Les échevins de Guînes, avoués de la maladrerie de Spellèques, reconnaissent que cette maison doit à Huon Bollard, bourgeois de Saint-Omer, une redevance annuelle de sept busteaux de froment, pour une terre récemment achetée à Chrétienne, fille de Henri d'Hogtinghem, suivant la teneur d'un contrat dont ils enregistrent les principales conditions.

Nos, eskevin de Ghines, avoei de le maison as malades lepreus de Spellekes, faisons savoir à tous chaus qui cheste presente chartre verront et orront, ke le devant dite maisons des malades lepreus de Spellekes doit à Huon Bollard, borghois de Saint Omer, VII bustel de froment de rente par an, à le mesure de Ghines, de trois mesures et demie de terre, ki gist d'encoste de le maison as malades devant dis, atenant le voie ki maine à Rodelinghem; laquile terre le devant dite maison as malades acata bien et loialement, et par droit pris, contre Christiene, fille Henri de Hogtinghem, par sa grant povertei, provei à loi et jugié; laquile terre li devant dite Cristiene tint de Huon Bollard devant nomei. Si est à savoir ke le devant dite Cristiene guerpi chele terre à loi, et clama quite a oes le maison des malades devant dis; et le devant dite maison as malades rechut cele terre de Huon Bollard devant nomei, à loi, à tenir à tous jors mais, quite et delivre en bien et en pais de li et de ses hoirs, par VII bustel de froment de rente par an, et par le relief, sauve les droitures au devant dit Huon et le contei de le terre sans autre extorse, ne autre costume paier. Si est à savoir ke le devant dite maisons doit relever cheste terre à le mort Baudewin de Libringhem, li queus fu maistres de le maison quant la terre fu acateie; et après le mort cheli Baudewin, le relevera le devant dite maison à le mort cheli qui primes sera coisi à maistre de le maison après, et ensi de maistre à maistre, à tous jors mais. En reconisanche de laquil chose nos avon mis no seel à cheste presente chartre, à le requeste du maistre et des freires de le maison des malades sovent nomeis, pour che ke le devant dite maison n'eut point de seel. Laquile chartre fu faite en l'an de l'incarnation Dieu nostre Segneur M. CC. et LVII, el mois de decembre.

Benoit Tock

Paris, BNF, coll. Moreau, t. CLXXIX, p. 198 (copie d'érudit)