IRHT

Enquêtes menées sous les derniers capétiens

> Procès de Morise Braefort contre Pierre Saymel, jadis bailli d'Orléans

Archives nationales, J 742, n°4

Enquête

[1]

Comme lidiz Morise fust au consail l'abbé et le convent de Saint Bonoaist et lour baillif, et il eust entendu que en molt diverses manieres il avoient fet et faisoient dons et courtoysies audit Pierre Saymiau, si comme il desclarera et baudera par escript, se mestiers est, et cestes diverses manieres de prendre faisoit il pour soi covrir. Le dit Morise, quant il ot ce entendu, en parla a l'abbé et a ses genz et les en requist forment et leur dist que il sembleit que il feïssent de leur droit lour tort quant il donnoient ausint grossement au baillif, il sembloit que il eussent tort vers le roy et sa gent des complaintes que il fesoient des troubles, empeeschemens et griés que ledit baillif et sa gent li fesoient, et pluseurs autres choses leur dist seur ce. Et quant ledit baillif ot entendu que il en aveit ainsint parlé, il fist et pourchasça audit Morise les griés, injures et dommages qui s'en sivent :

Primierement pour ce que il n'avoit point de cause raisonnable de ce li faire, il prist talent et achoison de li faire, que il a bien acoustumé a fere, quar comme ledit Morise, baillif lors de Saint Benoast, tenist emprison un escuier qui est apelé Guillaume dou Boys de La Haye pour le soupeçon de 1 murtre que l'en li metteit sus, ledit baillif le leur osta et le mist en la prison le roy a Yenville et tout l'eust il fet a tort, si comme il aparut, quar il leur fu puis rendu par commandement de court. Ledit baillif mist sus audit Morise que il avoit fet enqueste fors en enformement sanz escript que les nons que il aveit fet escrire a 1 clerc en ses tables, qui ne le vouleit bailler a nulli pour ce que ce esteit cas de sanc. Et toutes voies ledit Morise lidit par cuer ce que il en aveit fet et trové par son serement par la force et la volenté doudit baillif, tòut n'i fust il de riens tenuz.

Pierres dit que il fu bien voirs que Guillaume dou Boys de la Hae fu soupeçonneus d'avoir occis le compaignon au prieur de Sermeses, et en fu lidiz Guillaume tenuz a S. Benoaist. Et pour ce que lidiz moines murtriz esteit de la guarde le roy, pour ce prist li baillis ledit Guillaume que soupeçonneus en esteit et le tint par devers li, mais ou point que il fu tenuz a Saint Benoist, Morise Broiefort, qui esteit baillis de Saint Benoist, enquist de celui fet a Sermeses ou li faiz fu fez et retint devers lui l'enqueste que il en fist. Et quant li baillis tint la personne soupeçonneuse, il requist a Morise que il li monstrast l'enqueste ou informacion que il en aveit fait, par quoi il se peut aviser sus pour le fet mielz trover, quar Morises li aveit dit que il en avoit trové molt cleres presomptions. Morise li refusa par 2 foiz ou par trois ne monstrer ne le vout au baillif, pour quoi li baillis ne pot pas si savoir la verité dou fet comme il deust par le faute de celui Morise, dont il li sot molt malvés gré, et en commanda li a en saisir sa meson a la fin que il li baillast cele information, mes bailler ne li vout. Et ensi li baillis s'en soffri et ne trova pas le fet si comme il deust. Si dit que en ce faisant il ne meffist riens audit Morise ne a autrui, mes Morises se meffist.

Item comme ledit Morise eust fait arester 1 chevalier qui li devoit deniers et a ses compaignons, par lettres de la prevosté d'Orliens, laquele chose il poait fere par la coustume du pays notayre et manifeste, en despit, grief et domage audit Morise, il le delivra sanz rien paier en disant audit Morise laides paroles et vileines. Derechief ledit Morise li requist que il li feist droit savoir se il le devoit delivrer ou non. Ledit baillif respondi que il ne li en fereit ja jugement : Beau deable, dit li baillif, en gronz tu, malvés garçon, se tu en paroles plus, je te feray mettre en prison leanz . Et par pluseurs foiz li dit cetes paroles. Et en telle eure il fesoit mettre juis en prison pour larrecin et dist derechief au dit Morise Par poi que je ne te fais mettre em prison avec ces larrons . Et lors lidit Morise ot si grant paour et si grant honte que il, sanz en plus fere ne dire, s'en ala. Et vousist mielz ledit Morise avoir perdu 40 l. que la honte et vileinie que il li dist.

Pierres dit que il fu voirs que Morises fist arester a Orliens mons. Jehan des Barres pour cause de dette, et esteit li baillis a Orliens. Li chevaliers li vint monstrer au baillif et requist que il des arrester le feist, car il esteit venuz a Orliens pour li arreer d'armes et de hernois pour aler en l'ost en Gascoigne et le jura au baillif. Li baillif fit oster l'arrest, et en ce il meffist riens comme, en celi cas. Chevaliers ne escuiers ne doit estre arrestez ne si cheval par le commandement dou roy.

Item ledit Morise vint a une autre journee devant ledit baillif pour aucunne requeste que il li vouloit fere et ledit baillif li dit que il ne l'orreit en riens et li deffendi toute advocacion et deffendi au prevost d'Orliens que il ne l'oïst en riens, en laquele advocacion ledit Morise gaigneit bien 100 l. l'an et plus.

Li diz Pierres dit que il puet bien estre que li diz Morises vint bien devant ledit baillif une foiz en la noveleté que Morises li ot refusé a monstrer l'enqueste que il aveit fet dou moine murtri et que Morises li fist bien une requeste pour li Morise meesmes. Li baillis li dit que il ne voloit fere ce que li baillis li requereit et aveit requis de reson et que bien feust il ne l'an amoit mie mielx ne si volentiers il ne l'en orroit mie comme se il eust obeÿ et puet estre que il li dit adont que il se traisist arrieres, mes puis il a touz jouz oÿ et escoté ne en ce il ne siet que Morises eust onques dommage, ne pour ce. Et dit li baillis que en advocacion Morise n'esteit mie adont ne n'est de sens d'estat que il dut gaigner en 1 an par s'avocacion 20 l. car il ne siet riens et non pour quant Pierre l'a puis eu pour le roy avec li et la compaignie.

Item lidiz baillis dit audit Morise que il toudroit et feroit tolir toutes ses pensions et que tuit cil de qui il se entremettroit y auroient dommage se il le retenoient en leur servises.

Pierres dit que onques ne le dit en la maniere que Morise le dit, et se dit l'avoit si est aparuz li contraires car li baillis l'a puis oÿ et pour li et pour autrui en ce que il aveit a fere, si comme les autres qui plus sevent, et a puis esté au consail ledit Pierre pour le roy et bosoignes le roy et a mangé et beu aveques ledit Pierre et li compaigne devant touz, ne onques pension ne li toli.

Item il fist mettre hors ledit Morise et ses anfanz hors de sa meson et seeller ses huis, laquele esteit hors de la joustice le roy, et estoit en la joustice de Saint Loranz les Orliens, ne ne pot avoir recreance tant comme ledit baillif fust en la ville. Et quant il s'en fut alez le prevost la li fist a grant paine et a grant priere pour paour que il n'en fust blasmez et requis doudit baillif.

Pierre respont que il commanda bien que l'en seisisist son temporel en la nouveleté que Morises li refusa a bailler l'enqueste que il avoit fete dou moine murtri, a la fin que il li baillast ; mes bailler ne li vaut et non pour quant sa meson et li siens li fu desseisi.

Item ledit baillif parla et fist parler a l'abbé de Saint Benoist comment il ostat ledit Morise hors de son servise ou il i auroit plus grant domage. Et ensint a la requeste et a la monition doudit baillif ledit abbé osta ledit Morise de son servise, ouquel servise ledit Morise avoit 60 l.p. de pension par an et pluseurs autres pensions que ledit Morise avoit que il convint que il1 delessast pour ce que il ne poait estre oïz en advocation ne en requeste, et pour ce que que ceus n'enpirassent leur besoignes pour la compaignie dudit Morise, car il n'a si grant advocat en Orliens que se le baillif le tournast en hayne, qui que feust baillis qui pas poust fere son prou ne l'autrui par advocation en sa baillie.

Pierres dist que onques ne fist oster Morise hors dou servise Saint Benoist ne d'autre, mes bien puet estre que aucunnes personnes de Saint Benoist se conseillerent audit Pierre, liquex leur seroit, seurlon son avis plus profitables a estre leur baillis ou Morises ou Maçoz de Chilli. Lidiz Pierres qui aime et amoit l'esglise de Saint Benoist leur lit bien que Maçoz esteit trop plus soffisanz que Morises a son avis et que il dorroit plus volentiers Macé 100 l. pour 1 an servir que 40 a Morise. Et puis ce puet estre que il osterent Morise et retinrent Macé de Chilli, mais par li ne fu pas. Si dit Pierres que en ce faire il ne meffist rien.

Item ledit Morise prist aveques autres la taille dou pain et dou vin en l'an IIIIXX et douze, que l'en apele la grant taille de la tierce annee, ledit Morise, puis que il ot fet ses paemenz, fu pourforcé a paier 15 s. que il ne devoit pas et les paia a Guillaume Tybout, prevost d'Orliens, par la contrainte dou baillif, maugré doudit Morise et contre sa volenté.

Pierres dit que, au conte dont Morise parole, il Pierres conta a ceus qui tenoient la taille dou pain et dou vin er demoura certaine somme de dette sus aus, tout acordee, ne ne savoit pas Pierres que Morises feust compainz de celle taille dou pain et dou vin, ne a li l'en en contoit de rien. Si fu acordé que se Morises avoit esté compainz des premieres annees dont cil debat est, dont on conta, il soit que il paereit dou sien les 15 s. et se conpainz non aveit esté, li compaignon qui sanz li avoient tenu la taille li renderoient.

Item ledit Morise prist doudit baillif la prevosté de Baugenci pour li et pour 1 bourjois de la ville qui a non Hervet Le Breton, lequel Hervet acorda audit Morise la compaignie aveuc li pour le pris de 140 l.p. par an. Le baillif faint que il l'avoit baillee a 1 autre par enchiere et il le laissa a yceli Hervet pour 120 l., dont ledit Morise eust fet son profit en ladite presvosté par l'an, de bien 40 l. et de plus. Et ainsinc fist dommage au roy et audit Morise en despit et en hayne doudit Morise et en pluseurs autres manieres, a bien eu ledit Morise de dommage jusques a la value de 100 mars d'argent, et honte et vileinie que il ne vousist avoir soustenu pour autant. Si vous requiert et souploye ledit Morise que lesdiz damages li soient renduz, sauve vostre loial estimation, se il connoist les choses desus dites. Et se il les nie, ledit Morise en offre a prover ce que mestier li en sera, sauves toutes ses resons dont il fet retenue.

Pierres dit que ladite prevosté fu vendue ou temps que Morises dit a Gile Coran de Bloys pour 100 l. 1 an a 100 s. d'enchiere, et puis le mit Hervez le Breton a 110 l. et i acompaigna Morise, et puis le mist Symons Le Usuriers a 120 l. et i acompaigna Hervet, et non Morise. Et ala Hervet a la court monstrer aucuns dommages que il avoit euz pour le roy et aucuns servises que il aveit fez et fu Jehan de Es presenz et ledit Pierre et autres genz que li connoissoient et requist au mestres que l'en li vousist lessier la prevosté pour 110 l. et par le tesmoignage que li mestre en orent bon, il li otraieerent et furent osté 1 paiement passé, comme pour trop conté nos mestres le tiez des 10 l. que l'en li avoit ja contez et li demoura a 110 l.

Et pour ce que nous auditeurs fusmes en peschié en plusieurs choses et ledit Morise ne nous poursui mie moult, la chose demoura en cest estat jusqu'a tant que on revendra ou païs.

Notes

1 Ces 3 mots ajoutés en interligne.

Comment citer cette notice

Elisabeth Lalou, Xavier Hélary. "Procès de Morise Braefort contre Pierre Saymel, jadis bailli d'Orléans (Archives nationales, J 742, n°4)", dans Enquêtes menées sous les derniers capétiens, Elisabeth Lalou, Christophe Jacobs, éds, Paris : Centre de ressources numériques TELMA, 2007. (Ædilis, Publications scientifiques, 4). [En ligne] http://www.cn-telma.fr/enquetes/enquete34/ .

Mentions légales | Colophon | Contacts | Haut de page