Sylvanès, ante ostium ecclesie conversorum. Donation de droits sur les parras de Pardirgas par Raymond de Tournemire.

Notum sit omnibus hominibus quod ego Ramundus de Tornamira, bona fide et sine inganno, nec coactus sed spontanea mea voluntate, dono et laudo pro amore Dei et remissione peccatorum meorum et cum hac presenti carta in perpetuum possidendum trado Domino Deo et monasterio Beate Marie de Salvanesc et tibi Bernardo, abbati, et omnibus fratribus ejusdem loci presentibus et futuris, totum quod habeo vel habere debeo vel aliqua persona per me vel de me habet in omnibus parranis de Pardirgas, et hoc donum facio integre et fideliter sine aliqua retentione, ut melius dici, scribi vel intelligi ad vestrum bonum intellectum potest, et promitto per stipulationem me contra hoc donum nunquam venturum aliqua lege, ratione neque alia aliqua persona meo consilio vel ingenio, imo etiam omni juri et rationi, quod in omnibus predictis parranis michi competebat vel competere videbatur, renuncio et inde me et omnes meos exuo et vos et posteros vestros fideliter investio et totum hoc, [tactis] corporaliter sacrosanctis evangeliis, juro. Et vos dedistis michi de caritate XXX solidos de Raimundensibus, ex quibus penes vos nichil remansit in debito. Factum est hoc apud Salvanesc, ante ostium ecclesie conversorum, anno Dominice incarnationis M°C°LXXXVII°, mense julio, in presentia Bernardi, abbatis, Ugonis Astanova, Stephani de Raol, Guillelmi Manalas, Stephani de Biterris, Petri de Beirui, Guillelmi Amici, Guillelmi Bermundi, et fratris Petri qui hoc scripsit.

Rodez, AD Aveyron, H(006) 001, cartulaire de l’abbaye de Sylvanès (cartulaire)