Donation de tous leurs droits sur la paroisse de Cenomes par Déodat Macip, sa femme Ricarde et Adalais, fille de Ricarde.

DE DONO DEODATI MACIP Anno Dominice incarnationis M°C°LXXXX°, ego Deodatus Macips et ego Ricardis, uxor ejus, et ego Azalaicia, filia predicte Ricardis, nos omnes insimul per nos et per omnes nostros donamus et titulo perfecte venditionis tradimus Domino Deo et monasterio Beate Marie de Selvanesc et tibi Bernardo, abbati, omnique ejusdem loci et conventui presenti et futuro, totum quod habemus et habere debemus in tota parochia Sancti Amancii de Senomes sive sit feudum vel beneficium sive sit in alio aliquo quod nobis pertinere possit vel pertinere videatur. Hoc donum et hanc venditionem facimus bona fide et sine inganno, remota penitus omni fraude, ad melius quam dici vel intelligi ad utilitatem predicti monasterii potest, et promittimus per stipulationem quod non veniemus contra predictam venditionem neque aliqua persona nostro consilio vel ingenio, set eam vobis et posteris vestris in pace tenere et possidere faciemus, et hoc totum tactis sacrosanctis ev[an]geliis juramus ; et propter hoc dedistis nobis de caritate X solidos Melgorienses et I porcellum, ex quibus apud vos in debito nichil remansit. Hujus rei sunt testes : Ricardus Escofarius, Deodatus Noiriza et Raimundus, frater ejus, Guiraldus de Mairois, Bernardus de Terundo, capellanus, Deodatus da Malo. Petrus scripsit.

Rodez, AD Aveyron, H(006) 001, cartulaire de l’abbaye de Sylvanès (cartulaire)