Notum sit omnibus successoribus nostris quod Falco de Yconio, et filii et filiæ ejus, et Berardus et filii sui, Umbertus etiam, et Vuichardus, frater ejus, donaverunt Deo et Sancto Martino Saviniacensi, et abbati et monachis inibi degentibus, tam futuris quam præsentibus, capellam supradicti castelli, videlicet Yonii, cum omnibus appenditiis ejus: hoc est sicut Unfredus avus eorum melius et liberius possederat, et sicut Fulcherius Vulpeta melius et liberius habuerat eam ex ipso Unfredo. Et quid augmenti præfata capella post illum recepit, similiter donaverunt, et quidquid præfati monachi, tam in hac capella quam in cæteris ecclesiis quas iidem fratres eodem modo donaverunt Deo et Sancto Martino, acquisituri essent, similiter concesserunt, scilicet in ecclesia de Buxo et omnibus appenditiis ejus, et in ecclesia de Layniaco: quas eadem donatione et pactione supradicti fratres Deo et Sancto Martino et monachis Saviniacensibus in perpetuum contulerunt. Et hoc factum est secundum laudationem Artaldi , Forisiensis comitis, qui laudavit in vita sua, ut isti et alii qui alodium ejus in feodum francum tenebant, donarent Deo et Sancto Martino et sanctis, ad libitum suum, excepto quod ecclesia Layniacensis erat de alodio eorum, cum omnibus appenditiis suis. Item prædictus Falco donavit præfatis monachis in æternum, in silvis suis, ligna ad calefaciendum et ad sepiendum , et omnibus modis ædificandum, et ut liceret semper porcos eorum pasci et currere in eisdem silvis absque pasnatio. Similiter notificari volumus quod isti prænominati fratres fecerunt hoc donum Deo et Sancto Martino, et abbati Dalmacio , et monachis, in capitulo Saviniacensi, tractante hoc ipsum et multum insudante Rainardo, tunc temporis cancellario, qui hæc omnia per multas familiaritates et magnas collationes rerum sibi commissarum diu præparaverat, laudantibus et cartam corroborantibus subtitulatis omnibus. S. Vuillelmi comitis, filii Artaldi; Falconis et uxoris ejus; Berardi et uxoris ejus; Umberti; Vuichardi; Gausmari; Jarentonis; Hugonis; Theotgrini. Acta sunt hæc die solemnitatis sancti Nicolai, feria sexta et quinta, Henrico regnante, Gibuino Lugduni curam pastoralem exhibente, anno Domini millesimo septuagesimo nono, indictione secunda, epacta vigesima sexta. Quod si quis hanc cartam violare præsumpserit, perpetuo damnandus omni anathemati subjaceat. Scripta feria tertia, per manus Vuitberti cancellarii.

Laurent Ripart

cartulaire perdu (cartulaire)