[1]

Confirmatio certi accordi inter regem ex una parte et preceptorem domorum Militie Templi de Capella et de Monte Ricoso ex altera facti.

Ph. Dei [gratia] Franc. rex. Notum facimus universis tam presentibus quam futuris nos quasdam litteras sigillatas sigillis Giraudi Flote, senescalli nostri Petragoricensis et magistri J. Anthonii, judicis nostri Caturcensis, prout prima facie apparebat, ea que sequntur inter cetera continentes :

Noverint universi quod, cum inter procuratorem serenissimi d.n. regis Franc. in senescallia Petragoricensi et Caturcensi agentem, ex parte una, et religiosos viros et preceptores domorum milicie Templi de Capella et de Monte Ricoso defendentes ex altera super jurisdictione, mero et mixto imperio, alta et bassa justicia et exercicio eorundem et cujuslibet premissorum in villa de Capella et ejus pertinenciis cum grangiis seu locis de Lomhaco et de Correlha et super exercicio predictorum in villa seu loco de Casnaco cum grangiis seu locis de Trenahis et cum pertinenciis suis et super exercicio predictorum in villa Montis Ricosi cum pertinenciis suis universis et in loco vocato de Lezinhaco, alias vocato Mayresi, questio seu debatum existeret, tandem frater Hato de Salvinigniaco, preceptor domorum militie Templi de Capella et de Casnasco et frater B. de Ruppe, preceptor domus militie Templi Montis Ricosi, Caturcensis dyoc., militi illustris regis Franc. ejusdemque senescallo Petragoricensi et Caturcensi, et Johanni Antonii, legum doctori, judici auctoritate regia Caturcensi, quasdam litteras regias obtulerunt quarum tenores inferius subsequntur :

Ph. Dei gratia Franc. rex dilectis senescallo Petragoricensi et Radulpho de Bruliaco militibus nostris salutem et dilectionem. Cum inter nos ex parte una et religiosos viros preceptorem et fratres domorum militie Templi in Provincia ex altera super quibusdam jurisdictionibus et rebus aliis infra fines ejusdem senescallie comprehensis questio seu debatum existat de quibus iidem religiosi volunt et offerunt amicabiliter convenire nobiscum, vobis committimus et mandamus quatenus, vocato procuratore nostro et aliis evocandis de jure quod in jurisdictione et rebus contentiosis predictis habemus et habere possumus vos cum diligentia informantes, necnon de valore, condicionibus et pertinenciis universis earundem, si dicti religiosi super compositione seu financia predictorum facienda nobiscum vos ad vel audeant, seu requirant ad compositionem seu financiam hujusmodi, voluntate nostra et assensu retentis, admittatis eosdem compositionem seu financiam quam cum ipsis vel eorum procuratori feceritis, nobisssub sigillis vestris quantocius transmisuri.

Datum Parisius XXVII^a die marcii, anno Domini millesimo ducentesimo nonagesimo sexto.

Ph. Dei gratia Franc. magistro Stephano Motelli, dilecto clerico nostro, salutem et dilectionem. In commisso pro Templo negotio dilecto militi nostro Radulpho de Bruliaco et senescallo Petragoricensi vos ex causa subrogantes, mandamus vobis quatenus in dicto negotio juxta formam commissionis dictis R. et senescallo tradite, vobisque tradende cum dicto senescallo prout justum fuerit procedatis. Actum Par. IIII^a die julii anno Domini millesimo ducentesimo nonagesimo septimo.

Ph. Dei gratia Franc. rex magistro Johanni Antonii, judici ordinario Caturcensi et clerico nostro, salutem et dilectionem. In commisso pro preceptore et fratribus domorum milicie Templi in Provincia negotio dilecto et fideli Radulpho de Brulhiaco, militi nostro, et senescallo Petragoricensi, loco cujus militis magistrum Stephanum Motelhi, quondam clericum nostrum subrogavimus, qui postmodum est viam universe carnis ingressus, vos ex causa tenore presencium subrogantes mandamus vobis quatenus in dicto negotio juxta tenorem commissionis dictis militi et senescallo tradite vobisque tradende cum dicto senescallo, prout justum fuerit procedatis. Actum [fol. 11] Parisius sabbato ante festum Cathedre Sancti Petri, anno Domini millesimo ducentesimo nonagesimo octavo.

Auctoritate quarum nos senescallus et judex predicti, occupati quibusdam arduis et inevitabilibus dicti d. n. regis, de jure quod d. n. rex habebat seu habere poterat seu debebat in jurisdictionibus, mero et mixto, imperio, altis et bassis justiciis, locorum predictorum et aliis contentis in litteris predictis regiis per dilectos et fideles nostros magistros Guillelmum Messini et Heliam La Faya, clericos d. n. regis et jurisperitos, fecimus cum diligentia inquiri veritatem. Quibus quod inquirendum et informandum de premissis et singulis premissorum et quoad testium receptionem et examinationem commisimus vices nostras, cumque examinato diligenter dicto negotio per commissarios supradictos, et visu situ dictarum villarum seu locorum et territoriorum predictorum et distrittuum eorundem et cujuslibet predictorum et facta super premissis informatione diligenti, vocato procuratore d. n. regis, dictaque informacione per nos visa, lecta et diligenter considerata, supplicarent nobis senescallo et judici predictis et commissariis in hac parte nobilis et religiosus vir dominus frater Guigo Ademarii, miles, preceptor domorum milicie Templi in Provincia una cum predictis preceptoribus se admitti ad financiam vel compositionem jurisdictionum predictarum et alte et basse justicie, secundum continentiam litterarum regiarum, super jure quod d. rex habebat vel habere poterat in eisdem si forte jus qualecumque habebat in eis. Demum, perhibitis multis tractatibus, cum dictus d. fr. Guigo et preceptores predicti assererent omnimodam jurisdictionem altam et bassam justiciam in predictis locis dictis Templariis pertinere debere et pertinuisse ab antiquo, dicto procuratore contrarium asserente, volentes amicabiliter componere super premissis, post multas altercationes finaliter obtulerunt pro jure quod d. rex habebat vel habere poterat in jurisdictionibus, alta et bassa justitia locorum predictorum seu villarum et pro confirmatione eorundem, 1000 l.t. parvorum, salvo quod per predictam oblationem nullum prejudicium generetur preceptoribus predictis nisi hec financia perveniat ad effectum et confirmatio regia subsequatur. Quam quidem oblationem nos senescallus et judex predicti, habito tractatu et deliberatione cum predictis magistris Guillelmo Messini et Helia La Faya, clericis d. n. regis, et magistro Guillelmo de Casteneto, consiliario nostro, et cum magistro Fulcone de Soyri, procuratore dicti d. n. regis in senescallia Petragoricensi et Caturcensi et aliis curialibus et officialibus curie nostre, et cum aliis multis probis viris et fidedignis, consideratoque quod dictus d. fr. Guigo et dicti preceptores intentionem suam et in pluribus fundaverant sufficienter tum per prescriptiones ad hec sufficientes, tum per donationes comitis Tholose, consideratisque omnibus aliis que movere nos poterant ad premissa, et inspecta et attenta utilitate d. n. regis Franc., et de voluntate et assensu dicti procuratoris predictam oblationem dictarum 1000 l.t. parvorum nomine dicti d. n. regis Franc. a[d]misimus et recepimus et dicto d. fr. Guigoni et dictis preceptoribus nomine dictarum domorum Templi suisque successoribus in futurum merum imperium et mixtum, omnes altas et bassas justicias, et omnimodas jurisdictiones, exercicium et explectas eorumdem et cujuslibet premissorum, libere et quiete in predictis villis, locis seu reperiis supranominatis et eorum quolibet et districtibus et finibus et pertinenciis eorumdem nomine dicti d. n. regis dimisimus, concessimus quantum nobis licet auctoritate commissionis predicte et perpetuo quittamus, retento tamen dicto d. n. regi in locis predictis et singulis eorundem quolibet ressorto jure superioritatis. Hanc autem compositionem, oblationem, transactionem seu financiam admisimus, voluntate et assensu d. n. regis Franc. retentis, juxta formam mandati regii si eam sibi placuerit confirmare.

Datum et actum in Montealbano Caturcensis dyoc. et sigillis nostris pendentibus sigillatum, anno Domini M^o CC^o nonagesimo nono, die martis ante festum beati Hylarii.

Nos vero compositionem ipsam, prout superius est expressa, ratam et gratam habentes, mediantibus 1000 l. parvorum tur. predictis nobis reddendis et solvendis Parisius ad terminos infrascriptos, videlicet infra festum Nativitatis beati Johannis Baptiste primo venturum 250 l.t., infra instans festum beati Andree apostoli 250 s.t., et infra subsequens immediate festum Nativitatis beati Johannis Baptiste 250 l.t., et infra tunc immediate sequens festum beati Andree apostoli 250 l.t., ipsam laudamus, volumus et approbamus et eidem compositioni ac dimissioni, concessioni et quitationi, transactioni seu financie et omnibus et singulis suprascriptis nostrum benigne prebemus assensum, salvo in ressorto et jure superioritatis in premissis jure nostro et in omnibus alieno. Quod ut firmum permaneat in futurum presentibus litteris nostrum fecimus apponi sigillum. Actum Pissiaci mense marcio, anno Domini M^o CC^o nonagesimo nono.

Facta est collatio per me J. de Claromonte.