« actes-philippe3-145 »

Pro complendo testamento regis Theobaldi.

<Philippus>, Dei gratia Francie rex, gubernatori regni Navarre, salutem. Sollicite sumus requisiti quod redditus usque ad nonaginta unam libras in pedagiis et aliis certis redditibus regni Navarre solvi in perpetuum deputatas in testamento clare memorie Th Theobaldi , ejusdem regni quondam regis, faceremus integraliter assideri pro capellaniis perpetuis et anniversaris faciendis secundum ordinationem testamenti predicti ; rursus quod secundum ordinationem eandem remiti in perpetuum mandaremus penam peccuniariam que levari solet pro omicidio casuali; ceterum quoniam premissa in temporis regis Henrrici, successoris dicti Th Theobaldi minime completa fuerunt, sed qua de causa penitus ignoramus, advertentes quod regnum predictum in custodia dumtaxat habemus, et quod Johanna, ipsius regni heres, constituta est in etate minori; mandamus vobis quatinus, cunctis que circa hec fuerint attendenda cum diligenti deliberatione pensatis, communicato bonorum consilio, faciatis super premissis illud quod secundum foros et consuetudines regni Navarre juste et rationabiliter fuerit faciendum ; et si qua emerserint dubia, que por vos commode compleri non possint, nobis ea celeriter intimare curetis, ut si quod provisum fuerit consilio pleniori securius ad optatum perducatur efectum. Actum apud Vallem redolii in festo inventionis Sancti Stephani, anno Domini .M.^o CC.^o LXXmo. octauo.