IRHT

Enquêtes menées sous les derniers capétiens

> Accord entre le roi et le prieur et le couvent de Beaumont-le-Roger

Archives nationales, JJ 50, n°128

Enquête

[1]

Quedam conventiones inter regem et priorem et conventum de Bellomonte Rogeri facte.

Ludovicus Dei gratia Francorum et Navarre rex. Notum facimus universis presentibus et futuris quod nos cum priore et conventu prioratus de Bellomonte Rogerii, Ordinis Sancti Benedicti, Ebroycensis dyocesis, ipsorum interveniente assensu, unanimi, fecimus permutationem subsequentem, facta si quidem primitus de mandato nostro relataque nobis informatione et estimatione de omnibus rebus permutandis hinc inde per dilectum et fidelem magistrum Ph. Conversi, archidiaconum Augi in ecclesia Rothomagensi, clericum nostrum, et P. de Hangesto, ballivum Rothomagensem super hoc deputatos a nobis, quibus fidem plenariam adhibemus, prefatis priori et conventui pro se et suis successoribus ac suo prioratu predicto ex causa permutationis et excambii legitimi concedimus, tradimus, cedimus et quittamus firmam de Drocicuria cum universis suis juribus et pertinenciis ubicumque et in quibuscumque rebus situentur, quam firmam in emphiteosim tenebat a nobis Guillelmus Chanterelli, burgensis Pontis Audomari, pro 220 l.tur. annui redditus.

Item firmam de Franquevilla super Brioniam cum suis juribus et pertinenciis universis que in emphiteosim tenebat a nobis Johannes de Fovea, filius Guillelmi de Fovea, pro 82 l. 4 s.tur. annui redditus.

Quibus firmis in unum collectis patet quod in singulis annis valent 302 l. 4 s.tur. reddituales quas, sicut prediximus, dictis priori et conventui tradimus et assignamus ab eis, suo et prioratus sui nomine in hereditatem perpetuam et, ut prefertur, libere possidentes ex nunc in ipsos priorem et conventum omne jus, actionem, proprietatem, possessionem et dominium, quas in dictis firmis et earum qualibet et ipsarum pertinenciis universis ubilibet situatis habebamus et petebamus aut debebamus habere plenariam transferentes, salvis et retentis nobis et successoribus nostris regibus Francie in ipsis alta justicia, superioritate et ressorto, gardaque ac juribus patronatum si qui ad nos pertineant ex eisdem et quicquid ad altam justiciam, superioritatem et ressortum gardamque pertinet seu potest aut debet quomodolibet pertinere.

Promittimus insuper dictis priori et conventui dictas firmas et earum quamlibet modo predicto erga omnes et contra omnes, libere garantizare et deffendere aut alibi excambiare, valore ad valorem, absque eo quod per nos aut alium contra hec in postinum (?) aliquatenus veniamus et absque eo quod nos seu nostri successores in futurum dicere seu reclamare possimus quod in permutatione hujusmodi fuerimus circumventi vel quod ipsa permutatio et estimatio rerum permutatarum hinc inde bene, sufficienter et legitime non sint facte.

Dicti vero prior et conventus nobis ex causa permutacionis et in excambium dictarum firmarum per nos eisdem traditarum nobis tradiderunt, cesserunt et perpetuo quittaverunt :

Primo molendinum de Oscen de dono cumitis pro 70 l.tur. redditualibus.

Item decimam foreste de Bellomonte Rogeri pro 180 l.tur. redditualibus.

Item decimam partem obventionum et emolumentorum denarii et oboli de prepositura, decimam molendini Richardi des Preaux, decimam piscariarum nostrarum et piscarias quas ipsi prior et conventus annuatim habebant in aquis nostris de Bellomonte Rogeri et decimam molendinorum nostrorum apud Bellum Montem predictum necnon feriam Sancti Leonardi, totum pro 60 [fol. 82] l.tur. annui redditus.

Item 25 s.tur. reddituales quod d. de Groulay dictis priori et conventui annuatim faciebat et debebat pro decima accensata boscorum suorum sitorum juxta dictam forestam.

Item 25 s.tur. reddituales quos eisdem priori et conventui debebat Johannes Malvoisin, d. de Sarquigneyo, pro decima accensata boscorum suorum juxta dictam forestam sitorum.

Item 10 s.tur. quos eisdem debebant annuatim homines de Barro pro parcatu.

Item 14 s.tur. reddituales quos Guill. de Boisserya debebat annuatim eisdem.

Item 30 s.tur. reddituales quas debebat eisdem priori et conventui Guill. Le Vigneeur pro factura vinearum.

Item 6 s.tur. quos debebat annuatim eisdem Guill. Barbon.

Item 33 l. et 4 s.tur. quos annuatim faciebamus eisdem priori et conventui per manus vicecomitum nostrorum Auribecci et Pontis Audomari in duobus Scacariis nostris Rothomagensibus pro minutis decimis.

Hiis autem redditibus nobis a dictis priore et conventui traditis in summa redactis singulis annis valent 348 l. 14 s.tur. de quibus ad ipsorum prioris et conventus instanciam duximus deducendos 100 s.tur. reddituales pro quodam prandio quod idem prior et conventus tenebantur et reddituali debito in suo prioratu predicto die festo Trinitatis Domini, annis singulis, ministrare preposito nostro de Bellomonte Rogerii suisque1 servientibus et clerico ac eciam servientibus dicte ville, necnon viridario dicte foreste atque forestario et servientibus ejusdem, insuper et forestario parci nostri juxta castrum, et pro fimo quem prepositus noster de Bellomonte vel alie gentes nostre super ipsos priorem et conventum singulis annis jure hereditario percipiebamus pro pratis ipsorum sitis subtus parcum et vinea subtus castrum et pro aqua Bave que currit per sua prata predicta.

Quibus deductis restant 284 l. 4 s.tur. reddituales nobis deductionem eorum que dictis priori et conventui sicut predicitur, tradidimus remanendi, deductione vero facta de hujus modi redditibus nobis per ipsos priorem et conventum traditis, ad firmas quas ipsis tradidimus, super habundanter de valore firmarum ipsarum 18 l.tur. reddituales dumtaxat quas super eisdem firmis specialiter retinemus nobis et successoribus nostris a dictis priore et conventu qui pro tempore fuerint in dicto prioratu singulis annis perpetuo, in duobus Scacariis Rothomagensibus equaliter persolvendas, salvis in premissis dictis priori et conventui ac suis successoribus in dicto prioratu remanentibus et retentis decima quam habent et habere consueverunt in domis nuncupatis Le Parc, in Bosco Guill. et in bosco de Barro, ac decima terrarum et novalium circonadjacencium foreste de Bellomonte quam annuatim habere consueverunt et capere ad garbam, necnon 18 sext. frumenti que ipsi prior et conventus soliti sunt percipere super molendinis nostris de Bellomonte singulis annis, ad mansuram ejusdem ville, videlicet super molendinis de Stangno, salvis eciam et sibi retentis usagiis et coustumis quas habent et habere consueverunt singulis annis in foresta predicta de Bello Monte Rogerii, secundum tenorem litterarum suarum super hiis a nostris predecessoribus obtentarum, et aliis omnibus suis possessionibus ubicumque permaneant superius non expressis, de quibus retentis et eisdem priori et conventui remanentibus nullum sit escambium, sed sibi et eorum successoribus salva et quieta remanent per eos pacifice possidenda.

Promissam igitur permutationem tanquam nobis acceptam decernentes perpetuo et irrevocabiliter valituram volumus et dictis priori et conventui concedimus per presentes ut ipsi suique successores firmasque predictas et possessores earum justiciare valeant prout nos et gentes nostre, dum firmas easdem tenebamus, hoc facere poteramus, quodque ipsi suo et dicti sui prioratus nomine firmas ipsas libere, quiete, pacifice et honorabiliter, sicut in principio hujus carte prescribitur, deinceps imperpetuum teneant, possideant et explectant absque coactione vendendi vel extra manum suam ponendi seu prestandi nobis aut successoribus nostris homagium, auxilium quoscumque seu gardiam, servicium aut aliquam financiam pro eisdem,

Quod ut perpetuo etc. Actum apud Vicennas anno Domini Mo CCCo quarto decimo, mense januarii. Per d. regem. Guido.

Notes

1 Ici Seno (?)

Comment citer cette notice

Elisabeth Lalou, Xavier Hélary. "Accord entre le roi et le prieur et le couvent de Beaumont-le-Roger (Archives nationales, JJ 50, n°128)", dans Enquêtes menées sous les derniers capétiens, Elisabeth Lalou, Christophe Jacobs, éds, Paris : Centre de ressources numériques TELMA, 2007. (Ædilis, Publications scientifiques, 4). [En ligne] http://www.cn-telma.fr/enquetes/enquete113/ .

Mentions légales | Colophon | Contacts | Haut de page