Montpaon, in camera Guillelme, uxoris Gaillardi. Flandine et son fils donnent le fief, la viguerie et le bénéfice du mas Gaucelinenc.

In nomine Domini. Anno incarnationis Ejusdem M°CC°VIII°, ego Flandina, que quondam fui uxor Bernardi Gaucelini de Montepavone, et ego R. Gaucelmi, filius eorum, donamus et concedimus et nomine venditionis tradimus Domino Deo et monasterio Beate Marie Salvaniensis et tibi Geraldo, abbati, omnique ejusdem loci conventui presenti et futuro, totum quod habemus vel habere debemus in manso qui vocatur Gaucelinencs, qui est in territorio de Seihas, scilicet fevum, vicariam et beneficium. Hanc donationem et hanc venditionem facimus integre et fideliter ut jure perpetuo habeatis et possideatis in eternum, et nos et omnes nostros penitus exuimus et vos et omnes successores vestros plenarie investimus, et si homo vel femina contra hanc donationem vel venditionem venerit vel contrarius vobis in aliquo fuerit, erimus vobis adjutores et defensores ad rationem juditii. Pro hac donatione vel venditione dedistis nobis de caritate LX solidos Melgorienses ex quibus apud vos nichil remansit indebitum. Et notand[um] quod vos debetis nos recipere in spirituali beneficio domus vestre. Et ego Flandina et ego Raimundus, filius ejus, juramus tactis sacrosanctis evangeliis quod non veniemus contra hanc donationem sive venditionem neque homo vel femina nostro consilio vel ingenio, set firmiter et in pace faciemus vobis habere et tenere omnia suprascripta. Sciendum autem quod ego R. Gaucelini juravi quod faciam vobis hec omnia donare atque laudare N., uxori mee, et Gaucelino, filio meo, et aliis filiis meis similiter cum etatem habuerint faciendi laudationem. Factum est hoc in castro de Montepavone, in camera Guillelme, uxoris Gaillardi. Testes hujus rei sunt : R., prior Salvaniensis, in cujus manu hoc fuit factum, D. Parator et Philippus, monachi, Bego de Montepavone, B. Aldebert, G. d’Autinnac, Gaillartz, R. Calveira. Frater Petrus scripsit.

Rodez, AD Aveyron, H(006) 001, cartulaire de l’abbaye de Sylvanès (cartulaire)