Centule I^er, comte de Bigorre, donne à Saint-Victor de Marseille le monastère Saint-Savin[de Lavedan], situé dans le diocèse de Tarbes, dans le comté de Bigorre.

l.1 (CHRISMON ou CRUX) In nomine sancte et individue [Trinitatis]. Ego Centullus comes et uxor mea Beatrix, et mater ejus Stepha[nia, pro remedio] animarum nostrarum et parentum [nostrorum, monasterium] Sancti Savini, abbatis et confessoris, in valle Levitanensi situm, [in episcopatu] Tarbensi, in comitatu Bigorritano, [a monastica religione jam pene] lapsum, omnipotenti Deo et beate virgini Marie et sancto Victori Massiliensi martiri, et abbati Ricardo et successoribus ejus, [monachis] quoque Massiliensibus, presentibus et futuris, donamus, concedimus atque relinquimus in perpetuum habendum; tali tenore ut abbates Massilienses [abbatem] in predicto monasterio constituant benedicendum, secundum regulam sancti Benedicti et consuetudinem monasterii Massiliensis, [et monachos] male viventes et inobedientes inde auferant, et [bonos mittant] qui monasterium ordinent secundum consuetudines Ma[ssiliensis monaster]ii. Quod si abbas Sancti Savini contra regulam sancti Benedicti [et consuetudines] Massiliensis monasterii vixerit, et comes [et episcopus hoc tercio] abbati Massiliensi, per fideles et certos nuncios, notificaverint, [et securi]tatem et potestatem [corrigendi illum in tota terra sua dederint, et] abbatem ad obediendum constrinxerint et ipse neglexerit, [habeant potestatem] comes et episcopus Bigorritanensis corrigendi abbatem, secundum regulam sancti Benedicti. Donamus igitur ab integro Massiliensi [monasterio] et ibi Deo servientibus quicquid in predicto monasterio [Bigorritanenses co]mites actenus habuerunt vel visi sunt habere, preter eam legem quam de proclamationibus et sedicionibus secularium hominum in monasterio [Sancti Licerii] et in aliis Bigorre monasteriis habet, salva tamen auc[toritate] Tarbensis ecclesie. Jussu ergo et consilio Pontii, Tarbensis episcopi, facta est hec carta sive hujus monasterii adquisitio anno ab incarnato Dei filio millesimo octuagesimo, [kalendis aprilis]. Et ut hoc donum firmum et stabile in perpetuum maneat, ego [comes Cen]tullus, sine [omni malo] ingenio et retinemento, [hanc cartam] manu mea firmo, et uxori mee Beatrici, et matri ejus Stephanie, et principibus meis firmare precipio. Signum [Bernardi episcopi]. Signum Odonis abbatis. Signa sanctionis, Virgilii, Benedicti, Garsie, ejusdem loci monachorum. Signa Ogerii [vicecomitis, Tubaldi, St]ephani, Arsenii. Signa Dodonis Benacensis, Guillem Arramon, [de Ossu]; Arnalt Guillem, de Barbaza; [Guilemez de Baregda]. Signa Bernardi de Castello Baiac, et Arnalt Guil[lem de Angulis].