Donation de nombreux droits par Roger, vicomte de Béziers, fils de Trencavel.

Ego Rogerius, Biterrensis vicecomes, fortissimi Trencavelli filius, pro remedio anime mee et parentum meorum, divine pietatis intuitu, concilio procerum nostrorum, Petri Begonis de Murantione, vicarii nostri, et Aimerici de Ponte et Petri Vassalli, conciliarii nostri, volens michi providere in futurum aliqua de nostre liberalitatis munificentia, vestris petitionibus aures inclinans, tibi Raimundo, abbati Salvaniensi, et vestris successoribus in perpetuum et ejusdem monasterii religioso conventui, pro gloriose virginis Dei genitricis Marie honore, conferre destinavi, et monasterium vestrum quasi hereditarium successorem in aliquantis rebus instituere proposui. Cedo quamprimis Domino Deo et gloriose virgini Marie et vobis et vestris substituendis in futurum libertatem ipsius monasterii Salvaniensis ut illud sive censu sive omni exactione absque inquietudine nostri et Palatinorum nostrorum liberum inconcusse teneatis et possideatis cum omnibus rebus et pertinenciis suis, quas usque in hodiernum diem acquisistis vel in futurum, Deo adjuvante, acquirere poteritis ; si qua vero secularis vel ecclesiastica persona de civitatibus, burgis, oppidis, villis, possessionibus nostris seu de aliorum terras incolentibus ad religionem monasterii vestri convolere voluerit, eat libere Deo servire parata, et ut nullam timeatis inquietudinem pro sua persona sive pro rebus quas secum tulerit, ab omni controversia quam nos vel nostri movere possemus vobis perpetuam et inconcussam securitatem concedimus ; si vero fundos seu aliquas possessiones ecclesiasticas sive seculares monasterium Salvaniense acquirere voluerit, si nobis aliquo jure fuerint obnoxia sicut nomine alodii, feudi, comende, alberge, sine metu periculi confidenter et sine omni nostri juris onere acquisita habeatis et quasi ibi nulla jura habuissemus, nullam de nobis seu de nostris controversiam timeatis. Si vero per civitates, burgos, oppida, villas, possessiones nostras vobis aliqua venalia seu utenda seu ducenda seu reducenda sive sint mobilia sive immobilia, ut uno verbo omnia concludamus, vehi, duci, emi, vendi vobis placuerit, nullam nomine ledde, vectigalis, tributi, usatici exactionem timeatis nec aliqua publicanis nostris vel nobis conferre debeatis ; usibus vero vestris seu peccorum vestrorum vel armentorum boscos, garitas, silvas, dumeta, aquas, fontes, rivos, lacus, stagna, montes, colles, valles, omnia videlicet inculta, ubicumque casus seu concilium se obtulerit, in omni ditione potestatis nostre vobis profutura ad explicitas concedimus, et monasterium Salvaniense cum omnibus grangiis et pertinenciis suis quas modo habet vel in futurum acquirere poterit ab omni inquietudine nostri nostrorumque liberatum in perpetuum confirmamus ; et ut rata hec omnia et illibata conserventur auctoritate sigilli nostri corroboravimus, et ne contra hec venire possimus super sancta quatuor evangelia juramento confirmavimus, et a vobis M et C solidos Melgoriensis monete pro caritate accepimus. Testes hujus rei sunt : Aimericus de Ponte, Petrus Begonis de Murantione, vicarius, Berengerius Bonifilius, Petrus Vassal, conciliarius, Guillermus Ninal [?], abbas, R. de Selvanesc et Ugo Astanova, monachus, et Bernardus de Promilhac et Guillermus Bernardi. Anno Dominice incarnationis M°C°LXXX°.

Rodez, AD Aveyron, H(006) 001, cartulaire de l’abbaye de Sylvanès (cartulaire)