, Perrin li gendre au mestre de l'escole, la fame Tevenin Giraut et Tevenins Giraus, Johanne de Bonay, li filz Michau La Vache et plusors autres, plus de trente, les quelx ne cognoissent pas cis qui parle, et estiaint li uys et les fenestres de l'ostel doudit Tevenin roz et depecez et pluseurs autres personnes maffés, c'est assavoir Johan Bordon, Johan le fil Perre Climent, Le Roi, recovreur, et Johan le fil a la Pingnete. Et dit cil qui palle quar il a donques an celi moment en vit venir ledit Guillaume d'Argeri de celi leu ou lidit murtre5 avient esté fait droitement a l'abaïe et leanz entrer avesques frere Soutif, convers de leanz, ledit Colle Roucie et que lidiz Panceron, prevost, estoit presenz ou leuf ou lidit murtre avient esté fait, mes il ne set se il estoit, mes il ne set se il presenz quant il furent feit, et sot bien et vit bien quant lidit Guillaume d'Argerii et li autres de sus nommé, se departirent doudit leu, et l'on disoit communemant et il oiet bien que lidit Guillaume d'Argeri avoit faiz lesdiz murtres et que li autre desus nommé y avient esté et avient blecé les autres, si comme il est desus dit.

Requis se lidit malfeitor estiaint de l'abbaïe et au pain et au vin de l'abbaye, dit que oÿl, et de ce est commune renommee a Saint Satur.

Requis se li abbés et li convenz sorentz lesdit faiz, dit que il le porrent bien savoir avant la mie nuyt de cele nuyt, quar il aveit si grant bruet en la vile, et li faiz estoit si notaires, quar chacuns de la ville le poit savoir.

Requis se li abbés et li convenz useient de prise les mauffeitors, dit que riens n'en set, ne autre n'en set des articles desus diz.

Requis se lidit Johan Panceron estoit prevost, dit que oïl et il ha lonc temps prevosté por l'abbé et por le convent.

IIII. Bienvenue, la fille Augoin, quart tesmoing, juree et diligemment requise, dit par son serrement que le vendredi apres la saint Michel darremant passee, apres cuevre feu, elle qui gardoit un malade en la meson qui est assise de cousté la meson Tevenin Giraut, ou fut fet li murtres, par ce qu'elle tenoit en sa main de la palle alumee por cognoistre ceaux qui en la rue seriaint, quar il feisoit moult oscur, et vit et aperçut Guillaume de Remors, escuier, et Guillaume d'Argeri, neveu l'abé, qui avient les bacinez es testes et chascun une espee au poing et 1 baton, aus queuls celle qui parle dit : Ha, Guillaume, beau frere, soufrez vous et couez vous Et il li respondi : Fui de ci, fame, ou tu es morte. 6 Et ce dit, il commencerent tantost a crier : A la pie, garçon. et en l'eure celle qui parle s'an commança aler a sa meson et toutevois ainçoys qu'elle fut dedanz, vit elle que, a la pie d'iceaux deux et par le cri que il avoyent fé, vindrent Robin li clerc d' l'Aumosne, qui y fut tuez, un paul a son col, Baudri, le sergent au celerier, une espee en escharpe et 1 paul a son coul, et Colinet, valet l'abbé, qui venoit de vers sa meson, un grant baton a son coul, et s'an ala aus autres, et Touset, valet dou four de l'abbaye, qui demoroit iqui prés et s'en isit de sa meson, touz nu piez, en sa cote et sanz chaperon, une late en sa main, et dist : Sainte Marie, que esse ? Et par ce que l'an lensoit les perres a celle qui parle et s'en entra en sa meison et commença a crier : A la mort, au feu ! tant comme elle poit. Et toutes voys hoet elle bien comment lidit mauffetor assaillaint la meson Tevenin Giraut, et brisiaint les huys et les fenestres, et vit bien celle qui parle, avant que ele s'en entrast en sa meison, que Robin de l'Ausmone, dou paul qu'il tenoit, bota de soz Tevenin Giraut por le geter a terre, et li autre levoyent les paulz au fenestres.

Requise se elle y vit Johan Panceron a celle foyz, dit que non, mes di qu'y a poy retorna arreres et vit grant multitude de genz, tant les mauffetors desus diz et des autres genz de l'abbaye que des genz de la ville, qui estoient acouruz au cri par ce qu'i cuidoient que illi heüst feu. Et vit celle qui parle que li duy escuiers desus dit prindrent Johan Bordon et le lancerant a terre contre 1 fumier, la teste en bas et feriaint des espees surs le fumier, quar il cuidaint ferir surs luy, si comme li semble, et elle maimes cuidoit que il fut mors. Et oÿt celle qui parle que la fame Tevenin Giraut crioyt a ses fenestres a Johan Panceron qui presenz estoit : Johan, Johan, prenez ces murtrierz, quar Perrin de Rans est mors et il l'ont tué. Et a ses paroles vint Regnaut Ogers qui dist a celle qui parle : Belle seur, tu as tot perdu, quar il cuidoit que se fut feu. Et lors lidiz mauffeiters se tresirent vers ledit Regnaut les espees toutes nues, et le ferirent surs la teste, mes il avoit son bacinet, et lors cils Regnaut dist audit Johan Panceron : Beau compere, prenez ces murtrez, tenez vous en saisiz. Et il li respondit : Et je te prens. Et lidit Regnaut li respondit : Tu as menti, je ne sui pas murtrers, mes voiz les ci, en montrant luy les deux escuiers et les autres malfaiteurs desus diz. Et lors cils Jahan dist audit Regnaut : Je n'i voi murtrier fors que toi.

Et adonc les genz qui yqui estiaint de la ville commencerent a dire et a crier audit Johan Panceron et a Arnoul le Sergent : Tenez vous saisiz de ses murtriers qui si sont quar ill ont tué Perrin de Rans, et se vous voulez aide, l'en vous aidera. Adonc cilz Johan prist les deux escuiers parmi les pans des girons et les en mena. Et Maritorne et Baudri et un moinne que l'en apelle Coille Roucie les siguirent, et lidiz Arnoul dit bien audit Johan : Je vous aideré se vous volez. Et il li respondit : Je ne cure de vostre aide, je m'en aideré bien. Et li communs des gens qui estoient commença a crier : Johan, Johan, vous enmenez les murtriers, tenez vous en saisiz et gardez bien que vous en ferois, que Perrin de Rans est mort, que il hont tuez, et se vous volez aide, nous vous aideron.

Et cil Johan s'en commença aler le chemin vers l'abbaïe, mes elle ne set se il les y mena ou non, et dit cele qui parle que lidit mausfeitor desus nommé adonc et avant des genz de l'abbaye estiaint et au pain et a vin de l'abbaïe et de l'ostel de l'abaïe, et de ce est commune renommee, et que Johan Pancerons estoit et avoit esté par lonc temps ou service de l'abbaïe, et tenant le leu dou prevost et a luy obbeïssoit l'en comme a justice. Et autre chose n'en set.

V. Johanne de Bonnay, juree et diligentement examinee surs le fet desus dit, dist pour son serrement que le vendredi apres la saint Michel, environ l'eure de relevee, celle qui parle vit issir por mi la porte de l'abbaïe Johan Panceron, prevost, Michel La Vache et Guillaume de Remors, escuier l'abbé, et pluseurs autres, et oït que lit Michel dit au prevost : Vous vez bien que cilz hons me menace , en disant doudit Guillaume de Remors, adonc present, je vous requier que vous me faciez asegurer de ly. Et lidit Guillaume li disoit : Voyrement te menasége, tu le comparras en aucum temps. Et li prevost respondit audit Michaul, combien que il oÿt les menaces : Il ne te menace ne ne t'asegure. Et cil Michaul dist : Puis que vous ne me volez fere a segurer, je me feré asegurer au genz le roi.

Et puis celle qui parle, le soir, apres covrefeu, qui aloit querre Perrin Mirepie, enquel service elle estoit, vit, ainsit que elle aloit par la voie, les deux escuiers l'abbé, Guillaume le grant et Guillaume le petit, et autrement ne s et ses nons, li quel, c'est assavoir lidit Guillaume li grans, l'espee toute nue en la main et un grant baton souz s'esselle, et Guillaume li petit l'espee en escharpe et un paul a son col, et Baudri, le valet au cel erier, l'espee en escharpe et un baton de fer botonné a son col, et frere Soutif, convers de l'abbaïe, une gisarme a son col, et Robin le clerc de l'Ausmone, le bacinet en la teste, les gantelez es mains, le bouclier en l'une main et l'espee toute nue en l'autre, vindrent a celle qui parle, et li demanderent qui elle estoit, ne ou elle alayt. Et ce fut en la rue, au desouz un poy de la meson Tevenin Giraut, et elle respondit que elle aloyt querre son mestre qui estoit en la ville. Et un petit apres elle encontra son mestre, si s'en retorna avec luy et les persones sus nommees tuyt emsenble vindrent en toutes les espees totes traites et li demanderent qui s'estoit et il respondit que ce estoit Mirepie, et li grant Guillaume dist : Este vous ce Perrin, alez vous en, Perrin, nous cuidain que ce fust Michau La Vache. Et vit puis apres celle qui parle que lidit Mich. qui venoit apres dist : Alez vouz en, compere. Et tantost, comme li autre l'oïrent, il alerent a luy et ferirent surs luy a chable7 et le batirent et navrerent et li tolurent s'espee, et totes voys s'en eschape il et s'en entra en la meson Billebaut.8 (le reste comme dans son témoignage d'octobre 1305, sauf la dernière ligne : Et plus etc.)

(fin du témoignage de Jehanne)

VI. Johan Le Retondeur, tonterier, juré et diligentement examiné, requis surs le fayt desus dit, dit pour son serremant que le vendredi apres la saint Mich. darrement passee, apres covrefeu, il qui se gisoit en son lit en sa meson, devant la meson Tevenin Giraut, s'esvoyla por ce que il oÿt ferir et hurter a l'uys Tevenin Giraut, et que l'en crioyt Au feu et A la mort , et s'en issit de ches soy, luy et sa fame, et quant il s'aperçut que ce estiaint mauffetor, il dit a sa fame : Ne criez pas au feu, mes a la mort. Et vit cil qui parle que Guillaume d'Argeri, neveu l'abbé, ferit Regnaut Oger de l'espee parmi la teste si grant coup que, ce ne fut le bacinet que il avoit en la teste, ledit Regnaut heüst esté mort, si comme cil qui parle croyt, et oÿt bien cil qui parle que moult de gens, et ausy comme tuit cil qui estoient venuz autri dysiaint a Johan Panceron, baillif et justice dou leu, qui adonc estoit presenz, et de cousté luy estiaint presenz Guillaume de Remors, escuyer l'abbé, et Guillaume d'Argeri, neveu l'abbé : Johan, prenez ces murtrierz, il l'en y a de mors quar Perrin de Rans est mort. Et Coyllebaut, le pennetiers, disoit autresit ceans on ha vu qui ce mourt, qui a non Robin, le clerc de l'Ausmone, et ce dysient doudit Guillaume de Remors et de Guillaume d'Argeri, c'est assavoir que l'en les preïst, tant que murtriers, et oÿt cil qui parle que cilz Johan Pauceron, combien que il oÿst ces paroles dist audiz Guillaume de Remors et Guillaume d'Argeri9 : Qu'esce que feites vous cy, alons nous cy. N'autres paroles cil qui parle n'oït que cil Johan Panceron disist, mes cil qui parle vit bien que lidiz Johan Paceron, li dit Guillaume de Remors et lidit Guillaume d'Argeri tantost s'en partirent d'iqui et s'en alerent ensemble, mes cis qui parle ne set ou, et y avoit si grant planté de gens de la ville qui estoient venuz au cri et si grant asemblee et grant tumulte que cil qui parle ne pot pas vohir ne apercevoir que illi heüst aucuns de l'abbaïe qui s'en alast avec eaux ne qui maul faïst.

Et autre chose ne set dou fet, fors que tant que commune renommee est a Saint Satur que cil Guillaume d'Argeri, neveu l'abbé, tua lidit Perrin de Rans et Robin de l'Aumosne, et avec luy estoient Guillaume de Remors, Baudri, valet au celerier, frere Soutif, convers de l'abbaïe, et plus n'en set.

Requis ce Johan Pauceron en ycelui temps et avant estoit prevost, et comme prevost exerçoit ou non de l'abbé et dou convent et en yceluy leu de Saint Satur et que l'en le tenoit adonc et avant estoit prevost et comme prevost exerceit l'office de prevosté et justisoit communemant ou non de l'abbé et dou convent, et en ycelui leu de Saint Satur, et que l'en le tenoit adonc et avant et l'an l'a tenu par lonc temps por ballif et por justise dou leu, et a luy l'en obeïssoit tant que a ballif et a justise et communement il exerçoit l'office de justice ou non de l'abbé et dou convent et ha lonc temps exercé oudit leu. Et de ce est commune renommee et chouse notoyre oudit leu.

Requis se li diz Guillaume d'Argeri et Guillaume de Remors et li autre qui sont nomé ou septieme article estiaint en celuy temps et avant de l'abbaïe et au pain et au vin de ladite abbaïe et de leanz dit que oïl et de ce est commune renommee et chose que oïl et de ce est commune renommee et chose notoyre a Saint Satur. Et plus n'en set dilig. requis surs les choses qui touchent feist (sic).

VII. Agnes, la fame Tevenin Giraut, tesmoing juree et diligenment examinee dit par son serement que le vendredi apres la saint Michau derrement passee, apres l'ore de cuevre feu, que elle et lidiz Tevenins si mariz, Perrins de Rans, Johannet Climent et Michau La Vache bueüssent en la meson doudit Tevenin, il oïrent grant foison de gens qui faisient grant bruet a l'us doudit Tevenin et volient briser l'us et geterent les hus de la meson des gens, mes celle qui parlet ne set qui il estoient, et tote voys Mich. La Vache vint li premers a l'us et fust forment blecez, mes elle ne set qui ou fist, et li maris a celle qui parle fust ausit blecez par le braz, mes qui ou fist ele ne set.

Et puis apres ce, ele qui palle, qui ce fut de valee ou bas, vit Perrins de Rans qui mors est ou la ruol dou celier de la maison, et Robin le clerc de l'Aumone et Guillaume d'Argeri, que l'en apelet le petit Guillaume, neveu l'abbé, mes que il firent ensemble, ce ne set elle10, fors que tant que elle en vit issir ledit petit Guillaume l'espee traite, tote nue, levee en haut et apres li issit Perrin de Rens qui tenoit la main vers la memele, et s'en entra en ladite mayson et monta en haut et dist a celle aui parle : Ha, bele commere, je sui navrez et regarda comment il estoit navré, et cele qui parle vit que il avoit deux plaees, c'est assavoir une en la forcele et autre ou nombril, et dist lidiz Perrins : Has las, le petit Guillaume m'a ce feit, il m'a mort. Et demanda le prestre et d'iqui a poi perdit la parole et morut. Et tot ce vit cele qui parlet et oït bien cele qui parlet que mout de gens crient et disient a Johan Panceron qui presenz estoit en la rue ou grant multitude de gens qui estoient venu au cri : Johan, prenez ces murtriers, tenez vous en saisi. Et nulle autre chouse n'en set, fors que communement l'en disoit et crioit on que lidit Guillaume d'Argeri avoit ocis ledit Perrin, et ledit Robin. Et cele qui palle estoit si abaïe quar ele ne puet rien bien entendre.

Requise se ledit Johan Panceron estoit prevost dou leu, dit que oïl et de ce est commune renommee.

VIII Babeau, la beesse au Goin, tesmoing juré, dit par son seremant que le vendredi apres la saint Mich. darrement passee, apres cuevrefeu, ele qui avecques sa dame gardoit 1 enfent malade por ce qu'ele oït crier A la mort et Au feu ala a plein voier que ce estoit, et tenoit de la palle en sa main tote ardent quar il fesoit escur, et vit et aperçut Guillaume de Remors, escuer l'abbé, et Guillaume d'Argeri, neveu l'abbé, qui avient les bacinez es testes et chacun une espee ou poing et 1 paul au col et estoient pres de la meson Tevenin Giraut. Et puez apres ele oÿt que il crient : A la iue, a la iue, garçon. Et tantost ele se mervuilla mout et vit que par le cri que il havient fet, vindrent Robins li clers de l'aumone, 1 paul a son col, Baudri, le valet au celerier, une espee en escharpe et 1 paul a son col, et Colinez, valet l'abbé, qui venoit de vers sa meson, 1 grant baton a son col. Et por ce qu'i lençoient les perres vers soy et vers sa dame, quar vers eaux regardoient ele et sa dame, s'en entreirent ches eaux et commencerent a crier : A la mort, a la mort ! Et tote voys oÿt bien et vit bien cele qui parle que lidit mauffeitor assaillaint la meson Tevenin Giraut et brisiaint les hus et les fenestres, et d'iqui a poy grant multitude de genz des vesins et des autres de la ville vindrent au cri.

Et vit cele qui palle que li 2 escuer desus dit pridrent Johan Bordon et le lencerent a terre contre 1 fumier la teste en bas et ferient des hespees desus le femier quar il cuidient ferir sus luy, si comme il semble a cele qui parle, mes li fumiers estoit hauz et la teste estoit en bas, et il fesoit escur. Et la fame Tevenin Giraut qui estoit au fenestres de sa meson crioit a Johan Panceron, prevost de Saint Satur, qui presenz estoit en la multitude des autres : Johan, prenez ces murtriers, quar Perrins de Rans est mort, et il ont tué. Et ce disoit elle des 2 escuers desuz diz et des autres mauffeitors desus diz qui en lor compegnie estiaint.

Et lors vint Regnaut Ogers et tantost li mauffeitor se tressirent vers li, les espees totes nues et le ferirent en la teste, c'est assavoir li uns de eaux, mes ele ne poit cognoistre li quelx ce fust. Et lidit Regnaut havoit le bacinet en la teste et lors li dit Regnaut dit audit Johan Panceron : Beau compere, tenez vous saisiz de ces murtriers, vez les ci. Et lidit malfeitor estoient de costé ledit Johan Panceron. Et li dit Johan respondit audit Regnaut : Et je te prins, je n'y voy murtrier fors que toy. 11 Et cilz Regnaut respondit : Ge ne suis pas murtrier, mes voi les ci. Et les autres genz de la ville qui yqui estoient criient et disient au dit Johan Panceron : Tenez ces murtriers, prenez ces murtriers, quar il l'ont tué, Perrin de Rens, et se vous volez aide nos vous aideron. Et adonc cilz Johan prist lesdiz 2 escuers parmi les pens des girons et les enmena. Et Maritorne et Baudri et 1 moines que l'en apelle Coille Routie les siguirent et torz jorz lidit Arnoulz disoit audit Johan : Je vos aideré se vos volez. Et lidiz Johan li respondoit : Je ne cure de vostre aide, je m'en ayderay bien. Et li communs des genz qui yqui estiaint criient audit Johan et apres luy : Johan, vous enmenez les murtriers, tenez vous en saysiz, gardez bien que vous en feroys quar Perrins de Rans est mort quar il l'ont tué, et ce vous volez ayde, nous vous ayderon. Et cilz Johan et li autre s'en alerent le chemin vers l'abbaye, mes elle ne set ce il les enmena ou non, et dit celle qui palle que lidit mauffetor desus nommé adonc et avant estient des genz de l'abbaye et au pain et au vin de l'abbaye et de l'ostel de l'abbaye, et de ce est commune renommee, et que Johan Pancerons estoit et avoit esté par lonc temps ou service de l'abbaïe et tenent le leu dou prevost, et a li obeïssoit l'en comme a justice. Et autre chose ne set dilig. requise.

IX. Johan Heloys, autrement Rute Beuf, juré etc. dit par son seremant que le vendredi apres la saint Mich. darrenemant passee cil qui palle et Arnoul le Sergent, qui se soient, environ l'eure de cuevre feu surs un suege en la rue, oïrent que vers la meson Tevenin Giraut l'en criayt : Au feu, au feu ! , et ja havoit dit lidit sergent audit Johan que il li avoit mellee et que cil de l'abbaye troveriaint de ceus de la ville se il les point trover, et lors cil qui parle et lidit sergent qui dist a celui qui palle12 ce que je disoie illi a mellee, alerent ensemble de vers la meson Tevenin Giraut en l'asemblee des gens estoit et criet l'en la palle par la rue et l'alumet l'en par ce que il feisoit escur, et vit cil qui parle que li huys de la meson audit Tevenin Giraut estiaint despecé et mis a terre, et disoient communemant cil qui estiaint present, c'est assavoir la fille au Gouyin, Tevenin Giraut, le fils Perreau Climent et pluseurs autres, des quex nons ne li soviant, que ce avoient fet Guillaume de Remors, escuier l'abbé, Guillaume d'Argeri, neveu l'abbé, Robin, li clerc de l'Aumosne, dit Maritorne, dit Baudri, valet au celerier et frere Soutif, convers de l'abbaïe, les quelx excepté lidit Guillaume de Remors cil qui parle vit a l'assemblee, c'est assavoir ledit Guillaume d'Argeri tenant une espee tote nue en sa main et ferant de ça et de la et faysant voye entor luy et ledit Robin, clerc de l'Ausmone13 qui avoit l'espee tote nue en sa main et le bacinet en sa teste, et ledit Maritorne qui tenoit en sa main ne set une mace ou un baton, et l'espee au col en escharpe, et ledit Baudri, une espee en la main et le forreau en escharpe, et feroit de ça et de la. Et disiaint ceux qui present estoient en criant A la mort et Au feu que lidit mauffetor aviaint blecié moult forment Mich. La Vache, le filz Perreau Climant et Tevenin Giraut et vit cil qui palle, que quant Perrins de Rans issit de la meson Tevenin Giraut par voher que ce estoit, si tost comme il s'en issit, et cil Guillaume d'Argeri le pot apercevoir, il adreça audit Perrin l'espee toute nue, et cil Perrin, quant il aperçut, se destorna et se trait pout soy garentir vers la ruo dou celier de ladite meson, et li dist Guillaume le siguist l'espee nue en la main et le ferist d'estoc de l'espee pormi le cors, et vit qui palle que tantost cil Guillaume d'Argeri s'en issit de la ruo et se commença a defendre a celle fin qu'il ne fut pris. Et lors Johan Panceron, le quel cil qui palle n'avoit pas vehu avant a la mellee, sy comme il li semble, vint yqui et tuit li commencerent a crier : Prenez les murtrers, prenez les murtriers, vez les ci, nous vous aiderons se vous volez, quar il l'ont tué Perrin de Rans14. Et cil Perrin de Rans s'en estoit ja alez tout trampelant en la meson doudit Tevenin Giraut et morut d'iqui a petit. Et dit cil qui palle que quant l'en disoit ces paroles audit Johan Panceron, il responnoit et disoit grossemant : Alez, alez vous en nous n'avons metier de vostre aide, nous nous en aiderons bien et les garderons bien. Et adonc s'en departirent d'iqui lidiz Johan Panceron et cil maulfeitor desus diz, et s'en alerent ensemble. Mes cil qui palle ne set quel part, mes il croit mielx en l'abbaïe que aylleurs, et dit qui palle que les bonnes genz qui ileuc estiaint present heüssaint bien pris et retenu lesdiz mauffeiters se ne fut ledit Johan Panceron qui estoit prevost et justise de la ville ou non de l'abbé et dou convent, et a qui l'en obbeïssoit comme a justise et qui comme justise prist et anmena lesdiz mauffeitors. Et dit cil qui palle que, puys apres ce, il ala o pluseurs autres voheyr ledit Robin, clerc de l'Aumone, qui estoit mort en un lit de costé la meson Tevenin Giraut et disoit l'en que lidit Guillaume d'Argeri l'avoit tué, et que quant il l'occist, il cuidoit occirre Johan Bordon et disoit telles paroles : Or ce tien ge Jehan Bordon. Et tout ce avoit cogneu et confessé avant que il trepassat. Et autre chose n'en set dou fet.

Requis se lidit mauffetor estiaint de l'abbaïe et du pain et au vin de l'abbaïe et de la mesnie de ladite abbaïe, dit que oÿl, et de ce est commune renommee et chouse notoyre a Saint Satur.

Requis se le dist Johan Panceron estoit prevost et justise dou leu ou non de l'abbé et dou convent, dit que, adonques et avant, a luy l'en obbeïssoit comme a justise et il exerçoit, et ha lonc temps exercé office de justice en hoant les cens et les plez oudit leu, et ou non doudit abbé et convent, et ce que il commandoit comme justise estoit tenu, et a luy obbeïssoit l'en comme justise. Et ce a vehu cil qui palle et de ce est commune renommee a Saint Satur15.

Aleiz, la chamberiere a la fame feu Jobert, juree etc., le vendredi apres la saint Mich. etc., elle qui palle qui apres l'eure de covrefeu estoit au fenestres de la meson ou elle demoroit pres de la meson Tevenin Giraut, une meson entre deux, hoÿt16 que uns qu'ele ne cognoissoit mie, mes l'en li a puis dit que ce estoit Colinet, le valet l'abbé, et Perrin Mirepié, qui aloit parmi la nuit et parliaint li uns a l'autre, et disoit ledit Perrin audit Colinet que il avoit dit villenie de luy, et il disoit que non avoit. Et tantost elle qui palle vit que Guillaume de Remors, escuier l'abbé, et Guillaume d'Argeri, neveu l'abbé, vindrent a ceaux qui paliaient, c'est assavoir ledit Guillaume de Remors l'espee tote nue en sa main, et demanda : Qui est ce la ? . Et tantost cil Perrin respondit : C'est Perrin Mirepié. Et ce, dit elle qui palle, oÿt que Mich. La Vache commença a crier audit Perrin : Beau compere, venez ça, lessiez les ester. Et lors li duy Guillaume de Remors et Guillaume d'Argeri corurent audit Mich., c'est assavoir lidit Guillaume de Remors l'espee tote nue, et oÿt celle qui palle bien que il batiaint et feriaint Mich. La Vache, mes elle cuidoit que ce fut Tevenin Giraut jusques a se qu'elle hot alumé le feu et lancé de la palle ardent par la rue por y vohayr et adonc s'aperçut que ce estoit ledit Mich. qui estoit batuz, et cil de la rue lançaint de la palle ardent par la rue et elle et li autre criaint : a la mort ! et au feu ! . Et vit celle qui palle que avec ces deux escuyers estiaint pluseurs personnes, jusques a sis, o espees et o batons, des quelx elle n'aperçut fors que les deux escuyers et Maritorne Baudri, valet au celerier, et frere Soutif, convers de l'abbaïe, et vit bien que li duy escuyer et li autre qui avec estiaint assallaint la meson Tevenin Giraut et lanciaint les espees tote nues et les batons aus fenestres du solier de la meson por atandre et por ferir ceux qui y estiaint, et briserent et geterent a terre l'uys de la meson et vit celle qui palle puys que moult de gens de la ville vindrent ileuc a l'asemblee por ce que l'en crioit Au feu ! et aus murtriers ! . Ne ne vit pas celle qui parle que onques hommes a celle asamblee y fut feruz et si vit que li duy escuier et 1 genvre moinne, lequel elle ne cognoisset pas, mes l'an li a puys dit que l'en l'apelle Coille Routie, se departirent de l'asemblee et s'en alerent vers l'abbaïe et apres eaux aliaint li autre mauffetor qui estiaint en la compegnie si comme il est17 desus dit, et apres eaux l'en crioit : Prenez les murtriers, prenez les murtriers, il l'ont tué Perrin de Rans et Robin, le clerc de l'Aumone. Et se aloit cilz Guillaume d'Argeri tot saingnent et tors jors s'en voloit retorner arriere lidit Guillaume d'Argeri a la mellee, mes li genvre moinnes l'en destorboit. Et puys apres celle qui parle se descendit des fenestres ou elle estoit et s'en ala a l'asemblee aus autres et vit en la meson Tevenin Giraut en un lit ledit Perrin de Rans mort et Tevenin Giraut le braz coupé mes non pas tot outre, et le fil Perreau Climent blecie en la teste, et disiaint communement tuit cil qui ileuc estieint que li dit Guillaume d'Argeri avoit tué ledit Perrin de Raus et que il avoit ausi tué Robin, le clerc de l'Aumone, et quant il le feroit, il cuidoit que ce fut Johan Bordon, le quelx Robin de l'Aumone ala puys vohayr celle qui palle en la meson Billebaut ou il se gisoit en un lit, et le vit morir devant luy.

Requise se Jehan Panceron, prevost de Saint Satur, fut en la compegnie de ces maufetors quant cil fet furent fet, dit que avant ne apres elle ne l'i vit, mes l'en disoit bien et encore dit l'en communemant que il vint au cri et que Regnaut Ogers et li autre bonnes genz qui estiaint venu au cri li aviaint bien dit que il preïst ces murtriers, et ces mauffetor, mes il respondit que il ne s'entremetroit ja.

Requise ce Johan Panceron estoit prevost de la ville et justise et ce il exerçoit office de prevost et de justise ou non de l'abbé et dou convent, dit que illi avoit 1 moinne qui estoit prevost moine et que cil Johan a esté lonc temps sergent et tenent leu de prevost et exercent office de prevost et de justise ou non de l'abbé et du convent, et a luy l'en obeïssoit tant que a justise.

Requise se cil mauffeitor estiaint de l'abbaye et dou pain et dou vin de l'abbaye et de l'ostel de ladite abbaye, dit que oÿl. Et de ce est commune renommee et chose notayre a Saint Satur, et autre chose ne set dou fet.

XI. Babeau, la niece Heliot, juree etc. dit etc. celle qui parle qui avec sa mere de leur meson, qui est de costé la meson Tevenin Giraut, 1 mur entre deux, s'en estoit issue a plain pour fere pisser un enffant qui malades estoit leanz et fesoit bien oscur, si que l'en ne poet pas bien cognutre les genz, oït tout plain de genz parlanz ensemble et n'estoyent pas plus de quatre, si comme li semble, et disoyent l'un a l'autre : S'il ne sont venu, il vendront de pres ne vous feignez pas mes ferez bien. Et tantost apres elle qui parlet qui avec sa dame et ou l'enffant se bouterent en leur hostel, oÿrent crier : A la mort, au feu et aus murtrers.

Et tantost cil qui estiaint en celle meson, c'est assavoir sa mere et la chambererent (sic) alumerent de la paille et pourterent en la rue et celle qui parlet monta aus fenestres de leur meson, une chandele en sa main, et vit Guillaume de Remors, escuyer l'abbé, et Guillaume d'Argeri, neveu l'abbé, et Baudri, vallet au celerier, Robin, le clerc de l'Aumosne, et pluseurs autres, lesquex ne cognussoit pas, qui estient a l'uys Tevenin Giraut et disient : Tantost comme nous crierons nous aurons nostre aive. Et cis Robin de l'Aumosne avoit un paul bouté dessouz l'uys por abatre l'uys et avoit s'espee ceinte et le bacinet en la teste et le bouclier en la main, et Baudri avoit une espee toute nue en la main et le fourreaul en escherpe et le paul au col, et Guillaume d'Argeri avoit l'espee toute nue en la main et le paul au col, et autressit l'avoit Guillaume de Remors et assaillerent celle meson et gitoyent les espees toutes nues amont aus fenestres et les batons et les perres, et abatirent l'uys. Et por ce que il virent que celle qui parlet tenoit une chandele alumee aus fenestres ou elle estoit, il lancerent les perres et elle se descendit avaul et ala a sa mere qui estoit avaul et estoit alee au cri, ne ne vit ou celle qui parlet ferir homme, mes elle oït bien que li voisin d'iquy environ et Regnaut Ogier et les autres bones genz de la ville qui estoyent venu au cri a grant multitude disient et crient a Johan Panceron qui illeuc estoit : Johan, prenez les murtrers qui ci sont, vez les ci, et se vous voulez nous vous aiverons quar il hont tué Perrin de Rans. Et il respondit : Je n'ai cure de vostre aide, je les enmeneré bien. 18 Et quant les bones genz de la ville oÿrent ça, il dissirent a Arnoul, sergent de la ville, qui present estoit : Arnoul, vous estes sergens de la ville, vous ne fetes pas vostre devoir, veez ci les murtrers qui s'en vont et vous ne les prenez pas. Et cis Arnous respondit : Il est graigneur mestre de moy, il est prevostz et justise, il s'en chavira bien. Et tantost il dist audit Johan : Se vous voulez, je vous aideré. Et il li respondit : Va t'en, va t'en, je m'en aideré bien. Et vit celle qui parlet que ledit prevost en mena les deux escuyers par les deux girons l'un d'une part et l'autre d'autre, et li autre mesfeteur s'en alient empres, mes celle qui parlet ne set quel part, mes croit meaus que il alesseint a l'abbaye que ailleurs. Et nule autre chose n'en set fors que tant que l'en disoit et dit l'en communement que ledit Guillaume d'Argeri avoit tué ledit Perrin de Rans et Robin, le clerc de l'Aumosne.

Requise se le dit Johan Panceron estoit prevost et justise ne se il exerçoit office de justise, dist que oïl.

Requise se lidit mesfeteur estoyent au pain et au vin et de l'ostel de l'abbaye, dist ensi come li autre tesmoing dessus dit.

XII Annes, feme feu Jehan Chaigneau, juree etc., dist par son serement que rien n'en set, fors que tant que, le vendredi apres la seint Mich. derrenement passee, apres l'ore de covrefeu grant piece, elle qui estoit en sa meson, laquele est loing de la meson Tevenin Giraut, oït que li fis au Douz de Seint Satur et Johan Bernar dissirent a Johan Pauceron19 telx paroles : Johan, venez prendre le chapellain et le segrestain quar nous cuydons que il soyent consentans de cest murtre. Et il respondit : Se vous les tenez, si les tenez bien quar je ne m'en entremetré ja. Et plus ne oïst ne ne set.

Requise de la commune renommee, dist autressit come li autre tesmoing dessus dit.

Requise se li autre mesfeteur estoyent dou pain etc.

XIII. Heliot Angoin, juré etc. apres covre feu environ le premer somne, cis qui parlet, qui en son lit se gisoit, cousté la meson Tevenin Giraut, un mur entre deux, oït crier Au feu ! et Aus murtrers ! et tantost il, se vestit et chauça et ala fors, et vit mout grant multitude de genz devant la meson Tevenin Giraut et disient et crieent : A la mort, a la mort, Perrin de Rans est morz. Et disient a Johan Panceron qui estoit illeuc presenz, et estoient pres de li Guillaume de Remors, escuyer l'abbé, et Guillaume d'Argeri, neveu l'abbé : Johan, veez ci les deux murtrers, tenez vous en saisy, quar il ont tué Perrin de Rans.

Et mesmement la fame Tevenin Giraut qui estoit aus fenestres de sa meson crioet tant comme elle poet : Bones genz, aus murtrers, aus murtrers, Perrin de Rans est morz. Et disient les bones genz au prevost : Se vous voulez aide, nous vous aiderons. Et il rspondit : Je n'ai cure de votre aide, je m'en aideré bien20. Et lors ledit prevost les prist et les enmena, mes ne set quel part.

Et autre chose n'en set.

Requis de la commune renommee, dist autressit comme li autre tesmoin dessus nommé.

Requis se cis Johan Panceron estoit prevost ne se il exerçoit office de justise ou non de l'abbé et dou convent, dist que oïl, et autressi come li autre tesmoin dessus examiné.

Requis se lidit mesfeteur estoyent dou pain etc.

XIIII. Bejart, fille mestre Estiene le charpentier, juree etc. dist etc. elle qui en son lit se gisoit oït crier mout forment A la mort et au feu et pro ce elle se leva et chauça et issit fors, et oït mout grant bruyt et mout grant noise a l'uys Tevenin Giraut, et que l'en brisoit les huys, mes elle ne savoit qui ce estoit, ne elle ne fesoit aprocher par la peur que elle avoit, et mout de genz de la ville y avoit qui estoyent venu au cri et crieent et brayent : Prenez les murtrers, prenez les murtrers, Perrin de Rans est morz, il en y a deux de morz. Et puys apres ne demora pas mout que elle qui parlet vit un poy au dessouz de sa meson au quarreoul, laquele meson est au dessus de la meson Tevenin Giraut, venir devers la meson Tevenin Giraut Johan Panceron, avec luy Guillaume l'escuyer l'abbé, et le petit Guillaume, neveu l'abbé. Et apres eaus venient grant multitude de gent, des nons des quex ne li souvient qui crieent, brayent et disient audit Johan Panceron : Johan, prenez ces murtrers, prenez ces murtrers, il en y a de morz, il en y a deux morz. Ne celle qui parlet n'oïst pas, par la multitude et par le bruyt de la gent, ce que le prevost leur respondit, ne ne set quel part il retornerent et puys apres elle ala a la meson Tevenin Giraut et vit ledit Perrin de Ransmort, et disoit l'on communement que le petit Guillaume, neveu l'abbé, l'avoit tué, et avoit autressi tué Robin, le clerc de l'Aumosne.

Et autre chose n'en set de la commune renommee, mes autressi come li autre.

.

XV. Gilete, la fame feu Johan Beraut, juree etc. apres covrefeu un petit, elle qui se gisoyt en son lit en sa meson qui est asez pres de la meson Tevenin Giraut, deux mesons entre deux, hoÿst forment crier A la mort, au murtriers et au feu. Et oyt que fourment l'en feroyt et asaylloyt l'en la meson audit Tevenin Giraut, et por ce elle se leva et se vestit en son peliçon et prist et fist prendre grant foyson de paylle par sa chambrere et la fist porter fors et alumer por ardoyr et vit tout plain de genz qui estiaint a l'uys Tevenin Giraut et lanciaint aus fenestres de la meson les perres et les batons et brisieint et abatiaint l'uys et entre les autres elle aperçut Guillaume le Grant, escuyer l'abbé, et tuyt cil qui yquy estiaint, par la mere partie dysiaint que o luy estoyent Guillaume le petit, escuyer l'abbé, et Robins, clers de l'Aumosne, et y avet tant de gens qui avyaint tant d'espees et de batons qui asailliaint la meson que celle qui parle ne savoyt qui li autre estiaint, mes toutes voys l'en disoyt communement que c'estiaint de la mesnye de l'abbaye et oÿst bien celle qui parle que l'en crioyt formement Prenez les murtriers, prenez mes murtriers, que Perrins de Rans est mort. Et bine y vit celle qui parle Johan Friolet, autrement dit Pancerons, mes elle ne li oÿst onques mot dire ne autre chose n'en set, fors que de la commune renomee autre sit comme li autre desus diz fors que tant que apres ce elle ala vohayr ches Tevenin Giraut Perrin de Rans qui estoyt mors, et disoyt l'en que li petit, escuyers l'abbé, l'avoyt tué, et que ausit il avoyt tué Robin de l'Aumosne, clerc, et plus n'en set21.

XVI. André Chevalier, tesmoin juré etc., dit etc. environ le premier somme cil qui parle, qu'il avoyt ja asez dormi, oÿst que l'en cria Au feu. Et fist lever sa mesnie et il meymes se leva et yssit fors et demanda a ceaux que il trova en la rue : Qu'es ce ? Et l'en crioyt communement aus murtriers, et li dist l'en que Perrins de Rans estoyt tué et que li petit Guillaume d'Argeri, neveu et escuyer l'abbé, l'avoyt tué et n'osoyt cil qui parle aler la ou la mellee estoyt, quar l'en lençoyt les chayllous et les perres vers luy, et crioyt l'en communement cilz de la ville et grant foyson qui y estiaint venuz au cri : Bonnes gens, prenez ces murtriers quar Perrins de Rans est morz. Et vit bien cil qui parle Johan Panceron, Regnaut Tue Beuf et Arnoul Chanderi, sergens de la ville, qui couriaint de ça et de la, mes ne sot cilz qui parle que il firent ou si firent bien ou mal ne autre chouse, ne vit ne n'en oÿst cilz qui parle, fors que tant que il vit bien Guillaume de Remors et ledit Guillaume d'Argeri, neveu l'abbé, qui tenoyt l'espee nue en sa main, et s'en aliaynt ensemble, et l'en crioyt apres eaux : Prenez ces murtriers, prenez ces murtriers. Et disoyt l'en communement que li dit petit Guillaume, neveu l'abbé, avoit tué ledit Perrin de Rans, et autre chouse n'en set que d'oÿr dire et de commune renomee ausit comme li autre.22

XVII. Henri Charrede, tesmoin juré etc., dit etc. un petit apres covrefeu, por le cri que il oÿst et por la noyse yssyst de ches soy en la rue et cil qui parle vint devant la meson Tevenin Giraut por ce que il avoyt oÿ crier au feu et a la mort, vint grant herre au cri, et quant il fut acouru au cri, ledit Guillaume d'Argeri, neveu l'abbé, vint a cil qui parle et li cuyda doner de l'espee parmi la teste, et se lidit Henri ne heüst bessé la teste, cil Guillaume d'Argeri l'eüst forment domagé, et ce ne feüst ce que cilz Henri qui parle li courut et l'acola a la fin que il le peüst prendre par reyson dou cri et de ce que il avoyt oÿ crier, et adonc cil petit Guillaume, neveu l'abbé, autrement dit d'Argeri, le commença forment a destortre entre les braz de cil qui parle qui le tenoyt, et le commença a ferir dou plat de l'spee parmi les espaules, et adonc cil qui parle qui le tenoyt le lessa par la paour que il avoyt des compaygnons qui estyaint avecques soy, c'est a savoyr Guillaume de Remors, escuyer l'abbé, Baudri, valet au celerier. Et dysoyt l'en communement que li petit Guillaume d'Argeri, neveu l'abbé, avoit navré a mort Perrin de Rans, et qui ne parloyt pas, et criaint cil qui present estiaint venuz au cri, qui estiaint bien plus de 30 et en la presence Johan Panceron, Arnoul Chauderi, sergens : Prenez ses murtriers, prenez ses murtriers. Et mesmement Regnaut Oger et li autre qui avec luy estiaint presenz disiaynt a Jehan Panceron : Johan, prenez ces murtriers, prenez ces murtriers, il hont tué Perrin de Rans, et ce vous voulez, nous vous ayderon. Et ce disiaynt il doudit Guillaume de Remors et dou petit Guillaume, neveu l'abbé et de Baudri, valet au celerier, qui estiaint de cousté ledit Johan Panceron, et dit cil qui parle que il n'oÿst onques parolé que cil Johan respondist, et puys apres dit il que li dit Guillaume de Remors, le petit Guillaume, neveu l'abbé, et Baudri et Johan Panceron tuyt ensemble se departirent de la presse et lidit Johan Panceron se partit d'eaux et s'en ala le chemin de souz et li autre troys s'en alèrent vers l'abbaye, et tourjors les genz crioyent Au murtiers, aus murtriers. Et puys cil qui parle ala vohayr chés Tevenin Giraut ledit Perrin de Rans qui mort estoit, et disoyt l'en communement que lidit petit Guillaume l'avoyt tué et avoyt tué ausit Robin de l'Aumosne clerc. Et autre chouse n'en set cil qui parle, fors que d'oÿr dire et de la renommee ausit comme li autre tesmoin desus diz.

Requis se lidiz Johan Panceron estoyt prevost, et exerçoit office de prevosté, dit ausic comme li autre.

Requis se li dit mauffetor estiant dou pain etc.

23

XVIII. Perrin Jobert, tesmoin juré etc., dit par son serement que le vendredi apres la saint Micheau derrenement passee, apres covrefeu, cis qui parlet qui se dormoet en son lit, se esvoilla por ce que l'en li dist que l'en crioit A la mort et Au feu ches Tevenin Giraut, et se vestit et s'en issist de sa meson et quant il fut hors, il vit grant multitude de genz qui estoyent issuz et venuz au cri, et crioyent li pluseur Aus murtriers, aus murtriers, Perrin de Rans est morz. Et disient que le petit Guillaume d'Argeri neveu l'abbé, l'avoit tué. Et puis cis qui parlet, qui plus pres s'aprocha de la meson Tevenin Giraut, vit Guillaume de Remors, escuyer l'abbé, l'espee nue au poing, en haust levee, et le petit Guillaume d'Argeri, neveu l'abbé, aussit l'espee en haust levee, et estoit tout sanglant, et Maritorne, vallet de l'abbaye, et y ne membre pas a celi qui parlet se il avoit baton ou non, et vit cis qui parle que les huys Tevenin Giraut estient mis a terre, et disoit l'an que ce avoyent fet li duy escuyer l'abbé, c'est assavoir cil duy Guillaume, et li autre qui estient venu avec eaus de l'abbaye, et oït cis qui parlet que Regnaut Oger et li autre qui estient venu au cri disient a Johan Panceron qui ileuc estoit : Jehan, prenez ces murtrers qui sont en cousté vous, veez les ci, Perrin de Raus est morz, il l'ont tué, et se vous voulez aide nous vous aiderons. Et il respondit : Prenez les se vous voulez, je ne me feré pas tuer. Et touz jourz l'en crioit : Bones genz, prenez les murtriers ; Et tantost cil duy escuyer et le dit Jehan Panceron et un moyne que l'en appeloit Coille Rotie, qui survint de l'abbaye et qui embraça le petit Guillaume que il l'en menast que il ne feïst plus nulle folie, se departirent de çaux qui iqui estient et s'en alerent ensemble juques au quarrouge qui est vers la meson mestre Estiene le Chapuis et tous jours l'an crioit apres eaus : Prenez les murtrers, prenez les murtrers. Et de celui quarroge ledit Johan Panceron se departit doudit quarroge et s'en ala la voye basse en sa meson, et li autre s'en alerent vers l'abbaye24. Et puis cis qui parlet vit ledit Perrin de Rans mort et autressi ledit Robin de l'Aumosne, et disoit l'en communement que le petit Guillaume d'Argeri, neveu l'abbé, les avoit tuez, et de ce est commune renommee.

Requis se ledit Johan Panceron estoit prevost ne se il exerçoit office de justise et se lesdiz mesfeteur estoyent dou pain etc.

XIX. Annes, la fame Andri Babignon, jurre etc., dit par son serement quar elle qui se dormoit en son lit de costé la meson Tevenin Giraut, une meson entre deux, le vendredi etc. environ le premier somme, se eveilla quar elle oït mont forment crier en la rue A la mort, et Au feu et li sain de la ville sonnoyent mont forment, et quant elle fut issue fors, elle vit grant bruyt et noise a la meson Tevenin Giraut et despeçoit l'en les huys et les fenestres et y aperçut celle qui parlet les deux escuyers l'abbé, le grant Guillaume et le petit Guillaume, et y avoit grant foison des gens de la ville et des voisins de la ville qui estient venu au cri, et criet l'en mont forment A la mort, aus murtrers, prenez les murtrers, prenez les murtrers, Perrin de Rans est morz. Et quant l'en crioit ainsit, elle qui parlet vit que Johan Panceron y ssurvint au cri, mes elle ne set se ce estoit ou par bien ou pat maul, et tantost demanda Qu'es ce, qu'es ce ? . Et l'an li comença ainsit comme tuit communement a dire et a crier : Perrin de Rans est morz, prenez ces murtrers etc. Et puis vit celle qui parlet que lidit duy escuyer et ledit Johan Panceron s'en allerent ensemble et passerent par devant la meson a celle qui parlet et l'en crioit apres eux25 Bones gens etc.

Et autre chose n'en oïst ne n'en set fors que de oïr dire et de la renommee autressi comme li autre.

XX. Bonin de La Ronde, juré etc. il qui parlet estoit en la meson, por ce que il oït crier a la mort et au feu, se leva et s'en ala fors et vit mout grant bruyt et mout grant noyse devant la meson Tevenin Giraut et disoit l'en ja communement que Perrin de Rans estoit morz et que li duy escuyer l'abbé et Baudri, le vallet au celerier, l'avient tué, et metient les bones genz de la rue de la paille on feu por cognustre les mesfeteurs, et la fesient ardoir en la rue por ce que i fesoit mout oscur et por ce que l'en dit a celi qui parlet que Regnaut Oger estoit a l'assemblee de celle gent, il ala la, et aveque ledit Ren aut il ala en la meson Tevenin Giraut et vit Perrin de Rans tout mort en un lit et disoit l'en etc.

Et lors cis qui parlet s'en issit de la meson et vint en la rue et ala avec mout d'autres genz a Johan Panceron, prevost et justise de la ville, qui estoit ileuc armez d'une cote gambesee, d'un bacinet en la teste, et une espee en escherpe. Et tant cis qui parlet come les autres bones genz de la ville qui eleuc estient distrent audit Johan Panceron : Johan, il en y a deux de mors, Perrin de Rans est morz et Robin, le clerc de l'Aumosne, fetes crier de par l'abbé et de par le prevost que il y en a deux de morz et que l'en preignet ces murtrers quar il ne sont pas loing, et nous vous aiderons. Et il leur respondit : Alez, alez vous en, s'il en y a de morz, si les fetes saler et en ferez charbonee, quar il seront bien pris, je les troveré bien dedanz demain prime. 26 Et plus n'en set cis qui parlet fors que de oïr dire et de commune renommee come li autre, et cis qui parlet que Johan Panceron estoit prevost et justise, et l'a esté par plus deux anz derrenement passez, et cis meimes qui parlet jadis, plus a de deux anz, oït que li abbés et li prevoz moynes l'en obeïssit au dit Johan Panceron come a prevost et come a justise et en non d'aux a touz jours d'iquy en avant l'en y a touz jourz obeï

XXI. Perreau le Cousturier, de la Charité, demorant a Seint Satur, juré etc. apres covrefeu, qui estoit en sa meson, assez pres de la meson Tevenin Giraut, couchez en son lit par ce que il oït crier au feu chés Tevenin Giraut, se leva, et tout nu piez en sa cote senz chaperon et s enz chemise ala voir que ce estoit, et vit que, par ce que i fesoit oscur, li voisin et les bones gens de la rue lancient la paille et l'alumient parmi la rue porce que l'en y veïst meaus, et vit que li duy escuyer l'abbé, c'est assavoir le grant Guillaume et le petit Guillaume, chascun l'espee toute nue en la main, et Baudri, vallet au cellerier, et Maritorne, et Colinet, vallet l'abbé, chascun un paul en la main, estient a l'uys Tevenin Giraut et ferient et frapient et despecient les huys et les fenestres, et la feme Tevenin Giraut estoit aus fenestres de la meson et lançoit la paille toute ardent enmi la rue, et crioit tant come elle poet : A la mort, aus murtrers, a la mort, aus murtrers. Et lors cis qui parlet, p. ce que touz nuz piez estoit et par la peour que il avoit se trahist arrieres et comença a crier a la mort come li autre. Et puys apres ne demora quyere que les bones gens qui vindrent au cri comencerent a crier A la mort, a la mort, Perrin de Rans est morz. Et disient ensi que Robin le clerc de l'Aumosne estoit morz et que lidit duy escuyer et li autre qui en leur compeignie estient les aviens tuez.

Et puis ce cis qui parlet vit venir a celle assemblee qui grant estoit des genz de la ville et des mesfeteurs dessusdiz, Johan Panceron armé d'une cote gambesee, l'espee en escherpe, et, si come il semble, le bacinet en la teste, li quex demanda : Qu'es ce, qu'es ce ? Et tantost l'en li comença a crier : Johan, prenez les murtriers etc. Et bien li disoit l'an touz jours que lidit duy escuyer et li autre mesfeteur dessus dit qui en leur compeignie estient, et qui estient ileuc presenz, les avient tuez mes il i avoit si grant bruyt et si grant noise que cis qui parlet l'oït pas la reponse que ledit Johan Panceron fit.

Et puis, d'iquy a petit, ledit Johan Panceron et lidit duy escuyer et li dit autre mesfeteur dessus dit se departirent d'iquy. Et lidit duy escuyer avoyent les espees toutes nues es mains et li autre mesfeteur dessus dit avient chacun un paul au col, et s'en alerent ensemble juques vers le cemitere, et touz jourz les bones genz crioent apres : Johan, prenez ces murtrers. 27 Et autre chose n'en set.

Requis ce lidit Johan Panceron estoit prevostz ne se l'en obeïssoit a li come a justise, dist que oïl, ne se l'en obeïssoit a li come a justise, dist que oïl.

Requis se lidit mesfeteur estoyent dou pain etc.

XXII. Hugues, fis feu Joffroi Bourdon, juré etc. apres covrefeu grant piece cis qui parlet oït que l'en crioit au feu et a la mort en la rue et p. ce s'en issit et vit vers la meson Tevenin Giraut grant assemblee de gens et grant meslee, et quant il fut la il vit Johan Panceron armé d'un bacinet en sa teste, et d'un gantelez es mains et l'espee en escherpe, mes ne set se il estoit autrement armez par le cors, quar il avoit son surcot vestu et de costé li estient si fil, l'espee ceinte en escherpe, et Tevenin, sergent audit Johan, l'alernaz tout nu en la main, et assez loignet d'iquy vit cis qui parlet les deux escuyers l'abbé, c'est assavoir le grant Guillaume et le petit Guillaume, et tenoit chascun s'espee nue en sa main, et frere Soutif, convers de l'abbaye, qui avoit un grant levier et un fauchon en sa main et gitoit l'en parmi la rue li voisin grant foison de paille ardent par fere clarté par ce que i fesoit oscur, et vit que Perrin de Rans issit de la rue dou celier de la meson Tevenin Giraut, et s'en entra en la meson Tevenin Giraut, et disoit : Alas, je sui navrez a mort. Et puis apres ne demora gueres que il morut, et disoit l'en communement que ledit petit Guillaume l'avoit tué.

Mes autre chose n'en set, fors que tant que il oït bien que les gens qui iqui estient disient que Robin de l'Aumosne estoit mors et que ledit petit Guillaume l'avoit tué, et que l'en crioit et disoit l'en a Johan Panceron qui iqui estoit presenz : Johan, prenez ces murtriers etc. Et il respondit : Je ne m'en entremetre ja, se il en y a deux morz, je amasse meaus de quatre, se il sont mort, fetes les saler, si en ferez charbonee. 28

Et puis il vit que lidit maufeteur et ledit Johan Panseron s'en alerent ensemble et l'en crioit apres eaus : Prenez ces murtriers, Johan, guardez bien que vous en ferez. Mes ou il alerent ce ne set cis qui parlet.

Et autre chose n'en set, fors que de la commune renommee ausit come li autre.

XXIII. Johan Mautaint, juré etc. un petit avant l'ore de vespres, cis qui parlet vit que come une feme fust venue en la court de l'abbaye devant Johan Panceron, tenant le leu de prevost, et exercent office de justise, et se plainsist et dissit que trois clerc l'avient batue on presseur mestre Jehan d'Ursy, et ledit prevost li respondit que il n'estoyent pas ses justisables et que i ne li en poet fere droet. La fame dist que puis que il ne li en voulet fere droit, elle metroit le feu en la meson ainces que elle ne fust vengee. Et tantost cis Micheaus La Vache dist : Ci a grant cas ce est contre l'abbaye et contre la ville, il i a bien cas par quoy vous la devez metre en prison, je vous requier et vous conseil que vous la feçoiz metre en prison. Et come ledit prevost l'eust comandee a metre en prison, Guillaume de Remors, escuyers l'abbé, qui iquy estoit, dist audit Mich. : Michau vous parlez mont a chevaul. Et ledit Mich. respondit : Je ne sui pas a chevaul, ains parle come preudons. Et ledit Guillaume respondit : Vous mantez, quar vous estes mauvés vilains, et je ne sui pas vostre amis, ances sui vostre annemis, et vous en appercevrez briement, et vous en fuyssez pice a apperceüz se ne fust une fille qui est chez vous qui est parente a une feme de ceste ville. et lors ledit Mich. dit au prevost : Sire, vous vez bien que il me menace, je vous pri que vous me façoiz assegurer , et ledit prevost dist que y n'i choet poent d'assegurement, et que il ne le feroit pas assegurer. Et furent present a ce cis qui parlet, Andri le Bergoignon, Odenin Giraut, Perrin Mirepié et ledit Gros Vallet son frere29.

Et plus n'en set diligenment requis.

XXIIII. Guillaume Gros Vallet dit par son serement que le vendredi etc. environ nonne, il vit et fut presenz et vit en la court de l'abbaye, devant Johan Panceron qui iqui tenoit ses jours p. l'abbé et le convent que p. ce que Guillaume de Remors, escuyers l'abbé, disoit grosses paroles a Mich. La Vache qui estoit presenz, en disent li devant ledit prevost que il n'estoit pas suis amis, et que il estoit ses annemis, et que il s'en appercevroit brement et s'en fust apperçeüz se ne fust une fille que il avoit chez soi qui estoit parente a une feme de la ville. Ledit Mich. requist audit prevost que il le feïst assegurer doudit Guillaume, quar il se doutoit de li. Et le dit prevost respondit que y n'i choet poent d'assegurement et que il ne s'en entremetroit ja30

Et a ce furent present cis qui parlet, Andri le Bergoignon, Odenin Giraut, Perrin Mirepié. Et plus n'en set.