Les échevins de Douai pour Evain de Louvain béguine

<<</>>>

NuméroF13128

Genrecharte

Date (précise)22/01/1311

Authenticiténon suspecté

Languefrançais

Diocèse Arras



Auteur

Les échevins de Douai

Bénéficiaire

Evain de Louvain béguine, Marguerite dite Kaheis femme de Jean Du Four dit des Vignes, Jean et Marguerite leurs enfants

Regeste

Chirographe échevinal de la vente, par une veuve et ses trois enfants, à une béguine, d’une propriété bâtie avec jardin et vignes, le tout non hypothéqué.

Texte

(Au dos): C’est wers Evain de Leuwe, le beghine. Sacent tout cil ki sunt et ki avenir sunt ke Margherite ditte Kaheis, femme Jehan Dou Four dit des Vignes, ki fu, Sainte, Jehans et Emmelos, enfant celi Margherite, ont vendut et werpit à Evain de Leuwe, le beghine, leur maisons, les vignes, le gardin et tout le tenement ke il avoient, si com il dient, seant en le rue des Weis entre le tenement qui fu Robiert Le Blont, d’une part, et le tenement con dist dou Temple, d’autre part, et s’aboute par derriere à le rue des Bouloirres et au tenement qui fu Jehan Lacotin, tout ensi com ces maisons, les vignes, li gardins et tous li tenemens premiers nommeis sieent et s’estendent, wit et herbreghiet devant et derriere, entre les quatre cors et le moillon, à 51 s. de douysiens, à 20 capons et demi et à 115 s. de par. de rente par an sour toutes rentes, se tant doit. Et tout ensi com devant est dit, ont li ditte Margherite, Sainte, Jehans et Emmelos, si enfant, les maisons etc..., devant dis werpit et enconvent à aquiter à le ditte Evain de Leuwe, cascuns pour le tout, juskes au dit des eschevins. Et si ont enconvent li ditte Margherite, Sainte etc..., à le ditte Evain u à celui qui le dit tenement tenra, sour eaus et sour le leur, partout ù qu’il l’aient, et cascuns pour le tout, ke dedens les XL jours apres çou ke Jehane, fille celi Margherite, ara sen eage, ke il li feront werpir et avoir enconvent à aquiter les dittes maisons etc..., en le maniere com il l’ont chi-devant werpit à le ditte Evain u à celui qui celui tenement tenra. Et si ont connut Margherite etc..., ke il n’a sour les maisons etc..., about, convenence ne assenement par eschevinage, autre que cestui vendage et werp. Et si ont connut li ditte Margherite etc... qu’il ont eut et recheut de le ditte Evain tous les deniers dou pris de cestui vendage, boins et loiaus et bien conteis, et bien s’en tienent apaiiet et en quitent celi Evain et tout sen remanant. Tout chou fu fait en le halle, par devant eschevins Jehans Pourres et Amans de Gant. En l’an de grasce M. CCC et X, XXII jours el mois de jenvier.

Bibliographie

ESPINAS (Georges), La vie urbaine de Douai au Moyen-âge, t. IV, pièces justificatives. XIVe siècles, n° 925, p. 63-64.

Responsable

Benoit Tock

Source de l'édition

Douai, AM, FF 669 (original)

Comment citer cette notice

Acte n°213765 dans Chartae Galliae. Edition électronique: Institut de Recherche et d'Histoire des Textes, 2014. (Telma). [En ligne]http://www.cn-telma.fr/chartae-galliae/charte213765/. Date de mise à jour : 09/08/12. Première version : 10 juin 2010.