Jean d'Arkenne pour Chevaliers du Temple de Flandre

<<</>>>

NuméroF05594

Genrecharte

Date (précise)18/09/1271

Authenticiténon suspecté

Languefrançais



Auteur

Jean d'Arkenne

Bénéficiaire

Chevaliers du Temple de Flandre

Regeste

Jehan d'Arkenne, vend aux chevaliers du Temple, pour la somme de 283 livres, tous ses alleus de Landas .

Texte

Jou Jehans d'Arkenne, chevaliers et mères de Ha, fach à savoir à tous cheaus qui ceste lettre verront et orront, que je ai vendut à maistre et as frères de le chevalerie du Temple en Flandres tous mes alleus de Landast, liquel alleus gisent en le chastèlerie de Lille, de Douay et d'Orchies, XIIIxx livres de la monoie de Flandres et III livres, de laquel je me tieng bien apaiet en boine monoie secke ke je ai rechiut et en boines denrées; et de ches alleus est li maistres et li frères aïretés bien et par loy desous le franel à Landast, par-devant le singneur de Landast et v des alloiers ki là furent, ki jugèrent par le soumonse dou singneur, par le foi que il devoient Dieu et le singneur de Landast, que je en sui bien désiretés et par loi, et ke li maistres et li frère devant dit en sont bien aïretet et par loi, ne ke jamais nus hons ne puet ches alleus réclamer par proïmetet, ensi que li alloier l'ont jugiet par droit; et jou Jehans devant dis ai fianchié ma foi et juret ke je ne querrai jamais art n'engien, matère n'okoison, ne autres de par moy, de coi li Temples soit grevés ne ait damaige. A ches lettres faire fu madame Maroie, ma feme, et madame Helvis, ma suer, et Jehans Dupus et Cholars, ses frères, bourgois de Tournay, ki mainent en le parroche Saint-Jakème, et Mikiel de le Porte, de Ha, et Robiers de Tamines, mes cousins, et Gérars Li Blons, de le parroche de Genec, et frère Libers, commandères de Corbris, et frères Jehans, commandères de Saint-Liggier, et frères Gautier, commandères de Flandres, et frères Robiers, commandères de le Haie, et mout d'autres gens en non de tiesmoignage. Ches lettres furent faites à le maison dou Temple à Tournay, en l'an del Incarnation Nostre-Signeur Jhésu-Crist mil deus cens LXXI, le venredi apriès le procession de Tournay, et pour che que cheste lettre soit ferme et estable, nos i avons mis nostre saiel en tiesmoingnage de véritet.

Bibliographie

HAUTCOEUR (E), Cartulaire de l'abbaye de Flines (1200-1630), t.1, Lille-Bruxelles, 1873, n°CLXXVIII, p. 190

Responsable

Benoit Tock

Source de l'édition

Lille, AD Nord, 31 H 100 (Cartulaire B de l'abbaye de Flines), fol. 121v° (cartulaire)

Comment citer cette notice

Acte n°206231 dans Chartae Galliae. Edition électronique: Institut de Recherche et d'Histoire des Textes, 2014. (Telma). [En ligne]http://www.cn-telma.fr/chartae-galliae/charte206231/. Date de mise à jour : 16/09/11. Première version : 10 juin 2010.