Au roy nostre sire supplie humblement Gerard d'Aura, chevalier, que comme ou temps de vostre predecesseur le roy Philippe le Bel, que Dieux, absoille, les officiers du roy par dela, qui pour le temps estoient, meïssent sus et imposassent a Hot d'Aura, chevalier, pere du dit suppliant, qu'il avoit forgié fause monoye, pour laquelle cause [V^o] le dit son pere se mit en rebellion contre les gens du roy, apres que le dit suppliant conversa aveques le dit son pere et presta aide et consentit a la dite rebellion, le dit suppliant fu bannis du royaume de France et ses biens prins et detenus par la main du roy, dont apres le dit roy vostre predecesseur, trente ans a et plus, de sa benigneté et grace especial remist et quitta au dit suppliant les dits mesfaix et rapella le dit ban et tout quanque il s'en ensui, et li fist rendre et delivrer tous ses dits biens a plain, selon ce que en la dite grace estoit contenu, de la quelle il a joui paisiblement par tout le temps dessus dit jusques a maintenant.

Neantmoins le senechal de Toulouse qui est a present et aucuns autres ses commissaires se pourforcent de nouvel a molester le dit suppliant en disant que, combien que la rebellion et ban dessus dit li soient remis et quité, lesdits mesfais ne luy sont mie quitté ne remis en son grand prejudice et dommage, et comme le dit suppliant ne fu en riens acusés ne souspeçonés des autres [fol. 190] fais, si comme il appert par la dite grace, pour ce supplie humblement que en consideration au grant temps passé et aux bons services que il vous a fais depuis en vos guerres avec le devancier conte de Foix et fera tandis a son povoir, vuilliés mander au dit seneschal de Toulouse et a tous autres justiciers, commissaires et a leurs lieux tenans que, se veüe la dite grace leur appert que il soit ainsi, ne molestent ni ne travaillent le dit suppliant pour les fais dessus dits, ni acheison d'iceux en aucune maniere ; ni ne souffrent estre molesté par vostre procureur auquel vuilliés sur ce imposer perpetuel silence, et rapellent tout ce qui auroit esté fait au contraire, les quelles choses li vuilliés octroyer de grace especial et de certaine science.

Et au dessus est escrit : au senechal de Toulouse ou a son lieutenant. et plus bas La requeste civile de Gerart d'Aure, chevalier .

Extr et coll. .... au tresor des chartres ..... au chasteau de Foix en la caisse quarante quatriesme ..... Fait a Foix le vingt neufviesme fevrier mil six cens soixante huit.