[1]

Les tesmoins a l'abbé de S[aint Denis] contre le seigneur [de Clichi].

................. l'abbé et] le couvant de Saint Denis en France ......................... eglise contre le seigneur et la [dame de Clichy] ..................... par eus] et par leur genz sunt et ont esté [en saisine par tant de temps que il d]oit souffire a bonne saisine avoir acquise [ de justice, en cas de ] justice haute et basse en l'iaue de Saine du Blanc Port jusques au ru de Chambrit quant cas i est avenu. Non credit.

Item que il sont en sezine d'avoir l'espave pris en ladite eaue en quelqueconques lieu que elle s'escroisse ou estaire dedens les metes desusdites par quelconques main que il soit pris ou arrestez, quiconques la terre soit ou l'eritage ou il soit arresté. Non credit.

Item que le merrien dont contemps est fu arresté ou arresta de soi ou lieu dont la veue a esté faite durant la croissance de l'yaue desus dite. Non credit.

Item que il sont en sezine d'avoir l'espave qui arive de soi la ou lesdiz religieus sunt en saisine d'avoir tel joustice comme il apartient ou cas. Non credit.

Item que il sunt en saisine d'avoir tel joustice ou lieu dont veue a esté faite comme appartient au cas qui est dit desus. Non credit.

Item que se aucune foiz aucuns se sont efforciez de prendre ou de justicier en ladite eaue dedens les metes desus dites ou en la terre dont veue a esté faite, lesdiz religieus par eus ou par leur genz sunt en sesine d'estre resesi par vous au lieu Non credit.

Item dit le procureur desusdit, a conforter leur entention su la sesine, que a eus apartient toute justice en ladite eaue durant les motes desusdites par don de roy seellé et confermé de leur saainc. Non credit.

Item que des choses desusdites est commune renomnee ou païs ou environ. Non credit.

Item que le seigneur et la dame de Clichi ou leur commandement, en troublant et en empeeschant la sesine desdiz religieus, ont arresté ou fet arrester le merrien dont contemps est et dont veue a esté faite. Non credit.

Et des choses dessusdites offre ledit procureeur a prouver ce que souffire li pourra et devra ou non desusdit en son entention fonder et sauver, a ceste fin que trouble et l'empeeschement que le seigneur et ladite dame ont mis es choses desusdites soit par vous osté, si que lesdiz religieus puissent lever paisiblement les choses desusdites et joïr et esploitier paisiblement de leur saisine et nient le fait a la partie adverse en tant comme il est contraire au sien.

Enqueste faite l'an de grace mil.CC.IIII^xx. et dis et huit, le dymanche devant la Tyffaine, par Thibaut de Senliz, appelé o lui Martin Toustain, notoire du Chastelet de Paris, pour l'abbé et le couvent de Saint Denys contre la dame de Clichi et contre le seingneur.

I. Jehan Gallien, de l'aage de 50 anz ou environ, hoste le cuisinier de Saint Denis, demourant ou port de Nulli...

... Dit que l'abbé et le couvent sont en bonne sesine etc [2^o peau] des Blanc Port en aval jusques au port d am pec. par ce le set que des ce que il n'avoit que 8 anz en ença jusques a ore, il a esté peescheur en la riviere de Saine et encore l'est, et dit que puis le temps desusdit en ença il et autres peescheeurs de la ville dunport de Milli ont arrivé pluseurs merreins qui noient devers Paris et l'ont mis a terre aussi comme il et ses autres compaignons de celui dont contemps est ont fait et dont veue a esté faite, et dit quant il avoient mis a terre le cuisinier de Saint Denis ou le coumandeeur ou leur genz en fesoient porter le merrien a Saint Denys ou il le vendoient ou donnoient ou fesoient leur volenté, et donnoient a lui qui parle et a ses compaignons pour ce que il l'avoient mis a terre leur vin. Et dit que il a veu aucune foiz que aucun suioit le merrien que il estoit siens et il le prouvast par devant le coumandeeur ou par devant leur genz, que il le rendoient.

Requis se il set des nons de ceuz qu'il a veu suivre le merrien ne a qui il a esté rendu, dit que il n'en est recort.

Requis par quantes foiz il a veu prendre tel merrien, dit par vint foiz et plus, si comme il li semble.

Requis des nons des compaignons qui li ont aidié a tel merrien meitre a terre, dit il qui parle Henri Le Picart, Henri Dinart, Bertaut Breval et pluseurs autres. Et dit ... que, puis vint anz en ença, que il a veu par pluseurs foiz meslees qui ont esté faites au bac par lequel l'en passe au port de Nulluy, de clers et d'autres genz, et pluseurs personnes dont il ne se recorde des nons. Et dit ... que il a parlé amené et aidié a mener ces manieres de genz par 6 foiz ou par plus avecques Jehan le Pontonnier et avecques pluseurs autres a Saint Denys en prison. Ce ne set il conment il estoient delivrez de prison et dit que environ 12 anz, si comme il semble, il vit 1 batel depecié en la court mons. Gauchier de Biaumont, mari de ladite dame de Clichi, que il avoit pris en l'yaue de Saine, si comme l'en disoit au travers des moulins de Clichi, et dit ... que il en vit grant plet entre le cuisinier Pierre qui lors estoit et le dit mons. Gauchier. En la parfin il vit que Robert a la Souche, serjant du Chastelet, si comme i li semble, fit resesir ledit cuisinier du batel, ou lieu ou il avoit esté pris, du commandement au prevost de Paris, si comme il disoit, et que le cuisinier avoit bien prouvé que il avoit la joustice de l'yaue ou le batel avoit esté pris.

Requis des presens a celle recesine faire et a ces paroles dire, dit ... ledit cuisinier, ledit Robert a la Souche et Pierre le Meire au seingneur de Clichi, qui fist ramener le batel ou il avoit esté pris, Pierre Baillif, Symon La Maresse et pluseurs autres bonnes genz de Clichi et du port de Nully.

Requis se le seigneur de Clichi et la dame et leur genz sorent ce es plez dont il a deposé desus, dit ... que il set bien que oïl, par ce le set que il a veü par pluseurs foiz que le sire de Clichi, ou temps que il vivoit, et la dame puis sa mort et leur genz ont mis contemps es fus qui ont esté arrivez au port de Nully et a Clichi qui ont esté mis de l'yaue a terre, mes il ne vit onques ne ne sot ne n'oï que il en eussent nul, mes touz jours en ont pledié et encor en pledent.

Requis se la gent le roy sorent cest esploit que riens ne set autres chose que il a dit desus.

... Autre chose n'en set.

[3^o peau]... Dit que il vit bien arrester le merrien dont contemps est et veue a esté, s'arresta par soi de la creüe de l'yaue partie, et les autres pieces il qui parle et Henri Le Picart et Jehan Dore mistrent a terre...

... Autre chose n'en set.

... Dit ... que il a veu par pluseurs foiz merrien arresté ou lieu ou le merrien estoit dont contemps est, qui estoit venus en la creüe de l'yaue ou avoit esté mise a terre par force de gent, que les cuisiniers de Saint Denis ou leur gent les fesoient meitre en l'yaue et mener a Saint Denis. Ce ne set il qu'il en fesoient.

Requis des nons de ceus a qui il a veu mener cel merrien et par quantes foiz, dit a Jehan de Breval, à Martin Dinart et a Richart Le Rous et a pluseurs autres dont il n'est recort des nons a present ; des foiz dit par 3 fois ou par 4, si conme i li semble...

... Dit ... que il croit bien que se aucuns s'est efforcié de prendre ou de justicier aucun cas qui sunt avenus en l'yaue, que lesdiz religieus en ont esté recesis. Par ce le croit que il a dit au premerain article, et que, puis 2 anz a, il vit que Taupin, forestier de Saint Cloout pour le roy, avoit sui un batel qui estoit eschapé de Saint Cloout et l'avoit fet trere a terre devant la meson a la suer a l'abbé de Saint Denys. Et vit que 2 serjans de Chastelet, dont il ne set les nons, vindrent au port de Nully, la ou le batel estoit a terre, et conmanderent a Thaupin, de par le prevost de Paris, que il resesisist arrieres le cuisinier du batel et vit que le dit Taupin recesi le lieu du batel et le fist bouter a son vallet en l'yaue et vit que le cuisinier qui ores est a present le rendi a un preudomme de Saint Cloout dont il ne set le non, qui suioit le batel pour sien.

Requis des presens a celle resesine faire, dit ... le dit cuisinier, ledit Taupin, lesdiz serjans, Henri Le Picart et pluseurs autres dont il n'est recort des nons...

... Dit ... que riens n'en set que d'oïr dire.

... Dit ... que il est bien conmune renommee au port de Nully et a Clichi et au païs d'environ des choses dont il a deposé desus.

... Dit que riens n'en set fors que d'oïr dire, mes il dit qu'il croit que se il l'ont fait arrester que il l'ont fet en troublant et en empeeschant la sesine desdiz religieus. Par ce le set que il a dit desus...

II. Pierre le Serreurier de Saint Denys, hoste l'abbé de Saint Denys, de 50 anz d'aage ou environ...

[4^o peau] Dit ... que il croit bien que lesdiz religieus sont en sesine d'avoir l'espave et la prise de ladite yaue en quiconques lieu que elle s'escroisse estendent dedens les metes desusdites. Par ce le croit que, environ 2 anz a, quant les granz yaues furent, le cuisinier qui ores est a present envoia il qui parle au port de Nully et a Clichi et par la riviere pour fere trere le merrien a terre et toutes choses qui venoient a val l'yaue, et dit ... que il avoit bien le jour 7 bateaus, 9 bateaus, 5 batiaus, 3 bateaus ainsi comme il les povait avoir et 15, 14, 16, et fesoit ariver le merrien qui venoit aval l'eaue, fust en la terre le roy ou en la terre a la dame de Clichi, fust en la terre a la dame du port de Nully, fust en la terre a la chambellengne, fust en quelque terre que ce fust, fust du Blant Port jusques a Saint Denys. Et dit ... que il paroit les ouvriers qui amenoient cel merrien des deniers au cuisinier de Saint Denys et fesoit leur despenz. Et dit ... que il fist ariver le merrien dont contemps est ou lieu ou il est a present, ou la greigneur partie, et croit que il i ait aucune piece qui s'aresta de soy.

Requis quant il l'avoit arresté ou fet arrester en la terre a la dame de Clichi ou en autre se elle en fesoit point porter, dit ... que Pierre Le Munier, maire a la dame de Clichi et 2 homes dont il n'est recort des nons emportoient une piece de merrien en leur cous, que il avoient pris ou lieu dont contemps est, et il qui parle leur rescoust le merrien et leur fist lessier et les mena devant le cuisinier qui estoit au port de Nully, chiez le chantre, et dit que il vit que il l'amenderent audit cuisinier. Ce ne set se il en paierent onques amende.

Requis des presens a celle amende fere, dit il qui parle, lesdites personnes et Rogier de Saint Denys et pluseurs autres genz dont il n'est recort des nons.

Requis se la dame de Clichi set cele amende, dit que riens n'en set.

Requis se il sot onques se la dame de Clichi ne sa gent emportast ne feïst emporter du merrien que il avoit fet arriver en la terre de ladite dame ne en sa joustice, dit ... que il a bien oï dire que elle en fist bien emporter, mes il n'en savoit riens, ne il ne set se le cuisinier ne sa gent en savoit riens...

... Dit ... que il croit bien que partie du merrien s'aresta de soi. Par ce le croit que il a dit desus...

... Dit ... que il n'en set autre chose que il a dit desus.

Requis se la gent le roy et la dame de Clichi ou leur genz sorent ces esploiz dit ... que il le porent bien savoir car il le fesoit a veue et a seue [5^o peau] de bonne gent...

III. Henri Le Picart, hoste la dame du port de Nully, de l'aage de 50 anz ou environ...

... Dit ... que il croit celui estre vrai. Par ce le croit que puis 45 anz ou ença il ... a demouré au port de Nully sus Saine et a veü pluseurs foiz que le conmandeeur et le cuisinier de Saint Denys en France ou leur genz ont arresté ou fet arrester et trez hors de l'yaue et mis a terre, des du Blanc Port jusques au port de Chambrit, le merrien qui est venus aval l'yaue. Et dit que par pluseurs foiz, quant aucuns marcheanz suioient et fesoient a leur les diz merriens ou vins et il les requeroient au cuisinier ou conmandeeur ou a leur genz par paiant les cous quant il les fesoient pour leur, que il leur rendoit.

Requis des nons de ceus que il a veut ainsi requerre le vin et les merriens et rendre, et a qui il estoit rendu dit : le baillif l'evesque de Paris, et au mestre de Saint Ladre et a pluseurs autres... Et dit que environ 20 anz a, si conme i li semble, 50 cuirs de cerf ou environ, si conme il li semble, vindrent a Paris aval Seine, liez d'une corde, atachiez a une pierre perchie, pour l'yaue qui estoit creue. Et dit ... que il les mena par yaue a Saint Denys de l'Estree entre lui et Jehan Laloe ou le cuisinier Pierre qui lors estoit, mainjoit, estoit a disner, et dit que il ... le vit, aprez ce 7 jours ou 8, si conme i li semble, il vit venir un bourgois de Paris a l'Estree Saint Denys, ou il ... estoit alez du conmandement au cuisinier pour savoir ou il avoient pris ces cuirs. Et dit que il li dist que il les avoit pris devant la meson Jehan le Flamenc, bourgois de Paris, au port de Nully, laquele est a present a la suer l'abbé de Saint Denys. Et dit que il vit que ledit cuisinier rendi les cuirs audit bourgois et il qui parle et Jehan Laloe en ot 5 s.p. pour leur paine.

Requis des presens a ces cuirs rendre, dit il qui parle, Jehan Laloe, le cuisinier, le prieur de l'Estree et pluseurs autres ... et dit ledit bourgois dont il ne set le non.

Et dit que, environ 2 anz a, un pourcel fu trouvé noié au port de Nully, qui estoit venus avant l'yaue, que Raoul du Chastelier, peescheur, trest hors de l'yaue, si comme il a oï dire, et dit par son serement que le cuisinier le fist donner et departir audit Raoul pour ce que ome ne le suioit, et en ot il qui parle la teste, et ledit Raoul la moitié et l'autre departie parmi la ville, c'est a savoir a Raoul et a Jehannet le Bourgoignon et a pluseurs autres...

Et dit que, environ 16 anz a, si conme i li semble, il qui parle estoit pontonnier de Sorennes [6^o peau] pour le cuisinier, de qui il l'avoit acenssé, et dit que les genz de Sorennes et la mesniee du prieur de Sorennes, laquele prioré est de Saint Germain des Prez, depecierent le batel o qui il qui parle passe les bonnes genz, et dit que mestre Robert Le Cubevilluer qui lors estoit cuisinier, qui est aumosnier de Saint Denys a present, en fu plaintiz au prevost de Paris qui lors estoit, dont il ne se recorde du non. Et en vit grant plet entre le prieur et les genz de Sorennes d'une part et le cuisinier d'autre, et en la parfin il vit que 2 serjans du Chastelet dont il ne set les nons, qui conmanderent au prieur de Sorennes qu'il restablisissent le cuisinier et l'yaue du batel que ses genz avoient depecié. Et vit que ledit prieur recesi le dit cuisinier d'un batel que il acheta tout nuef 4 l. 10 s. si comme il l'oï dire, et le bouta en l'yaue de sa main.

Requis des presens a celle recesine fere, dit il qui parle, lesdiz serjanz du Chastelet ... ledit prieur, ledit cuisinier et plusieurs autres ...

Item il dit que, environ 14 ans a, si conme i li semble, un batel eschapa du port de Nully qui estoit Guillaume de Saint Bris, qui se feri ou travers des moulins de Clichi, si conme il oï dire. Et dit que mons. Gauchier de Biaumont, qui lors estoit sire de Clichi, le fist prendre et porter en sa court a Clichi, et la il qui parle le vit, que il estoit par pieces. Et dit que grant plet en fu entre le seigneur de Clichi d'une part et mons. Robert de Tubevillier, lors queu de Saint Denys d'autre, qui suioit ledit batel pour son hoste et qui disoit que la joustice de l'yaue en apartenoit a lui, si conme il qui parle oï par pluseurs foiz. Et dit que en la parfin il vit que Robert a la Souche, serjant du Chastelet, vint a Clichi et vit et oï qu'il conmanda a monseigneur Gauchier de Biaumont, sire lors de Clichi, que il resesisist le suicinier du batel qui avoit esté pris entre les moulins. Et dit que ledit monseigneur Gauchier recesi ledit cuisinier du batel, et le bouta en l'iaue par 2 foiz.

Requis des presens a celle recesine fere, dit il qui parle et pluseurs du port de Nully que ledit cuisinier i fist mener, et ledit mons. Gaucher, ledit cuisinier, ledit serjant et pluseurs autres ...

Item il vit, environ 2 anz a, il vit venir 11 tonniaus de vin qui estoient afondrez au Louvre a Paris, si comme l'en disoit, qui vindrent jusques au port de Nully flotant, qui estoient a marcheanz de Compigne dont il ne set les nons. Et dit il qui parle et Richart de Couroncie et Johannot Aillon et pluseurs autres peecheeurs ou port de Nully mistrent a terre les vins au port de Nully, c'est a savoir devant la maison a la dame et chiez Guillaume de Saint Bris. Et dit que il vit venir les marcheanz a qui les vins estoient ... au port de Nully par devant le cuisinier de Saint Denis. Et dit que lesdiz marcheanz firent les vins pour leur et le cuisinier leur delivra er conmanda que il les enmenassent. Dit ... que il qui parle et ses compaignons en orent 20 s.p. des marcheanz par le conmandement du cuisinier pour leur paine.

Requis des presens a ces vins delivrer, dit il qui parle, ledit cuisinier, lesdiz marcheanz, Guillaume de [7^o peau] Saint Bris chiez qui partie des vins estoit et pluseurs autres. bonnes genz de la ville.

Item il dit que, environ 4 anz a, si conme il li semble, un bourgois de Compigne dont il n'est recort du non vint au port de Nully, dit a lui qui parle que il avoit perdu un tonnel de vin qui s'en aloit aval l'eaue et li pria par amour que il alast apres aval l'eaue, et il li donrroit volontiers son vin, et il qui parle ala et trouva le tonnel de vin endroit Espineul, que la gent su seigneur de Mommorency avoient tret hors de l'yaue et le firent meitre en une meson et il qui parle le garda 4 jours, du conmandement l'abbé de Saint Denis ou de sa gent, et dit que quant il vint au chief de 5 jours la gent de Montmorency en vouloient fere mener le tonnel de vin a Montmorency mal gré sien et contre la volenté de il qui parle, et il qui parle vint a Saint Denys pour querre le cuisinier, et quant il fu en mie voie de Saint Denys il encontra le cuisinier et le souz prieur qui menoient avecques eus un serjant de Chastelet dont il ne set le non, qui aloient a Espineul pour faire delivrer le vin au marcheant, et il qui parle leur dit que la gent au seigneur de Montmorenci en vouloient mener le vin mal gré sien, et dit que lors il vit que le cuisinier et ledit serjant coururent quant que il poürent a Espineul, et il qui parle vint tout belement aprez, et quant il vint la il trouva que le serjant avoit resesi le cuisinier dudit vin, si comme il disoit, et dit il qui parle que il aida a chargier le vin au bourgois en sa nef quant le cuisinier li ot delivré et en ot il qui parle 6 s.p. et ses despenz.

Requis des presens a ces choses fere dit il qui parle, ledit serjant, ledit cuisinier, la gent au seigneur de Montmorency dont il ne set les nons, ledit bourgois et pluseurs autres ...

... Dit que il croit celui estre vrai ; par ce le croit que il a deposé desus .. et par ce, puis le temps dont il a deposé en ença, il qui parle et pluseurs peescheeurs de la ville du port de Nully ont pris et arresté pluseurs merriens et par pluseurs foiz, qui aloient aval l'eaue, quant elle estoit creüe, en la terre a la dame de Clichi et en la terre la dame du port de Nully, et en la terre a la chambellengne, en la terre Saint Germain des Prez et a Sorennes et ailleurs, du conmandement aus cuisiniers de Saint Denys ou de leur genz ; et quant il avoient arresté ledit merrien et il n'avoit suite il a veu par pluseurs foiz que les cuisiniers ou leur genz les en ont fet mener a Saint Denys ou vendre ou donner ou fere leur volenté.

Requis des nons de ceus a qui il a veü fere ces esplois, dit a mons. Robert Tubevillier, qui lors estoit cuisinier et a sa gent, au conmandeeur a sa gent ou temps que il fu cuisinier, a mons. Pierre d'Estampes qui cuisinier [8^o peau] estoit et au cuisinier qui ores est et a sa gent et pluseurs autres cuisiniers dont il n'est recort des nons...

... Dit ... que il ne set pas que il s'arrestast de soi, ainz dit que lui et Richart de Creci et Bertaut Brieval le mistrent au lieu ou il est par la creüe de l'yaue...

... Dit ... que il croit bien que lesdiz religieus en sont en saisine ; par ce le croit que il a dit ou premerain article, autre chose ne set de l'art.

... Dit que il croit celui estre vrai ; par ce le croit que environ 7 anz a il qui parle mist un gouvernail ou lieu dont contemps, qui venoit aval l'eaue, et dit que mons. Symon de Sorviller, qui lors estoit cuisinier de Saint Denis, en fist mener le gouvernail a Saint Denys par Guillaume Hasle et par P. de la Villete, peescheeur de Saint Denys. Ce ne set il que le cuisinier fist du gouvernail. Et dit que environ 3 anz, si conme i li semble, que Jehan Galyeh trouva un buef qui estoit venu d'espave pres du lieu contencieus ou le merrien est, si conme il oï dire audit Galyen, et dit que il vit que Renaut, serjant l'abbé de Saint Denys en mena ledit buef a Saint Denys au conmandeeur, et oï dire que le conmandeeur l'avoit rendu a un marcheant qui le suioit pour sien. Ce ne set il le delivra. Autre cas ne vit onques avenir ou lieu dont contemps est ...

... Dit ... que il croit celui estre vrai. Par ce le croit que il a dit au premerain article. Autre recesine ne vit onques ne ne sot que le prevost de Paris ne sa gent feissent onques...

... Dit ... que riens n'en set fors d'oïr dire...

... Dit ... que il est conmune renonmee au port de Nully, a Clichi et aus lieus d'environ se ce dont il a deposé desus.

... Dit ... que il vit bien Adenot du Puis, serjant a ladite dame de Clichi, qui arresta ledit merrien dont contemps est et dont veue a esté faite.

Requis se il set que ce fust en troublant et en empeeschant la sesine desdiz religieus, dit que il croit bien que oïl. Par ce le croit que il a veu que les cuisiniers et leur genz ont fait les esplois au lieu dont contemps est et dont veüe a esté faite et dont il a deposé desus.

Requis se il set se la dame de Clichi ne le seigneur ne leur genz ne la gent le roy sorent ces esplois dont il a deposé desus, dit que il le poürent savoir se il voudrent ; par ce le set que les cas ont esté fait a veü et a seü de touz...

IV. Jehan de Poissy, demourant au port de Nully, hoste le chantre de Saint Denys, de l'aage de 40 anz ou environ...

... Dit ... que il croit celui estre vrai. Par ce le croit que des le temps que il se sot connoistre en ença il a demouré au port de Nully jusques a ores et di que il a oï dire au pere de lui qui parle et aus anciens que la joustice au cuisinier de Saint Denys qu'il a en l'yaue au port de Nully dure du Blanc Port qui est delez Saint Cloout jusques au ru de Chamblie qui est au desous de Chalevanne, et dit que en cel yaue il a veü ainsi esploitier ledit cuisinier ou sa gent ou non de ladite eglise.

Requis quiex esplois il a veü faire audit cuisinier et a sa gent, dit ... que il a bien 20 anz en ença que il est peescheeur en yaue avecques Richart Gaubert pere de lui qui parle et par celui temps il a veü ariver et avaler aval l'yaue pluseurs merriens et pluseurs tonneaus de vin et pluseurs honmes mors es lieus dont contemps est et aillieurs. Et dit que le cuisinier et sa gent les arrivoient a terre et les menoient a Saint Denys ou fesoient leur volenté.

Requis quex merians an aloient einsi, dit que, environ le temps desus sit, il vit premierement chevrons ariver et 4 tonniaus de vin qui furent mis en garde de par ledit cuisinier ou par sa gent chiez dame Heloys au port de Nully pour savoir se nul les suivroit et en aprez il furent boutez en l'yaue et menez a Saint Denys si comme il qui parle vit.

Requis qui les i mena, dit Henri le Picart et pluseurs autres peescheeurs du port de Nully dont il n'est recort des nons. Ce ne set il que mons. Symon de Sorvillers qui lors estoit cuisinier en fist ne se il orent point de suite.

Requis se la gent au seingneur de Clichi ne le seigneur sorent ces esploiz dit que il le poürent bien savoir car il furent bien 8 jours en la meson ou il demande sa joustice.

Et dit, environ 12 anz a, il qui parle et Pierre Goujon estoient chiez dame Heloys au port de Nully ou le seigneur de Clichi demande sa joustice et bevoient ensemble et s'entrebatirent et firent sanc, et dit que Guillaume de Saint Bris qui estoit fiuz a ladite Heloys prist lui qui parle et son compaignon et les mena en prison chiez la chambellengne et i jurent une nuit, et lendemain les serjans de Saint Denis les vindrent querre et les enmenerent a Saint Denis en un batel et furent mis en prison en la porte Compoise et en aprez il furent delivrez par pleiges [10^o peau] et se soufrirent ceus de Saint Denys.

Requis se la gent au seigneur de Clichi sorent ces esplez, dit que oïl. Par ce le set que la gent au seigneur de Clichi vindrent a la meson a la chambellengne pour eus prendre se il les eussent trouvez, si conme l'en dist a lui qui parle et a son compaignon.

Et dit que aucun de l'yaue derrainement, environ 2 anz a, il qui parle, Guillaume de La Mote, H. Dinart, Le Picart et pluseurs peescheeurs arriverent pluseurs meriens en la terre au seingneur de Clichi et es lieus dont contemps est, qu'il menerent, du conmandement du cuisinier, a Asnieres en la meson de Saint Denys.

Requis se la gent su seigneur de Clichi le sorent, dit que il le poürent bien savoir car il le fesoient au veü et au seü de chascun qui veoir le vouloit.

Requis se il i mistrent onques debat, dit que non que il veïst ne que il seüst...

... Dit que il croit celui estre vrai. Par ce le croit par ce que il a deposé au premerain article...

... Dit ... que ilui semble que partie du merrien dont contemps est s'aresta de soi et partie il qui parle et ses autres compaignons arriverent...

... Dit ... que riens n'en set ... car il ne vit onques que l'en feïst onques nulle recesine a ceus de Saint Denys ne il ne set riens du don le roy.

... Dit ... que il est bien conmune renonmee au port de Nully et contreval l'yaue des choses dont il a deposé desus et que l'eglise de Saint Denys a sa joustice en la manere que il deposé desus.

... Dit ... que se le seingneur et la dame de Clichi ont fait arrester le merrien dont contemps est, que il l'ont fait en troublant et en empeeschant la sesine desdiz religieus...

V. Richart de Crocy qui demeure au port de Nully, hoste le chantre de Saint Denys, de l'aage de 51 anz ou environ...

... Dit ... que il ... a esté bien peescheeur 30 anz ou port de Nully et a touz jours oï dire aus anciens que la justice de l'yaue est au cuisinier de Saint Denis des le Blanc Port delez Saint Cloout jusques au port de Chambere qui est au desous de Chalevanne et que toutes les espaves et justices qui sunt venues aval l'eaue ont esté au cuisinier de Saint Denis, qui que ait esté cuisinier.

Requis quelles espaves et queles joustices il a veu venir dit que il y a pluseurs foiz veu venir merrien aval l'yaue, que il qui parle traeit a terre, que le cuisinier avoit et en fesoit ce qu'il vouloit, et dit que quant aucun le suioit et fesoit pour sien par devant ledit cuisinier ou sa gent, il le ravoit, si conme il a oï dire, car il n'i fu onques.

Requis se il en vit onques point [11^o peau] arrester en la terre au seigneur de Clichy que Saint Denis eüst, dit ... que non, mes quant les pons de Paris rompirent ; il qui parle et pluseurs autres peescheeurs du port de Nully trestrent a terre pluseurs merrians ou lieu dont contemps est par le conmandement du cuisinier et de ses serjans, present a ce fere ledit cuisinier. Et quant il le orent pres de tout atrait, lors vindrent les serjans au seigneur de Clichi qui l'arresterent.

Requis des nons de ses compaignons qui li aidierent a meitre a terre ces merrians, dit Robert Aude, Guillaume de la Mote, Jehan Galien, Robert Doré, Jehan Dore, Jehan Aloe, Jehan le Bourgoignon, Niclol le Fournier, Henri Dinart, Jehan Le Roy, J. Cent Livres, J. de Poissi, Raoul Le Chastelier, Raoul Le Passeur, Guillaume de La Mote (sic) et Beneeton son fiuz, Richart Le Normant et autres peescheeurs ... du port de Nully.

Et dit que, environ 8 anz a, si comme il li semble il qui parle et pluseurs autres de ses compaignons peescheeurs traistent a terre un home noié qui estoit venus aval l'yaue jusques au port de Villers en la terre au seingneur de Clichi, qui est semblable condicion au lieu dont contemps est, et l'enfouirent du conmandement au cuisinier et en orent 12 d. du cuisinier.

Requis des nons de ses compaignons dit Jehan Galyen et autres peescheeurs...

Requis se le seingneur et la dame de Clichi sorent ces esplois, dit que il ne set se il le sorent onques, mes il le poürent bien savoir car il le fesoient a veü et au seü de chascun qui veoir le vouloit.

Et dit que environ 12 anz a, si comme il li semble, Jehan Galien et ses compaignons renfoïrent un autre homme noié qui estoit arrivé en la terre au seigneneur de Clichi au port de Courcelles, qui est de semblable condicion au lieu dont contemps est, par le conmandement au cuisinier qui lors estoit, et en orent 12 d. si comme il oï dire audit Jehan Galyen et a ses compaignons.

Requis conment ledit cuisinier avoit non, dit que il n'en est recort.

Et dit que, environ 3 anz a, si conme il li semble, il qui parle, Jehan Aloe, Jehan Galyen, le Picart et touz autres peescheeurs du port de Nully peeschierent en l'yaue 6 tonniaus de vin qui venoient flotant aval l'yaue, qui estoient issus d'une nef qui estoit depeciee et les mistrent a terre en la meson a la chambellengne qui est en la terre au sire de Clichi et furent illeucques bien par l'espace de 15 jours et au chief de 15 jours, il vit que le cuisinier qui maintenant est fist charchier lesdiz tonneaus de vin, et mener en un batel a Saint Denys. Et oï que les marcheanz alerent a Saint Denys pour fere les vins leurs ; ce ne set il que il en fu fait.

Requis se le seingneur de Clichi ne la dame ne leur genz sorent ces esplois dit que il le porent bien savoir se il voudrent, car les tonniaus de vin furent bien devant la meson a la chambellengne par le temps desusdit...

... Dit que il croit celui estre vrai par ce que il a dit ou premerain art.

... Dit ... que par-[12^o peai]-tie s'en arresta de soi si conme i lui semble et partie en astrestrent lui et ses compaignons du conmandement au cuisinier.

... N'en set autre chose que il a dit desus...

... Dit que, environ 4 anz a, si conme i lui semble ; il vit le batel Jehan Petit, peescheeur du port de Nully, sur terre, que Thaupin, forestier le roy de Saint Cloout, avoit fait trere a terre, si comme l'en disoit, pour ce que ledit Jehan avoit esté es bois de Saint Cloout et dit que pour ce ledit Jehan s'en ala plaindre au cuisinier, si conme il oï dire. Et dit que il oï dire que le cuisinier fist adjourner ledit Thaupin au Chastelet par devant le prevost de Paris et oï dire que il fu conmandé audit Thaupin que il venist recesir l'yaue audit cuisinier dudit batel, et vit que ledit Thaupin vint au port de Nully et recesi l'yaue.

Requis des presens, dit lui qui parle, ledit cuisinier et ledit Taupin et pluseurs autres bonnes genz du port de Nully...

... Dit que riens n'en set, ne que il n'en vit onques leitres que li diz religieus eüssent.

... Dit ... que il est bien conmune renommee au port de Nully et environ que lesdiz religieus sunt bien en sesine d'avoir tele joustice conme il a dit desus.

... Dit ... que rien n'en set.

VI. Guillaume de La Mote, demourant au port de Nully, hostes au chantre de Saint Denys, de l'aage de 70 anz ou environ...

... Dit que il qui parle a bien esté peescheeur en l'yaue au port de Nully environ 50 anz et a touz jours bien oï dire aus anciens que la joustice de l'yaue est au cuisinier de Saint Denys des le Blanc Port de Saint Cloout jusques au port de Chambere qui est au desous de Chalevanne et que toutes les espaves et les joustices qui sunt venues aval l'yaue ont esté au cuisinier de Saint Denys, qui que ait esté cuisinier.

Requis queles espaves et queles joustices il a veu avenir, dit ... que il a veu par pluseurs foiz pluseurs merriens avaler aval l'yaue, et il ... en atret assez a terre que le cuisinier avoit, et en fesoit sa volenté, et quant aucun le fesoit pour sien par devant ledit cuisinier, ledit cuisinier le rendoit.

Requis se il en vit onques point arrester en la terre au sire de Clichi [13^o peau] ne arriver quant les grans yaues estoient, que non, fors puis que les pons de Paris chaürent, qu'il aida a arriver le merrien dont contemps est ; autre espave ne autre joustice ne vit onques que la gent a l'abbé de Saint Denys feissent en la terre au seigneur de Clichi ne autre chose...

... Dit que rien n'en set fors ce que il a dit desus ou premerain article.

... Dit que i lui semble que partie s'en arresta de soi et partie lui et ses autres compaignons peescheeurs en arriverent aveques et encore en y a ...

... Rien n'en set etc (cf. [2]).

... Dit ... que environ 16 anz a, si comme i lui semble le seigneur de Clichi en fist emporter un batel qui estoit arrivé par pieces et noees entre les yaues de Clichi et Sainne, si comme l'en disoit, et en aprés il vit que mons. Gauchier de Biaumont, qui lors estoit seigneur en recesi le lieu et le cuisinier d'une buche, mons. Robert Tuebeuf qui lors estoit cuisinier.

Requis des presens a celle resesine fere, dit lui qui parle, Henri Dinart, le chastrier et pluseurs autres peescheeurs ... un serjant de Chastelet...

... Dit que il n'en vit onques leitres ne conformement que il en eüssent, mes il oï bien dire ans anciens que le roy Challes Martel donna l'yaue et tout ce qui estoit dedens aus religieus...

... Dit que il est conmune renonmee au port de Nully et environ...

... Dit que il croit bien que se il ont fait arrester ledit merrien, il l'ont fait en troublant et en empeschant la sesine desdiz religieus.

VII. Jehannot Ville, peescheeur demourant au port de Nully, hoste la dame du port de Nully, de l'aage de 24 anz ou environ...

... Dit que il a touz jours oï dire aus anciens que le cuisinier de Saint Denis ou non de l'eglise a sa joustice des le Blanc Port desous Saint Cloout jusques au port de Chambere et toutes les espaves en l'yaue.

Requis queles joustices et espaves il a veü avenir, dit ... que, environ 5 anz, a si comme i lui semble, il et Martin son frere et pluseurs autres ... arriverent 13 tonniaus de vin qui estoient venus aval l'yaue [14^o peau] d'une nef qui effondra au port de Saint Cloout, si comme l'en disoit, a la meson a la Chambellengne. Requis combien il furent iluecques, dit environ 15 jours. Et dit que aprez il vint un marcheant de Paris ... qui vint au cuisinier et lui requist a avoir les vins et les fist pour siens, et le cuisinier les rendi au marcheant. Requis comment le cuisinier avoit non, dit que il n'en est recort. Requis des nons de ceus qui estoient avecques lui quant les vins furent renduz au marcheant, dit lui qui parle, ledit cuisinier, ledit marcheant et pluseurs autres...

Et dit que environ 8 anz a, si comme il lui semble, il vit que deus homes mors furent arrivez a terre seiche en la terre au seigneur de Clichi de semblable condition au lieu dont contemps est, c'est a savoir l'un en cel temps et l'autre aprez 2 anz, si comme il lui semble, et dit que le cuisinier qui lors estoit, dont il ne sot le non, les fist enfouyr sus la riviere par lui qui parle et Jehan Galyen et par le Picart, et en orent 12 d. du cuisinier de chascun cors.

Requis ou il reçurent ces 12 d. de chascun cors, dit a la meson au cuisinier au port de Nully.

Requis se le seingneur de Clichi ne sa gent sorent ces esplois, dit que il n'en set riens.

Et dit quant les pons chaürent a Paris il et pluseurs autres peescheeurs arrivoient pluseurs pieces de merrien qui s'en venoient aval l'yaue, flotant la ou elle s'estendoit en la terre au seigneur de Clichi et ailleurs, et dit que il les arrivoient a terre et ou lieu dont contemps est, et apres il les menoit a Asnieres en la meson l'abbé de Saint Denis et a Saint Denys du conmandement du cuisinier.

Requis se le sire de Clichi ne sa gent sorent ces esploiz, dit que il n'en set riens, mes cf. supra.

... Dit que il croit celui estre vrai par ce que il a dit au precedent.

... Dit ... que il n'en set riens, mes lui qui parle et ses compaignons peescheeurs l'arriverent ou lieu ou il est assis et encor en y a.

... Autre chose n'en set fors ce que il a dit ou premerain.

... Dit ... que rien n'en set, ne que il n'en vit onques fere resesine ausdiz religieus ne il ne vit onques que les religieus eussent onques leitres de roy ne [15^o peau] confirmacion que il eüssent des choses dont il a deposé desus.

... Dit ... que il est conmune renonmee au port de Nully et es lieus d'environ.

... Dit ... que riens n'en set.

VIII. Jehan Goyer, hoste de Saint Denys, demourant au port de Nully, de l'aage de 50 anz ou environ...

... Dit ... que il a oï dire du temps que il se sot premier connoistre, a Girart de l'Espine et a Girart son frere, qui furent serjans de l'yaue pour le cuisinier bien par l'espace de 32 ans, que la justice au cuisinier de Saint Denys que il a dedens l'yaue dure du Blanc Port qui est prés de Saint Cloout jusques au ru de Chambli qui est au desous de Chalevanne. Et dist que puis le temps desus il a veu par pluseurs foiz, quant les eaues sont creües, venir merrien aval l'yaue, vins et personnes noiees que il qui parle et autres peescheeurs ont arrivé a terre es lieus ou il les trouvoient, en quelque joustice que ce fust, et en joïseoit le dit cuisinier pesiblement.

Et dit ... que bien a 20 anz il qui parle et serjanz de Saint Denys, c'est a savoir Symon Cornu et Pierre de la Vilete et Guillaume Vit d'Osier, arriverent merrien, c'est a savoir une poudre par la creüe des yaues seur la terre au seigneur de Clichi, et d'ilueques il amenerent a Saint Denys.

Requis se le seingneur de Clichi ne ses genz sorent que le merrien fust sus sa terre, et quant il en fu mené a Saint Denys, dit par son serement que oïl, et que il fu bien sus la terre audit seigneur par l'espace de 8 jours et que le seigneur ne mist onques debat quant il en fu enmené.

Et dit que, environ 25 anz a, cil qui parle aida a arriver un tonniau de vin qui venoit au desous de Clichi, en la terre au seingneur de Clichi, entre Clichi et Saint Ouen. Et dit que il qui parle et les persones desus dites menerent ledit tonniau de vin a Saint Denis en la meson au cuisinier en la rue de Seine. Et dit que il qui parle oï dire que messire Pierre d'Estampes, qui lors estoit cuisinier, et est maintenant chantre, rendi ledit tonniau au marcheant a qui il estoit.

Et dit ... que il qui parle, bien a 14 ans, et un sien frere trouverent un enfant mort et noié endroit le moulin de Clichi acoté a terre par la force de l'yaue, et l'enfouyrent en la terre de Clichi sane nul debat.

Requis se li sires de Clichi mist nul debat, dit que nennil car les moines de Saint Denys veulent que, en quelque lieu home noié soit en l'yaue en leur joustices que il soit enseveli ilueques, si comme il lui semble.

Et dit ... que il a bien 16 anz que une mellee fu faite en la terre au sire de Clichi entre celui qui parle et un home de Paris dont il ne set le non et i ot sanc ; si en fu mené l'ome de Paris a Saint Denis en prison a Gileviler et i fu 8 jours. Requis se le sire de Clichi i mist nul debat, dit ... que il n'i mist nul debat, si comme il croit.

[16^o peau] Et dit que il qui parle, Jean Galyen, Jehan Doré et Jehan Bille, ou temps que les yaues furent grans et les pons de Paris rompirent, arriverent merriens en la terre au sire de Clichi dont partie en fut amenee par eus a Anieres en la joustice de Saint Denis et partie en demoura ilueques...

... Dit ... que il croit celui estre vrai par ce que il a deposé ou premier article ...

... Dit ... que il qui parle et les persones desus dites, peescheeurs et compaignons de celui qui parle, arriverent partie du merrien dont contemps est au sire de Clichi par le conmandement du cuisinier de Saint Denys, et l'yaue en emena partie qui s'arresta ilueques de soi ou lieu dont contemps est ...

... Dit que il croit celui estre vrai...

... Dit ... que, environ 20 anz a, il vit que mons. Gauchier de Biaumont, qui lors estoit seigneur de Clichi, fist amener un batel de sa maison de Clichi, que il avoit fait prandre d'un peescheeur de Saint Oen, si conme l'en disoit au port de Clichi, et en fist recesir messire Pierre d'Estampes qui lors estoit cuisinier de Saint Denis. Requis des presens, dit ... que il qui parle, ledit messire Gauchier, messire Pierre d'Estampes ... et Robert a la Sooche, serjant de Paris, qui conmanda a faire ladite resesine audit cuisinier de par le prevost de Paris, si comme il lui semble, et pluseurs autres bonnes genz du port de Nully, de Clichi et du port Saint Denys et d'ailleurs.

Et dit ... que, bien 18 anz a que il vit que le devant dit mons. Gauchier restabli et recesi ledit cuisinier d'un batel que il avoit pris ou fait prendre, qui avoit esté venu d'espave, si conme l'en disoit. Requis des presens, dit que il qui parle, ledit messire Gauchier, messire Pierre d'Estampes qui lors estoit cuisinier ... et Robert a la Coche, serjant de Paris, qui conmanda a faire la recesine audit cuisinier de par le prevost de Paris ... et pluseurs autres bonnes genz du port de Nully, de Clichy et du port Saint Denys et d'ailleurs, et dit que il vit que ledit chevalier bouta li meïsmes le batel devant en l'yaue du don le roy et par leitre, mes il n'en vit onques leitre.

... Dit ... que il est bien conmune renonmee ou port de Nully, a Clichy, des choses que il a deposé par desus et que l'eglise Saint Denys a bien cele saisine de joustice conme il a dessus dit.

... Dit ... que il croit bien que li sires de Clichy ont fait arrester le merrien dont contemps est et dont veue est faite, que il l'ont fait en trou-[17^o peau]-blant et en empeeschant la joustice des religieus desus dit. Par ce le croit que il a desus dit...

IX. Robert Aude, demourant au port de Nully, hoste de Saint Denys, de l'aage de 26 anz ou environ...

... Dit ... que il a touz jours oï dire aus anciens que le cuisinier de Saint Denys a toute joustice en l'yaue, du Blanc Port qui est prés de Saint Cloout jusques au ru de Chambli qui est au desous de Chalevane, et dit ... que il qui parle et Richart de Crecy et le Picart et Henri Guynart prindrent pluseurs merriens, quant les pons de Paris rompirent, en la terre au seigneur de Clichy et ailleurs, si comme l'eaue s'estendoit, et l'amenoient au port de Nully par le conmandement au cuisinier et d'ilueques il le menoient a Asnieres en la meson de Saint Denys. Et dit que, environ 8 anz a, il vit un home noié qui estoit venu aval l'yaue et le fist enterrier sus la rive de l'yaue en la terre au seigneur de Clichy au port de Villers, et un autre, environ 4 anz a, au port de Corcelles et ne set par quel conmandement ce fu.

Et dit que, puis que les ponz de Paris rompirent, une nef enfondra entre Nully et Saint Cloout, qui portoit vin, et dit que il qui parle et Henrri Guynart empeeschierent 4 tonniaus et les arriverent et mistrent au port de Nully, chiez dame Helouys de Saint Brice, laquele est hostesse au sire et a la dame de Clichi. Et dit que le cuisinier qui ores est les en fist mener chiez la chambellengne et demourerent iluecques par l'espace de 8 jours, car pluseurs bonnes genz les i virent. Et dit que il vit que les marcheans a qui les vins estoient dont il ne set les nons, vindrent au cuisinier pour requerre les vins, et il leur rendi. Requis des presens, dit ... que il qui parle, le cuisinier qui ores est, Guillot Fourmage de Saint Denis et les marcheanz dont il ne set les nons et pluseurs autres bonnes genz du port de Nully...

... Dit que il croit celui estre vrai par ce que il deposa au precedent...

... Dit ... que riens n'en set.

... Dit ... que autre chose n'en set fors ce que il a dit ou premier article.

... Dit ... que riens n'en set.

... Dit ... que il est conmune renonmee au port de Nully et de Clichy que lesdiz religieus sunt bien en sesine d'avoir la justice, conme il a desus dit.

... Dit ... que il croit bien que se li sires et la dame ont fet arrester le merrien dont contemps est, que il l'ont fet en empeeschant la joustice desdiz religieus. Par ce le croit que il a dit desus.

X. Jehan Cent Livres, demourant au port de Nully, hoste de Saint Denys, de l'aage de 35 anz ou environ...

... Dit ... que du temps que il se sot premier connoistre, il a touz jours oï dire aus anciens que le cuisinier de Saint Denys a toute joustice en l'yaue de Blanc Port qui est pres de Saint Cloout, jusques au ru de Chambly qui est au desous de Chalevane.

Et dit que, environ 9 anz a, si comme i li semble, une nef rompi au port de Saint Cloout qui [18^o peau] amenoit vins et en arriva bien au desous du port de Nully environ 30 tonniaus et en aida a meitre a terre il qui parle, a son batel, 7 tonniaus, dont il qui parle en arriva 2 en la terre au sire de Clichy pres du lieu dont contemps est, et en aprez le cuisinier qui lors estoit, dont il ne set le non, en fist monter arrieres contremont l'yaue, penduz au bort d'un batel, et furent mis devant la meson Richart de Crecy en la rive oveques les autres tonniaus, et en ot il qui parle et ses compaignons de chascun tonniau que il arrivoient 12 d. par la main du cuisinier. Requis se le seigneur de Clichy le sot, dit que riens n'en set. Et dit que il vit que le marcheant a qui les vins estoient vint au cuisinier au port de Nully et fist les vins pour siens et le cuisinier les li rendi.

Et dit que, ou temps que il estoit petit enfant, il vit que Guillaume Le Fournier de Villers, peescheur, hostes a la dame de Nully, enfouy un home qui estoit venu aval l'yaue, noiez au port de Villers qui est en la terre au seigneur de Clichy. Et oï dire que le cuisinier donna 12 d. au dit Guillaume pour l'enfouyr.

Et dit que il vit que, quant les pons de Paris rompirent, il qui parle et pluseurs autres peescheeurs aidierent a ariver pluseurs meriens, pluseurs tonniaus de vin et pluseurs autres choses, du conmandement au cuisinier, au port de Nully, en la terre au seigneur de Clichy et en pluseurs autres lieus. Ce ne set il que il devindrent ne qui les ot.

... Dit que il croit celui estre vrai par ce qu'il a dit desus.

... Dit ... que riens n'en set, car il n'i en vit onques arrester fors celui dont contemps est.

... Dit ... que autre chose n'en set fors ce que il a dit ou premier article.

... Dit ... que riens n'en set.

... Dit ... que il est conmune renonmee au port de Nully et de Clichy que lesdiz religieus sont bien en sesine d'avoir la joustice...

... Dit ... que il croit bien que se li sires et la dame ont fet arrester le merrien dont contemps est, que il l'ont fet en empeeschant la sesine desdiz religieus. Par ce le croit que il a dit desus...

XI. Bertaut de Breval, demourant au port de Nully, hoste la dame du port de Nully, de l'aage de 30 anz ou environ...

... Dit ... que il a touz jours oï dire aus anciens, du temps que il se sot premier cognoistre, que le cuisinier de Saint Denis a toute joustice de Blanc Port qui est pres de Saint Cloout jusques au ru de Chambly qui est au desouz de Chalevanne.

Et dit ... que il qui parle et Erembourc sa mere, environ 20 anz a, si conme il lui semble, arriverent pluseurs merrians qui venoient aval l'yaue devant la meson celui qui parle en la terre au seigneur de Clichy ou lieu dont conntemps est et en la terre a la dame du port de Nully. Et vit il qui parle que ledit cuisinier en fist menez lesdiz merrien par l'yaue a Saint Denys. Requis se li sires de Clichy ou sa gent en savoit riens, dit [19^o peau] oïl bien, si conme il li semble. Requis se il i mist nul debat, dit que non, que il seüst.

Et dit ... que, environ 16 anz a, il qui parle, Jehan Calliou, Jehan Aillon aidierent a peeschier 12 tonniaus de vin qui estoient venus contreval l'eaue d'une nef qui estoit effondree vers Saint Cloout, si conme l'en disoit, et les arriverent en la terre au seigneur de Clichy, et furent mis de par le cuisinier en la meson a la Chambellengne. Et dit ... que il qui parle et les personnes desus dites orent dudit cuisinier pour leur salaire 10 s. Et dit ... que il vit que les marcheanz qui les vins estoient vindrent au cuisinier au port de Nully et requeroient lesdiz vins audit cuisinier, et fesoient les vins leurs, et que le cuisinier les leur delivra. Et dit que il qui parle et les personnes desus dites aidierent a chargier les vins ausdiz marcheanz dont il ne set les nons.

Et dit que, environ 8 anz a, si conme il li semble, il vit que Jehan Gallien et pluseurs autres peescheeurs arriverent un home mort noié en la terre au seigneur de Clichy pres du lieu dont contemps est. Et dit que Jehan Gallyen, du conmandement au cuisinier, l'enterra illueques et en ot 12 d. pour l'enfouir, du cuisinier. Requis des presens, dit que il qui parle, Jehan Gallien et pluseurs autres...

Et dit que 2 anz aprez un autre home fu trouvé noié en la terre au sires de Clichy asses pres dou lieu dont contemps est, et fu enterré du conmandement au cuisinier ileuques et en ot 12 d. pour l'enterrer. Requis se li sires de Clichy ne la dame le sorent, dit par son serement que il ne set se il en savoient riens, mes il dit que ce fu au veu et au seu de bonnes genz, si que li sires et la dame le povaient bien savoir se il vouloient.

Et dit que, environ 1 an a, si conme il li semble, il vit deus homes dont il ne set les nons ne dont il sunt, s'antremellerent et firent sanc et furent menez en prison a Saint Denys. Requis ou celle meslee fu faite, dit que ou bac du port de Nully...

... Dit ... que il croit celui estre [vrai] par ce que il a deposé ou premier article...

... Dit ... que il qui parle vit arrester du merrien ou lieu dont contemps est, arriver par soi encontre les arbres et que il qui parle et autres peescheeurs en arriverent partie, du conmandement au cuisinier, et encore en i a...

... Dit ... que il ne set autre chose que ce que il a dit ou premier article.

... Dit ... que il n'en vit onques faire resaisine ne ne vit confirmation de don de roy.

... Dit ... que il est bien conmune renonmee au port de Nully et environ que le cuisinier est bien en saisine de cele joustice...

... Dit ... que il croit que se le sires et la dame ont fet arrester le merrien dont contemps est, que il l'ont fait en troublant et en empeeschant la seignorie [20^o peau] desdiz religieus. Par ce le croit que il a dit desus...

XII. Jehan Aillot, demourant au port de Nully, hoste la Chambellane, de l'aage de 30 anz ou environ...

... Dit ... que il qui parle, puis le temps desus dit, a touz jours demouré au port de Nully et a touz jours oï dire aus anciens que la joustice de l'eaue est au cuisinier de Saint Denis, ou non de l'eglise, des le Blanc Port, delez Saint Cloout jusques au port de Chambli qui est au desous de Chalevanne, et toutes les espaves et les joustices qui sunt venues aval l'eaue ont esté au cuisinier de Saint Denis, quiconques soit cuisinier.

Requis queles espaves, queles joustices il a veü avenir, dit par son serement que il a veü par pluseurs foiz pluseurs merriaus venir aval l'eaue, que il qui parle et pluseurs autres peescheeurs ont tret a terre. Requis quelx merriens, et conbien il i a puis que ce fu :

Premierement il dit que, environ 12 anz a, si conme il li semble, il et ses compaignons arriverent et trairent a terre conme pieces de fust et gouvernaus de nez ou lieu dont contemps est et illueques environ.

Et dit que, environ 10 anz a, si conme il li semble, il et ses compaignons arriverent ou lieu dont contemps est et iluec environ, sept tonniaus de vin qui estoient eschapez d'une nef qui estoit depeciee au port de Saint Cloout si conme l'en disoit, du conmandement au cuisinier. Et dit que il furent illeuques bien environ 3 jours jusques a tant que 2 marcheanz dont il ne set les nons vindrent, qui firent les vins pour leur par devant le cuisinier, et le cuisinier les leur rendi et delivra. Requis du non du cuisinier, dit que mons. Estienne qui maintenant est conmandeur de Saint Denys. Requis des nons de ses compaignons qui li aidierent a meitre les vins a terre seiche, dit que il qui parle et Bertaut de Breval, Jehan Gallien et pluseurs dont il ne set les nons.

Requis se le seigneur et la dame de Clichi ne leur genz sorent ces esplois, dit que il le porent bien savoir se il voudrent car il le fesoient au veu et au seu de chascun.

Item environ 3 anz aprez il et ses compaignons arriverent ou lieu dont contemps est environ 12 tonniaus de vin qui estoient eschapez d'une nef qui estoit effondree a Paris, si conme l'en disoit, et furent ilueques bien par l'espace de 8 jours, et aprez ce deus marcheanz, dont il n'est recort des nons, vindrent a messire Geoffroy de Chevreuse, qui lors estoit cuisinier, et firent les vins pour leur, par leur seremenz et par les tesmoinz que il amenerent, dont il n'est recort des nons, et leur rendi les vins. Requis des nons de ses compaignons, dit Jehan Gallien et Petit de Villers et pluseurs autres.

Item il dit que, environ 5 anz a, si conme il li semble, il qui parle et ses compaignons arriverent ou lieu dont contemps est 14 tonniaus de vin qui estoient venus aval l'eaue d'une nef qui estoit depeciee a Saint Cloout, si conme l'en disoit, et les mitrent en la meson a la Chambellane en la terre au seigneur de Clichy, et la furent par l'espace de 15 jours. Et dit que il vit que 2 marcheanz de Picardie, dont il ne set les nons, ne quil il estoient, vindrent a mons. Estienne, qui lors estoit cuisinier et ores est conmandeeur de Saint Denis, et firent lesdiz vins pour lor par devant ledit cuisinier. Et dit que il vit et oï que ledit cuisinier leur rendi lesdiz vins, et en ot il qui parle, Jehan Galyen et les autres compaignons 25 s. pour leur salaire desdiz marcheanz par la main au cuisinier. Requis des presens, dit que il qui parle, le cuisinier, les marcheanz et Jehan Galyen et pluseurs autres bones genz du port de Nully.

Requis se li sires de Clichy et se la dame [21^o peau] le sorent, dit que bien le porent savoir, car ce fu au veü et au seü de assez de bonnes genz.

Et dit que puis 9 anz en ença, il a veü 3 mellees de sanc fet et de batre et de ferir en la meson dame Eslouis de Saint Brice, et vit que ceus qui fesoient les meslees furent menez en prison a Saint Denys et puis estoient delivrés par les genz de Saint Denys, ce ne set il conment. Requis des nons de ceus qui fesoient des mellees, dit Jehan de Puissy du port de Nully, Pierre Cogon de Saint Cloout, Rogier Mauquerel de Saint Cloout, Martin de Corcelles fiuz Engerran Petit de Villers ... Requis se le seigneur de Clichy ne ses genz le sorent, dit que bien le pourent savoir se il voudrent.

... Dit ... que il croit celui estre vrai par ce que il a deposé ou premier article...

... Dit ... que il n'en vit onques point arrester de soi...

... Dit ... que il croit ceus estre vrais par ce que il a deposé ou premier article...

... Dit ... que il ne vit ne ne sot onques que lesdiz religieus en fussent resaisis...

... Dit ... celui est vrai par ce que il a deposé desus.

... Dit ... que il est conmune renonmee au port de Nully et environ...

... Dit ... que se il ont fet arrester le merrien dont contemps est, il croit que il l'ont fet en troublant et en empeeschant la sesine desdiz religieus.

XIII. Pierre Gojon de Saint Cloout, hoste l'evesque de Paris, de l'aage de 50 anz ou environ...

... Dit que, environ an et demi a, si conme il li semble, un jour dont il n'est recort, il qui parle et Rogier Maquerel de Saint Cloout bevoient au port de Nully chiez dame Helouys de Saint Brice, et ainsi conme il bevoient Jehan de Poissy vint sur eus par derriere eus et feri lui qui parle derriere du poing sus le dos, et lors il qui parle se leva et ala audit Jehan ainsi conme il aloit a lui. Ledit Jehan de Poissi prist lui qui parle par la poitrine et li descira sa robe et sa coiffe et li fist sanc au visage, et Pierre Allout si prist par les cheveus lui qui parle, qui estoit de l'aide dudit Jehan, et lors il qui parle se deffendi au miex qu'il pot, et s'en issi hors dudit hostel en mi la voie, et lors la chambellagne vint a lui qui parle et audit Rogier et leur dist : Venez vous en en meson, je vous ferai recoustre voz robes qui sont toutes depeciees. Et lors il et ledit Rogier Maquerel alerent o li en sa meson, et quant il furent chiez la chambellengne, en l'ostel qui fu Raoul de Boissy, ladite chambellengne dist a lui qui parle et audit Rogier teles paroles : Je vous deffent de tel povair conme j'ai de par le chambellenc mons. que vous ne vous mouvez de ceenz tant que ne parle a noz mestres de Saint Denys. Et lors dist ledit Pierre et ledit Rogier : Avoy, dame, que voulez vous faire, vous nous aviez amené ceenz, et cuidoie que ce fust pour recoustre noz robes et vous nous detenez en prison, vous ne faites pas cor-[22^o peau]-toisie. Et fistrent tant vers la chambellane que il qui parle fu delivré jusques a lendemain et fu ledit Rogier son pleige et demoura Rogier leenz en prison, et quant ce vint a lendemain qu'il revint de Saint Cloout au port de Nully chiez la chambellengne pour querre ledit Rogier, ladite chambellengne lui dit que le cuisinier de Saint [Denis] l'avoit envoié querre et l'en avoit enmené en la prison de Saint Denis. Et lors il qui parle et ladite chambellengne le secont jour ensuiant alerent a Saint Denis et trouva que ledit Rogier estoit en la prison, si conme l'en dist. Et lors il qui parle pria le cuisinier qui ores est, dont il n'est recort du non, que il lui rendist ledit Rogier, et ledit cuisinier li rendi sanz amende et sanz autre chose. Et dit que ledit Rogier jut en prison a Saint Denis 2 nuis.

Requis des presens a celle mellee faire, dit il qui parle ledit Jehan de Poissy, ledit Rogier, Pierre Aillout et pluseurs autres dont il n'est recort des nons.

Requis des presens quant le cuisinier delivra ledit Rogier, dit il qui parle, ledit cuisinier, la chambellane, la fame Guillaume de La Mote et pluseurs autres.

Requis de l'eure et du jour, dit que il n'en est recort. Requis se il set se le seigneur de Clichy et sa gent sorent ces esplois, dit que il n'en set riens. Requis dou lieu dont contemps est et dont veüe a esté faite, dit ... que rien n'en set.

... Dit que rien n'en set.

... Dit ... que l'en set conmuneement au port de Nully les choses dont il a deposé desus.

... Dit ... que riens n'en set.

XIV. Rogier Le Maquerel, demourant a Saint Cloout en la rive, peescheeur, hoste l'evesque de Paris, de l'aage d'environ 60 anz...

... Dit ... que, environ 2 [23^o peau] anz a, si conme il li semble, il qui parle et Pierre Cojon et venoient de Saint Denys et tournerent a bouire chiez dame Helouis au port de Nully et illeques assez tost aprez Jehan de Poissi vint seur eus et feri du poing ledit Pierre avecques pluseurs autres dont il ne set les nons, qui errachoient audit Pierre les cheveus.

Requis des presens dit lui qui parle, ledit Pierre, ledit Jehan, ladite Helouys et Guillaume son fuiz, Guillaume de la Mote et pluseurs autres...

Et en aprez la chambellagne vint seur euls et prist ledit Pierre et ledit Jehan de Poissi au fet present et les mena au port de Nully en sa meson qui fu Raoul de Boissy, et en aprez ledit Rogier pleia cors pour cors ledit Pierre Gojon et demoura pour lui, et jut en la prison avecques ledit Jehan de Poissi et lendemain ledit Rogier et ledit Jehan furent mis en un batel et menez en la prison a Saint Denis, et jurent iluec une nuit sus la porte Ponpoise et lendemain, a la requeste de Johanne, fame dudit Rogier, qui plouroit devant les moines et crioit que lui qui parle fust delivré, le prevost des moines manda lui qui parle et ledit Jehan de Poissi par devant lui, et conta chascun sa reson et en aprez il delivra ledit Rogier et retint ledit Johan. Ce ne set il conment il fu delivrés.

Requis des presens a celle delivrance, dit lui qui parle, ledit Johan, ledit prevost, Symon Corun, Baudet le peescheeur et sa fame et pluseurs autres...

Requis des nons des batelliers qui les menerent en la prison de Saint Denis, dit Jehan Aloe et un sien compaignon batellier ... et un serjant de Saint Denis qui estoit englais, qui portoit une hache danoise.

Requis se li sires de Clichi ne sa gent sorent ces esplois, dit que oïl, car Pierre, le maire de Clichi vint chies la chambellane quant il i estoient en prison et dist ces paroles a la chambellane : Damoiselle, rendez nous ces mauffeteurs que vous tenez ceenz. Et elle respondi que il n'en merroit nul en une main ne en autre. Et lors li dist le maire : Il coustera plus que vos blez ne feront a soier. En on Dieu, fist elle, il coustera dont assez car il me cousteront assez d'argent. Et lors ledit Pierre s'en ala. Ce ne sot il qu'en fu puis fait...

Requis des presens a ce fere, dit lui qui parle, ladite chambellane et Pierre Aillont, serjant de celle chambellengne et pluseurs autres...

... Dit ... que il n'en set autre chose que il a dit desus fors que il est conmune renonmee au port de Nully, a Saint Cloout et environ de la meslee dont il a deposé desus.

XV. Garnier Dynart, demourant au port de Nuilly, hostes et justicables au chantre de Saint Denis en France, de l'aage de 56 anz ou environ...

... Dit ... qu'il set bien que l'abé et le couvent de Saint Denis et leur gent sunt [24^o peau] et ont esté en bonne saisine de jousticier en l'yaue, dés Blanc Port en ença jusques au port dampoit. Par ce le set que puis 40 anz en ença il qui parle a touz jours esté peescheeur en la riviere de Saine et encore l'est, si conme il dit. Et dit ... que puis le temps desus dit il qui parle et pluseurs autres compaignons peescheeurs arrivoient celui dont contemps est et dont veue a esté faite. Et dit ... quant il avoient arrivé et mis a terre, le cuisinier de Saint Denis ou le commandeeur ou leur genz en fesoient porter le merrien a Saint Denis et en fesoient leur volenté et donnoient a lui qui parle et a ses compaignons leur vin pour ce qu'il l'avoient arrivé et dit qu'il a veu aucune foiz, quant aucun suivoit le merrien, que il estoit siens, et il le prouvoit par devant leur genz, que il le rendoient.

Requis des nons de ceus que il a veu requerir le merrien, dit que il n'en est recort.

Requis des nons de ses compaignons qui li ont aidie a arriver ledit merrien, dit Henri Dinart, Nicholas Le Fournier, Gieffroy Sadouin, Guyart La loue, Guillaume de La Mote, Jehan Cent Livres, Jean Le Roy, Richart de Croci, Robert Aude, Jehan de Poissy et pluseurs autres...

Et dit ... que environ 30 anz a, si conme il li semble, un pourcel fu trouvé au port de Nully derrier la maison Raoul de Boissy ou lieu dont contemps est. Il vit que Raoul de Boissy, qui estoit serjant de Saint Denis, du conmandement des seigneurs de Saint Denis, si conme ledit Raoul le disoit, donna ledit pourciau pour Dieu et en aumosne pour ce qu'il ne venoit ame avant qui feïst ledit pourciau pour sien.

Item il dit que, puis le temps desus dit, il qui parle et ses compaignons ont arrivé pluseurs tonniaus de vin qui venoient devers Paris et devers Saint Cloout et mis a terre. Et dit quant il avoient arrivé les vins desus diz le cuisinier de Saint Denys ou la gent de Saint Denis fesoient mener lesdiz vins a Saint Denis et en fesoient leur volenté. Et dit que aucune foiz il a veü, quant aucun marcheant suivoit lesdiz vins ou il les prouvoit a siens par devant le cuisinier, que le cuisinier leur rendoit.

Requis des nons des compaignons a qui il a veu requerir les vins, dit que il n'en est recort.

Requis se il set se le seigneur ne la dame de Clichy ne leur gent sorent ces esplois de joustice dont il a deposé desus, dit que riens n'en set...

... Dit que il qui parle, Jehan Galyen et pluseurs de ses compaignons arresterent une partie du merrien dont contemps est ou lieu dont veue a esté faite, du conmandement au cuisinier de Saint Denys, et l'autre partie s'arresta de soi. Requis conment il sot qu'il s'aresta de soi, par ce le set qu'il l'i trouverent et virrent qu'il i arrivassent l'autre partie. Requis ou le lieu est ou le merrien est arresté dont contemps est, dit au port de Nully devant les molins et derrieres. Dit que l'un partie du merrien fut arrestez durant la croissance de l'yaue...

... Dit que il croit ceus estre vrais ; parcce le [25^o peau] croit que il a dit ou premier article.

... Dit ... que il n'en vit onques fere resaisine.

... Dit que croit bien que l'abé de Saint Denis et sa gent sunt en saisine d'avoir la joustice par les rivages desus diz entre les metes desus dites. Par ce le croit qu'il a dit desus, mes il dit qu'il n'en vit onques leitre seellé ne de roy ne d'autre.

... Dit ... que il est bien conmune renonmee aus lieus dont contemps est et dont veue a esté faite et environ des choses dont il a deposé desus...

... Dit que riens n'en set que d'oïr dire, mes il croit bien que se la dame ou le seigneur de Clichy ont fet arrester le merrien dont contemps est, qu'il l'ont fet en troublant et en empeeschant la saisine desdiz religieus. Par ce le croit qu'il a dit desus...

XVI. Henri Dynart, demourant au port de Nully, hostes et joustiçables la damoiselle du port de Nully, de l'aage de 50 anz ou environ...

... Dit ... qu'il set bien que l'abé et le convent de Saint Denis en France sont en saisine et ont esté de jousticier touz cas de joustice haute et bas en l'yaue de Saine dés le Blanc Port en ença jusques au port dau Poit, et d'avoir l'espave. Par ce le set que puis 30 anz en ança il qui parle a esté peescheeur en l'yaue de Saine, et est encore, si comme il dit. Et dit ... que puis le temps desus dit il qui parle et pluseurs autres compaignons peescheeurs du port de Nully ont arrivé pluseurs foiz merrien qui venoit devers Paris aval l'yaue ; et quant il l'avoient arrivé ledit cuisinier ou sa gent en fesoient porter le merrien a Saint Denis et en fesoient leur volenté paisiblement sanz debat de nulluy.

Et dit que aussi a il pluseurs foiz arrivé li et ses compaignons peescheurs du port de Nully pluseurs tonniaus de vin qui venoient aval l'eau et les arrivoient a terre, et quant il les avoient arrivez le cuisinier qui ores est et ses devanciers fesoient mener lesdiz vins a Saint Denis ; et dit quant aucun venoit qui vouloit fere lesdiz vins pour siens et il les prouvoit devant le cuisinier de Saint Denis, ou sa gent, ore aucun des vins, leur delivroit.

Requis des nons des personnes a qui il a veü requerir ce merrien et ce vin, dit ... que il n'en est recort, mes il disoient qu'il estoient de Paris. Et dit que, puis le temps desus dit, il qui parle et ses compaignons peescheeurs ont trouvé aucune foiz genz mors qui venoient aval l'yaue, et dit par son serement, quant il les avoient trouvez, qu'il les enfouaient entre le port de Nully et le port de Villers ou quel lieu la dame et le seigneur de Clichy dient qu'il ont justice, et dit qu'il a veu, quant aucun des noiez mors qu'il avoient trouvé avoient aucune chose sus eus, que le cuisinier de Saint Denis le prenoit ou fesoit prendre et vendre.

Requis des nons de ceus qui li aidierent a arriver le merrian desus dit, dit Richart Le Rous, Jehan Dynart, Martin Dinart et pluseurs autres... Et dit que par le temps desusdit, il qui parle et ses compaignons peescheeurs ont arrivé merrien et vin quant l'yaue cressoit [26^o peau]. Et dit ... que quant l'eaue estoit si grant qu'elle estoit issue hors, il arrivoient le merrien et le vin la ou il povaient plus tost trouver terre, fust en la terre au seigneur de Clichy ou en autre terre quele qu'elle fust, ne a qui qu'elle fust, et tantost le cuisinier fesoit mener a Saint Denis ce qu'il avoient arrivé et en fesoit sa volenté.

Requis des lieus ou il arrivoient ces espaces desus dites, dit que il les arrivoient au port de Nully, chiez la chambellane, 4 tonniaus de vin, et 4 tonniaus chiez Guillaume de Saint Brice, et par le cuisinier de Saint Denis.

Et dit ... que il vit marcheanz qui estoient de Paris, si conme il disoient, qui firent les 8 tonniaus pour leur devant monseigneur Symon, a ce temps cuisinier de Saint Denis, et vit que ledit cuisinier les rendi audiz marcheanz et donnerent les marcheanz desusdiz a lui qui parle et a ses compaignons qui avoient arrivé lesdiz vins, 5 s.p. pour leur vin.

Requis des presens a ces vins delivrer dit il qui parle, Henri Le Picart, Jehan Dynart, ledit cuisinier et pluseurs autres...

Requis du lieu ou ces vins furent delivrez dit devant la meson Guillaume de Saint Brice et devant la meson a la chambellane.

Requis se le seigneur et la dame de Clichy sorent onques ces esploiz de joustice, dit que riens n'en set...

... Dit ... que, a Noel nouvelement passé ot 2 anz, le cuisinier de Saint Denis conmanda a lui qui parle et touz les autres bateliers au port de Nully qu'il alassent acoster tout le merrien qu'il pourroient arrester qui venoit aval l'eau et qu'il l'arrivassent la ou il le pourroient arriver ; et il qui parle, Robert Doré et pluseurs autres arresterent le merrien dont contemps est et l'arriverent et le mistrent la ou il est mis...

... Dit qu'il croit ceus estre vrais. Par ce le croit que il a dit desus.

... Dit qu'il ne fu onques a resaisine qui en fust faite.

... Dit qu'il croit bien que toute la joustice de l'yaue et des rivages desusdiz dedenz les metes desusdites apartient ausdiz religieus. Par ce le croit que il a dit desus et par ce qu'il ne vit onques user du contraire, mes il dit qu'il n'en vit onques leitres...

... Dit ... qu'il est bien conmune renonmee aus lieus dont contemps est et environ...

... Dit ... qu'il est bien que l'arrest que le seigneur et la dame de Clichy ont fet faire sus le merrien dont contemps est, qu'il l'ont fet fere en troublant et en empeeschant la saisine desdiz religieus. Par ce le set qu'il a dit desus.

Collatio fit.