Donum Sicardi et uxoris ejus Ingelsendis, de ecclesia S. Martialis et de quibus in vicaria Barrense.

Sacrosanctæ matri ecclesiæ S. Petri de Belloloco, quæ secus fluvium Dornoniam nomine sita est, cui Gairulfus abbas præesse dignoscitur. Nos in Dei nomine Sicardus et uxor mea Ingenseldis, pariter pertractantes casum humanæ fragilitatis et considerantes cœlestis patriæ mansionem, ut ante tribunal Christi veniam mereamur accipere, cedimus ibi altari S. Petri suisque servientibus, aliquid de nostris propriis rebus quæ sunt in territorio Lemozino, in vicaria Barinse, hoc est ecclesiam nostram quæ secus fluvium nomine Correziam ædificata et constructa est in honorem.S. Martialis, cum curte, et orto, et exitu et viridario, et cum ipsa baccalaria integra quæ ibidem pertinet. Et similiter cedimus sancto prædicto loco, in alio loco, in ipsa vicaria, in villa cujus vocabulum est Rofiniacum, illum mansum integrum ubi Bertemarus servus noster visus est manere, una cum ipso servo jam supradicto, et alium integrum mansum ubi Sicardus visus est manere, alium mansum ubi Guntarius visus est manere, et alium mansum integrum ubi Fedreus visus est manere et alius servus nomine Archambaldus. Hos mansos constructos, cum curtibus et ortis et exitibus, cum viridariis, cum campis, pratis, pascuis, adjacentiis, silvis, sepibus, cum exitibus et regressibus, viis, aquis aquarumve decursibus, cultos sive incultos, quæsitos vel quod acquirendum est, omnia et ex omnibus, quantumcumque ad ipsam ecclesiam, una cum ipsa baccalaria, et ad ipos mansos aspicit vel aspicere videtur, totum et ad integrum, in die præsenti ibidem cedimus, pro redemptione animæ meæ et pro remedio animæ germani mei nomine Adalgarii presbiteri, germanique nostri nomine Andriani, et pro redimenda anima genitoris nostri nomine Madalberti, et genitricis nostræ nomine Datile. Istas vero res jam supradictas S. Petro suisque servientibus ibidem cedimus, ut nobis plus Dominus, in die judicii, veniam retribuere dignetur, nisi tamen tantummodo, dum ego Sicardus vixero, usumfructuarium tenere faciam, et annis singulis ad luminaria S. Petri ibique Deo servientium, solidos decem exsolvere faciam, post autem meum dicessum, ipsæ res ad S. Petrum et ad suos servientes revertantur, et nullus abbas neque ullus rector de servientibus ipsas res S. Petri vendere vel alienare faciat, sed in servitio S. Petri remaneant ; quod forte si fecerint, ad proximum parentem meum res ipsæ revertantur, et ipsi decem solidi in octavia Nativitatis Domini, in missa scilicet Innocentium, exsolvantur. Et per hunc modum S. Petro ibidemque suis servientibus res jam supradictas tradimus, transferimus atque transfundimus, ut habere atque commutare liceat. Sane si quis aut nos ipsi, immutata voluntate nostra, aut ullus heredibus nostris, seu quælibet opposita vel immissa persona, contra S. Petrum vel suos servientes ire, agere vel ullam calumniam inferre conatus fuerit, inprimis iram Dei omnipotentis incurrat, et postea cum Juda traditore in inferno habeat mansionem, et insuper S. Petro vel suis servientibus auri libram unam aut solidos trecentos coactus exsolvat, et quod petit non vindicet, sed præsens ista concessio firma permaneat, et cum stipulatione subnixa omni tempore maneat inconvulsa. S. Sicardi. S. Ingelsendis. S. Adalgarii presbiteri qui hoc firmaverunt. S. Gariberni. S. Eldoardi. S.Donadei. S. Madrini. S. Serrafi. S. Anastasii. S. Sadulfi. Facta est concessio ista in mense novembrio, regnante Karlomando rege Francorum atque Aquitanorum.

Paris, BNF, n.a. lat. 493, cartulaire de l’abbaye Saint-Pierre de Beaulieu (cartulaire)